Baɗitari 43

Maɗama' Yusuf Ku Ngka Ahar Masar Ka Benjamin

1Akwa saka ngəni, mi ni ku vərvər hara mwavər akwa tsəɗi ni. 2Sakatə mjir kutakəyir Yakub ku kuri susəmər ɗa natə da thlatə kəgari ahar Masar ni, antə Yakub pəla aka maɗa'ni, “Jaktə mwar giri ahar Masar, ka giri masta ala mburu susəma raka.” 3Amma Yahuda pəla alari, “Diya mdə ni ku tsaktə yeru ka duna abbər ma yeru ku ngka kula gajir yeru ni, to, yeru aɗi ata wutə kəmari wa. 4Ma ga ata hir ka yeru mwari ata kəma duku kəga ɓzərma' yeru ngəni, yeru ata ləghəi, ka yeru masta ala gə susəma. 5Amma ma aɗi ata hara apani wa, yeru aɗi ata mwari wa, kamnyar mdə ni ku pəla ala yeru abbər, ma yeru aɗi mwari kəga ɓzərma' yeru ni wa, yeru aɗi ata wutə kəmari wa.”

6Antə Yakub pəla, “Kamnyar mi tə giri akwa ɗi ra apani nə ri, tə giri ata pəla aka mdə ni abbər ɓzərma' giri damwa aɗi ni?”

7Antə da shinau ka pəla, “Ai mdə ni an yu su ata kəra yeru kəga yangkura yeru, abbər, ‘Baba giri tsu aɗi ya? Tsuwa ɓzərma' giri damwa aɗi ya?’ Apani amsar suayeri tə tsa yu ni antə yeru hamta alari daci. Apa madi tə yeru ata mzhi nggaɓəla abbər tsa ata sə pəla, ‘Səntə giri ɓzərma' giri ni’ ri?”

8Antə Yahuda pəla aka baba'ni, “Vu ɓzərni akwa tsi, ka yeru psi laku, ta mi asə kurəmta mburu, yeru, kəga ga, kəga maɗankyarər yeru na raka raka. 9I ku kətə wul lapiyakurərni akwa tsi, akwa tsi antə ga ata bara ni. Ma I aɗi ngka ka tsa ala ga, kəi psi ni akəma gə wa, to, ka watsəɓər bikari ndzi ata kəri har ba saka madi. 10Kamnyar kulini ma abbər mburu ana aɗi shamta saka wa, sakani yeru ku mwari har ka ngka ka suɗa.”

11Antə Yakub na baba' ɗa pəla ala ɗa, “Ma ku ndzi dwali apani, to, ɗəmtsə giri yar sur fakəu na ɓɗakɓɗaku ar tsəɗi ni akwa bufayeri ar giri, ka giri mwanta aka mdə ni apa sur cauta ar giri. Ka giri mwanta alari mal na kuzəkər kuri kəta, ka cirməma, ka dəmwar, ka mur, ka munya nfur pistakiyo, ka munya nfur almon, raka raka. 12Ka giri kətə hangkur kwaba tə giri mwari kəgari ni ka bwa suɗa. Ngka giri ka kwaba natə da pu ala giri akwa mnya bufayeri ar giri ni, kamnyar nuhum kəra ɗa an təramta. 13Tsuwa kətə giri ɓzərma' giri, ka giri psi laku, ka ngka adzə mdə ni. 14Ka Hyel na ka Duna ta Shang hara ka mdə ni kətadzə giri, ka tsa psi ala giri ɓzərma' giri, ka giri ngka ka tsa ka tsuwa Benjamin ata kəma duku. Amma arna, ma I ku ndzi abbər tar kəi ni ka maɗankyarərna, to, I ku kurtə ni ka da.”

Maɗama' Yusuf Ku Jaktə Kəɓa Ka Tsa

15Antə da ku kətə cautə ni, tə da kətə hangkur kwaba ni ka bwa suɗa, ka kətə Benjamin. Antə da psi laku ka təra ləghəi ahar Masar, ka mwari akəma Yusuf.

16Sakatə Yusuf wutə ɗa ka Benjamin adzə ɗa, antə tsa pəla aka mdə na ola ata kəra kutakəyirni, “Səvi ka mji ngəni, ka gə thlamta wulya mwaɓi, ka gə ɗəmhə susəma, kamnyar mji ni ata səm susəmər təpci ata kəma duku ka iya.” 17Antə mdə ni ku hara tsu apatə Yusuf ku pəla alari, tə tsa səvi ka mji ni akwa kutakəyir Yusuf.

