Pristayeri 21
21
Tsawayeri Aka Pristayeri
1MTHLAKU ku pəla aka Musa, ka tsa pəla aka pristayeri na maɗa' Haruna abbər, “Prist aɗiya namtə kərni dlimbur atar wujir mshiyir yangkurari wa, 2tar yangkurari na kudzəha apa mama'ni, baba'ni, ɓzərni, ngkwarni, ɓzərma'ni, 3wala ngkwarma'ni na aɗi kəl sal wa, na ka ndzi adzə ni. 4Prist aɗiya namtə kərni dlimbur atar ləkwa wujir mta ar mjir mwalankiɗa wa.#21:4 Karapur vəras ngəni aɗi ata bəbal wa. 5Prist aɗiya shimta bwadukwa kərari wa, wala pamta shishir kumiyari wa, wala ntəntatə dzari kamnyar ncanta abbər tsa akwa tuwa mshi wa. 6Tar ka pristayeri ndzi zum ta mji damwa ali, antə da aɗiya hilantə thləmi wa. Da an mjir hamta saɗakar susəma ali, antə kalkal ka da ndzi ɓɗakkarkara. 7Prist aɗiya kəl mwala na ku hara karwakur wa, wala mwala natə mji ku ɓzamtə ni wa, wala na ku ndəka ka sal wa, kamnyar tar ka tsa ndzi zum ta mji ali. 8Tar ka kəlara mdə nar səli aka prist abbər tsa mdər Hyel, kamnyar tsa an mdər hamta saɗakar susəma ali. Tsa ata ndzi zum ta giri, kamnyar I na MTHLAKU, na ana namtə giri zum ta mambila mji, an ɓɗakkarkara. 9Ma ngkwar prist akwa hara karwakur, tsa akwa kəli səliyir baba'ni, antə ka mdə mbamta ni ka tsa mta. 10Prist na ola akwa nca giri, natə mdə ku pungkər alari mal ar hamta olkur, tsa aɗiya zhar shishir kərari kula thlar wa, wala kwahəwa ləptərni kamnyar tuwa mshi wa. 11Tsa aɗiya shahədzi kudzəhə ka mshi wa, wala mshiyir baba'ni wala ar mama'ni wa. 12Tsa aɗiya zhar mbwar vəngkər səli wala ɓzamtə mbwa ni atar mwari adzə mshi wa, kamnyar tsa an Prist na ola. I an MTHLAKU. 13Tar ka prist kəl ɓzərngkwa na aɗi səndə sal wa. 14Tsa aɗiya kəl mwala natə salngkiɗa ku mtə wa, wala na ndək ka sal wa, wala na ku hara karwakur wa. Ka tsa kəl ɓzərngkwa na aɗi səndə sal wa akwa nca durərni. 15Ma apani wa, maɗa'ni natə kalkal ka da ndzi zum ta mambila mji, da ata ndzi hilhilari. I an MTHLAKU na ku vəi ni prist na ola.” 16MTHLAKU ku pəla aka Musa 17ka tsa tsawa aka Haruna abbər, “Aghəlazi kəkayeri ar nga aɗi wala duku na ka nangka na ata sə mzhi hamta saɗakar susəma ali wa. 18Mda aɗi na ka nangka wala duku na ata si kudzəha ka iya wa, wala tsa an mdlyang, wala abdala, wala mdə na ka kəmari hilhilari, wala səlari duku saɓəl ta nvwani, 19wala mdə na dəkəi səlari wala tsiyari, 20wala mdə na ka madagara, wala bukarwada, wala mdə na ka kumdla, wala shilkər ɓəɓa, wala kulkulni, wala mdə na kulaɓu. 21Mda aɗi wala duku na ka nangka akwa nca kəkayeri ar Haruna na prist na ata mzhi hamta saɗakar susəma ali wa. 22Tsa ata mzhi səm kəlara susəma natə mdə ku hamta ali. 23Wala apani, tə tsa ka nangka, tsa aɗi ata mwari adzə lapəli, wala adzə bagaɗi wa, ta tsa asə ɓzamtə vəyayeri ar vəngkər səli. I an MTHLAKU na ku namtə ɗa zum ta mji damwa.” 24Nayeri ni an su tə Musa ku pəla aka Haruna, ka maɗa'ni, ka aka shanga mjir Israila.
Currently Selected:
Pristayeri 21: KNB
Highlight
Copy
Compare
Share
Want to have your highlights saved across all your devices? Sign up or sign in
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.
