Səɓəlari 40

Mdə Ku Nci Tent Ni Ka Hamta Ni Aka Hyel

1Antə MTHLAKU pəla aka Musa. 2“Akwa vira thliya ntang ar thliya na ntangkəma ka gə nci Tentər Kəɓa ni. 3Vu Akwati Alkawal ni akwa, ka gə nggamta ni ka lapəli. 4Ka gə səntə tebər ni akwa, ka gə ɗəmhə shanga kariyayeri arni kalkal ata kər. Ka gə səmbwa ka zwalər kəsi pitəlayeri, ka gə putə pitəlayeri ni akwa vəi ndzəndziyir ɗa. 5Ka gə vəi bagaɗi ar dinar kamnyar mba tulari ɗuza akəma Akwati Alkawal ni, aghəla nda ka gə hahəi lapəli akwa nyarmbwar Tent ni. 6Ka gə vəi bagaɗi ar hamta saɗaka mbamba ni anyarmbwar Tentər Kəɓa ni. 7Tsuwa ka gə vəi tasa na ola tə mdə nam ka əmza ni akwa daɓwa Tentər Kəɓa ni ka bagaɗi ni, ka gə nghyantə ni ka yimi. 8Ka gə ncimta zhimbwalayeri na ata kalaktə bəbal ni, ka hahəi lapəliyayeri ata da, kambəla gə hahəi lapəliyir nyarfur ləkwa kuta bəbal ni.”

9“Ka gə kətə mal ar hamta mda aka Hyel, ka gə pshitə dza Tent ni, ka shanga kariyayeri na akwa kutari. Ka gə hamta ni ali ka shanga kariyayeri na akwa kutari. Atar apani antə da ata ndzi ɓɗakkarkara. 10Tsuwa ka gə pshitə mal ni aka bagaɗi mbamba ka shanga kariyayerari, ka gə hamta ni ali ka tsa ndzi ɓɗakkarkara. Apani antə bagaɗi ni ata ndzi ɓɗakkarkara ka duna. 11Tsuwa ka mdə pshitə tasa na ola ka sur vətari ka mal ar hamta mda aka Hyel, ka gə hamta ni ali.”

12“Ka gə səntə Haruna ka maɗashilərni anyarmbwar Tentər Kəɓa, ka mdə pərantə ɗa ka yimi. 13Ka gə hatə ləptayeri na ɓɗakkarkara aka Haruna, ka ɗangkər mal ni ata kərari, ka gə hamta ni ali, kamnyar ka tsa mzhi hara kəthlər pristkur ali. 14Ka gə səntə maɗashilərni akəma, ka gə hata ala ɗa ləptayeri na kwadang kwadang. 15Ka mdə ɗangkər mal ni ata kəra ɗa tsu akwa laku tə gə hara aka baba' ɗa, kamnyar ka da hara kəthlər pristkur ali. Atar mal ngəni tə mdə ɗangkər ala ɗa ni, mdə ku namtə ɗa tə da ku ndzi zum kamnyar hara kəthlər ar pristkur ba saka madi akwa shanga zamanayeri arɗa.”

16Antə Musa ku hara shanga su kalkal apatə MTHLAKU ku tsawa alari. 17Antə akwa vir na ntang ar thliya na ntang akwa məva na suɗkur, antə mdə nci Tentər vəngkər səli ni. 18Antə Musa thlentə Tent ni. Tsa nci sur kəsi səla udzəmayeri, ka thlentə udzəmayerari ata, ka putə udzəm kadləngkər, ka thlentə zhimbwalayerari. 19Antə tsa pungkər sur hartə kəra Tent ni, ka pungkər sur hartə kərari na aɓəlaɓəla ni kalkal apatə MTHLAKU ku tsawa alari. 20Antə tsa kəta allowur Seɗar Alkawal, watau Tsawayeri na Kuma ni, ka vu akwa Akwati Alkawal ni. Antə tsa fatə zwalayeri ka hagau akwa lenduwayeri ar akwati ni, ka hartə ka sur hartə kərari, watau vəi kələmta watsəɓər biku. 21Antə tsa ləmbwa ka Akwati Alkawal ni akwa Tentər vəngkər səli, ka mbugəi lapəli kamnyar nggamta kəma Akwati Alkawal, kalkal apatə MTHLAKU ku tsawa alari.

22Antə Musa vəi tebər ni akwa Tentər Kəɓa təbwar yala ka Vəi Na Ɓɗakkarkar ni, akəma lapəli na ola, 23ka patə Buradi tə Mdə Hamta aka MTHLAKU ni ata kəra tebər ni, kalkal apatə MTHLAKU ku tsawa alari. 24Antə tsa vəi zwalər kəsi pitəlayeri ni akwa Vəi na Ɓɗakkarkara təbwar anəm, awul tebər ni. 25Antə tsa njiu u'u akwa pitəlayeri akəma MTHLAKU, kalkal apatə MTHLAKU ku tsawa alari. 26Antə tsa vəi bagaɗi dinar ni akwa Vəi na Ɓɗakkarkara abwakəma lapəli na ol ni, 27ka mba tulari ɗuza na kiskisu, kalkal apatə MTHLAKU ku tsawa. 28Antə tsa kətə lapəli ni ka mbwi akwa nyarmbwar ləkwa Tent ni, 29ka kətə bagaɗi mbamba ni ka vəi anyarmbwar Tent ni, ka hamta saɗaka mbamba, ka ar mpwa, kalkal apatə MTHLAKU ku pəla alari. 30Antə tsa kətə tasa na ola ka vəi akwa daɓwa Tentər Kəɓa ka bagaɗi ni, ka nghyantə ka yimər kəcudzi, 31natə Musa, ka Haruna ka maɗa'ni ana kəcimta tsiya ɗa ka səla ɗa kəgari. 32Da ana kəcimtadzi kəlara sakatə da ləkwa Tentər Kəɓa, ka sakatə da ku mwari adzə bagaɗi ni, kalkal apatə MTHLAKU ku tsawa aka Musa. 33Antə Musa ku ncigəi zhimbwalayeri na kalaktə bəbal tə Tent ka bagaɗi akwa ni, ka hahəi lapəli akwa nyarfur ləkwa ɓəɓal ni. Apani antə Musa ku kuri kəthlər ni.

MTHLAKU Ku Səghəi Akwa Vəi Ndzəndziyirni

(Jik 9:15-23)

34Antə dlamba na kəkəsu ku hartə Tentər Kəɓa,

tə parakər səliyir MTHLAKU ku nghyantə Tent ni.

35Musa aɗi mzhi ləkwa Tentər Kəɓa ni wa,

kamnyar dlamba na kəkəsu ku səghəi ata kəra Tent ni,

parakər səliyir MTHLAKU ku nghyantə Tent ni.

36Akwa shanga mwayeri arɗa, kəlara sakatə dlamba na kəkəsu ni ku thlatə kazhar kəra Tent ni, mjir Israila ana thlatə kazhar vəi fəliyir ɗa ni ka psi laku. 37Ma dlamba ni aɗi thlatə kazhar kəra Tent ni wa, da ma da aɗi ata thlatə wa, tar vir tə tsa ku thlata. 38Kamnyar akwa shanga mwar ɗa, dlambar MTHLAKU ni ana ndzi ata kəra Tent ni təpci, ma aviri tsuwa u'u andər ndzi akwa dlamba ni ata nca shanga mjir Israila.

Currently Selected:

Səɓəlari 40: KNB

Highlight

Copy

Compare