OŌYƐBƐ̄CƐ 39

É le aɔ́dōwīyē kú ācogwɛ́ɛya ā kpó gɔ́

1É bī owú odufā, owú ɔgalúlā mɛ́mla owú nɔwā le aɔ́dōwīyē ohéyīfuú nɛ̄hi gɔ́ lɛ ācogwɛ́ɛya, ɛ̄nɛ̄ é géē lɛ wiiyē eko nēé gē yúklɔ́ ɛga otīihɔ ā. É le aɔ́dōwīyē gɔ́ lɛ Árɔ̄ni mɛ́mla ayí nū ɛ́gɛ́nɛ̄ Óndú ā cābɔ̄ lɛ Umósīsi lɛ ā.

2É bī owú odufā, owú ɔgalúlā, owú nɔwā, īlī nɛ̄hɛ́ olɔɔlɔhi mɛ́mla owú ugóolu (oje ɔdɔ) le ɛ́fɔ̄du o wiiyē kla awulú ā gɔ́. 3É bī omútāgā le ugóolu (oje ɔdɔ) ca plɛ́kɛ́tɛ́ɛ́, anɔ́ɔ é le ɔ́ hɛ́ fíílí-fíílí kéē bī ɔ̄ le tá tū ipú owú odufā, owú ɔgalúlā mɛ́mla owú nɔ̄wá mɛ́mla ipú īlī olɔhi nɛ̄hi ā. 4É le ɔ́ŋgbá ácá ɛpa gɔ́ kwu ɛ́fɔ̄du ā, anɔ́ɔ é kwú uwā ú kpó kwu aáklō kú nū cɛ́ɛ́ kóō playi anú glá. 5É le ɔdōgbɛ̄ɛ́nyɔ́ nēé bī aɔ́dā ɛdɔ ékpó le yá uwā gɔ́ kwu ɛ́fɔ̄du, cɛ́ɛ́ kóō kwú pīya ɔdā ékpó mla anú, ɛ́gɛ́nɛ̄ Óndú ā da Umósīsi lɛ ā. 6É le ɛcɔ̄ nēé hī ukanéliyan gbā, anɔ́ɔ é le uwá kpó kwu ɔkwu kú ugóolu (oje ɔdɔ). É gbeyī cíí le iyē kú ayí kú Ísrɛ̄lu ɛ́gɛ́nɛ̄ ɔgba kú oōma kú uwā lɛ ā tá tū ɔ̄. 7É kwú uwā ú kpó kwu ɔ́ŋgbá ácábɔ̄ kú ɛ́fɔ̄du kéē bī lɛ blakwu áipɔ́ɔmā igwɛ́ɛpa kú Ísrɛ̄lu, ɛ́gɛ́nɛ̄ Óndú ā da Úmósīsi ā.

É le ɛkpa o bɔ́tū yá

(Oyɛb 28.15-30)

