Səɓəlari 29

Lakur Vu Mda Akwa Kəthlər Pristkur

(Prist 8:1-36)

1“Nggədza su tə ga ata hara aka Haruna ka maɗashilərni kamnyar hamta ɗa ali ka da ndzi pristayeri na ata hara ali kəthlər. Ka gə kətə ɓzər gyal pal ka gam suɗa na kula nangka. 2Ka gə kətə mpur alkama na liktikti, ka gə hərtə ni kula yist, ka gə ɓwatə buradi, ka kek tə mdə hərtə ka mal, ka biskitu tə mdə fadzə mal zaitun. 3Ka gə pu suayeri ngəni shang akwa thlambəl, ka səntə ɗa akwa thlambəl ni ata kəma duku ka gyal ka gamayeri na suɗə ni.”

Kəcimtar Pristayeri Ka Hamta Ɗa Aka Hyel

4“Ka gə səntə Haruna ka maɗashilərni anyarmbwar tentər vəngkər səli, kara kəcimta ɗa ka yimi. 5Aghəla nda ka gə fatə kariyayeri ni ka gə hata aka Haruna. Ga ata baɗitə hata alari ləptu na saɓəl ni, kambəla ləptu na kwadang ni, kambəla ləptər efod, kambəla zhaɓər dlipwayeri ar kərathlu, ka gə mbwata alari səwur mbwadzi natə mdə tsatə ni ka tsiya mda. 6Aghəla nda ka gə hangkər alari dzakwar prist, ka tsatə allo na raka ni ata dzakwa ni. 7Tsuwa ka gə kətə mal ar hamta mda aka Hyel ka gə pungkər ata kərari.”

8“Aghəla nda ka gə səntə maɗashilər Haruna, ka gə hata ala ɗa ləptayeri na kwadang kwadang. 9Ka gə mbwi kusara ɗa ka sur mbwadzi ka tsangkər ala ɗa dzakwayeri na raka raka ata kəra ɗa. Akwa laku ngəni antə ga ata hamta kari kəthlər ar pristkur aka Haruna ka maɗa'ni. Antə kəthlər pristkur ata ndzi arɗa har ba saka madi.”

Saɗaka Mbamba Kamnyar Vəi Prist

10“Ka gə səntə gyal akwa nyarmbwar tentər vəngkər səli, ka Haruna ka maɗa'ni putə tsiya ɗa ata kəra gyal ni. 11Ka gə thlangkər wulya aka gyal ni anyarmbwar tentər vəngkər səli ni, akəmi, I na MTHLAKU. 12Ka gə kətsə mamshir gyal ni, ka gə ɗata ata təmbəlayeri ar bagaɗi mbamba ni ka kuleng tsiya ga. Mambila mamshi ni, ka gə pumta adzə kira bagaɗi ni. 13Ka gə fwaɓəla shanga mal na hartə sur kutari, ka vəya mir na ɓɗakta shang, ka kulshayeri ni japu, ka mal na hartə ɗa, ka gə mbamta ɗa ata kəra bagaɗi ni. 14Amma mambila kumər gyal ni, ka kəsəmari, ka busari, mda ata ra mbamtari aɓəla ata hildi. Ngəni an saɗakar tifəmta biku.”

15“Ka gə kətə pal akwa nca gamayeri ni, antə ka Haruna ka maɗashilərni pungkər tsiya ɗa ata kərari. 16Ka gə thlamta wulya gam ni, ka gə pshitə mamshari ata shanga tenga bagaɗi ni. 17Ka gə thləthlau gam ni raka raka, ka gə kəcimta kari kutari, ka nggilangayerari, ka gə paktə ka kərari ka putə ɗa shang ata bagaɗi saɗaka ni. 18Ka gə mbamta gam ni swakti ata bagaɗi ni, antə tsa ata ndzi saɗaka mbamba na ata hamta shiwur na msəra ali.”

