Baɗitari 31

Yakub Ku Hwi Kazhar Laban

1Tsuwa akwa saka ndaga Yakub ku nggatə maɗashilər Laban akwa pəla abbər, “Yakub ku famnya shanga sur baba' mburu. Ai shanga gənarni ni thlata akəla baba' mburu.” 2Tsuwa Yakub ku wulɓəla abbər Laban aɗi akwa ncanta alari hirkur apa na hwatu wa.

3Antə MTHLAKU pəla aka Yakub, “Ngka akwa tsəɗiyir kəkayeri ar nga, adzə mji na yangkura ga. Tsuwa I ata ndzi ata vəi duku ka ga.”

4Antə Yakub thlentə kuraku aka Rahila ka Leya abbər ka da ra wutə ni akwa mtaku, akwa vəi tə ciɓayeri arni ni ata. 5Antə tsa pəla ala ɗa, “I ku wuta abbər baba' giri aɗi akwa ncanta ali hirkur apa na hwatu wa, amma Hyelər baba'na tsu ata vəi duku ka iya. 6Tsuwa japwa giri ka səndari abbər I ku hara kəthlər ka duni shang aka baba' giri. 7Amma wala apani baba' giri ku fəi ra, ka pagali watsəɓayeri arna har ka kuma, amma Hyel aɗi hir zhar ni ka tsa dəkəi ra wa. 8Kamnyar ma tsa pəla, ‘Na ka dza ɗa dlapdlappa ni ata ndzi watsəɓər nga,’ to, shanga mwaɓiyayeri ni ata ya maɗa' ka su dlapdlappa ata dza ɗa. Tsuwa ma tsa pəla, ‘Na ka dza ɗa tyau tyauwa ni ata ndzi watsəɓər nga,’ to, shanga mwaɓiyayeri ata ya maɗa' ka su tyau tyauwa ata dza ɗa. 9Apani antə Hyel ku famnya mwaɓiyayeri ar baba' giri ka hamta ɗa ali.”

10“Akwa sakar kəl hur ar mwaɓi ni antə I suni. Antə akwa suni ni I ku wuta abbər nciwayeri na ka ɗaha tyau tyauwa, ka na ka su dlapdlappa, ka na jadlajadla, an akwa fəl mwala akwa ciɓə ni. 11Antə mdərthlentərhyel gari ali akwa suni ni ka pəla, ‘Yakub.’ Antə I ndəra ka pəla ‘Naam, nggədza ra.’ 12Antə tsa pəla, ‘Hapta nca ga kara wul su, ga ata wuta abbər shanga nciwayeri na akwa fəl mwala akwa ciɓə ni ɗaha ata dza ɗa tyau tyauwa, wala dlapdlappa, wala jadlajadla. I hara apani ni kamnyar I ku wutə shanga suayeri tə Laban akwa harari ala ga. 13I an Hyel na ncantədzi ala ga akwa Bethlel, akwa vəi tə gə pungkər mal ata kəra shanggam, ka kahyel ali ni. Antə kulini, thlatə kazhar vəi ngəni, ka gə ngka akwa tsəɗi tə mdə ku yaɓəla nga akwa.’ ”

14Antə Rahila ka Leya pəla aka Yakub abbər, “Su damwa aɗi na ku mbili ala yeru akəla baba' yeru tə yeru ata fa kifari ya? 15Tsa aɗi namtə yeru apa mjir tsəɗi na aɓəla ciju wa ya? Kamnyar tsa ku ɗələmta yeru, tsuwa kulini tsa ku tsi shanga kwaba na alari kamnyar yeru ni. 16Shanga gəna ngəni tə Hyel dlutsa akəla baba' yeru ka na ala gə ni, ai shang da ar yeru kəga maɗa' yeru. Antə apani, hara kəlara su tə Hyel ku pəla ala ga.”

17Antə Yakub ku thlatə ka putə maɗa'ni kəga mwankirni ata dləkəmauwayeri. 18Antə tsa fatə shanga mwaɓiyayeri arni, ka shanga kariyayeri arni tə tsa wuta ahar Paddan Aram ka təra ka da, kamnyar mwari adzə baba'ni Ishaku akwa tsəɗi Kanana. 19Suayeri ngəni hara akwa sakatə Laban ləɓəla ka təra mwari akwa thla shishir təmayeri arni. Tsuwa akwa saka ngəni tsa aɓəla ni, antə Rahila ləvəi ka həltə haptayeri ar kutakəyir baba'ni. 20Tsuwa Yakub ku pwaktəmta Laban na mdər Aram təng tə tsa aɗi pəla alari abbər tsa ata hwi təra wa. 21Antə apani Yakub ku fatə shanga suayeri tə tsa kəgari ka hwi təra. Sakatə tsa thlata antə tsa fəlɓəla Thlyagha Yufiretis, ka thlentə kəmari təbwar tsəɗiyir garayeri ar Gileyad.

