Pristayeri 14

Lakur Kəcimta Mji Na Ku Mbantədzi Kazhar Shilkər Kəsəm

1MTHLAKU ku pəla aka Musa, 2“Nggədza suayeri natə mdə na ka shilkər kəsəm ata harari kamnyar ka tsa ndzi kəcəkəcari. Mda ata səntə ni aka prist, 3antə prist ata ləɓəla ka tsa ata hildi ka tsa wulhə ni. Antə ma shilkə ni ku kuri, 4prist ata vu ka mdə səntə ɗikar ɓɗa na ka mpika suɗa, ata kəma duku ka udzəm seda, ka kusar puwa mamza, ka wakzhal. 5Antə prist ata vu ka mdə tsi pal akwa nca ɗikayeri ni akwa tughum ata kəra yimər zərkəu na ata hwi. 6Antə tsa ata kətə ɗika na mbil pal ni ka udzəm seda, ka kusar puwa mamza, ka wakzhal, ka tsa nciu ɗa akwa mamshir ɗika natə mdə tsi ni. 7Antə tsa ata pshingkər mamshir ɗika ni ka murfa ata mdə natə mda ata kəcimtari ni. Aghəla nda tsa ata pəla abbər ‘Mdə ni ku kəcimtadzi.’ Antə tsa ata psi ɗika na ka mpikə ni ka tsa fəla ka təra. 8Antə mdə na ku kəcimtadzi ni ata kəcimta kari hatərni, ka shimta shanga shishirni, ka pərəmta pəra, antə tsa ata ndzi kəcəkəcari. Aghəla ngəni tsa ata ngka akwa kuta di, amma tsa aɗi ata ləkwa tent ni wa tar aghəla vir murfa. 9Akwa vir na murfəkur tsa ata jaktə shimta shishir kərari, ka kumiyari, ka shishir ncari, ka shanga shishi na ku mbili ata dzari. Aghəla nda tsa ata kəcimta kari hatərni, ka pərəmta pəra, antə tsa ata ndzi kəcəkəcari. 10Akwa vir na nciskur tsa ata səntə maɗa' gam suɗa, ka mbəkəl tema na ka məvari pal kula nangka, ka mpwa kilogram makər hərhərari ka mal zaitun kamnyar saɗakar mthli, ka mal zaitun retar kwalɓa. 11Antə prist ata kətə mdə natə mda ata kəcimtari ni, ka shanga sur hamta, ka mwantə ɗa ali anyarmbwar tentər tsaptədzi. 12Antə prist ata kətə pal akwa nca gamayeri nda ka tsa paktə ka mal retar kwalɓa nda ka tsa hamta apa saɗakar ntə biku. Tsa hamta ɗa ali apa sur cauta na zum. 13Antə tsa ata tsi ɓzər gam ni akwa vəi na kəcəkəcari, vəi tə mda ana tsi mwaɓiyir saɗakar kiɗə tifəmta biku ka saɗaka mbamba. Mda ata hamta saɗakar ntə biku aka prist tsu apatə mda ana hara ka saɗakar kiɗə tifəmta biku. Tsa an saɗaka na ɓɗakkarkara. 14Prist ata kətsa bwadukwa mamshir gam ni ka tsa fadza aka mnya thləma mdə ni na təbwa mazəm, ka aka mpəl ola ar kuleng tsiyari na təbwa mazəm, ka aka mpəl ola ar səlari na təbwa mazəm. 15Prist ni ata kətə bwadukwa mal ni ka puta ata kuta tsiyari na abwa matsəkar. 16Tsa ata nciu kuleng tsiyari na abwa mazəm ka pshitə təbwar tent na ɓɗakkarkara ni ka murfa. 