18Amma mji ni ku thlivəra sakatə mdə səntə ɗa akwa kəyir Yusuf. Antə da pəla, “Ngəni diya mdə havi mburu azi ni kamnyar kwaba tə mdə jaktə pu ala mburu akwa bufayeri ar mburu akwa səyir mburu na ntangkəma ni. Tsa akwa bara sur vətə ka tsa ngkəi mburu, ka tsa namtə mburu mafa, ka tsa dlutsə kwarayeri ar mburu.” 19Antə mji ni ləmta adzə mdə na ola ata kəra kutakəyir Yusuf ni, ka gari ka tsa anyarmbwa. 20Da pəla alari, “Mdərkəi, yeru ku si azi ka pal kamnyar masə susəma. 21Amma sakatə yeru ku mzhitə vəi fəliyir yeru, ka kəlar bufayeri ar yeru, təng yeru wutə kwabar waskəi akwa mnya bufərni, tsuwa kwaba ni cipcippu. Antə yeru ku ngka ka kwaba ni akəla yeru. 22Tsuwa yeru ku si ka kwaba damwa kamnyar jaktə mastə susəma. Yeru aɗi səndə mdə na pu ala yeru kwaba ni akwa bufayeri ar yeru ni wa.”

23Antə mdə ol ni shinau ka pəla, “Peri giri hangkala giri, giri aɗiya thlivər wa. Sakani Hyelər giri, Hyelər baba' giri an pu ala giri gəna ni akwa bufayeri ar giri. Kamnyar ai I ku dlu kwabar giri.” Antə tsa səɓəla ka Simeyon ala ɗa. 24Mdə ni ku ləvəi ka mji ni akwa kutakəyir Yusuf, ka na ala ɗa yimi tə da kəcimta səla ɗa, ka na thladli aka kwarayeri arɗa. 25Antə da ɗəmhə cautər ɗa aka Yusuf ma tsa ku səvi təpci, kamnyar da ku nggata abbər da ata səm susəma ata kəma duku ka tsa anda.

26Sakatə Yusuf ku səvi, antə da hamta alari cautər ɗa tə da səvi kəgari ni, ka zuzuri ka kəma ɗa ata di akəmari. 27Antə tsa yu lapiyakurər ɗa ka pəla, “Amadi baba' giri ri, mda ola tə giri pəla ali su ata kərari ni? Tsa tsu ka mpika ya?”

28Antə da shinau ka pəla, “Mafar nga na baba' yeru ni tsu ka mpika, tsuwa tsa lapiya.” Antə da nggyarghəidzi ka aduta alari.

29Sakatə tsa haptə ncari ka wutə ɓzərma'ni Benjamin, natə mama' ɗa duku, antə tsa pəla, “Ngəni an gajir giri tə giri gari ali ata kərari ni ya? Ka Hyel hara ala gə ɓɗakkur ɓzərna!” 30Sakatə Yusuf nggata apa shimwi akwa səɓəla alari, kamnyar tə hangkalari ku mwari adzə ɓzərma'ni, təng təkəma tsa ləɓəla ka huva ka baratə vəi laga tə tsa ata tuwa ata. Antə tsa ləkwa kutambwarni ka tuwa ka shimwi. 31Aghəla tə tsa ku kəcimta kəmari, antə tsa səɓəla ka ntsari ɗəffari, ka pəla ka mdə ndəkəi susəm ni. 32Antə mdə vəi alari susəmərni zum, ka vəi ala ɗa arɗa zum, ka vəi aka mjir Masar na ana səma ata kəma duku ka tsa ni tsuwa zum. Mdə hara apani ni kamnyar tə mjir Masar aɗi ana səm susəma ata kəma duku kəga mjir Ibrani wa, kamnyar ngəni an sur cika aka mjir Masar. 33Antə maɗama' Yusuf ni ku ndzəndzi akəmari ata ola ata ola, baɗitə ka yarakəmar ɗa ka tsikərari ka gajir ɗa. Antə mji ni wuli nvwa ɗa kamnyar da ku ndatədzi. 34Ata tebər na akəma Yusuf ni mda akwa dingngga kətsə susəma ka ndəkəi ala ɗa, amma hangkur susəmər Benjamin ku təramta ar kəlara mda akwa nca ɗa ka bwa ntəfu. Antə da ku səma ka sa ka hara hara kucali ata kəma duku ka tsa.

Currently Selected:

Baɗitari 43: KNB

Highlight

Copy

Compare