Baɗitari 32

Yakub Ku Ɗəmhədzər Kəɓa Ka Isuwa

1Sakatə Yakub akwa ləkəma ka mwarni, antə mjirthlentərhyel laga si adzə ni. 2Sakatə Yakub wutə ɗa antə tsa pəla, “Ngəni an vəi fəliyir dlamar sojayeri ar Hyel.” Kamnyar ngəni antə tsa vətə thləm aka vəi ni Mahanayim. 3Antə Yakub thlentə mji adzə ɓzərma'ni Isuwa asəgu akwa bwar Seyir na akwa tsəɗi Edom. 4Tsa tsawa ala ɗa abbər, “Nggədza su tə giri ata pəla aka Isuwa, ‘Zanuwa, Buɗar nga Yakub na ndzi ka Laban apa mətəpi har ka vədza aka saka ngəni ni ku ngka kulini. 5Kulini tsa ka gyal thlayeri, ka kwarayeri, ka ciɓayeri ar kwi kəga təma, ka mafayeri shili ka mwanki. Antə kulini tsa thlentə yeru adzə nga gə na mdərkəyirni abbər ma ahara ka tsa wutə mdəkur ata nca ga.’ ”

6Antə mjir thlentə ni ku ngka adzə Yakub ka pəla alari abbər, “Yeru ku mwari adzə ɓzərma' nga Isuwa, antə kulini tsa ata laku akwa sə thlakəma ga, tsa ka mji aru nfwar adzə ni.”

7Antə Yakub ku thlivər ka duna, ka ləkwa damitədzi. Antə tsa ndəkəi mji na adzə ni, ka ciɓayeri ar təma kəga kwi, ka thla kəga dləkəmauwayeri ni ka bwa suɗsuɗa. 8Tsa akwa dzama abbər, “Ma Isuwa ku si ka dlərəmta zara na pal, to zara na mbil pal ni ata msəra.”

9Antə Yakub hara adduwa ka pəla, “Hyelər kəkarna Ibrahim, Hyelər baba'na Ishaku, gə na MTHLAKU ku pəla ali kəi ngka akwa tsəɗiyirna adzə maɗama'na, antə ga ata hara ali ɓɗakkur. 10I aɗi mzhi kəi wutə jili hirkurər nga na ana palidzi wa ni wala raka wa, wala mzhi ka gə ndzi ali ka jirkur tədəku akwa shanga su apani wa. Kamnyar ka zwalər na daci antə I ku fəlɓəla Thlyagha Jodan, amma nggədza kulini I ka zara suɗa. 11Usa, mbuli ra akwa tsiya ɓzərma'na Isuwa, kamnyar I akwa thlivər ni, kamnyar nuhum tsa asə si ka tsi ra, ka tsəgəi mwankirna kəga maɗa'na. 12Amma ga ku hara ali alkawal abbər ga ata hara ali ɓɗakkur, ka hara ka kəkayeri arna yatədzi ka ndzi hang apa wuyakər mnya manda, tə mda amzhi jikatari wa kamnyar hangkurər ɗa.”

