Səɓəlari 39

Laku Tə Mdə Ndəɓu Ləptər Pristayeri

(Səɓ 28:1-43)

1Mdə tsatə ləptayeri ar mjir kəthlər akwa Vəi na Ɓɗakkarkara ni ka puwa lipəla, ka na kalar yar ndləngi həng'ha, ka puwa mamza, ka dəɓatə ɗa ɓɗaku. Mdə tsatə ləptayeri na ɓɗakkarkara aka Haruna, akwa laku tə MTHLAKU tsawa aka Musa.

Laku Tə Mdə Namtə Efod

2Mdə tsatə efod ni ka puwar dinar, ka na lipəla, ka na kalar yar ndləngi həng'ha, ka puwa mamza, ka puwar nggira ar lilin na ɓɗaku. 3Mdə tasəmta dinar tə tsa ndzi thlaptar apa zhaɓi, ka ntəntau ni miɗiɗi apa puwar nggira, ka mnyar paktə tsatə ɗa ata kəma duku ka puwa lipəla, ka na kalar yar ndləngi həng'ha, ka puwa mamza, ka puwar nggira ar lilin na ɓɗaku. Antə mdə ku tsatə ni ɓɗak laga. 4Mdə namtə səwa ata mnya efod ni kamnyar hahəi efod ni ata pathlaha mda, antə mda ata kadləɓəla səwayeri ni ka mdə ndəli amta. 5Tsuwa mdə na masəkur tsa su an tsatə sur mbwidzi, mdə tsatə tsu akwa laku tə mdə tsa efod ni, watau ka puwar dinar, ka puwa lipəla, ka na kalar yar ndləngi həng'ha, ka puwa mamza, ka puwar nggira ar lilin na ɓɗaku, tsu akwa laku tə MTHLAKU tsawa aka Musa. 6Antə mdə fatə pela daraja suɗa ar oniks ka rubwamta thləma maɗa' Israila ata da, akwa laku tə mdər mar pela daraja ana ɗahəi seɗa ata pela. Antə mdə pu ɗa akwa kur dinar tə mdə namta. 7Antə mdə dləɓtə ɗa ata sur hahəi efod ni ata pathlahəu, kamnyar ka da ndzi pelar ɗangtə maɗa' Israila, apatə MTHLAKU ku tsawa aka Musa.

Zhaɓər Dlipwayeri Ar Kərathlu

(Səɓ 28:15-30)

8Antə mdə ku namtə zhaɓər dlipwayeri ar kərathlu. Mdə nam ni tsu akwa laku tə mdə nam efod ni, watau ka puwar tsa su ar dinar, ka puwa lipəla, ka na kalar yar ndləngi həng'ha, ka puwa mamza, ka puwar nggira ar lilin na ɓɗaku. Antə mdə tsatə ni ɓɗak laga. 9Zhaɓi tə mdə tsatə ni shanga thlimbəlayerari kalkal kəga nvwa ɗa, watau saɓəlkurari mandaɓar tsi pal, baukurari mandaɓar tsi pal. Tsuwa mdə paktə ni nca kəma suɗa, kamnyar ka tsa ndzi dlipur kərathlu na ar efod. 10Antə mdə putə layi nfwar ar pela daraja ata. Nggədza laku tə mdə pau pelayeri ni akwa,

“Akwa layi na ntangkəma, karneliyan, ka topaz, ka emeral.

11Akwa layi na suɗkur, emeral, ka sapfiya, ka daimon.

12Akwa layi na makərkur, yasinth, ka agat, amethlis.

13Akwa layi na nfwarkur, beril, ka oniks, ka jaspa.”

Tsuwa kəlara pela mdə vu ni akwa ku tə mdə nam ka dinar. 14Tsuwa mdə ku rubwamta thləma maɗa' Israila na kumnya suɗə ni ata nyarmbwa ata nyarmbwa, ata pelayeri ar daraja ngəni kumnya suɗə ni. Mdə thlaɓəla thləma ɗa ata pela ni apa seɗa ar tsiya kuthli. 15Antə mdə namtə sarka ka dinar shini, kamnyar hahəi zhaɓər dlipwayeri ar kərathlu ni. 16Antə mdə namtə kuayeri laga ka dinar vəyari suɗa, ka namtə lenduwayeri suɗa ka dinar tsuwa, natə mdə pwi akwa kuɗəmayeri suɗa na amta ar zhaɓər kərathlu ni. 17Antə da ku dləɓta sarkar dinar na suɗə ni ata lenduwayeri na ata kuɗəmar zhaɓər dlipwayeri ar kərathlu ni. 18Antə mdə ku paktə mnya sarka na suɗə ni ata mnya kur dinar na mbili suɗə ni, ka putə ɗa ata sur hahəi su na suɗa abwakəma zhaɓər kərathlu ni. 19Antə mdə namtə lenduwa damwa suɗa ka dinar, ka putə ɗa ata mbila kuɗəmayeri suɗa, aghəi avivi adzə zhaɓər kərathlu ni. 20Antə mdə jaktə namtə lenduwa damwa suɗa ka dinar, ka putə ɗa pal pal ata sur hahəi zhaɓər kərathlu ni təbwakəma, aghəya japwa pathlaha efod, kudzəhə ka vəi kəɓar ɗa ka sur mbwadzi tə mdə tsatə ɓɗaku ni. 21Mdə mbwahə zhaɓər kərathlu ni atar mbwahə lenduwar zhaɓə ni ka lenduwar efod ni ka səwu lipəla. Mdə hara apani kamnyar ka zhaɓər kərathlu ni pəpəi ləpu kula mpələmtadzi kazhar efod ni, tsu akwa laku tə MTHLAKU tsawa aka Musa.