19“Ka gə kətə pala gam ni, ka Haruna ka maɗashilərni putə tsiya ɗa ata kəra gam ni. 20Ka gə thlamta wulya gam ni, ka ɗatə mamshari ata mnya thləma Haruna kəga maɗashilərni, thləm na abwa mazəma ɗa, ka ata mpəl olər tsiya ɗa, ka mpəl olər səla ɗa shang na abwa mazəm. Ka gə pshidzə mambila mamshi ni aka shanga tenga bagaɗi ni. 21Ka gə kətsə mamshi na ata kəra bagaɗi saɗaka ni, kara kətsə mal ar hamta mda aka Hyel, ka gə pshingkər aka Haruna ka ləptərni, ka aka maɗa'ni ka ləptər ɗa. Apani antə Haruna, ka maɗa'ni, ka ləptər ɗa ata ndzi arna ka kəcəkəcəkur.”

Hamta Pristayeri Aka Hyel

22“Ka gə fəi malər gam ni, ka malər kurari, ka mal na hartə kari kutari, ka vəya mir na ɓɗakta shang, ka kulshayeri japu, ka mal na hartə ɗa, ka kiɗə na abwa mazəm, təng tə ngəni ku ndzi gamər hamta kari kəthlər aka prist ni. 23Tsuwa akwa thlambələr buradi na kula yist tə mdə vəi akəmi ni, ka gə kəɓəla kər buradi pal, ka kek pal natə mdə ɓwa ka mal zaitun, ka kər biskitu pal tsuwa. 24Ka gə pu shanga suayeri ngəni akwa tsiya Haruna ka maɗashilərni, ka da haptə ɗa akəmi apa sur hamta na ola. 25Aghəla nda, ka gə jaktə dlu buradi ni akəla ɗa, ka gə mbamta ɗa ata bagaɗi saɗaka apa saɗaka mbamba na ka shiwurari msəra aka MTHLAKU.”

26“Ka gə kətə kərathla gam tə mdə tsi kamnyar hamta kəthlər aka Haruna ni, ka gə hapta akəmi ali, ka tsa ndzi apa sur hamta na ola. Antə kərathlu ngəni ata ndzi nəɓwar nga.”

27“Ka gə hamta ali vəyayeri na ɓɗakɓɗaku ar gam tə mdə tsi akwa hamta kəthlər pristkur aka Haruna ka maɗashilərni ni. Watau ka gə hamta ali kərathla gam ni, ka kiɗari natə mdə hapta akəmi apa sur hamta na ol ni. 28Ngəni an su tə ka mdə hara ba saka madi, abbər kəlara sakatə mjir Israila ku si kamnyar hamta saɗakar jakə mwardzi, ka mdə hamta kərathlu ka kiɗə mwaɓi ni aka Haruna kəga maɗashilərni. Ngəni an ata ndzi saɗakar mjir Israila tə mda ata haptari ali, I na MTHLAKU.”

29“Shanga ləptər pristkur ar Haruna ata ndzi aka maɗashilərni aghəla mtərni, kamnyar akwa ləptayeri ngəni antə mda ata ɗangkər ala ɗa mal olkur, ka hamta ala ɗa kari kəthlər pristkur 30Ɓzər na ku dlu tsiyari an ata hatə kari ni har vir murfa, akwa kəlara sakatə tsa ata ləkwa tentər vəngkər səli akəmi kamnyar ka tsa hara kəthlər akwa Vəi na Ɓɗakkarkara.”

