Səɓəlari 18

Yethro Ku Sə Thlawar Musa

1Yethro na prist ar Midiyan, baba' mwalar Musa ku nggata ata kəra shanga surndatayeri tə Hyel hara aka Musa ka aka mjir Israila, ka laku tə MTHLAKU fwaɓəla ɗa akwa Masar. 2Antə Yethro ku kətə Zippora na mwalar Musa ka səntə ni aka Musa, natə akwa saka na təramta tsa thlenta avi adzə baba'ni. 3Tsuwa Zippora ku si ka maɗashilər ɗa ka Musa suɗa. Na pal mda ana kəga thləmari Gershom, kamnyar sakatə mdə ya ɓzər ngəni ni Musa pəla, “I mətəpi akwa tsəɗiyir mji damwa.” 4Antə thləma na duku tsuwa an Eliyezer, kamnyar tsa ku pəla, “Hyel baba'na an ndər dlar ra, ka msərantə ra ta katsakarər kuthli.” 5Antə Yethro, na baba' mwalar Musa ku səntə mwalar Musa ka maɗa'ni alari akwa mtaku, akwa vəi fəliyir ɗa ata kusar garər Hyel. 6Mdə laga ku mwari ka pəla aka Musa abbər, “Nggədza baba' mwalankiri akwa sə wuli nga, da akwa si ka mwalankiri kəga maɗashilər ngə ni japu.” 7Antə Musa ləɓəla kamnyar thlakəma Yethro ka mwalankiɗa. Sakatə Musa ku kəɓa ka baba' mwalarni antə tsa zuzuri akəmari ka vədzə mnyari alari. Da thlawardzi ka yutə lapiyakur nvwa ɗa, ka ləvəi akwa tentər Musa. 8Antə Musa jikata aka baba' mwalarni Yethro, shanga suayeri tə MTHLAKU ku hara aka kuthli ka aka mjir Masar kamnyar ka mjir Israila msəra. Tsuwa tsa ngkərɓəla alari ata kəra bwaniyayeri tə mji wuta ata laku, ka apatə MTHLAKU ku msərantə ɗa. 9Antə Yethro ku hara kucali kamnyar shanga ɓɗakkur tə MTHLAKU hara aka mjir Israila, ka apatə tsa msərantə ɗa akwa tsiya mjir Masar. 10Antə Yethro pəla, “Hu gir MTHLAKU na msərantə giri akwa tsiya mjir Masar kəga kuthlir ɗa. Tsa ku msərantə mjir Israila akwa tsiya mjir Masar. 11Antə kulini I ku sənda abbər MTHLAKU ku təramta duna shanga haptayeri, kamnyar tsa ku msərantə mjirni Israila akwa bwani akira mjir Masar na ku rutəmta ɗa.” 12Antə Yethro na baba' mwalar Musa ku hamta saɗaka mbamba ka saɗakayeri damwa aka Hyel. Antə Haruna ka shanga mji na ol'olər Israila ku si kamnyar səm susəma ata kəma duku ka baba' mwalar Musa akəma Hyel.

Musa Ku Carɓəla Alkaliyayeri Laga

(Z. Sha 1:9-18)

13Səɓəla ɗəpari antə Musa ndzəndzi akwa hara shariya aka mji. Antə mji ku kalaktə ni akwa səkə ni təng tsu ɗəɗəpa har tə pci təri. 14Sakatə baba' mwalarni wutə bwani tə Musa ni akwa ɗarari kamnyar hangkur mji antə tsa pəla, “Ngəni man su tə ga akwa harari kamnyar mji nə ri? Kamnyar mi tə gə shinga an akwa hara shariya nə ri? Wul laku tə mji thləthlatə ka kalaktə nga baɗitə təng ɗəɗəpa har tahaku ni!”

15Antə Musa shinau alari abbər, “Kamnyar mji akwa si adzə ra ka da yuɓəla su na ata kəskəra MTHLAKU. 16Kəlara sakatə mji ku tsuktədzi, da ana si adzə ra, antə I ana shwalatə ɗa kəi namtə daɓwa ɗa. Tsuwa I ana thlipa ala ɗa tsawayeri ar Hyel ka suayeri tə tsa thlamta abbər ka mdə hara.”

17Amma Yethro pəla aka Musa abbər, “Su tə ga akwa harari ni aɗi kalkal wa. 18Shanga giri kəga mji na si adzə ngə ni ata ghərantə kər giri gapani. Kamnyar kəthlər ngəni ku təra kərathla ga. Ga amzhi hara kəthlər ngəni gə shinga wa. 19Kulini ndzi kəi na ala gə sauri laga, natə I mbərsa ma ga ku nuwa Hyel ata dlar nga. Ar nga ga ata ndzi mdər gari ata vəya mji ngəni akəma Hyel, ka gə mwantə su na ku ndzi damitədzər ɗa akəma Hyel. 20Ka gə thlipa ala ɗa tsawayeri ar Hyel ka surthlipayeri arni, ka gə ngkərɓəla ala ɗa laku tə ka da hara su akwa, ka su tə kalkal ka da hara. 21Tsuwa akwa nca mji ngəni, ka gə carɓəla mji na ata kuri wujir, mji na ana thlivər Hyel, mji tə mdə ku mbərsa ka da, ka mji na ana hir su ka dlərpəkur wa. Antə ka gə pwi ɗa ka da ndzi mjir pwar mji dəpu dəpu, mji aru aru, mji ntəfkumari ntəfkumari, ka mji kum kuma. 22Antə ka mji ngəni ndzi mjir hara shariya aka mji tədəku. Ma su na mwavər ka da sənta ala ga, amma su na raka ka da kuri kəga kər ɗa. Akwa laku ngəni, kəthlər ni ata ndzi kasəla ala ga, kamnyar giri ku ndəkəi kəthlər ni kəga da. 23Ma ga ku hara apani, tsuwa tə Hyel ku pwar nga, antə ga aɗi ata ghərantə kər ngə wa. Tsuwa shanga mji ata ngka aviyar ɗa ka ɗəffa ɗa msəra ala ɗa.”

24Antə Musa ku psi thləm aka sauriyir baba' mwalankiɗa ka hara shanga su tə tsa pəla. 25Antə Musa ku carɓəla mji na ata kuri wujir akwa nca mjir Israila ni. Antə tsa putə ɗa mji ol'ola ata kəra mji dəpu dəpu, ka mji aru aru, ka mji ntəfkumari ntəfkumari, ka ata kəra mji kum kuma. 26Antə mji tə mdə putə ni ku ləkwa hara shariya aka mji tədək saka. Suayeri na mwavər mwavər da akwa səntari aka Musa, amma suayeri na raka raka da akwa kuriyari sur ɗa.

27Aghəla nda antə Musa ku pwarɓəla Yethro na baba' mwalankiɗa, antə tsa ku ngka akwa tsəɗiyirni.

Currently Selected:

Səɓəlari 18: KNB

Highlight

Copy

Compare