Lakur Thla Ləptayeri Damwa Ar Pristayeri

(Səɓ 28:1-43)

22Mdə tsatə ləptu laga saɓəl na kalar lipəla swakti, ka hangkər efod. 23Mdə thlaɓəla wulya ləptu ni ka tsatə mnyari tə tsa ndzi kəkəsu, ta tsa asə kwaha. 24Antə mdə dəɓatə mnya ləptu ni ka dludzər yar rumman ka puwar tsa su na lipəla, ka na kalar ndləngi həng'ha, ka puwa mamza, ka puwar nggira ar lilin na ɓɗaku. 25Tsuwa mdə ku ɓdlətə kyangkyangayeri ka dinar shini, ka patə ɗa akwa layi, watau aghəla kəlara yar rumman pal, mda mbwatə kyangkyang pal. Apani antə mdə hara har ka kalaktə mnya ləptu ni ka da. 26Antə mdə patə ɗa shang akwa layi, ngəni akwa nu ghəla nvwa ni, watau aghəla kəlara dludzər yar rumman pal mdə mbwatə kyangkyang pal. Antə mdə hara apani har ka kalaktə mnya ləptər kəthlər ni ka da, tsu akwa laku tə MTHLAKU tsawa aka Musa.

27Antə mdə tsatə ləptu na kwadangari ɓɗak laga ka lilin na ɓɗaku aka Haruna kəga maɗashilərni. 28Antə mdə tsatə dzakwar prist, ka dzakwayeri na raka raka, ka hwandauwayeri na kwadang kwadang, shang ka lilin na ɓɗaku. 29Antə mdə tsatə sur mbwadzi ni ka puwar nggira ar lilin na ɓɗaku, ka puwar lipəla, ka na kalar yar ndləngi həng'ha, ka puwa mamza, kalkal apatə MTHLAKU tsawa aka Musa. 30Antə mdə namta allo laga raka ka dinar shini, ka mbuta ata dzakwa na ɓɗakkarkara ar prist. Tsuwa mdə ku thlaɓəla rəbutə laga apa seɗar kuthlikur ata allo ni abbər, “MDƏ KU HAMTA NI ƁƊAKKARKARA AKA MTHLAKU.” 31Antə mdə ndəltə səwu laga tə mdə tsa ka puwa lipəla ata allo na raka ni, kamnyar ka mdə mzhi mbwatə ni ata dzakwar prist ni, apatə MTHLAKU ku tsawa aka Musa.

Mdə Ku Kuri Kəthlər Ni

(Səɓ 35:10-19)

32Apani antə mdə ku kuri shanga kəthlərayeri ar Tentər Kəɓa ni. Mjir Israila ku hara shanga su apa tə MTHLAKU ku tsawa aka Musa. 33Antə da səntə shanga suayeri ni aka Musa. Da sənta alari Tent ni ka shanga kari kəthlərari, ka liyayeri ar hatə su arni, ka udzəmayerari, ka zwalayerari, ka zhimbwalayerari ka sur kəsi səla ɗa, 34ka sur hartə kəra Tent tə mdə nam ka kəsəm gamayeri tə mdə tatə mamza, ka sur hartari na aɓəlaɓəla tə mdə namtə ka kəsəm na ɓɗaku, ka lapəli na ola ar Vəi na Ɓɗakkarkara, 35ka Akwati Alkawal ka zwalayerari, ka sur hartə mnyari, watau vəi kələmta watsəɓər biku, 36ka tebər ka shanga kariyayerari, ka Buradi tə Mdə Ku Hamta, 37ka zwalər kəsi pitəlayeri tə mdə nam ka dinar shini, ka pitəlayerari, ka shanga kariyayerari, ka mal ar pitəlayeri ni, 38ka bagaɗi tə mdə nam ka dinar, ka mal ar hamta mda aka Hyel, ka tulari ɗuza na kiskisu, ka lapəli ar nyarmbwar Tent ni, 39ka bagaɗi tə mdə nam ka əmza, ka wayari tə mdə nam ka əmza kamnyar ptsa kum, ka zwalayerari, ka shanga kariyayerari, ka tasa na ola ka sur vətə ni, 40ka lapəliyayeri ar bəbalər Tent ni, ka zhimbwalayerari, ka sur kəsi səla ɗa, ka lapəliyir nyarfur ləkwa bəbalər Tent ni, ka suwayerari, ka makukwayerari, ka shanga kari kəthlər akwa Tentər Kəɓa ni, 41ka ləptayeri tə mdə nduɓtə ɓɗaku ka tsi kamnyar hara kəthlər akwa vəi na Ɓɗakkarkara, ka ləptayeri na ɓɗakkarkara aka Haruna na prist, ka ləptayeri ar maɗashilərni kamnyar kəthlər pristkur.

42Apani antə mjir Israila ku kuri shanga kəthlər ar Tent ni kalkal apatə MTHLAKU ku tsawa aka Musa. 43Sakatə Musa ku wulhə shanga kəthlər ni, ka wuta abbər jiri shanga su ku ndzi kalkal apatə MTHLAKU ku tsawa, antə Musa ku vədza ala ɗa barka.

Currently Selected:

Səɓəlari 39: KNB

Highlight

Copy

Compare