ÚKLƆ́ KÚ ĀCOTƐ̄HƆ̄ 26
26
Upɔ́lu kɛlā iyɔ̄bū Ágirīpa
1Eko nēé le Upɔ́lu bī iyɔ̄bū aɔ́cɛ́ ā. Anɔ́ɔ Ágirīpa da Upɔ́lu kahíníī, “É je ɛga ga awɔ ká ā kɛlā kú uwɔ abɔ̄yī uwɔ.” Anɔ́ɔ Upɔ́lu je abɔ̄ gicō, anɔ́ɔ ó gbɔɔ́ ō kɔko kú iyī nū ɔwɛ ɛ́gɛ́nyā á.
2“N hī iyī um ka ɔ̄cɛ nɛ̄ iyē kú nū fú nɛ̄hi, Ágirīpa Ɔcɛ́, nōó wɛ iyɔ̄bū uwɔ nɛ̄ n gáā kɔkɔ kú um ícɛ ohígbū ɔdā dóódu nɛ̄ ācɛ Ujíyu kpó ce um ā, 3ohígbū ka awɔ abɔ̄yī uwɔ ā jé ucē mɛ́mla áafú dóódu nɛ̄ ācɛ Ujíyu gē tá ā lɔɔlɔhi. Ó lɛ ā n gbɔ̄ɔkɔ gā awɔ kā lɛ ahɔ̄ jē gā um pɛtɛɛ.
4“Odúúdú ācɛ Ujíyu jé ɛ́gɛ́nɛ̄ n lā oyēeyī kú um ŋméeko nɛ̄ n wɛ ɔyípoklóbīya ā. É jé ɛ́gɛ́nɛ̄ n lā odúúdú oyēeyī kú um lɛ ā, aflɛ́yí ɔtāhɛ ajɛ ɔlɛ́ um mɛ́mla ipú Ujerúsālɛm ā. 5#Ācot 23.6; Ufíl 3.5Ɔ́dāŋ kéē í cɛ̄ í ce um ijáalí, é jé ŋmá eko aflɛ́yí ka n wɛ ɔ́wá kú Ufárisīi nēe leyī kwɛcɛ gɛɛ fíyɛ́ dúú ā. 6Anɔ́ɔ abālɔbányā n háyi amānyā kéē kɛpɔ̄ tū um ohígbū ka n kpɔ́tūce yɔ̄ ī gbēyī ka Ɔwɔicō géē yá okónu nōó ce lɛ aádáádā alɔ ā. 7Okónu ɛdɔ ékpó nɛ̄ Ɔwɔicō ce nyā nɛ̄ ipɔ́ɔma igwɛ́ɛpa kú ɔlɛ́ alɔ ā leyīce ka Ɔwɔicō ɔ́ɔ géē yá lɛ uwá ā nēé gē gbā ɔ̄ ɛ̄gbā ɛnɔ mla otú á. Ohígbū ɔtōkpóce nyā, ágábáidu, nɛ̄ ācɛ Ujíyu mbáa kpɛ́lā ce um á! 8Ɔdíyá nōó lɔnɔ tū aá nēe bá amānyā ká aá cɛ̄ ka Ɔwɔicō je ɔ̄cɛ héyi ŋmá ɔlékwū glá ā? 9#Ācot 8.3; 22.4,5“Ami abɔ̄yī um gē gbɛlá ka n lɔfú lɛ ɔdā dóódu yá ká n̄ lɛ ɛyí bū kwu iyē kú Ujísɔ̄si kú Unásārēti. 10Ɔ́ɔmā wɛ ɔdā nɛ̄ n yá ipú Ujerúsālɛm á. N le íkwu mīyɛ ŋmá abɔ̄ kú otrɛ̄yí kú ācogwɛ́ɛya, anɔ́ɔ n le ācɛ alɛwa kú ācɔ̄lóhɔ́nyɛtá kpó tū agbá. Eko nēé le ɛpɔ̄ ɔ̄cɛ ō ŋmó ka tū uwā nɛ̄, n gē ka dúú ka n cɛ̄ mla uwá. 11Igbo alɛwa n gē cɛ̄ kéē yá uwā italā ipú Ɛgogbɔ̄ɔkɔ dóódu, n kē ī cēyītīkwū ká n̄ yá kéē cɛ̄ɛ̄lā Ɔwɔicō gɛ ŋ́. N kē cɔ̄nū nɛ̄ɛ̄nɛ̄hi lɛyíkwu uwá nōo kōō cɛ̄ ga um ga ipú igelī kú aílɔ́wá ká n yá uwā ŋmó.