17Mal na ku mbili akwa kuta tsiyari tsa ata fadza aka mnya thləma mda tə mda ata sə psəmnyari abbər tsa kəcəkəcari ni, ka aka kuleng tsiyari na ola təbwa mazəm, ka aka mpəl ola ar səlari na abwa mazəm ata kəra mamshir saɗakar ntə biku ni. 18Prist ata fadza mambila mal na ata kuta tsiyari ni ata kəra mdə natə mdə ku kəcimta ni ni. Apani antə prist ata harari ka kələmta bikər mdə ni akəma MTHLAKU. 19Prist ata hamta saɗakar kiɗə tifəmtar biku, ka nutə suayeri na ar kəcə biku kamnyar mdə ni. Aghəla nda tsa ata tsi mwaɓiyir saɗaka mbamba ni, 20ka hamta ata kəma duku ka saɗakar mthli ata bagaɗi saɗaka. Akwa laku ngəni antə prist ata kəcimta bikər mdə ni, antə tsa ata ndzi kəcəkəcari. 21Amma ma tsa mdər bwani tə tsa amzhi wutə su nayeri ni wa, tsa ata mzhi səntə ɓzər gam pal kamnyar saɗakar ntə biku ka mdə hamta apa sur cauta na zum. Tsuwa tsa ata səntə mpwa kilogram pal na hərhərari ka mal zaitun kamnyar hara saɗakar mthli, ka mal retar kwalɓa adza. 22Tsa ata səntə bukəlayeri suɗa wala maɗa' katapar suɗa, duku kamnyar saɗakar biku, dukwari kamnyar saɗaka mbamba. 23Mdə ni ata səntə ɗikayeri ni aka prist akwa vir na nciskur anyarmbwar tentər tsaptədzi aka MTHLAKU, antə mda ata kəcimta ni. 24Prist ata kətə gam ar saɗakar ntə biku ka paktə ka mal zaitun ka hamta ɗa apa saɗakar cauta na ɓɗaku laga aka MTHLAKU. 25Tsa ata tsi gamər saɗakar ntə biku ni ka kətsə mamshari ka fadza aka mnya thləm na təbwa mazəma mdə ni, ka aka mpəl ola ar tsiyari na təbwa mazəm, ka ata mpəl ola ar səlari na təbwa mazəm. 26Prist ata putə bwadukwa mal ni ata kuta tsiyari na abwa matsəkar, 27ka pshitə ka kuleng tsiyari na abwa mazəm, ka murfa təbwar tentər MTHLAKU. 28Bwadukwa mal na ku mbili akwa tsiyari tsa ata fadza aka mnya thləm na təbwa mazəma mdə ni, ka ata mpəl ola ar tsiyari na təbwa mazəm, ka ata mpəl ola ar səlari na abwa mazəm, ata vəi tə mdə putə mamshir saɗakar ntə biku ni. 29Mambila mal na akwa tsiyari ni, tsa ata pungkərari ata kəra mdə ni, Apani antə mda ata kiɗə MTHLAKU ka tsa kələmta alari bikərni. 30Antə mdə ni ata hamta bukəlayeri suɗa wala kataparayeri suɗa, kəlara natə tsa ku mzhi wutari. 31Pal kamnyar kiɗə tifəmta biku ka na palari kamnyar saɗaka mbamba tə mda ata hamtari ata kəma duku ka saɗakar mthli. An tsa laku natə prist ni ata hamta saɗakar kələmta biku aka mdə ni akəma MTHLAKU. 32Ngəni an su tə mdə na ka shilkər kəsəm na ɗimi ni ata harari, mdə natə wutərni an raka.”

