Səɓəlari 17

MTHLAKU Ku Vu Tə Yimi Səɓəla Akwa Pela

(Jik 20:1-13)

1Shanga mjir Israila ku thlatə kazhar Mtakər Sin, ka ləkwa mwa ka fəli ata laku ata kər ata kər apatə MTHLAKU ku tsawa ala ɗa. Akwa tsikərari da ku sə mzhitə Refidim ka fəli anda, amma yimi aɗi tə ka mji sa anda wa. 2Antə da nggungguni aka Musa ka pəla, “Na ala yeru yimi ka yeru sa.”

Antə Musa shinau ala ɗa abbər, “Kamnyar mi tə giri akwa jikamnya ata kəri ri? Kamnyar mi tə giri akwa ngkərtə MTHLAKU ri?”

3Amma kamnyar tə thləli akwa kətə mji ni, da ku ləkəma ka nggungguni aka Musa ka pəla, “Kamnyar mi tə gə fwaɓəla yeru akwa Masar kamnyar ka gə kurəmta yeru, kəga maɗa' yeru, kəga mwaɓiyayeri ar yeru ka thləli ri?”

4Antə Musa tuwa aka MTHLAKU abbər, “Man su tə kəi hara aka mji ngəni nə ri? Kamnyar da ku ɗəmhədzi ka da ndzəndzəhtə ra ka pela.” 5Antə MTHLAKU pəla aka Musa, “Kətə zwal natə gə tsa yimər Nayil kəgari ni, kara fatə mji laga na ol'ola akwa nca mjir Israila, ka gə pwa akəma ɗa ka giri təra. 6I ata mwari kəi thləthlata akəma giri adzə gagəma na ata Gar Horeb ni. Ga ata tsa gagəma ni, antə yimi ata səɓəla akwa gagəma ni ka mji sa.” Antə Musa ku hara tsu apa nda ata nca mji ol'olər Israila.

7Antə Musa ku kəga thləma vəi ni, Massa watau vəi ngkərtədzi, ka Meriba watau vəi beɗi, kamnyar tə mjir Israila ku jikamnya aka Musa ka ngkərtə MTHLAKU abbər, “MTHLAKU adzə mburu jiri nənga, tsa aɗi adzə mburu wa ri?”

Mjir Amalek Ku Dlər Mjir Israila

8Vir laga mjir Amalek ku si ka dlər mjir Israila ahar Refidim. 9Antə Musa pəla aka Joshuwa, “Mwari, ka gə carɓəla ala mburu mji na ata sə ləɓəla ra dlər mjir Amalek ɗəpa. Arna I ata mwari kəi thləthlata ata kəra gar ni, ka zwal natə Hyel pəla ali kəi kətə ni akwa tsi.” 10Antə Joshuwa ku hara tsu apatə Musa pəla alari, tə da ku mpa kəga mjir Amalek. Antə Musa, ka Haruna, ka Hur ku lətə kəra gar ni. 11Antə kəlara sakatə Musa ku haptə tsiyari amta, mjir Israila ata ləkəma ka səm mpa ni, amma ma tsa ku kəlghəi tsiyari, təkəma mjir Amalek ni ata ləkəma ka səm mpa ni. 12Amma tsiya Musa ku sə ghəri ka duna. Antə Haruna ka Hur ku paktə pela, ka si ka hangkir alari, antə tsa ndzəndzi ata. Antə Haruna ka Hur ku thləthlata athlimbəlari, mdə pal abwa matsəkar mdə pal abwa mazəmari akwa kathla alari tsiyari amta har tə pci təri. 13Apani antə Joshuwa ka sojayeri arni ku kurəmta mjir Amalek ka katsakar.

14Antə MTHLAKU pəla aka Musa, “Rəbutə labar ngəni akwa kakaɗu kamnyar ka tsa ndzi sur ɗangta. Tsuwa ka mdə pəla aka Joshuwa ata kəra alkawal tə I kəta abbər I ata kurəmta mjir Amalek karkar kazhar kəra duniya ni.” 15Antə Musa ku həntə bagaɗi ata vəi ndaga, ka kəga thləmari vəi ni abbər “MTHLAKU an alam arna.” 16Antə Musa pəla, “Haptə gir alamər MTHLAKU amta! MTHLAKU ata ləkəma ka mpa mjir Amalek akwa shanga zamanayeri.”

Currently Selected:

Səɓəlari 17: KNB

Highlight

Copy

Compare