Pristayeri 15

Diɗər Ashira Mdə Na Ana Səntə Dlimburkur

1MTHLAKU ku pəla aka Musa ka Haruna, 2“Pəla giri aka mjir Israila abbər, ‘Kəlara mdə sal na ka kini akwa vəi salkurari, kini nda an su na dlimbur. 3Wala ma kini nda an tsu akwa ləkəma ka səɓəla akwa dzari, wala ma tsa an ku thləthlata, tsa ku kurtə ka namtə mdə ni dlimbur. 4“Kəlara dəkəl natə mdə na ka kini ni ku pəpəi ata ka kəlara su tə tsa ku ndzəndzi ata ku ndzi su na dlimbur. 5Kəlara mdə na ku tsəkwar dəkələrni, tar ka mthlakari kəcimta kari hatərni, ka pəra. Antə tsa ata ndzi dlimbur har ka pci təri. 6Kəlara mdə na ku ndzəndzi ata su tə mdə na ka kini ni ku ndzəndzi ata, tar ka mthlakari kəcimta kari hatərni, ka pəra. Antə tsa ata ndzi dlimbur har ka pci təri. 7Kəlara mdə na ku tsəkwar mdə na ka kini ni, tar ka mthlakari kəcimta kari hatərni, ka pəra.Antə tsa ata ndzi dlimbur har ka pci təri. 8Ma mdə na ka kini ni ku tifə mtili ka pwa ata mdə laga na kəcəkəcari, tar ka mthlakari kəcimta kari hatərni, ka pəra. Antə tsa ata ndzi dlimbur har ka pci təri. 9Kəlara sərɗu natə mdə na ka kini ni ku ndzəndzi ata, sərɗu nda ku ndzi dlimbur. 10Kəlara mdə na ku tsəkwar su tə mdə ni ku ndzəndzi ata kər ata ndzi dlimbur har ka pci təri. Tsuwa kəlara mdə na ku kəl sur ndzəndzi tə tsa ku ndzəndzi ata, tar ka mthlakari kəcimta kari hatərni, ka pəra. Antə tsa ata ndzi tsu dlimbur har ka pci təri. 11Ma kəlara mdə na kəcəkəcari natə mdə na ka kini ni tsəkwar ni kula kəcimta tsiyari, tar ka mdə ndaga kəcimta kari hatərni, ka pəra. Antə tsa ata ndzi dlimbur har ka pci təri. 12Kəlara tughum həi natə mdə na ka kini ni ku tsəkwari antə tar ka mdə jaɓumta, amma ma su tə mdə nam ka udzəm mda ata yimtari daci. 13Ma sakatə kini ni ku kuri tə tsa ku mbəi, antə tsa ata səka ar vir murfa kambəla tsa kəcimta kari hatərni, ka pəra akwa yimi na ɓɗaku, kambəla tsa ndzi kəcəkəcari. 14Akwa vir na nciskur antə tsa ata sənta ali bukəlayeri suɗa wala maɗa' katapar suɗa anyarmbwar tentər tsaptədzi, ka tsa hamta ɗa aka prist. 15Antə prist ata hamta saɗaka ka da, na pal kamnyar saɗakar kiɗə tifəmtar biku, na palari tsuwa kamnyar saɗaka mbamba. Akwa laku ngəni antə prist ata kəcimta bikər mdə na ka kini ni. 16Ma yimər dza sal ku pumtadzi alari, tar ka tsa pəra ka kəcimta shanga dzari. Antə tsa ata ndzi dlimbur har ka pci təri. 17Kəlara zhaɓi wala kəsəm natə yimər dzari ni ku putədzi ata, tar ka mdə kəcimta suari. Tsa ata ndzi dlimbur har ka pci təri. 18Ma sal ku pi ka mwala ka puɓəla yimər salkurərni, japwa ɗa ata pəra ka yimi, ka ndzi dlimbur har ka pci təri. 19Ma sakatə mda mwala akwa wulthlali ar thliyarni, tsa ata ndzi akwa dlimburkur ar vir murfa. Antə kəlara mdə na ku tsəkwar ni ata ndzi dlimbur har ka pci təri. 20Kəlara su tə tsa ku pəpəi ata akwa sakar wul thlali arni suari ata ndzi dlimbur. Tsuwa kəlara su tə tsa ku ndzəndzi ata suari ata ndzi dlimbur. 21Kəlara mdə na ku tsəkwar dəkəl arni, tar ka tsa kəcimta kari hatərni ka pəra, ka ndzi dlimbur har ka pci təri. 22Kəlara mdə na ku tsəkwar su tə tsa ku ndzəndzi ata, tar ka mthlakari kəcimta kari hatərni ka pəra, antə tsa ata ndzi tsu dlimbur har ka pci təri. 23Wala an dəkəl arni wala kəlara su madi tə tsa ku ndzəndzi ata, mdə na ku tsəkwari tsa ata ndzi dlimbur har ka pci təri. 24Ma sal na ku pi ka tsa akwa sakar wul thlali arni, dlimburkur mwala ni ata ngkəi ni. Antə tsa ata ndzi dlimbur har vir murfa. Tsuwa kəlara dəkəl tə sal ni ku pəpəi ata, dəkəl ni ata ndzi dlimbur. 25Ma mdə mwala ku pumta mamshi ar vir hang akwa saka damwa zum, wala ma wul thlali arni ku təramta virayeri na kalkalari, tsa ata ndzi dlimbur tsu apa sakatə tsa akwa sakar wul thlali arni. 26Kəlara su tə tsa ku pəpəi ata, wala ndzəndzi ata akwa sakatə mamshirni akwa pumtadzi, suari ata ndzi dlimbur, tsu apa akwa sakar wul thlali arni. 27Tsuwa kəlara mdə na ku tsəkwar suayeri ngəni, mthlakari ata ndzi dlimbur. Antə tar ka tsa kəcimta kari hatərni ka pəra, ka ndzi dlimbur har ka pci təri. 28Aghəla tə mamshi ni ku thləthlata, tsa ata jikaɓəla vir murfa, kambəla tsa ndzi kəcəkəcari. 29Akwa vir na nciskur antə tsa ata sənta ali bukəlayeri suɗa wala maɗa' katapar suɗa aka prist anyarmbwar tentər tsaptədzi. 30Antə prist ni ata hamta na pal kamnyar saɗaka kiɗə tifəmtar biku ka palari kamnyar saɗaka mbamba. Apani antə prist ata harari antə I ata kəcimta aka mwala ni dlimburkurərni. 31Akwa laku ngəni antə giri ata namtə ka mjir Israila ndzi kəcəkəcari. Ma da aɗi hara apani wa antə da ata ɓzamtə mbwar vəngkər səli ali. Antə mda ata tsi ɗa.” 32Nayeri ni an tsawayeri na ata kəra mdə sal na ka kini wala mdə natə yimər dzari ar salkur ku pumtadzi, tə tsa ku ndzi dlimbur. 33Tsuwa tsa an tsawa ata kəra mwala na akwa wul thlali, ka kəlara mda sal wala mwala na ka kini, ka sal na ku pi ka mwala na dlimbur.’”

Currently Selected:

Pristayeri 15: KNB

Highlight

Copy

Compare