Laban Ku Nu Dəlpa Yakub

22Sakatə Laban nggata akwa vir na makərkur abbər Yakub ku hwi ka təra, 23antə tsa fatə yangkurayerari laga, ka nu dəlpa Yakub. Akwa vir na murfəkur antə da kəɓa ka Yakub akwa tsəɗiyir garayeri ar Gileyad. 24Amma Hyel ku jaktə ncantə kərni aka Laban na mdər Aram akwa suni aviri, ka pəla alari, “Ka gə hara hangkal ka kəlara su tə ga ata pəla aka Yakub, wala su na ɓɗaku wala na ɗimi.”

25Antə Laban ku kəli Yakub. Akwa saka ngəni Yakub ku nci tentərni akwa garayeri ar Gileyad, antə Laban ka yangkurayerari ni nci tentayeri arɗa tsu anda akwa ar Gileyad ni. 26Antə Laban pəla aka Yakub, “Man su tə gə hara nə ri? Gə pwaktəmta ra, ka fatə maɗa'na na maɗankwi ka təra ka da apa mwanki tə mdə fata akwa mpa! 27Kamnyar mi tə gə nggwar hwi nə ri, tə gə pwaktəmta ra, ka təra kula gə pəla ali ni? Ai ma ga an pəla ali, sakani I ku salamtə nga ka kucali kəga hayeri, kəga sur tsa apa kəcaikəcai ka yakandi. 28Tsuwa kamnyar mi tə ga aɗi zhar kəi salamtə maɗa'na na maɗankwi kəga kəkayeri arna atar paktə kəsəm mnyi kəga da wa ri? Ai ngəni cakukur an tə gə hara! 29I ka duna kəi hara ala gə su na ata dəkəi nga, amma naha aviri Hyelər baba' nga gari ali abbər, ‘Ka gə hara hangkal ka kəlara su tə ga ata pəla aka Yakub, wala su na ɓɗaku wala na ɗimi.’ 30I asənda abbər gə hwi təra ni kamnyar ga akwa mwaɓər ngka akwa kutakəyir baba' nga, amma kamnyar mi tə gə həltə haptayeri arna ri?”

31Antə Yakub ku shinau aka Laban ka pəla, “I akwa thlivəra, kamnyar I dzama abbər ga ata sə dlutsə maɗa' nga na maɗankwi ni akəli ka dwali. 32Amma kəlara mdə natə ga ku wutə ni ka haptayeri ar nga, mda ata tsi ni. Antə tsu ata nca mjir mburu ni, ncaɓəla ali su tə I kəgari na ar ngə ni, ka gə kəta.” Yakub aɗi sənda abbər Rahila an həltə haptayeri ni wa.

33Antə Laban ləkwa tentər Yakub ka wulha, ka ləɓəla ka ləkwa tentər Leya, ka ləɓəla ka ləkwa ar maɗankwi na suɗa na mafa ni, amma tsa aɗi wutə haptayeri ni wa. Antə tsa ləɓəla ka ləkwa tentər Rahila. 34Azha Rahila an fatə haptayeri ni, ka pu ɗa akwa thləvur dləkəmau, ka ndzəndzi ata kər. Antə Laban dlarhə shanga kuta tent ni akwa pakari, amma tsa aɗi wutə haptayeri ni wa.

35Antə Rahila pəla aka baba'ni abbər, “Baba, ɗəffa ga aɗiya ɓzə kamnyar tə I aɗi thlatə wa ni wa, kamnyar I ka kəca ar thliya thliya.” Antə Laban ku paka amma tsa aɗi wutə haptayeri ar kutakəyirni ni wa. 36Antə ɗəffa Yakub ɓza, tə tsa aɗi mzhi mbwi ɗəffari wa. Antə tsa yu Laban abbər, “Man tə I ɓzamtə ri? Man biku tə I hara ri, har tə ga akwa nu ra ka ɗəffu apani ni? 37Nggədza kulini ga ku dlarhə shanga kariyayeri arna, man sur kutakəyir nga tə gə wuta akwa nca ɗa ri? Ma aɗi, pwi ɗa azi ata bəbal ka kamnyar ka mjirna ka mjir nga shang wuta, ka da thlamta ala mwa shariya ata kər. 38Kulini mwa ku hara məva sərkumari ka ga, təmar nga wala kwiyir nga aɗi na ku ɗar sartə wa. Tsuwa I aɗi ɗar ɓɗəmnya gamər ciɓayeri ar ngə wa. 39Tsuwa kəlara mwaɓiyir nga natə mwaɓi mtaku ku tsi, I aɗi ana ghər sənta ala gə wa, I ana kəta asarari. Tsuwa ga ana bara kəi ntəmta ala gə kəlara mwaɓi tə mdə ku həlta akwa ciɓər nga, wala natə mdə həlta təpci wala na aviri. 40Ka hang tə I ana ɗar bwani təpci kamnyar bwarbwarkur pci, ka ɗar bwani aviri kamnyar mtathlakkur, har tə ka heni zhar ta ləkwa nci. 41Apani antə I ku ɗar bwani akwa shanga məvayeri ngəni sərkumari tə I ndzi aviyar ngkiri ni. I ku hara kəthlər ala ga ar məva kumnya nfwar kamnyar kəl maɗankwiyir nga na suɗə ni, ka hara məva ngkwa kamnyar ciɓər nga. Tsuwa ga ku kəɗar pagali watsəɓərna har ka kuma. 42Ma aɗi kamnyar Hyelər baba'na, Hyelər Ibrahim, Hyel tə mda ana thlivərari na Hyelər Ishaku an adzə ra wa, sakani ga ku kədləmta ra kula su akwa tsi. Amma Hyel ku wutə bwaniyayeri arna, ka jili kəthlər tə I hara. An su na hara tə tsa mnya ala gə naha aviri ni.”