13Antə tsa pi anda vir nda aviri. Səɓəla ɗəpari antə tsa kəɓəla akwa nca suayeri na akəlari ka hamta cauta kəgari aka ɓzərma'ni Isuwa. 14Tsa fwaɓəla mwala kwi aru suɗa, ka nciwayeri sərkumari, ka mwala təma aru suɗa, ka gamayeri sərkumari, 15ka mwala dləkəmau makkumari ka maɗa' ɗa, ka mwala thla nfwarkumari, ka gyalayeri kuma, ka mwala kwara sərkumari, ka bitalayeri kuma. 16Antə tsa ndəkəmta ɗa aka buɗayeri arni, waskəi ka ciɓərni. Antə tsa pəla ala ɗa, “Pwa giri akəma, ka giri vu daɓu akwa daɓwa kəlara ciɓa ka nvwani.” 17Antə tsa tsawa aka buɗarni na akwa mwa ka ciɓa na akəmata shang abbər, “Ma sakatə ɓzərma'na Isuwa ku kəɓa ka ga, ka yu nga abbər, ‘Wan mthlakər ngə ri? Ga akwa ləmari? Mwaɓiyayeri na akəma gə ni ar wa ri?’ 18Ka gə pəla alari, ‘Ka barkar nga! Ciɓə ngəni ar buɗar nga Yakub. Tsa thlentə yeru abbər ka yeru səntə ɗa cauta ala ga, zanuwa. Tsuwa tsa ma tsa akwa si abwahila yeru.’ ” 19Antə Yakub tsawa aka mdə na suɗkur, ka aka na makərkur, ka aka shanga ɗa na ata nu ghəla nvwani ka ciɓə ni, abbər ka waskəi pəla su tə mdə na ntangkəma ata pəla aka Isuwa ni, ma da ku kəɓa ka tsa. 20“Tsuwa ka giri mbərsata abbər giri ku pəla alari, ‘Yakub na ɓzərma' nga akwa si aghəla yeru.’ ” Kamnyar Yakub akwa dzama abbər, “I akwa thlenta alari cautayeri ngəni kamnyar ka ɗəffari pwi akwabə yeru akəɓa ka tsa, natə ma sakatə yeru ku kəɓa ka tsa nca ka nca, nuhum tsa adlu ra.” 21Apani antə cautər Yakub ni ku mwari kəmata tsa, amma arni, vir nda aviri tsa pi tsu akwa vəi fəliyir ɗa ni.

Yakub Ku Hara Gawa Ahar Peniyel

22Tsu vir nda antə Yakub thlatə ka fatə mwankirni suɗa ka mwanki mafa na suɗə ni, ka maɗashilərni na kumkantang ni, ka fəlɓəla Zərkəu Yabbok. 23Aghəla tə tsa ku thlentə ɗa aɓəla bwanda, antə tsa thlentə shanga kariyayeri arni aɓəla bwanda tsuwa. 24Amma Yakub ku ndzi tsu anda tsa shini. Antə mdə laga ku si ka hara gawa ka tsa har tə vir kura. 25Sakatə mdə ni wuta abbər tsa aɗi mzhi nggyari Yakub wa, antə tsa tsa ɗethlər kiɗə Yakub, antə ɗethlər kiɗə ni ləɓəla kazhar vəi ndzəndziyirni. 26Antə mdə ni pəla aka Yakub abbər, “Zhar ra kəi təra, kamnyar vir akwa kura.”

Amma Yakub pəla, “I aɗi ata zhar nga ka gə təra wa, tar ma ga ku vədza ali barka.”

27Antə mdə ni pəla, “Thləma gə mə ri?” Antə tsa pəla, “Thləmi Yakub.”

28Antə mdə ni pəla, “Thləma ga aɗi ata ndzi Yakub kəra wa, amma ata ndzi Israila, kamnyar ga ku hara gawa ka Hyel ka hara gawa ka mji, har ka səma.”

29Antə Yakub pəla, “Ar nga thləma gə mə ri?”

Amma mdə ni pəla, “Kamnyar mi tə ga ata yu thləmi ri?”

Tsu anda antə mdə ni vədza alari barka.

30Kamnyar ngəni antə Yakub kəga thləma vəi nda Peniyel, kamnyar tsa pəla, “I ku wutə Hyel nca ka nca, amma ba kulini mpikəi tsu aɗi.” 31Tsuwa pci ku kurtə hara ola sakatə Yakub akwa təramta akwa Peniyel ni, antə tsa ləkwa ncakəɗi kamnyar kiɗari na ləɓəla ni. 32Antə har ba ashina mjir Israila aɗi ana ɓɗə pərɗa kumər kiɗə na akwa vəi ɗethlər kiɗə wa, kamnyar ata pərɗa ar kiɗə ni antə mdə ni tsa Yakub.

Currently Selected:

Baɗitari 32: KNB

Highlight

Copy

Compare