Susəma Natə Mdə Ku Vəi Aka Hyel

31“Ka gə kətə kumər gam tə mdə tsi akwa sakar hamta kari kəthlər aka Haruna ka maɗa'ni ni, ka gə ɓwata akwa vəi laga na ɓɗakkarkara. 32Haruna ka maɗashilərni an ata ɓɗə kum ngəni ka buradi na akwa thlambəl ni anyarmbwar tentər vəngkər səli ni. 33Da shiɗa an ata səm susəma natə mdə hara saɗakar kələmta bikər ɗa kəgari ni, susəma natə mdə hara akwa sakar hamta kari kəthlər ala ɗa, ka hamta ɗa aka Hyel ni. Mdə damwa aɗi na ata mzhi səm susəmayeri ngəni wa, kamnyar mdə ku namtə ɗa kəcəkəcari. 34Amma ma kumər gam tə mdə tsi akwa hamta kəthlər aka pristayeri ni ka buradi tə mdə hara akwa ni ka mbiləmta har ka səktə ɗəɗəpa, ka mdə mbamta ni ka u'u. Mda aɗiya səm wa, kamnyar mdə ku namtə ni kəcəkəcari.”

Laku Tə Mda Ata Hamta Bagaɗi Saɗaka Akwa

35“Ka gə haratə shanga suayeri tə I pəla ka gə hara aka Haruna ka maɗa'ni. Ka gə kətə vir murfa kamnyar wujir hamta ala ɗa kari kəthlər pristkur ni. 36Kəlara viri ka gə hara saɗaka ka gyal pal kamnyar tifəmtar biku. Aghəla nda ka gə putə mal zaitun ata bagaɗi ni ka gə namtə ni ka tsa ndzi kəcəkəcari akəmi. 37Ka gə hara vir murfa akwa hara saɗakar kələmta bikər bagaɗi ni, ka gə namtə ni ka tsa ndzi kəcəkəcari, ka hamta ni ali. Apani antə bagaɗi ni ata ndzi ɓɗakkarkara ka duna. Antə kəlara su na ku tsəkwar bagaɗi ni tsa ata ndzi ɓɗakkarkara.”

Saɗaka Na Tədəku Viri

(Jik 28:1-8)

38“Ngəni an su tə ga ata ləkəma ka hamtari ata bagaɗi ni tədəku, gamayeri suɗa na ka məva ɗa pal pal. 39Ka gə hamta saɗaka ka ɓzər gam na pal ɗəɗəpa, ka na dukwari tahaku. 40Mda ata paktə ɓzər gam na ntangkəma ni ka mpur alkama tə mdə hadli liktikti tasa pal, ka hərtə ka mal zaitun na thləlthləlari kwalɓa pal. Tsuwa ka mdə pu yimər anap apa kwalɓa pal ka tsa ndzi saɗaka ar sur sa. 41Ɓzər gam na suɗkur ni mda ata hamtari tahaku. Mda ata paktə ni ka mpur mthli ka saɗakar sur sa, ka hamta ni tsu akwa laku tə mdə hamta na ɗəɗəpa ni, kamnyar ka saɗaka tə mdə hamta ka u'u, ndzi saɗaka na ata shiwur msəra ali, I na MTHLAKU. 42Antə ba saka madi, mda ata ləkəma ka hamta saɗaka mbamba ni tədəku shanga zamanayeri ar giri. Mda ata hamta saɗaka ni anyarmbwar tentər vəngkər səli ni akəmi, akwa vəi tə mwa ata kəɓa, tsuwa anda antə I ata gari ala ga. 43Anda antə I ata kəɓa kəga mjir Israila, antə parakər səliyirna ata namtə ka vəi ni ndzi ɓɗakkarkara. 44I ata namtə ka tentər vəngkər səli ni ka bagaɗi saɗaka ni ka da ndzi ɓɗakkarkara. Tsuwa I ata namtə Haruna ka maɗa'ni ka da ndzi arna, ka da ndzi pristayeri na ata hara kəthlər ali. 45Antə I ata ndzəndzi akwa nca mjir Israila, kəi ndzi Hyelər ɗa. 46Antə da ata sə sənda abbər I an MTHLAKU na Hyelər ɗa, na fwaɓəla ɗa akwa Masar, kamnyar kəi ndzəndzi akwa nca ɗa. I an MTHLAKU na Hyelər ɗa.”

Currently Selected:

Səɓəlari 29: KNB

Highlight

Copy

Compare