Mjir Rom 13

Kələngkər Aka Mji Na Ka Kuthlikur

1Ka kəlara mdə kələngkər aka mji na ol'ola akwa kuthlikur, kamnyar kuthlikur aɗi na kula Hyel an vəi wa. Kamnyar shanga mjir kuthlikur na aɗi ni Hyel an putə ɗa. 2Apani kəlara mdə na akwa bara hara nggyarɗəkur aka kuthlikur, tsa akwa hara nggyarɗəkur ni aka su tə Hyel an vəi. Antə kəlara mdə na akwa hara nggyarɗəkur ni tsa ata ndəkərəngkər shariya aka kərari. 3Kamnyar mjir kuthlikur aɗi sur thlivəra aka mji na ana hara su kalkal wa, amma tar mjir hara ɗimikur. Ga ata hir ndzi kula thlivər mdə na ka kuthlikur ya? To tar ka gə hara su na kalkalari, antə apani tsa ata hu nga. 4Kamnyar tsa akwa hara kəthlər aka Hyel kamnyar lapiyakurər nga. Amma ma ga ku ɓzamtə su, ata ndzi dwali ka gə thlivəra, kamnyar tsa akwa kəsi katsakar ni gapani wa. Tsa akwa hara kəthlər ni aka Hyel, kamnyar ɗi kəlara mdə na ku hara ɗimikur. 5Antə kalkal ka waskəi kələngkər aka mjir kuthlikur, aɗi kamnyar hwi ɗiɓəladzər Hyel daci wa, amma kamnyar ka hangkala giri pəpəi kula səzə su.

6Tsu kamnyar suayeri apani antə giri ana ntə tsəma, kamnyar mjir kuthlikur akwa hara kəthlər ni aka Hyel, akwa kəlara sakatə da ku hamta kərɗa akwa hara kəthlərayeri ni kalkal. #Mat 22:21; Mar 12:17; Luk 20:25 7Antə ka giri ntəmta aka kəlara mdə su tə tsa akwa nu giri. Ka giri ntəmta tsəma aka mjir dlu tsəma, ka hamta janggal aka mjir dlu janggal, ka giri na səli aka mji tə kalkal ka mdə na ɗa səli, ka na olkur aka mji tə kalkal ka mdə na ɗa olkur.

Ka Gə Hir Nvwa Nga

8Giri aɗiya ndzi ka təmbələr wama ata kəra giri wa, tar təmbələr hir nvwa giri daci. Kamnyar kəlara mdə na akwa hir ntəwulərni, tsa ku ɓəlatə tsawu ni. 9Kamnyar tsawayeri ngəni na pəla, “Ga aɗiya ləkə wa. Ga aɗiya tsi mdə wa. Ga aɗiya həl wa. Ga aɗiya nggukə sur mdə wa,” ka shanga tsawayeri damwa ni, an pakpakari akwa tsawu ngəni na pəla, “Ka gə hir ntəwulər nga apa kəra ga,” ni. 10Kamnyar hirkur aɗi ana ɓzamtə su aka ntəwulərni wa. Antə apani hirkur an ɓəlatə tsawu ni.

11Antə ka giri hara ngəni, kamnyar giri asəndə jili sakatə mburu akwa kulini ni. Saka ku hara tə ka giri thlata ata heni. Kamnyar sakatə mda ata mbantə mburu ni ku hara kudzəhə ka mburu kulini, ta sakatə mburu haɗa hamta jiri nda. 12Viri abaka kura, pci abaka səɓəla. Antə mbura zhar hara suayeri na ar kuthlu, ka mburu fatə kari mpayeri na ar parakəu. 13Ka mburu namtə ndzəndziyir mburu na ata kəɓa ka su tə mji ana hara təpci. Mburu aɗiya hara sur kuthlu apa wikər shambarkur, wala jili wikə damwa, wala karwakur, nggukər ɗimikur, wala mpa, wala səlkə wa. 14Amma ka giri hatə Mthlaku Yesu Kristi, tsuwa giri aɗiya psi laku aka dza giri ka tsa mzhi kuri nggukayeri arni wa.

Currently Selected:

Mjir Rom 13: KNB

Highlight

Copy

Compare