Upɔ́lu ka ɛ́gɛ́nɛ̄ ó pīyabɔ̄ lɛ ā
(Ācot 9.1-19; 22.6-16)
12“Ohígbū ɛ̄nyā nɛ̄ n mīyɛ íkwu mɛ́mla ɔ́da ŋmá ɛgiyí otrɛ̄yí kú ācogwɛ́ɛya ga ajɛ Udamásikɔ̄si á. 13Ɛplá ɛnɔ oyɛ̄ɛyí ā, Ɔcɛ́ ágábáidu, n má ɔlá ōfíyajɛ nōo fíyajɛ fíyɛ́ ɛnɔ, ŋmá ɔkpáncō, anɔ́ɔ ó le cɛ̄ klá ami mɛ́mla ācɛ nēe bá ī yɛ tɔ̄há mla um ɔwɛ ā. 14Anɔ́ɔ eko nɛ̄ odúúdú alɔ mágwōnū bá ajɛ ā, n pó ɔkɔ éyi nōo da um ɔkɔ Uhíbru ka, ‘Usɔ́lu, Usɔ́lu, ɔdíyá nāa ī yá um ŋmó ā? Ó í lɔnɔ tū uwɔ nɛ̄hi ká ā bɛyí kwu ɔdā nɛ̄ n miya táajɛ ā n.’ 15Anɔ́ɔ n ka, ‘A wɛ ɔ̄nyɛ nɛɛ, Óndú?’ Anɔ́ɔ Óndú ā da um ka, ‘Ami Ujísɔ̄si nāa gē yáŋmó á. 16Amáŋ cāŋjɛ ká ā háyi ikpó abɔ̄yī uwɔ. Ohígbū ka n wā gáā ma iyī um fú gā awɔ ká n̄ lɛ uwɔ yá ɔ̄cocɛ̄hɔ̄ kú um. 17N géē nya uwɔ tá ŋmá abɔ̄ kú ācɛ Ísrɛ̄lu mɛ́mla o ŋmá abɔ̄ kú aílɔ́wá nɛ̄ n yɔ̄ ī tū uwɔ ɛhɔ̄ ga ɛgiyí uwā ā. 18Awɔ ā kóō le uwá eyī nwūla cɛ́ɛ́ ká ā lɛ uwá eyī pīya ŋmá ɛgiyí Ebilíi ga ɛgiyí Ɔwɔicō, cɛ́ɛ́ o ŋmá lɛ o cɛ̄ɛ̄lā kú um, é géē je íne nēé bīya ā yá uwā ɛhi, cɛ́ɛ́ kéē lɛ ɛga éyi lɛ ɔtāhɛ̄ ayípɛ̄ ɔlɛ́ Ɔwɔicō.’
