OŌYƐBƐ̄CƐ 35

Íne kú Usábāti

1Umósīsi lɛ odúúdú ójila kú ācɛ kú Ísrɛ̄lu ā túbá, anɔ́ɔ ó da uwá kahíníī, “Ɛ̄nyā wɛ ɔdā nɛ̄ Óndú ā je ɔ́da lɛ aá ká aá yá. 2#Oyɛb 20.8-11; 23.12; 31.15; 34.21; Ulīf 23.3; Obla 5.12-14Ɛ̄cī ɛhīlī nɛ̄ aá géē yúklɔ́ á. Amáŋ ɛ̄cī ɔ́mahāapa ā kóō wɛ ɛ̄cī ō tīihɔ, ɛ̄cī ihɔ kú omlɛ́nyɔ́ nēé je táajɛ lɛ Óndú ā. Ɔ̄cɛ dóódu nōo le úklɔ́ yá ɛ̄cī ɔ́ɔmā, ē géē je ɔ́ ŋmó. 3Aá gáā yá ɔdōlé dúúmā ɔlɛ́ aá ɛ̄cī Usábāti ā ŋ́.”

Ɔdā ɛ̄gbā obi yúklɔ́ kú Áklɔ̄kpīihɔ

4Umósīsi le ka lɛ odúúdú ójila kú ācɛ Ísrɛ̄lu kahíníī, “Ɛ̄nyā wɛ íne nɛ̄ Óndú ā je á. 5Aá je ɔdā ɛ̄gbā lɛ Óndú ā. Ɛjɛ̄ɛ̄jī ācɛ nēe dɔ̄ɔ̄ka kéē je ā, kéē bī ɔdā ɛ̄gbā kú ugóolu (oje ɔdɔ), oje nɛ̄hɛ́, ámāŋ ka oje udɔ. 6Īlī nɛ̄hɛ́, īlī odufā, īlī ɔgalúlā, īlī nɔwā, mɛ́mla īlī kú ɔnwū ɛwū. 7Mla ɔkpá omlede otɛ̄ɛ̄tū nɔwā, mɛ́mla ɔkpa ɛbɛ́ ɔhá, mɛ́mla ɔcí kú akésiya. 8Anɔ̄ ō le tū agege, anɔ̄ ōtīihɔ mɛ́mla anɔ̄ kú ɔtulalī umuumu ōkpóocu, 9Ɛcɔ̄ kú ukámlin, mɛ́mla ɛcɔ̄ aɔ́tangbédē ɔhá nēé géē je wu ipú awulú kú ɔ̄cogwɛ́ɛya, mɛ́mla ɛkpa o bɔ́tū nē é hī ka ɛ́fɔ̄du ā.”

Iyó kú Áklɔ̄kpīihɔ ā

10Odúúdú ācɛoyúklɔ́ abɔ̄ nēe bá ipú aá ā, géē wā í yá ɔdā dóódu nɛ̄ Óndú ā ka ā. 11Iyó kú Áklɔ̄kpīihɔ ā bá yɔ̄ á, īlī ukɔ́tin kú nū, ɔdā ō klá anú eyɛ̄cɛ, uwɔ ō bī ɔcí kú nū, ɔcí ogblógbló kú nū, aɔ́kpá mɛ́mla ígbóoje-otáajɛ kú uwā. 12Ikpati kú Ɛka kú Óndú ā, ogbló kú nū, ɔdā ō klá anú ɛyí, mɛ́mla ɛga ocīce kú eyīnyinyi kú nū. 13Utébulu mɛ́mla ɔcí kú nū mɛ́mla odúúdú iyó kú nū ɔhá ā. Igbō nēé gē je kú ɛ̄gbā lɛ Ɔwɔicō ā wɛ dúú. 14Ɔdā ō lɛ agege ce ɔ́, mɛ́mla odúúdú iyó kú nū. Agege mɛ́mla anɔ̄ ō lɛ tū ɔ̄. 15Ede ō yi ɔtulalī umuumu ɔlá ɛyí nū mɛ́mla ogbló kú nū, anɔ̄ ōtīihɔ, ɔtulalī umuumu o kpóocu, ukɔ́tin o klá ɔwɛ kú Áklɔ̄kpīihɔ ā. 16Ede o gwɛ́ɛya ō yɔlá ɛyí nū, mɛ́mla oje udɔ o pla fíílífíílí nēé gē lɛ wu ɔ́ áklō, ogbló kú nū mɛ́mla odúúdú iyó kú nū, ɔgbanjɛ o le na abɔ̄ mɛ́mla ɛga ō háyi kú nū. 17Ukɔ́tin kú igá kú Áklɔ̄kpīihɔ ā, ɔ́kpa kú nú mɛ́mla ígbóoje-otáajɛ kú nū, ukɔ́tin kú okómpinu kú Áklɔ̄kpīihɔ ā. 18Ɔcí ō hɛ́tājɛ mɛ́mla ɔ́ŋgbá kú Áklɔ̄kpīihɔ ā. 19Mla odúúdú aɔ́dīifa lɔɔlɔhi nɛ̄ ɔ̄cogwɛ́ɛya gē lɛ wiiye eko nēé gē yúklɔ́ ɛga otīihɔ ā. Aɔ́dōwiyē ō tīihɔ kú Árɔ̄ni ɔ̄cogwɛ́ɛya ā mɛ́mla ákú ayīnɔ̄nyīlɔ kú nū.”

Ācɛ bī ɛhi kú uwa wā

20Anɔ́ɔ odúúdú ójila kú ācɛ Ísrɛ̄lu ā le pɛ́ nyɛ̄ɛ̄ ŋmá ɛgiyí Umósīsi á. 21Anɔ́ɔ ɛjɛ̄ɛ̄jī ācɛ nēe dɔɔ̄kā ō bī ɔdā ɛhi nēé géē lɛ gwó Áklɔ̄kpīihɔ ɛga nɛ̄ Óndú ā yɔ̄ ā, le kpó wā. É le odúúdú ɔdā dóódu nēe cɛgbá kéē lɛ gbā Óndú ā ɛ̄gbā mɛ́mla ɛ̄nɛ̄ é géē gɔ́ ɔdōwiyē kú ācogwɛ́ɛya ā kpó wā. 22Odúúdú ācɛ nɛ̄e dɔɔ̄kā ō je, kwu ācɛnyīlɔ mɛ́mla ācɛnyā, bī aágá o bī yíifa, aɔ́dōplahɔ́, aéliká, aágbá ō tɔ̄ɔkɔ, mɛ́mla aɔ́dīifa kú ugóolu (oje ɔdɔ) ɛyɛ́ɛ́yɛ́yí, anɔ́ɔ é kwú uwā ú kpó lɛ Óndū á. 23Ɛjɛ̄ɛ̄jī ācɛ nōo lɛ īlī odufā, īlī nɔwā, mɛ́mla īlī ɔgalúlā, īlī ɔnwū kú ɛwū, mɛ́mla ɔkpá omlede nēé le tɛ̄ɛ̄tū nɔ̄wá, ámāŋ ka ɔkpɛ́bɛ́ olɔhi ɔhá ā, anɔ́ɔ é le uwá kpó wā á. 24Ɔ̄cɛ dóódu nōo je ɔdā ɛ̄gbā kú oje nɛ̄hɛ́ ámāŋ, ákú ugóolu (oje ɔdɔ) glá ā le bī gé lɛ Óndú ā. Ācɛ dóódu nēe lɛ ɔcí kú akésiya ā le uwá kpó wā. 25Odúúdú ācɛnyā nēe jé ō tá īlī ā le owú kú ɔgalúlā, owú odufā, mɛ́mla owú nɔwā nēé tá ā kpó wā. 26É klla bī ɔnwū ɛwū ā le tá owú. 27Aótrɛ̄yí ā le ɛcɔ̄ ogbɔɔ́lá kú Onīsi, mla ɛcɔ̄ ɔtángbédē mɛ́mla ɛcɔ̄ ogbɔɔ́lá ɔhá nēé gē kpó kwu ɛ́fɔ̄du ō bɔ́tū mɛ́mla īlī ō klá acá kú ɛ́fɔ̄du ā, 28mɛ́mla anɔ̄ ɛyɛ́ɛyɛ́yí, mɛ́mla anɔ̄ ō le tū agege, mɛ́mla anɔ̄ ō tīihɔ, mɛ́mla ɔtulali umuumu okpóocu kpó wā. 29Odúúdú ācɛnyīlɔ mɛ́mla ācɛnyā kú Ísrɛ̄lu ā, nɛ̄ ɔtū he uwá kéē bī ɔdā dóódu wā, ohígbū úklɔ́ nɛ̄ Óndú ā je ɔ́da lɛ Umósīsi kóō yá ā, le ɔdā dóódu kú ɛ̄gbā kú uwā, kpó wā gé lɛ Óndú ā.

Ācoyúklábɔ̄ abɔ̄ kú Áklɔ̄kpīihɔ ā

30Anɔ́ɔ Umósīsi da ācɛ kú Ísrɛ̄lu ā kahíníī, “Áa má ɔ̄, Óndú ā le Ubɛ́sālelu, ɔyí kú Úri, ɔyí kú Uhɔ́ɔ nōo ŋmá ipɔ́ɔma kú Ujúda ā, hīīgwú ɛɛ́. 31Ɔwɔicō le ɔ́ tū mu mla ɔfú kú nū,#35.31 ɔfú, ámāŋ alelékwū. ó klla je ɔdā ímlɛ́ ō yá, íjééyī, mɛ́mla ɔdā o jé, kú úklábɔ̄ dóódu lɛ ɔ́. 32Ká ō miya ɔdīifa, cɛ́ɛ́ kóō yá uwā ŋmá ugóolu (oje ɔdɔ), oje nɛ̄hɛ́ mɛ́mla oje udɔ. 33Ó lɛ ɔfú kú ɛcɔ̄ ifa ō gbā kóō kpó kwu īlī, ákú ɔcí ōgbā mɛ́mla ɛdɔ úklábɔ̄ dóódu. 34Ó klla je ɔfú lɛ anú mɛ́mla Oholíyābu, ɔyí kú Ahísamāki nōo ŋmá ipɔ́ɔma kú Udán ā. 35Ó le uwá tū mu mla íjééyī, cɛ́ɛ́ kéē yá ɛdɔ úklábɔ̄ dóódu, mla ijā abɔ̄ ō he dóódu kú odufā, ɔgalúlā, mɛ́mla ɔnɔwā, īlī nɛhɛ̄ ō tá ígbíngbli, amáŋ īlī ō tá, mɛ́mla ɛdɔ úklɔ́ ímlɛ́ kú ācɛ ō hijā tū aɔ́dā dóódu.”

Currently Selected:

OŌYƐBƐ̄CƐ 35: IFBCL

Highlight

Copy

Compare