Mpururu Akwa Kutambwa

33MTHLAKU ku pəla aka Musa ka Haruna abbər, 34“Ma sakatə giri ku ləkwa tsəɗi Kanana natə I ata hamta ala giri ka tsa ndzi ar giri ka kəra giri, I ata vu ka pururu səɓəla akwa kutakəyayeri ar giri. 35Antə mthlakər kəi na ka pururu ni ata mwari adzə prist ka pəla alari abbər, ‘I wutə su laga apa pururu ata dza mbwa aviyarngkiya.’ 36Antə prist ni ata vu ka mdə fwaɓəla shanga su na akwa kutakəyirni ta shanga ɗa andzi dlimbur, kambəla tsa mwari ra wulha pururu ni. Aghəla nda antə prist ata ləvəi 37ka tsa wulha. Ma tsa wuta abbər pururu ni ku ngka apa hakciri wala ghəngnga akwa ɓɗə dza mbwa ni, 38antə tsa ata ləɓəla ka tsau kəi ni mnyar vir murfa. 39Akwa vir na murfəkur prist ni ata jaktə ngka ka wulha. Ma pururu ni ku ndlətə dza shanga mbwayeri na akwa kəi ni, 40antə tsa ata vu ka mdə fwaɓəla pelayeri natə pururu ni ku tsəkwari ka mdə ra pumta ɗa aɓəla ata hildi akwa vəi na ka diɗi. 41Aghəla nda tsa ata vu ka mdə hirəmta shanga dza mbwar kəi ni na avivi ka fatə kara pumtari shang aɓəla ata hildi akwa vəi na ka diɗi. 42Antə da ata səntə pelayeri damwa ka pu ɗa akwa vəyayeri natə mdə ku fagaɓəla pelari ni. Mda ata fatsə həi bilən ka fəi dza mbwa ni kəgari. 43Ma pururu ni ku jaktə səɓəla ka damwa akwa kəi ni, aghəla tə mdə ku fagaɓəla pelayeri ni ka hirəmta dza mbwayeri ni ka fi, 44antə prist ata jaktə ra wulhari. Ma pururu ni ku vərvəra ka ndlətə kəi ni, ata ndzi pururu na ɗimi ni, antə kəi ni ku ndzi dlimbur. 45Antə tar ka mdə ndlamta kəi ni, ka mdə fwaɓəla pelayeri kəga udzəmayeri ka shanga həyir fəi dza mbwa ni ka mdə mwanta aɓəla ata hildi ka pumta akwa vəi na dlimbur. 46Kəlara mdə na ku ləkwa kəi ni sakatə mdə ku hartə nda, mthlakari ata ndzi dlimbur har ka pci təri. 47Tsuwa kəlara mdə na ku pəpəi wala səm su akwa kutakəi ni, tar ka tsa kəcimta kari hata arni. 48Amma ma prist aɗi wutə pururu ni jaktə səɓəla aghəla tə mdə ku jaktə fəi dza kəi nda wa, tsa ata pəla abbər kəi ni ku ndzi kəcəkəcari kamnyar pururu ni ku kuri. 49Ma mda a bara ka kəi ni ndzi kəcəkəcari, mda ata səntə ɗikayeri suɗa, ka udzəm seda, ka kusar puwa mamza, ka wakzhal. 50Tsa ata tsi ɗika pal ata kəra tughum na ka yimi na ndəlang akwa. 51Aghəla nda tsa ata kətə udzəm seda, ka wakzhal, ka kusar puwa mamza, ka ɗika na ka mpikə ni, ka nciu ɗa akwa mamshir ɗika tə mdə tsi ni, ka akwa yimi na ɓɗaku, ka pshingkər aka kəi ni ka murfa. 52Apani antə tsa ata kəcimta kəi ni ka mamshir ɗika, ka yimi na ɓɗaku, ɗika na ka mpika, ka udzəm seda, ka wakzhal, puwa mamza, 53antə tsa ata psi ɗika na ka mpikə ni ka tsa fəla ka təra kazhar kuta di ka ndzi msərmsərari. Akwa laku ngəni antə tsa ata kələmta bikər kəi ni, antə kəi ni ata ndzi kəcəkəcari.” 54Nayeri ni an tsawayeri na ata kəra shilkər kəsəm dza na ɗimi, apa ɓəɓa 55wala ma pururu ku lətə kari hata, wala dza mbwa, 56wala kəthla, wala kuɗu wala huhwala. 57Tsawu nayeri ni ata ncaɓəla laku natə mda ata mzhi nggaɓəla su na kəcəkəcari ka su na aɗi kəcəkəcari wa. Tsa an tsawu na ata kəra pururu.

Currently Selected:

Pristayeri 14: KNB

Highlight

Copy

Compare