Upɔ́lu kɛlā kú úklɔ́ kú nū
19“Ohígbū ɔ́ɔmā, Ágrīpa Ɔcɛ́, ń yá īkpɛ̄yí olɔfú ɛgiyí ɔdā nɛ̄ n má ŋmá ɔkpáncō ā ŋ́. 20#Ācot 9.20,28,29Amáŋ n ka tɛ́ɛcɛ aflɛ́yí lɛ ācɛ nēe bá Udamásikɔ̄si, n kē ka tɛ́ɛcɛ ajɛ Ujerúsālɛm mɛ́mla odúúdú ajɛ kú Ujudíya. N ka tɛ́ɛcɛ ipú aílɔ́wá ā kéē pīyabɔ̄ kéē kwú eyī pīya tá ɛgiyí Ɔwɔicō, kéē yúklɔ́ nōo géē mafú kéē le pīyabɔ̄ ɛɛ́. 21Ohígbū ɔdā nyā nɛ̄ ācɛ Ujíyu nēe bá nyā le um kwú ipú Agblīihɔ-nɛ̄hi, klla tíne kéē lɛ um ŋmó á. 22Amáŋ o jāā gaá kwu ícɛ nyā piíí ā, Ɔwɔicō le um tábɔ̄, n kē yēeyī, cɛ́ɛ́ ká n̄ háyi amānyā ká n̄ cɛ̄ odúúdú ācɛ ijáalí, ācɛ nɛ̄ŋ́cɛ́ mɛ́mla ācɛ nɛ̄hi. Ɔdā nɛ̄ n ka ā wɛ ɛdɔ ékpó mɛ́mla ɔdā piíí nɛ̄ ācomɛ́ɛbɛ mɛ́mla Umósīsi le ka koó géē yá ā. 23#1 Ukɔ́r 15.20; Ayis 42.6; 49.6 Ó ka Ohɔ́nyɛtá géē móōwē, ka ɛ́gɛ́nɛ̄ ó géē wɛ ɔ̄cɛ aflɛ́yí nōo géē héyī ŋmá ɔlékwū ā, ó géē tɔ́ɔna kú ɔlá ofíyajɛ ā lɛ ācɛ Ujíyu mɛ́mla aílɔ́wá dúú.”
24Abɔ̄ Upɔlu yɔ̄ gē kɔkɔ kú nū ā, Ufɛ́sitɔ̄si le ɛgba dɛ̄ kahíníī, “Upɔ́lu, a gē jɛɛ́lɛ́! Ɔdōjé nɛ̄hi kú uwɔ yɔ̄ ī je uwɔ jɛɛ́lɛ́!” 25Amáŋ Upɔ́lu kahíníī, “Ń jɛɛ́lɛ́ ŋ́, ɛ́nɛ́nɛ̄ Igbómína ɔ̄cojīlīmā, Ufɛ́sitɔ̄si. Eyī gbum gɔɔ abɔ̄ n yɔ̄ ī kɛlā ɔkwɛ̄yi nyā. 26Ɔcɛ́ Ágrīpa! N lɔfú kɛlā gā awɔ tɛ́ɛcɛ péee glá. N jé cāā ka a jé aɔ́dā nēe bá nyā, é kē wɛ ɛ̄yīpɛ̄ tū uwɔ ŋ́, ohígbū ka aɔ́dā nēe yá ā í yá ipú ajoodobū ŋ́. 27Ɔcɛ́ Ágrīpa, a cɛ̄ɛ̄lā kú ācomɛ́ɛbɛ ā? N jé ka a cɛ̄.” 28Ágrīpa da Upɔ́lu kahíníī, “Ɛpléeko kpií nyā a dɔɔ̄kā ká ā je um pīya ɔ̄cɔ̄lohɔ́nyɛtá nɛɛ?” 29Upɔ́lu tóohi kahíníī, “Ó kōō wɛ eko kpií ámāŋ eko dóódu n gbɔ̄ɔkɔ lɛ Ɔwɔicō ka ó wɛ awɔ ōfōōfū uwɔ ŋ́, Amáŋ odúúdú ācɛ nēe ī pó ɛlā kú um ícɛ ā kéē le lɛbɛ̄ɛka ami ā dúú, amáŋ í tíne ká ā wɛ olagbá ŋ́.”
30Anɔ́ɔ Ɔcɛ́ ā cāŋjɛ mla igbómína ā mɛ́mla Ubenísi mɛ́mla ācɛ nēe bá ajɛ mla uwá ā. 31Anɔ́ɔ eko nēé le hɛ́ gɛcɛ ā, é da iyī uwā kahíníī, “Ɔ̄cɛ ā í yá ɔdā dúúmā nōo cíkā lɛ ikwū ámāŋ ka agbá ŋ́.” 32Anɔ́ɔ Ágrīpa da Ufɛ́sitɔ̄si kahíníī, “Alɔ í yɛ í lɛ ɔ̄cɛ ā hɛ́tá ɔ́dāŋ kóō hɔ́būtá pi ɛpɔ̄ ga ɛgiyí Usísa ŋ́.”
Currently Selected:
ÚKLƆ́ KÚ ĀCOTƐ̄HƆ̄ 26: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma
