Səɓəlari 28

Ləptər Ar Pristayeri

(Səɓ 39:1-7)

1“Ka gə kəgatə ɓzərma' nga Haruna ka maɗa'ni Nadab, ka Abihu, ka Eleyazar, ka Ithlamar. Ka gə pwi ɗa ali ka da hara ali kəthlər ar pristkur. 2Ka gə nduɓtə ləptayeri ar kəthlər aka Haruna na ɓzərma' nga, ləptayeri na ka səli ka daraja. 3Ka gə gari aka shanga mji na masəku, mji tə I ku na ala ɗa ɗəɗukur ar suayeri apani, ka da nduɓtə ləptayeri ni aka Haruna, kamnyar namtə ni ka tsa ndzi prist na ata hara kəthlər ali. 4Nggədza jili ləptayeri tə ka da nduɓta, zhaɓər dlipwayeri ar kərathlu, ka efod, ka ləptu na saɓəl, ka ləptu na saɓəl ta shang ka tsiyari saɓəl saɓəl tə mdə tsata, ka dzakwar pristkur, ka sur mbwi kusar. Da ata nduɓtə kari kəthlər nayeri ni aka Haruna na ɓzərma' nga ka aka maɗashilərni, kari na səli, kamnyar hara kəthlər pristkur ali. 5Ka mji ndəɓu ni nduɓtə kari ni ka puwa na kalar dinar, ka na kalar zarkina, ka na ka kalar yar ndləngi həng'ha, ka ulu na mamza, ka lilin tə mdə nggirtə ɓɗaku.”

Lakur Namtə Efod Ni

6“Ka da nduɓtə efod ni ka puwar nduɓwa na ka kalar dinar, ka na kalar zarkina, ka na ka kalar yar ndləngi həng'ha, ka ulu na mamza, ka puwa nggira na ɓɗaku, ka mdə na masəku an hara kəthlər ni. 7Mda ata namtə efod ni ka bwa suɗa, abwakəma pal, abwahili pal, ka mdə ndəli ɗa ata səwur hahəi ɗa ata pathlahəu. 8Tsuwa ka mdə tsatə byalər mbwadzi ɓɗaku laga ka jili puwayeri tə mdə nam efod ni kəgari ni, ka nduɓtə ni ka puwar dinar, ka puwa na kalar zarkina, ka na kalar yar ndləngi həng'ha, ka ulu na mamza, ka lilin na ɓɗaku tə mdə nggirta. 9Tsuwa ga ata fatə pelayeri suɗa ar oniks, ka gə rəbutə thləma maɗa' Israila na kumnya suɗə ni ata da. #28:9 pela oniks an pela laga na ana mbəl mbəla ka kalarni apa uwa ka mənggəl wala jili kala damwa tyautyauwa. 10Ga ata rəbutə thləma mji ngkwa ata kəlara pəla pal, ka thləma mji ngkwa damwa ata pela na dukwari. Ka gə rəbutə thləma ɗa atar yar ɗa. 11Ka gə rəbutə thləma maɗa' Israila ata pelayeri na suɗə ni, akwa laku tə mdər mar pelayeri na ka daraja ana thlaɓəla seɗa ata da. Ka gə pu pelayeri ni akwa kur dinar. 12Ka gə putə pelayeri na suɗə ni ata sur hatə efod ni ata pathlahəu, kamnyar ka da ndzi pelar ɗangtə maɗa' Israila. Apani antə ka Haruna mwari akəma MTHLAKU ka thləmayeri ngəni ata pathlahayerari, kamnyar ka da ndzi sur ɗangtə ali, I na MTHLAKU, ata kəra mjir Israila. 13Ka gə namtə vəi ndzəndziyir su ni ka dinar, vəyari suɗa, 14ka sarkayeri suɗa natə mdə hara ka dinar shini. Ka gə nduɓdzə sarkayeri ni adzə ku tə mdə nam ka dinar ni.”

Lakur Nduɓə Zhaɓər Dlipur Kərathlu

15“Ka gə namtə zhaɓər dlipur kərathlu aka Prist na ola kamnyar nggaɓəla ɗəffa Hyel. Mda ata tsatə ni tsu ka jili puwar tsa efod ni, watau ka puwar dinar, ka na kalar lipəla, ka na kalar yar ndləngi həng'ha, ka ulu na mamza, ka lilin tə mdə nggirtə ɓɗaku. 16Baukur ka saɓəlkur mnya zhaɓər kərathlu ni ata ndzi kalkal, tsuwa ata ndzi nca kəma suɗa. Saɓəlkurərni ata ndzi mandaɓar tsi pal, baukurari mandaɓar tsi pal. 17Nggədza laku tə ga ata pau pelayeri ni.”

“Akwa layi na ntangkəma, karneliyan, ka topaz, ka emeral.

18Akwa layi na suɗkur, emeral, ka sapfiya, ka daimon.

19Akwa layi na makərkur, yasinth, ka agat, amethlis.

20Akwa layi na nfwarkur, beril, ka oniks, ka jaspa.”

