OŌYƐBƐ̄CƐ 36

1Ubɛsálilu, Oholíyābu mɛ́mla odúúdú ācɛ nɛ̄ Óndú ā je ɔfú mɛ́mla ɔdōōjé lɛ uwá ā, ācɛ nōo jé ō yá ɛjɛ̄ɛ̄jī ɔdā dóódu nēe cɛgbá kéē le gwó Áklɔ̄kpīihɔ ā, géē yá uwā ɛ́gɛ́nɛ̄ Óndú ā cābɔ̄ lɛ uwā ā.

Ācɛ ā bī ɛhi alɛwa wā

2Anɔ́ɔ Umósīsi lɛ Ubɛsálilu, Oholíyābu mɛ́mla odúúdú ācɛ dóódu nēé kpó ɔfú lɛ uwá, nēe tútū kéē tábɔ̄ ā kpó hīgwú. Anɔ́ɔ Umósīsi da uwá kéē gbo úklɔ́ ā. 3É mīyɛ odúúdú ɔdā ɛ̄gbā nɛ̄ ācɛ kú Ísrɛ̄lu kpó wā kéē lɛ gwó Áklɔ̄kpīihɔ ā ŋmá ɛgiyí Umósīsi. Amáŋ ācɛ kú Ísrɛ̄lu yɔ̄ gē kpó ɔdā ɛ̄gbā kú uwā wā ɔ̄cɔ̄ɔ̄cī dóódu kpɔ́. 4Anɔ́ɔ odúúdú ācɛ nēe bá yɔ̄ gē yúklɔ́ kú Áklɔ̄kpīihɔ nyā le pɛ́ tá ɛgiyí Umósīsi. 5Anɔ́ɔ é da Umósīsi kahíníī, “Ācɛ ā bá ī kpó iyó kú úklɔ́ ā wā fíyɛ́ ɛ̄nɛ̄ o cɛgbá ō bī yúklɔ́, nɛ̄ Óndú ā da alɔ ka ālɔ̄ yá ā ɛɛ́.”

6Anɔ́ɔ Umósīsi le ɔna tá ga ɛga dóódu nɛ̄ ācɛ ā bá ā kahíníī, “Ɔ̄cɛ dúúmā kóō bī ɔdā dúú wā ohígbū ō gwó kú Áklɔ̄kpīihɔ ā ɛ́ɛ́ gɛ ŋ́.” Anɔ́ɔ ācɛ ā í bī ɛ̄gbā ɔhá wā gɛ ŋ́ má. 7Ohígbū ka iyó kú úklɔ́ nēé kpó wā ā, le cabá ō bī le yá ɛjɛ̄ɛ̄jī úklɔ́ kú Áklɔ̄kpīihɔ ā.

É gbɔɔ́ ō gwó Áklɔ̄kpīihɔ ā

8Ācɛ nēe jééyī kú úklɔ́ ímlɛ́ fíyɛ́ dúú ā, le Áklɔ̄kpīihɔ kú ɛga nɛ̄ Óndú ā yɔ̄ ā gwó. É yá ɔ̄ ŋmá ohí kú īlī nɛ̄hɛ́ igwó nēé wu tɔ̄há mla owú odufā, owú ɔgalúlā, klla lɛ ijā he tū ɔ̄ mla ifotó kú Ucérūbim. 9Ohí éyééye kú odúúdú īlī ā jōnjīlɛ, olīkpō kú nū wɛ ekābɔ̄ igwɛ́ɛpa, olɔwá kú nū wɛ ekābɔ̄ igwɛ́ɛpa dúú. 10É le ohí ɛhɔ̄ kú īlī ā gɔ́ kwɔhá kóō le pīya ígwu éékpó, ɔdā éékpó ɔ́ɔmā nēé yá mla ohí ɛhɔ̄ o hile ā dúú á. 11É le ɔ́ŋgbá kú owú odufā otíkōtō gɔ́ tū okónōgwu ikpó kú nū eyɛ̄cɛ mla eyīpú. 12É le íkōtō ofɛpa ce igwó gɔ́ kwu ohí aflɛ́yí kú ígwu aflɛ́yí kú īlī ā, mɛ́mla íkōtō ofɛpa ce igwó nēe jɔ̄njīlɛ̄ mla ohí ámōōmɛ kú ígwu ɔ́mpa ā. 13É lɛ uwɔ kú ugóolu (oje ɔdɔ) ofɛpa ce igwó yá, nēé géē bī le kwú āyā kú īlī éyi bɔ́há.

14É bī ɔnwū kú ɛwū le ohí kú īlī igwóléyi ā tá, kóō lɛ pīya īlī ō lɛ klá Áklɔ̄kpīihɔ ā. 15É tá odúúdú īlī ā jōnjīlɛ̄, olīkpō kú nū wɛ ekābɔ̄ igwɛ́ɛtá, olɔwá kú nū wɛ ekābɔ̄ ɛpa. 16É le ohí ɛhɔ̄ kú īlī ā gɔ́ kwɔhá kóō kwú pīya ígwu éyi, é klla le ɛhīlī kú nū gɔ́ kwɔhá kóō kwú pīya ígwu ɔhá. 17É le íkōtō kú owú odufā ɔfɛpa ce igwó tá playi éyi, é kē le ofɛpa ce igwó ɔhá tá playi ɔhá. 18É lɛ uwɔ ofɛpa ce igwó kú ugóolu (oje ɔdɔ) yá kóō lɛ īlī ā kwú bɔ́há kéē wɛ ékpónú. 19É klla le ɔdā ō klá ede ɛpa ɔhá yá kpɔ́, é yá éyi ŋmá ɔkpá omlede otɛ̄ɛ̄tū nɔwá, ɔhá ŋmá ɔkpá kú ɛbɛ olɔhi nɛ̄hi ā nē é géē lɛ ɔ́ klá eyīyɛ̄cɛ kú Áklɔ̄kpīihɔ ā.

