Pristayeri 20

Ɗya Kamnyar Tur Kələngkər

1MTHLAKU pəla aka Musa 2ka tsa pəla aka mjir Israila abbər, “Kəlara mda akwa nca giri wala mətəpi na andzəndzi akwa nca giri na ku hamta ɓzərni wala ngkwarni aka Molek, tar ka mdə ndzəndzəh ni ka pela ka tsi ni. 3Ma mdə na ku hamta ɓzərni aka Molek, tsa ku hilantə tentər tsaptədzi ka ɓzamtə thləmi na ɓɗakkarkara. Antə I ata ndzi dawa ka tsa, kəi ndəkəmta ni ka mjirni. 4Antə ma mji ku zhar mdə na hamta ɓzər ni aka Molek ni, tə da aɗi tsi ni wa, 5I ata ndzi dawa ka tsa ka kutakəyirni. Antə I ata kədləɓəla ni kazhar mjirni, tsa ka shanga mji na mbwa alari kir ka nu ni akwa vəngkər səli aka Molek ni. 6Ma mdə na ku bara sauri akəla mjir hakdzi ka ɗeaghayeri, ka hamta jiri ala ɗa, I ata ndzi dawa ka tsa, ka ndəkəmta ni ka mjirni. 7Hamta giri kər giri ali, ka giri ndzi ɓɗakkarkara, kamnyar I an MTHLAKU na Hyelər giri. 8Ka giri ɓəlatə shanga tsawayeri arna, ka nu ɗa, kamnyar I an MTHLAKU na ku namtə giri ɓɗakkarkara. 9Kəlara mdə na ku nggəl baba'ni wala mama'ni, mda ata tsi ni, antə mamshir mtərni ata ndzi ata kərari surni. 10Ma mdə laga ku lək mwalar nvwani, mda ata tsi mdə na lək mwala ni ka mwala ni. 11Ma mdə na ku pi ka mwalar baba'ni, tsa ku kəli səliyir baba'ni, antə mda ata tsi mdə na lək mwala ni ka mwala ni. Antə mamshir mtər ɗa ata ndzi ata kəra ɗa sur ɗa. 12Ma mdə na ku pi ka mwalaɓzərni, mda ata tsi ɗa japwa ɗa. Da ku hara adiyakur na ɗimi kamta, antə mamshir mtər ɗa ata ndzi kəra ɗa sur ɗa. 13Ma mdə sal na ku pi ka sal nvwani apatə mda ana hara ka mdə mwala, da ku hara sur cika na ɗimi kamta, antə mda ata tsi ɗa japwa ɗa. Antə mamshir mtər ɗa ata ndzi ata kəra ɗa sur ɗa. 14Ma mdə na kəl mwala japu ka mama'ni tə da ndzi mwankirni, shanga ɗa makər ni mda ata mbamta ɗa, kamnyar sur səli ngəni tə da hara ni. Mda aɗi ata kələngkər aka jili ɗimikur ngəni akwa nca giri wa. 15Kəlara mdə na ku pi ka mwaɓi, mda ata tsi ɗa japwa ɗa ka mwaɓi ni. 16Ma mwala na ku bara mwaɓi ka pi ka tsa, mda ata tsi ɗa japwa ɗa ka mwaɓi ni. Antə mamshir mtər ɗa ata ndzi ata kəra ɗa sur ɗa. 17Ma mdə na ku kəl ngkwarma'ni wala ngkwa'da'ni tə da ndzi sal ka mwala, da ku hara sur səli na ɗimi. Antə mda ata kəli səliyir ɗa ata nca mji, ka kədləɓəla ɗa kazhar nca mji. Tar ka sal ni ɗar bwani kamnyar biku tə tsa hara ni. 18Ma mdə na ku bara mwala na akwa sakatə tsa akwa wul thlali, mda ata kədləɓəla ɗa japu kazhar nca mjir ɗa, kamnyar da ku ɓəli tsawur kəcəkəcəkur. 19Ma mdə na ku pi ka bəbarni wala marsharni, tsa ku kəli səliyir yangkurari na kudzəha. Antə mda ata ɗi ɗa kamnyar bikər ɗa. 20Ma mdə na ku pi ka mwalar msəkərni, tsa ku kəli səliyir msəkərni, antə bikər ɗa ata nu ɗa, antə da ata mta kula ɓzər. 21Ma mdə na ku kəl mwalar ɓzərma'ni tə tsa tsu ka mpika, tsa ku hara ɗimikur ka kəli səliyir ɓzərma'ni, antə japwa ɗa ata mta kula ɓzər. 22Ka giri ɓəlatə shanga tsawayeri ka surthlipayeri arna. Ma apani wa tsəɗi natə I ata mwantə giri akwa ni ata sə nggəlar giri. 23Giri aɗiya nu surharar mji na ka ndzi akwa tsəɗi nda wa. I ata kədləɓəla ɗa ka giri ra ndzi anda, kamnyar da ku hara shanga sur cika nayeri ni antə I ku nggəlar ɗa. 24Amma I ku pəla ala giri abbər tsəɗiyir ɗa ni ata ndzi ar giri. I ata hamta ni ala giri ka giri ndzi mthlakari, tsəɗi na ɓɗaku, na ata ya su. I an MTHLAKU na Hyelər giri, na ku carɓəla giri ka namtə giri ɓɗakkarkara. 25Antə tar ka giri nggaɓəla zumzumkur na akwa daɓwa mwaɓiyayeri ka ɗikayeri na kəcəkəcari ka na dlimbur. Giri aɗiya hir ka giri ndzi sur cika atar ɓɗə kumər mwaɓi wala ɗika na dlimbur wa. I ku kurtə ka ngkərɓəla ɗa ala giri. Antə ma giri ku ɓɗa, giri ata ndzi dlimbur. 26Tar ka giri ndzi ɓɗakkarkara, kamnyar I na MTHLAKU, I an ɓɗakkarkara. I ku carɓəla giri ka pwi giri zum ta mjir duniya, kamnyar ka giri ndzi mjirna. 27Kəlara mdə sal wala mwala na ku ndzi ɗeagha wala mdər hakdzi, mda ata ndzəndzəh ni ka pela ka tsi ni. Mamshir mtərni ata ndzi ata kərari surni.”

Currently Selected:

Pristayeri 20: KNB

Highlight

Copy

Compare