“Kəlara pela mda ata vu ni akwa dlipu tə mdə nam ka dinar ni. 21Ata pelayeri na kumnya suɗə ni, mda ata rəbutə thləma maɗa' Israila, atar nyarmbwar ata nyarmbwar ɗa na kumnya suɗə ni. Kəlara pela pal kamnyar thləma dur pal akwa nca durayeri na kumnya suɗə ni. 22Ka gə namtə səwur sarkar hahəi zhaɓər dlipwayeri ar kərathlu ni ka dinar shini. 23Ka gə namtə lenduwayeri suɗa ka dinar, ka gə mbwadzə ɗa aka zhaɓər kərathlu ni akwa kuɗəmayeri suɗa na amta. 24Ka gə haɓəla səwur sarka na suɗa tə mdə nam ka dinar ni akwa lenduwayeri na ata mnya zhaɓər kərathlu ni. 25Ka gə mbwadzə mnyari na suɗə ni ata su na suɗa tə mdə nam ka dinar ata pathlaha efod ni. 26Ka gə namtə lenduwayeri laga suɗa ar dinar, ka gə mbwadzə ɗa akwa kuɗəmayeri suɗa na akira zhaɓər kərathlu ni, adzə efod ni. 27Ka gə jaktə namtə lenduwayeri suɗa ka dinar, ka gə putə ɗa ata kira səwur pathlaha efod ni, abwakəma akwa vəi kəɓar ɗa amtamta sur mbwa kusar tə mdə tsatə ɓɗaku ni. 28Ka gə kətə səwu na kalar zarkina ka gə mbwahə lenduwayeri na ata zhaɓər kərathlu ni ka lenduwayeri na ata ləptər efod ni ata kəma duku. Apani antə zhaɓər kərathlu ni ata ndzəndzi ɓɗaku ata kəra efod ni.”

29“Kəlara sakatə Haruna ata mwari akwa vəi vəngkər səli ali, ka tsa kətə thləma maɗa' Israila ata ɗəffari, ata zhaɓər dlipwayeri ar kərathlu, watau efod ar nggaɓəla ɗəffa Hyel, kamnyar ɗangtə ali, I na MTHLAKU, ata kəra mjirna. 30Tsuwa ka gə pu sur nggaɓəla ɗəffa Hyel ni, watau Urim ka Thlummim ni, ka dlipu na ata zhaɓər kərathlu ni, kamnyar ka da ndzi ata ɗəffa Haruna kəlara sakatə tsa ata si akəmi. Apani antə ka Haruna ndzi ka efod ar nggaɓəla ɗəffa MTHLAKU kamnyar mjir Israila.”

Ləptayeri Damwa Na Ar Prist

(Səɓ 39:22-31)

31“Ga ata namtə ləptu na saɓəl na kalar zarkina purəm, natə mda ata hangkər alari ləptər efod. 32Ka mdə thlaɓəla wulya ləptu ni ata ɗəffu kamnyar haɓəla kəra mda, tsuwa ka mdə tsatə wulyari ka tsa ndzi kəkəsu ta tsa asə kwahəmtadzi. 33Ka gə dəɓatə mnya ləptu ni ka dludzər yar rumman ka puwa na kalar zarkina, ka na kalar yar ndləngi həng'ha, ka ulu na mamza. Tsuwa ka gə mbwatə kyangkyangayeri ar dinar akwa daɓwa ɗa har ka da kalaktə mnya ləptu ni. 34Kengkengayeri natə mdə nam ka dinar ni, ka dludzər yar rumman ni, ka mdə pagalɓəla ɗa har ka da kalaktə kira ləptu ni. 35Ləptu ngəni antə Haruna ata hatari kəlara sakatə tsa ata hara kəthlər ar pristkur. Antə kəlara sakatə tsa ata si akəmi akwa Vəi na Ɓɗakkarkara ni, ka kəlara sakatə tsa ata ləɓəla, mda ata nggatə kuraka kyangkyangayeri, antə tsa aɗi ata mtə wa.”

36“Tsuwa ka gə namta allo laga thlaɓərangnga ka dinar shini, ka gə rəbutə ka ingdla seɗa ata abbər, ‘MDƏ KU HAMTA NGƏNI AKA MTHLAKU.’ 37Ka gə mbwatə allo ni ata bwakəma dzakwar prist ka səwur puwa na kalar zarkina. 38Antə ma Haruna ku hatə dzakwar pristkur ni, rəbutə ni ata ndzi ata murkəmari. Apani antə Haruna ata kətə bikayeri tə mjir Israila hara sakatə da akwa hamta sur hamta na ɓɗakkarkara. Antə rəbutə ni ata ndzi ata murkəma Haruna tədəku, kamnyar ka MTHLAKU hir dlu sur hamta arɗa.”

39“Ka gə tsatə ləptu na kwadang ka lilin tə mdə nggirtə ɓɗaku. Tsuwa ka gə namtə dzakwar prist ka lilin na ɓɗaku, ka tsatə sur mbwadzi ka dəɓatə ni.”

40“Tsuwa ka gə namta aka maɗashilər Haruna ləptu na kwadang, ka sur mbwadzi, ka dzakwa na raka, kari hata na ka səli ka daraja. 41Ka gə hatə kariyayeri ngəni aka ɓzərma' nga Haruna, ka maɗashilərni, aghəla nda ka gə pungkər ala ɗa mal ar hamta ɗa aka Hyel, ka hamta ala ɗa kari kəthlər akwa tsiya ɗa, ka gə namtə ɗa mji kəcəkəcari, kamnyar ka da ndzi pristayeri ar hara kəthlər ali. 42Tsuwa ka gə namta ala ɗa hwandauwur lilin na ata hartə durakur arɗa, ka saɓəlkurari baɗita ata kusar ka mzhitə kiɗa. 43Ata ndzi dwali aka Haruna ka maɗashilərni ka da ata hatə kariyayeri ni kəlara sakatə da ata ləkwa tentər vəngkər səli, wala mwari adzə bagaɗi kamnyar ka hara kəthlər pristkur akwa Vəi na Ɓɗakkarkara, ta da ahara biku na ata səntə sur mtər ɗa. Ngəni an tsawa aka Haruna ka durərni har ba saka madi.”

Currently Selected:

Səɓəlari 28: KNB

Highlight

Copy

Compare