20É le ɔ́kpa kú ɔcí kú akésiya gbā lɛ Áklɔ̄kpīihɔ ā. 21Olicō kú ɔ́kpa dóódu wɛ ekābɔ̄ ɛnɛ, olɔwá kú nū lɛbɛ̄ɛka ekābɔ̄ éyī ce āyá. 22É le ɔ́kpa ā piyɔkɔ́ ɛga ɛpa nēé géē je uwá kwɔhá glá gbā. Odúúdú ɔ́kpa ā wɛ ō piyɔkɔ́ ɛga ɛpa nyā kpɛ́mm. 23É gbā aɔ́kpá ofu kú ɛháajɛ kú Áklɔ̄kpīihɔ ā. 24Ígbóoje kú oje nɛ̄hɛ́ o táajɛ nēe í bá ɛháajɛ aɔ́kpá ā, ígbóoje ɛpɛɛpa nōo í bī ɛgōpiyɔkɔ́ kú ɔ́kpa ā háyicō é le yá dúú. 25É gbā aɔ́kpá ofu kú ɛhíícō kú Áklɔ̄kpīihɔ ā, 26mɛ́mla ígbóje nɛ̄hɛ́ o táajɛ ofɛpa, ɛpɛɛpa wɛ ákú ɔ́kpa éyééye. 27É gbā aɔ́kpá ɛhīlī kóō kwu igbīhi kú ābɔ̄ ɛnɔ̄ɔ̄nɛ̄ kú Áklɔ̄kpīihɔ ā, 28mɛ́mla ɔ́kpa ɛpa kú ɔ́kíkā kú Áklɔ̄kpīihɔ ā. 29Aɔ́kpa kú ɔ́kíkā ā kwɔhá ŋmá ɛháajɛ jāā ga ɛhíícō. Aɔ́kpa ɛpa nēe je pīya ɔ́kíkā kú inū ā ɛ́gɔ́ɔmā nēé gbā uwā lɛ á. 30Odúúdú aɔ́kpá ā wɛ ahātá, mɛ́mla ígbóoje-otáajɛ kú oje nɛ̄hɛ́ igwɛ́ɛhīlī, ɔ́kpa éyééye wu ígbóoje-otáajɛ ɛpɛɛpa.

31É le ɔcí ō tū ɔlɛ́ ɔkɔ igwɛ́ɛhɔ̄ gbā ŋmá ɔcí kú akésiya, ɛhɔ̄ wɛ ákú aɔ́kpá kú ābɔ̄ éyi kú Áklɔ̄kpīihɔ ā, 32ɛhɔ̄ ɔhá kē wɛ ákú aɔ́kpá kú ābɔ̄ ɔhá, ɛhɔ̄ wɛ ákú igbīhi ɛnɔ̄ɔ̄nɛ̄ kú Áklɔ̄kpīihɔ ā. 33Ɔcí ō tū ɔlɛ́ ɔkɔ kú ɔtāhɛ̄ kúo tá gicō kú aɔ́kpá ā, ŋmá okónōgwu éyi kú Áklɔ̄kpīhɔ ga okónōgwu ɔhá. 34É le ugóolu (oje ɔdɔ) ma plá aɔ́kpá ā le aéliká kú ugóolu (oje ɔdɔ) kpó playi uwá kéē bī ɔcí ō tū ɔkɔ kú ɔlɛ́ nēé ma ugóolu (oje ɔdɔ) plá anú dúú ā.

35É le ukɔ́tin kú īlī nɛ̄hɛ́ tá, lɛ ɔ́ wu tɔ̄há mla owú odufā, owú ɔgalúlā mɛ́mla owú nɔ̄wá. É klla le ijā kú ifotó kú Ucérūbim wu tū ɔ̄. 36É le ogbló ɛnɛ gbā ŋmá ɔcí kú akésiya nēe géē bī ukɔ́tin ā playicō, é le ugóolu (oje ɔdɔ) ma plá uwá iyē klla le uwɔ kú ugóolu (oje ɔdɔ) kpó kwu uwá. Anɔ́ɔ é le ígbóoje-otáajɛ kú oje nɛ̄hɛ́ ɛnɛ yá kéē bī aógbló ā bāajɛ. 37É le ukɔ́tin ō klá okómpinu kú Áklɔ̄kpīihɔ ā yá mla īlī nɛ̄hɛ́ nēé wu tɔ̄há mla owú odufā, owú ɔgalúlā, mɛ́mla owú nɔ̄wá. É klla le ijā kú ifotó kú Ucérūbim he tū ɔ̄ dúú. 38É le aɔ́kpá kú ɔcí ɛhɔ̄ nēé le uwɔ kpó kwu uwá, nēe géē bī ukɔ́tin ā playicō ā gbā. É le ugóolu (oje ɔdɔ) ma plá icō kú aɔ́kpá mɛ́mla ogbló kú uwā. É klla le ígbóje-otáajɛ kú oje udɔ ɛhɔ̄ nēe géē bī aógbló ā háyicō ā yá dúú.

Currently Selected:

OŌYƐBƐ̄CƐ 36: IFBCL

Highlight

Copy

Compare