Yakub Ka Laban Ku Hara Mnya Duku

43Antə Laban shinau ka pəla aka Yakub abbər, “Ai mwankir ngə ni maɗa'na, maɗankyarər ɗa ni kəkarna, tsuwa ciɓayeri ngəni ma arna. Shanga su tə ga ku wuta azi an arna. Amma ashina man su tə I ata mzhi harari aka maɗa'na na mwankir ngə ni, wala aka maɗankyarər ɗa tə da yaɓəla nə ri? 44Kulini, asər ka mwa hara mnya duku akwa daɓwa mwa, ka tsa ndzi seɗa akwa daɓwa mwa.”

45Antə Yakub kətə pela laga ka nci ni tə tsa ndzi shanggam. 46Antə Yakub pəla aka mjirni, “Tsaptə giri pelayeri.” Antə da tsaptə pelayeri ata vəi duku tyaləm. Antə da ku səm susəma anda adzə pela na tsaptsaɓari ni. 47Antə Laban vəta alari thləm Yegar Sahaduthla, watau Pela Tsaptsaɓa ar Seɗa. Amma ar Yakub tsa ana kəga thləma pela tsaptsaɓə ni Galeyed. 48Antə Laban pəla aka Yakub abbər, “Ashina pela tsaptsaɓə ngəni ata ndzi seɗa akwa daɓwa mwa.” Kamnyar ngəni mda ana kəga thləma vəi ni Galeyed ni. 49Tsuwa Laban ku kəga thləma pela tsaptsaɓə ni Mizpa, kamnyar tsa pəla, “Ka MTHLAKU pungkər ncari ata kəra mwa, akwa sakatə mwa aɗi ata kəma duku wa. 50Ma ga ku hara bwani aka maɗa'na ni, wala ma ga ku kəl mwanki damwa ata kəra maɗa'na ni, wala tə mdə damwa aɗi adzə mwa wa ni, ka gə ɗangta abbər Hyel an seɗa akwa daɓwa mwa.” 51Antə Laban pəla aka Yakub, “Wulha pela tsaptsaɓa ngəni ka shanggam natə I nci akwa daɓwa mwa ni. 52Pela tsaptsaɓə ngəni an seɗa, shanggam ngəni tsuwa seɗa, abbər I aɗi ata təramta pela tsaptsaɓa ngəni ka shanggam ni ka mwari adzə nga kamnyar hara ala gə ɗimikur wa. Tsuwa ga aɗi ata təramta pela tsaptsaɓa ngəni ka shanggam ni ka si adzə ra kamnyar sə hara ali ɗimikur wa. 53Antə ka Hyelər Ibrahim, na Hyelər Nahor, na Hyelər baba' ɗa, an hara shariya akwa daɓwa mwa.” Antə Yakub ku kahyel akwa thləma Hyel tə mda ana thlivərari, na Hyelər baba'ni Ishaku. 54Antə Yakub ku tsi mwaɓi ka hara saɗaka kəgari ata kəra gar ni, ka kəgatə mjirni ka da səm susəma. Antə da ku səm susəma ka pi ata kəra gar ni har tə viri kura ala ɗa. 55Səɓəla ɗəpari ɗəɗəpə mbing antə Laban thlatə ka vədzə mnyari aka maɗa'ni na mwankir Yakub, ka kəkayeri arni, ka vədza ala ɗa barka. Aghəla nda antə tsa thlatə ka ngka avi aharngkiɗa.

Currently Selected:

Baɗitari 31: KNB

Highlight

Copy

Compare