Baɗitari 44

Mdə Ku Wutə Kapər Gwamna Akwa Bufər Benjamin

1Akwa saka ngəni antə Yusuf tsawa aka mdə na ola ata kəra kutakəyirni abbər, “Ka gə nghyantə bufayeri ar mji ngəni ka susəma hang apatə da ata mzhi kətari. Ka gə vu kwabar kəlara mda akwa nca ɗa ni akwa mnya bufərni. 2Ka gə vu kwapərna na ar adzərfa ni akwa mnya bufər gajir ɗa ni, kara paktə ka kwabar mthlirni ni.” Antə tsa ku hara tsu apatə Yusuf pəla alari. 3Sakatə viri akwa kura ɗəɗəpə mbing, antə mdə salamtə ɗa tə da ləkwa laku kəga kwarar ɗa. 4Sakatə da ku ləɓəla kazhar bərni ni, ka ɗar mwa raka, antə Yusuf ku pəla aka mdə na ola ata kəra kutakəyirni ni abbər, “Mwa taktar kara ra kəli mji ni. Ma sakatə ga ku kəli ɗa, ka gə pəla ala ɗa, ‘Kamnyar mi tə giri akwa ntə ɓɗakkur ka ɗimikur ri? 5Kamnyar mi tə giri həltə kwapər adzərfa ar mdərkəyirna ri? Nənga ngəni aɗi an kwapə tə tsa ana sa su akwa wa ri? Tsuwa aɗi ka kwapə ngəni antə tsa ana ndzəl su wa ya? Giri ku hara su na ɗimi akwa su ngəni tə giri hara ni.’ ”

6Sakatə tsa ku kəli ɗa antə tsa gari ala ɗa tsu apani. 7Antə da pəla alari, “Mdərkəi, kamnyar mi tə ga ata ngkər gari apani ri? Ka Hyel ngkatə ta yeru ahara jili su apani! 8Ai wala kwaba tə yeru wuta akwa mnya bufayeri ar yeru ma, yeru ku thlata akwa tsəɗi Kanana ka ngka kəgari ala ga. Ka apa madi tə yeru ata həltə adzərfa wala dinar akwa kəyir mdərkəyir ngə ri? 9Mdərkəi, kəlara mdə tə ga ku wutə su ngəni akəlari, ka mdə tsi ni. Antə mambila yeru ata ndzi mafar nga.”

10Antə mdə ni pəla, “To, ka tsa ndzi apa su tə giri pəla ni. Mdə natə mdə ku wutə kwapə ni akəlari, tsa ata ndzi mafarna, amma mambila giri ata mzhi təra kula su tsəkwar giri.” 11Təkəma təng kəlara mdə kəli bufərni ata di ka mpələmta mnyari. 12Antə mdə ni ləkwa pakari, tsa baɗita ata mdə na olər ɗa ka tsikərari ata mdə na rakari. Antə tsa wutə kwapə ni akwa bufər Benjamin. 13Antə da kukwahəmta ləptayeri arɗa kamnyar ɗəffa ɗa na ku ɓzi. Antə waskəi putə kələrni ata kwararni, tə da ngka akwa kuta bərni ni.

14Sakatə Yahuda ka maɗama' ni jaktə ngka aviyar Yusuf ni, da wutə ni tsu avi. Antə da ku ndla ata di akəma Yusuf. 15Antə Yusuf pəla ala ɗa, “Ngəni man su tə giri hara nə ri? Giri aɗi sənda abbər mda apa iya ata mzhi nggaɓəla su na hara atar hakdzi wa ya?”

16Antə Yahuda pəla, “Mdərkəi, man su tə yeru ata mzhi pəlari ja? Gari aɗi tə yeru ata pəlari wa. Kamnyar laku aɗi tə yeru ata mzhi kəcimta kər yeru wa. Kamnyar Hyel ku kurtə wutə vəi shar yeru. Kulini shanga yeru ata ndzi mafar nga, yeru kəga tsa tə mdə wutə kwapu akwa tsiyari ni.”

