Baɗitari 46

Yakub Ka Mjir Kutakəyirni Ku Mwari Ahar Masar

1Antə Yakub ku fatə shanga su tə tsa kəgari ka psi laku. Sakatə tsa mzhitə Beyersheba, antə tsa hamta saɗakayeri aka Hyelər baba'ni Ishaku. 2Antə Hyel gari aka Yakub akwa suni, ka pəla, “Yakub, Yakub!”

Antə tsa shinau alari abbər, “Nggədza ra.”

3Antə Hyel pəla, “I an Hyel, Hyel na ar baba' nga. Ga aɗiya thlivər mwari ahar Masar wa, kamnyar anda antə I ata namtə durər nga ka tsa ndzi dur na ola. 4I ata ləghəi akwa Masar ata kəma duku ka ga, kəi jaktə səɓəla ka ga akwa Kanana. Ma sakar mtər nga ku hara tsuwa, Yusuf an ata sə hartə nca ga.”

5Antə Yakub ku thlatə kazhar Beyersheba, tə maɗashilərni ku kətə baba' ɗa Yakub, ka fatə mwankir ɗa, kəga maɗankyarər ɗa na raka raka ni, akwa wagənayeri natə kuthli thlenta abbər ka mdə kətə ni akwa ni. 6Tsuwa da ku fatə mwaɓiyayeri arɗa, ka shanga suayeri tə da wuta akwa tsəɗi Kanana, ka təra mwari ahar Masar kəgari. Antə Yakub ku fatə shanga mjir nyarmbwarni, 7watau maɗashilərni, ka kəkayeri arni na maɗashili, ka maɗa'ni na maɗankwi, ka kəkayeri arni na maɗankwi, ka shanga mjir nyarmbwarni ka si ka da akwa Masar.

Mjir Nyarmbwar Yakub

8Ngəni an thləma mjir nyarmbwar Yakub na mwari akwa Masar.

Ruben na yarakəmar Yakub,

9Maɗashilər Ruben an,

Hanok, ka Pallu, ka Hezron, ka Karmi.

10Maɗashilər Simeyon an,

Yemuwel, ka Yamin, ka Ohad, ka Yakin, ka Zohar, ka Shawulu natə ngkwar Kanana an yaɓəla.

11Maɗashilər Lawi an,

Gershon, ka Kohath, ka Merari.

12Maɗashilər Yahuda an,

Er, ka Onan, ka Shela, ka Perez, ka Zera. Amma Er ka Onan ku mti tsu akwa tsəɗi Kanana.

Maɗashilər Perez an,

Hezron ka Hamul.

13Maɗashilər Issakar an,

Tola, ka Puva, ka Yashub, ka Shimron.

14Maɗashilər Zebulun an,

Sered, ka Elen, ka Yahleyel.

15Ngəni an thləma maɗashili tə Leya yaɓəla aka Yakub ahar Paddan Aram, ata kəra ngkwarni na Dina ni. Shanga maɗa'ni shili ka maɗankwi ata kəma duku an mji makkumari ka makər.

16Maɗashilər Gad an,

Zifiyon, ka Haggi, ka Shuni, ka Ezbon, ka Eri, ka Arodi, ka Areli.

17Maɗashilər Asher an,

Imna, ka Ishva, ka Ishvi, ka Beriya.

Tsuwa ngkwarma' ɗa aɗi ka thləmari Sera.

Maɗashilər Beriya an,

Heber ka Malkiyel.

18Ngəni an thləma maɗashili natə Zilpa yaɓəla aka Yakub. Zilpa an ngkwar mafa tə Laban hamta aka ngkwarni Leya ni akwa sakar kəldzərni ni. Hangkurər shanga maɗashilərni an kumnya ngkwa.

19Maɗashilər Yakub natə da ya ka mwalankiɗa Rahila an,

Yusuf ka Benjamin.

20Tsuwa anda akwa tsəɗi Masar Asenath na ngkwar Potifera na prist ar On ku yaɓəla maɗashili suɗa aka Yusuf. Thləma ɗa an

Manasse ka Ifrayim.

21Maɗashilər Benjamin an,

Bela, ka Beker, ka Ashbel, ka Gera, ka Naaman, ka Ehi, ka Rosh, ka Muppim, ka Huppim, ka Ard.

22Ngəni an thləma kəkayeri ar Yakub tə tsa wuta atar mwalankiɗa Rahila, da an maɗashili kumnya nfwar.

23Ɓzər sal na ar Dan an,

Hushim.

24Maɗashilər Naftali an,

Yahziyel, ka Guni, ka Yezer, ka Shillem.

25Mji ngəni murfə ni an maɗashili tə Bilha yaɓəla aka Yakub. Bilha an ngkwar mafa tə Laban na aka ngkwarni Rahila akwa sakar kəldzərni.

26Hangkur shanga mjir Yakub na mwari akwa Masar, watau mji na hwulfərni, an mji ngkwakumari ka ngkwa, bamnda mwankir maɗashilərni. 27Tsuwa maɗashilər Yusuf natə mdə yaɓəla alari ahar Masar an mji suɗa. Antə shanga mjir Yakub na mwari akwa tsəɗi Masar an mji murfəkumari.

Yakub Ka Mjir Kutakəyirni Akwa Masar

28Antə Yakub thlentə Yahuda ka tsa mwari adzə Yusuf akəmata da, ka tsa pəla alari ka tsa ncanta alari lakur mwari akwa Goshen ni. Sakatə da ku si akwa bwar Goshen ni, 29antə Yusuf ɗəmhə wagənər taku arni, ka ləmta ahar Goshen ni kamnyar kəɓa ka baba'ni Yakub. Təkəma sakatə tsa mzhitə vəi ni, antə tsa mwari ka putə tsiyari ata wulya baba'ni, ka fəi akwa tuwa ata wulyari ni. 30Antə Yakub pəla aka Yusuf, “Kulini ja wala I an ata mta, təng tə I ku wutə nga, ka sənda abbər gə tsu aɗi ka mpikə ni.”

31Aghəla nda antə Yusuf pəla aka maɗada'ni ka mambila mjir kutakəyir baba'ni abbər, “I ata ra pəla aka kuthli abbər, ‘Maɗama'na kəga shanga mjir kutakəyir baba'na na akwa tsəɗi Kanana ni ku si adzə ra. 32Tsuwa da mjir ɓəla mwaɓi, kamnyar təng waci da ana pwi thla. Antə da ku si ka ciɓayeri ar kwi kəga təma, kəga thla, ka shanga sur ɗa.’ ”

33“Antə ma sakatə kuthli ku kəga giri ka pəla, ‘Man kəthlər ar giri ri!’ 34Ka giri pəla alari, ‘Mdərkəi, yeru ana ɓəla mwaɓi təng akwa kustakurər yeru har ka vədza aka pci na ashina, shanga yeru kəga kəkayeri ar yeru.’ Ma giri ku pəla ala ri apani, tsa ata zhar giri ka giri ndzəndzi akwa bwar Goshen, kamnyar mjir Masar ana cikə kəlara mdə na ku ndzi mdər ɓəla.”

Currently Selected:

Baɗitari 46: KNB

Highlight

Copy

Compare