Mjir Rom 12
12
Hamta Kər Aka Kəthlərər Hyel
1I akwa kiɗə kəra giri, maɗaməma, apatə Hyel ku kətadzə mburu ni, abbər ka giri hamta kəra giri apa saɗaka na ka mpika, na ɓɗakkarkara, na ata kəskəra Hyel. Kamnyar ngəni an laku na kalkal tə giri ata mzhi vəngkər səli aka Hyel akwa. 2Giri aɗiya nu surharar#12:2 wala giri aɗiya thlipə mjir zaman ngəni wa, wala nu halər ɗa wa. mjir duniya ngəni wa, amma zhari ka Hyel an pali giri ka giri ndzi mji bilən atar pali lakur dzamər giri. Apani antə giri ata mzhi nggaɓəla su tə Hyel akwa bara ka giri hara, na an su na ɓɗaku, na ata kəskərari, akwa laku na ciɗəɗu.
3Kamnyar ɓɗakkur tə Hyel hara ali ka ni cauta na ar mambəla, antə I akwa tsaktə kəlara pal akwa nca giri abbər giri aɗiya namtə kər giri olta laku tə giri akwa wa. Amma ka waskəi ngkahə kərni ka dzam na kalkalari, kalkal ka olkur hamta jiri tə Hyel na alari. 4Kamnyar mburu ka bwayeri hang akwa dza duku, tsuwa kəlara bwa ka kəthlərərni zum ta nvwani. #1 Kor 12:12 5Apani tsuwa wala tə mburu hang ni, mburu an dza duku akwa Kristi, tsuwa kəlara pal akwa nca mburu an bwar dza nvwani. 6Hyel ku hara ala mburu ka ɓɗakkur atar na mburu ka cautayeri zumzum, antə ka mburu kəthlər ka da. Ma Hyel ku na gə dunar hara naɓikur, ka gə hara naɓikur ni kalkal ka hamta jirər nga.#1 Kor 12:4-11 7Ma dunar hara kəthlər aka mji antə Hyel na ga, ka gə hara kəthlər ni ɓɗaku. Ma ar thlipa, ka gə thlipə ɓɗaku. 8Ma ar dunautə mda, ka gə dunautə mdə ɓɗaku. Ma ar hamta su, ka gə hara ka ɗəffa gə shang. Ma ar ndzi ola ata kəra mji, ka gə hara ka jirkur. Ma ar kətadzə mda, ka gə hara ka kucali.
Laku Tə Mda Ata Nggaɓəla Mdər Nuwa Na Jirari
9Ma gə hir mda, ka gə hir ni ka jirkur. Ka gə nggəlar shanga su na ɗimi, ka gə bartə kəlara su na ɓɗaku. 10Ka giri hamta kər giri kamnyar hir nvwa giri ka jili hirdzər maɗaməmakur. Ka waskəi bara təramta nvwani akwa nar olkur aka nvwani. 11Giri aɗiya mtathlidzi wa, amma ka giri hara su ka ufti, ka hara kəthlər aka Mthlaku ka ɗəffa gə shang. 12Ka giri hara kucali akwa su tə gə vəkər kəgari, ka giri nggitə bwani, ka giri hara adduwa tədəku. 13Ka giri hamta dlarər giri aka mjir Hyel na akwa tura, ka giri dlu mətəpi ka kucali akwa kəyir giri.
14Ka giri vədza barka aka mji na akwa hara bwani ala giri. Ka giri vədza ala ɗa barka, giri aɗiya shuwumta ɗa wa. #Mat 5:44; Luk 6:28 15Ka giri hara kucali ata kəma duku kəga mji na akwa kucali, ka tuwa ata kəma duku kəga mji na akwa tuwa. 16Ka giri ndzi akwa nggaɓəladzi kəga nvwa giri. Giri aɗiya ndzi ka ɗəffər olkur wa, amma ka giri mwa kəga mji tə mdə namtə ɗa apa da aɗi suma wa. Giri aɗiya namtə kər giri apa giri ku təramta mambila mji ka ɗəɗukur wa.
17Giri aɗiya ntə ɗimikur ka ɗimikur wa, amma ka giri dzama ka hara su natə shanga mji ata wul giri ka daraja. 18Ka giri hara su tə giri amzha, ma ahara, kamnyar ka giri ndzi lapiya ka shanga mji. 19Mjir yeru, giri aɗiya ntə dawakur ka giri sur giri wa, zhar giri aka Hyel ka tsa an ntəmta ala giri akwa ɗəffə bwarbwarkurərni. Kamnyar kakaɗər Hyel ku pəla,
“Ntə dawa an arna,
antə I ata ntəmta su tə da hara ni,”
ndə Mthlaku.
20Kakaɗər Hyel jaktə pəla abbər,
“Ma dawar nga ka mi,
ka gə na alari susəma,
ma tsa ka thləli,
ka gə na alari sur sa,
kamnyar atar hara apani
antə ga ata vu ni akwa səli na
ata mba ɗəffari apa hakthlir u'u.”
21Giri aɗiya zhari ka ɗimikur nggyari giri wa, amma ka giri nggyari ɗimikur ka ɓɗakkur.
Currently Selected:
Mjir Rom 12: KNB
Highlight
Copy
Compare
Share
Want to have your highlights saved across all your devices? Sign up or sign in
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.