17Amma Yusuf pəla, “Ka Hyel ngkatə ta I ahara su apani! Təng mdə tə mdə wutə kwapə ni akəlari daci an ata ndzi mafar na. Amma ar giri, giri ata mzhi ngka adzə baba' giri lapiya.”

Yahuda Ku Kiɗə Ka Mdə Psi Alari Benjamin

18Antə Yahuda ləmta adzə Yusuf ka pəla alari, “Mdərkəi, ndzi kəi pəla su laga duku bu ala ga. Usa, ɗəffa ga aɗiya ɓzi adzə ra wa, kamnyar tə gə kalkal ka kuthli. 19Mdərkəi, sakatə gə yu yeru abbər, ‘Baba giri aɗi ya, wala ɓzərma' giri?’ 20Antə yeru pəla ala ga abbər, ‘I, Baba yeru aɗi, mdə halhala laga. Tsuwa ɓzərda' yeru aɗi tə mdə yaɓəla aka baba' yeru akwa halhalkurərni. Arni ɓzərma'ni ku mti, antə tsa duku an mbili akəla mama'ni, tsuwa baba'ni hir ni.’ 21Antə ga pəla ala yeru, ‘Səntə giri ni ali, kəi wutə ni.’ 22Antə yeru pəla ala ga, mdərkəi abbər, ‘Ɓzəngkyarni amzhi tərardzi kazhar baba'ni wa. Kamnyar ma tsa ku təra kazhar baba'ni ni, baba'ni ata mta.’ 23Amma gə pəla ala yeru abbər, ‘Ma giri aɗi si kəga gajir giri ni wa, giri aɗi ata jaktə wutə kəmi kəra wa.’ ”

24“Saka tə yeru ngka adzə mafar nga na baba' yeru, antə yeru jikata alari su tə gə pəla ala yeru ni. 25Aghəla nda antə baba' yeru pəla, ‘Jaktə ngka giri, ka giri masta ala mburu susəma raka.’ 26Amma yeru pəla alari, ‘Yeru amzhi mwari wa. Ma ɓzərda' yeru na gajir yeru ni ata mwari kəga yeru, yeru ata mwari. Kamnyar ma gajir yeru ni aɗi adzə yeru wa, yeru aɗi ata mzhi wutə kəma mdə ni wa.’ 27Antə mafar nga na baba' yeru pəla ala yeru, ‘Giri asənda abbər Rahila na mwalarna ku yaɓəla ali maɗashili suɗa. 28Pal akwa nca ɗa ku təra kazhar ra, antə I kəta abbər, aɗi təra kəra mwaɓiyir mtaku an kukwahəmta ni wa, kamnyar I aɗi jaktə wutə ni kəra wa. 29Antə ma giri ku jaktə kətə ngəni akəli, tsuwa ma su laga ku wutə ni, to, giri ata hara ka shishi mwapu arna ni ləkwa kula ka ɗəffə ɓzəɓza.’ ”

30“Antə kulini, I amzhi ngka adzə mafar nga na baba'na ni kula ɓzər ni wa. Kamnyar apatə hangkalari ku nutə ɓzər ni ka duna ni, 31ma tsa wuta abbər ɓzər ni aɗi adzə yeru wa, tsa ata mta. Antə yeru na mafar ngə ni ata hara ka shishi mwapu ar baba' yeru ni ləkwa kula ka ɗəffə ɓzəɓza. 32Tsuwa I an kətə alkawal ar wul ɓzər ni akəma baba'na. I pəla, ‘Ma I aɗi ngka ka tsa ala gə wa, ka bikari ndzi ata kəri akwa shanga ndzəndziyir mpikəi.’ 33Antə kulini, I akwa kiɗa abbər ka gə dlar ra ka I an ndzi azi apa mafar nga ata vəya ɓzəngkyar ni, ka ɓzəngkyar ni ngka kəga maɗada'ni. 34Kamnyar apa madi tə I ata mzhi ngka adzə baba'na, kula ɓzər ni adzə ra ri? Awa, I aɗi ata sə nggitə wul jili matsifa na ata wutə baba'na wa.”

Currently Selected:

Baɗitari 44: KNB

Highlight

Copy

Compare