Baɗitari 47

Yakub Ku Ndzi Akwa Bwar Goshen

1Antə Yusuf mwari adzə kuthli ni ka pəla alari, “Babana, ka maɗama'na, ka ciɓayeri ar kwi, kəga təma, kəga thla, ka shanga sur ɗa ku thlata ahar Kanana ka si. Antə kulini da akwa Goshen.” 2Antə Yusuf fatə mji ntəfu akwa nca maɗada'ni ni ka ra ncantə ɗa aka kuthli. 3Antə kuthli pəla aka maɗada'ni ni abbər, “Man kəthlər ar giri ri?”

Antə da pəla alari, “Ka barkar nga! Yeru ana ɓəla mwaɓi, tsu apatə kəkayeri ar yeru ku hara. 4Yeru an mətəpiyayeri na si kamnyar ndzi akwa tsəɗi ngəni. Kamnyar anda akwa tsəɗi Kanana ni vəi ɓəla aɗi kəra wa, kamnyar mi ku hara mwavər ka duna anda. Antə zhar yeru bu usa, ka yeru ndzəndzi akwa Goshen ni.”

5Antə kuthli ni pəla aka Yusuf, “Kulini təng tə baba' nga ka maɗada' nga ku si ka da ndzi adzə nga, 6tsəɗi Masar ni akwa tsiya ga. Antə mwari ra pwi baba' nga kəga maɗada' nga akwa Goshen, vəi na ɓɗakta shang akwa tsəɗi ni. Tsuwa ma mji aɗi na kalkal tə ga asənda akwa nca ɗa, kara vu ɗa ka da wula ali mwaɓiyayeri arna.”

7Antə Yusuf ku səntə baba'ni Yakub akəma kuthli, ka ncantə ni alari. Antə Yakub ku kiɗə barka aka kuthli ni. 8Antə kuthli ni yu Yakub abbər, “Məva gə yiɗau ri kulini?”

9Antə Yakub pəla, “Ka barkar nga, hangkur məvi akwa duniya ni an aru pal ka makkumari. Məvi yiɗauwa daci, amma ncir bwani. Məvi aɗi mzhitə hangkur məva kəkayeri arna akwa duniya wa.” 10Antə Yakub ku kiɗə barka aka kuthli, ka salamtə ni, ka ləɓəla. 11Antə Yusuf ku pwi baba'ni kəga maɗa'ma'ni akwa Masar. Antə tsa na ɗa bwa laga na ɓɗakta shang akwa tsəɗi ni, ahar Rameses, tə da ndzəndzi akwa, tsu apatə kuthli ku pəla. 12Antə Yusuf ku hamta susəma aka baba'ni, kəga maɗa'ma'ni, ka aka shanga mjir kutakəyir baba'ni, kalkal ka hangkurər maɗankyarər ɗa na raka raka.

Kəthlər Tə Yusuf Ku Hara Akwa Sakar Mi

13Akwa saka ndaga akwa shanga tsəɗi ni, susəma aɗi wa, kamnyar mi ni ku hara mwavər, har tə dza mjir tsəɗi Masar ka na ahar Kanana ku kəmtadzi ka duna kamnyar mi. 14Tsuwa Yusuf ku tsaptə shanga kwaba natə mjir Masar ka mjir Kanana sə masə mthli kəgari ni, ka mwantə kwaba ni akwa kəyir kuthlikur. 15Sakatə shanga kwabar mjir Masar ka mjir Kanana ku kuri, antə shanga mjir Masar si adzə Yusuf, ka pəla alari, “Na ala yeru susəma! Kamnyar mi tə yeru ata mta, amma təng ga akwa wul yeru ka nca nə ri? Ai kwabar yeru ku kuri.”

16Antə Yusuf pəla ala ɗa abbər, “To, na giri ali mwaɓiyayeri ar giri, kəi na ala giri susəma ata vəyari, ma kwabar giri shang ku kuri.” 17Antə da ku səntə mwaɓiyayeri arɗa aka Yusuf, antə tsa ku na ala ɗa susəma ata vəya takwayeri, kəga kwi, kəga thla, kəga kwarayeri arɗa. Apani məva nda tsa hamta ala ɗa susəma ata vəya mwaɓiyayeri arɗa shang.

18Sakatə məva na ndaga ku kuri, səɓəla məvari antə da si adzə ni ka pəla alari, “Mdərkəi, yeru amzhi ɗuwari ala gə kuta yeru wa. Yeru ku tsi shanga kwabar yeru, tsuwa mwaɓiyayeri ar yeru ku ndzi ar nga. Ma kumər dza yeru ka fakayeri ar yeru wa, su damwa aɗi na ku mbili akəla yeru wa. 19Ga aɗiya zhari yeru ka yeru kurəmtadzi ka fakayeri ar yeru ni ndzi kula ampani, tə nca gə tsu aɗi wa. Mastə yeru kəga fakayeri ar yeru ata vəya susəma, antə yeru ata ndzi mafar kuthli. Na ala yeru mthli tə yeru ata səmari, ka hwulfa tə yeru ata thləkari, ta yeru amta ka fakayeri na akwa tsəɗi ni tsuwa ndzi shizha.”

20Apani antə Yusuf ku masɓəla shanga fakayeri na akwa tsəɗi Masar aka kuthli. Antə shanga mjir Masar ku ɗəgələmta fakayeri arɗa, kamnyar tə mi ni ku hara mwavər. Antə fakayeri ni ku ndzi ar kuthli. 21Antə Yusuf ku namtə shanga mjir Masar tə da ndzi mafa, baɗita akwa kəla Masar na abwani har ka mwanta akwa kəla Masar na abwanda. 22Tar fakayeri na ar pristayeri antə tsa aɗi masɓəla wa, kamnyar tə arɗa kuthli ana na ala ɗa susəma na ata mzhi ɗa tədəku. Antə apani da aɗi ɗələmta fakayeri arɗa wa. 23Antə Yusuf pəla aka mji ni, “Kulini I ku kurtə masɓəla giri kəga fakayeri ar giri aka kuthli. Antə nggədza giri hwulfa, ka giri ra thləkamtari akwa fakayeri ni. 24Amma ma sakar fəi sur fakəu ku hara, ka giri hamta duku akwa ntəfu aka kuthli. Bwa na nfwar ni ata ndzi ar giri, kamnyar hwulfa tə giri ata jaktə thləkamtari akwa faku, ka tsuwa kamnyar susəmər giri, kəga kutakəyir giri, kəga maɗa' giri na raka raka.”

25Antə da pəla alari, “Mdərkəi, ga ku mbantə mpika yeru! Antə yeru ata ndzi mafar kuthli, kamnyar ga ku hara ɓɗakkur ala yeru.” 26Apani antə Yusuf ku vu gari ni akwa tsawur tsəɗi, abbər duku akwa kuta ntəfu ar sur fakəu na akwa tsəɗi Masar ata ndzi aka kuthli. Tsuwa tsawu ngəni tsu aɗi har ba ashina. Tar fakayeri na ar pristayeri daci an aɗi ndzi ar kuthli wa.

Su Na Aghəlta Shang Tə Yakub Kiɗa

27Apani antə mjir Yakub ku ndzəndzi akwa tsəɗi Masar akwa bwar Goshen, har tə da ku wutə su akwa vəi nda, ka wutə ləkəma, ka yatədzi hang ka duna. 28Tsuwa Yakub ku ndzəndzi akwa tsəɗi Masar məvari kumnya murfa. Antə hangkur ar məva Yakub akwa duniya an aru pal ka nfwarkumari ka murfa.

29Sakatə sakar mtər Yakub ku hara kudzəha, antə tsa kəga ɓzərni Yusuf ka pəla alari, “Hara ali mdəkur bu, ka gə hangkir tsiya ga akira kiɗi. Ka gə kahyel ali ka jirkur abbər ga aɗi ata harəmta ra akwa Masar wa, 30amma ka gə mwantə ra kəi ra pəpəi adzə kəkayeri arna. Ka gə kəɓəla ra kazhar Masar, ka gə ra harəmta ra akwa vəi tə mdə harəmta kəkayeri arna akwa.” Antə Yusuf pəla, “I ata harari tsu apatə ga ku pəla.”

31Antə Yakub pəla, “Kahyel ali!” Antə Yusuf ku kahyel alari. Antə Yakub zuzuri, ka vətə kərari ata bwa kəra dəkələrni, ka vəngkər səli aka Hyel.

Currently Selected:

Baɗitari 47: KNB

Highlight

Copy

Compare