8É bī aɔ́dā éékpó ɔ́ɔmā le ɛkpa o bɔ́tū ā wu klla le ijā he tū ɔ̄ bɛ̄ɛka ákú ɛ́fɔ̄du ā. 9Ó lɛ ɔ́kíkā ɛnɛ, klla wɛ oōcēbá ɛpa. Olīkpō kú nū wɛ ayíkábɔ̄ ɛtá, olɔwá kú nū wɛ ayíkābɔ̄ ɛtá dúú. 10É le ɛcɔ̄ ōgbɔɔ́lá nɛ̄hi kpó kwu ɔ́ ɔgba ɛnɛ. Ɛcɔ̄ kú ɔgba kú aflɛ́yí ā wɛ Usádiyɔ̄si, Utɔ́pāsi mɛ́mla Ukábɔ̄nku. 11Ɛcɔ̄ kú ɔgba ɔ́mpa ā wɛ ɛ́mɛ̄rādi, usáfāya mɛ́mla udáyímɔ̄ndi. 12Ɛcɔ̄ kú ɔgba ɔ́mɛɛtá ā wɛ, Ujásínti, ágēti éyi, mɛ́mla ametíyīsti. 13Ɛcɔ̄ kú ɔgba ɔ́mɛɛnɛ ā wɛ, Ubɛríli, ukáneliyan mɛ́mla ujáspa. É le uwá kpó kwu ɔkwu kú ugóolu (oje ɔdɔ). 14É le iyē kú ayínɔ̄nyīlɔ éyééye kú Ujékɔ̄pu ā tá tū ɛcɔ̄ éyééye igwɛ́ɛpa ā, ó yá ɛ́ɛ́ kóō kwɛyí aípɔ́ɔmā igwɛ́ɛpa kú Ísrɛ̄lu mɛ́mla iyē kú ayí kú Ísrɛ̄lu. 15É le agbá kú ugóolu (oje ɔdɔ) abɔ̄yí nū nēé jíla bɛ̄ɛka ɔ́ŋgbá kóō bī ɛkpa o bɔ́tū ā playi ɛ́fɔ̄du ā. 16É lɛ ɔkwu ɛpa kú ugóolu (oje ɔdɔ) yá, mɛ́mla eliká kú ugóolu (oje ɔdɔ) ɛpa, anɔ́ɔ é kwú uwā ú kpó playi ɔ́kíka ɛpa kú ɛhícō kú ɛkpa o bɔ́tū ā. 17É kwú ɔ́ŋgbá kú ugóolu (oje ɔdɔ) ɛpa ā ú flá tū eliká ɛpa ā, 18anɔ́ɔ é kwú ɛyí ɛpa ɔhá kú agbá ā í gbō tū ɔkwu ɛpa ā, anɔ́ɔ é bī ɔwɛ nyā kwú uwā ú kpó kwu iyɔ̄bū ɔ́ŋgbá ácá kú ɛ́fɔ̄du ā. 19É le eliká kú ugóolu (oje ɔdɔ) ɛpa yá, kwu uwā ú kpó kwu ɛháajɛ kú ɔ́kíka ɛkpa o bɔ́tū ā, okónōgwu eyīpú nōo gboce ɛ́fɔ̄du ā. 20É le eliká kú ugóolu (oje ɔdɔ) ɛpa ɔhá yá, anɔ́ɔ é kwú uwā ú kwu ɛháajɛ kú iyɔ̄bū kú ɔ́ŋgbá acá ɛpa kú ɛ́fɔ̄du ā. Ó kwu ɛga nēé gɔ́ īlī ɛpa kwɔhá ā, nōo yɔ̄ icō kú ɔdōkwɛ́nyɔ́ nēé tá lɔɔlɔhi ā. 21Ɛ́gɛ́nɛ̄ Óndú ā da Umósīsi lɛ ā, é bī ɔ́ŋgbá owú odufā le eliká kú ɛkpa o bɔ́tū ā flá tū eliká kú ɛ́fɔ̄du ā, cɛ́ɛ́ kú ɛkpa o bɔ́tū ā kóō ce ɔdōkwɛ́nyɔ́ ā icō kóō híī je wī ŋ́.

É le aɔ́dōwiyē kú ɔ̄cogwɛ́ɛya o hile ā gɔ́

(Oyɛb 28.31-43)

22Owú odufā nēé le tá odúúdú awulú nōo yɔ̄ ɛháajɛ ɛ́fɔ̄du ā á. 23É le ɔkɔ kú nū ā wu lɔfúlɔfú mla owú, o yá ɛ́ɛ́ kóō híi je híla ŋ́. 24É bī owú odufā, owú ɔgalúlā mɛ́mla owú nɔwā lɛ hijā kú īkpō ɔcí kú upomégránēeti tū okónōgwu kú nū. 25É klla le áma kú ugóolu (oje ɔdɔ) abāābɔ̄yīnū yá playi ɛplá ijā kú ɔcí nēé hī ka upomégrānete nēé he tū ɔ̄ biílí jīla tá ā. 26Áma éyééye playi ɛplá upomégrānete éyééye yɛ awulú ā jīlatá biílí kú eko o yúklɔ́. Ɛ́gɛ́nɛ̄ Óndú ā da Umósīsi lɛ ā.

27É le ukafután ā gɔ́ lɛ Árɔ̄ni mɛ́mla ayínɔ̄nyīlɔ kú ɔlɛ́ nū. 28É klla le ɔláwoni mɛ́mla ɔdokwɛyí, ikakí kú īlī nɛ̄hɛ́ gɔ́, 29mɛ́mla īlī o gbɛ̄ɛ́nyɔ́ kú īlī nɛ̄hɛ́ o lɔɔlɔhi nēé bī owú odufā, ɔgalúlā, mɛ́mla owú nɔ̄wá wu ā. É klla bī inyilá le ijā he tū ɔ̄, ɛ́gɛ́nɛ̄ Óndú ā ka lɛ Umósīsi lɛ ā.

30É lɛ oje otīihɔ o bá odée nēé tɔ́kpá tū ɔ̄ kahíníī, “É kwú ɔ̄ ú lɛ Óndú ā” yá ŋmá ugóolu (oje ɔdɔ) abɔ̄yīnū. 31É bī owú odufā lɛ ɔ́ gbō bá ɛhíícō kú ɔláwonī ā, ɛ́gɛ́nɛ̄ Óndú ā da Umósīsi lɛ ā.

É le úklɔ́ ā ŋmɛ́yí

(Oyɛb 35.10-19)

32Odúúdú úklɔ́ kú ō gwó kú Áklɔ̄kpīihɔ ā gaá kwú ŋmɛ́yí. Ācɛ Ísrɛ̄lu lɛ ɔdā dóódu ā yá ɛ́gɛ́nɛ̄ Óndú ā cābɔ̄ lɛ Umósīsi lɛ ā. 33É le Áklɔ̄kpīihɔ ā mɛ́mla odúúdú aíyó kú nū, aágá kú nū, aɔ́kpá kú nū, aógbló ō tōkónu ɔlɛ́ kú nū, aɔ́kpa kú nū mɛ́mla aígbóoje-otáajɛ kú nū. 34Ɔdōklá anú kú ɔkpá omlede nēé le ɔ́ tɛ̄ɛ̄tū nɔ̄wá, mɛ́mla ákú ɔkpɛ́bɛ́ ɔhá olɔɔlɔhi mɛ́mla ukɔ́tin, 35Ikpati kú okónu ōce kú óndú nɛ̄ usiléti kú ɛcɔ̄ nēé tá íne tū ɔ̄ ā, aógbló mɛ́mla ɔ̄wū ikpati ā, 36utébulu mɛ́mla odúúdú iyó kú nū, mɛ́mla igbō nēé je lɛ Ɔwɔicō ā, 37Ɔdā ō le agege ce ɔ́ kú ugóolu (oje ɔdɔ) ā, agege kú nū, odúúdú iyo kú nū mɛ́mla anɔ̄ kú agege ā. 38Ede kú ugóolu (oje ɔdɔ) ā, anɔ̄ ōtīihɔ, ɔtulalī umuumu ōkpóocu ā mɛ́mla ukɔ́tin o klá ɔwɛ kú Áklɔ̄kpīihɔ ā. 39Ede kú ugóolu (oje ɔdɔ) ā mɛ́mla ɔdā nēé pla oje udɔ wúlá wúlá tū ipú nū ā, ogbló mɛ́mla aíyó kú nū, ɔgbanjɛ o bī lɛ na abɔ̄ mɛ́mla ɛga ō háyi kú nū. 40Ukɔ́tin kú igá kú ede ā mɛ́mla aógbló kú nū mɛ́mla aígbóoje-otáajɛ kú uwā. Aúkɔ́tin kú okómpinu eyīpú ā mɛ́mla aɔ́ŋgbá kú uwā, aɔ́dōpiyɔ́ŋgbá kwajɛ kú Áklɔ̄kpīihɔ ā mɛ́mla odúúdú aíyó nēé géē bī le yúklɔ́ ipú Áklɔ̄kpīihɔ ā. 41Úwé olɔhi nɛ̄hi nɛ̄ āccogwɛ́ɛya géē le wiyē, kéē yúklɔ́ ɛga otīihɔ ā. Īlī otīihɔ kú ɔ̄cogwɛ́ɛya, Árɔ̄ni mɛ́mla ákú ayí nū nɔ̄nyīlɔ o yúklɔ́ kú ɔ̄cogwɛ́ɛya ā. 42Ācɛ kú Ísrɛ̄lu ā le odúúdú úklɔ́ ā kpó yá ɛ́gɛ́nɛ̄ Óndú ā cābɔ̄ lɛ Umósīsi lɛ ā. 43Umósīsi le úklɔ́ ā jila, anɔ́ɔ ó le má ka ɛ́ɛ le ɔ́ yá ɛ́gɛ́nɛ̄ Óndú cābɔ̄ lɛ ɔ́ lɛ ā. Anɔ́ɔ Umósīsi le ɔhá hɛ́ ce uwá á.

Currently Selected:

OŌYƐBƐ̄CƐ 39: IFBCL

Highlight

Copy

Compare