ISAIA 53

1Kan thusawi tuin nge ring? Lalpa kut chu tu hnênah nge a lan?#Joh 12.38; Rom 10.16 2A hmaah chuan thil ṭiak no tak angin ani chu a chawr chhuak si a, lei ro aṭanga zung angin a puak chhuak bawk a ni. Pianhmang ṭhatna leh hmêl mawina rêng rêng a nei lo va; amah kan hmuhin amah kan duhna tûrin mawina rêng rêng a awm lo. 3Ani chu mihringte hmuhsit leh duh lohvin a awm a; lungngaihnate nei mi leh natna hre mi a ni a. Miten an hmai an huhsana ang chuan ani chu hmuhsitin a awm a; keini lah chuan ani chu kan ngaisâng si lo.

4Ani chuan kan natnate phurin, kan lungngaihnate pawh a phur ngei a; nimahsela, keini chuan lungngaihna tlâkbuakah, Pathian vuakah, tihretheihah kan ngai si a.#Mt 8.17 5Nimahsela, ani chu kan bawhchhiatnate avângin hliamin a awm a, kan khawlohnate avângin vuak thitlinin a awm a; kan thlamuanna tûra thununna chu a chungah a tla a, a vuakna vualtea tihdamin kan awm ta.#1 Pet 2.24 6Kan za hian berâm angin kan vâk bo va; mahni kawng kawngah kan pêng ṭheuh va; Lalpa chuan ani chungah chuan kan zaa khawlohna chu a nghat ta a.#1 Pet 2.25

7Ani chu hnehchhiahin a awm a; nimahsela, a inngaitlâwm a, a ka pawh a âng lo; berâmno talh tûra an hruaia ang leh, berâm a hmul mêttu hmaa ngawi renga awma ang maiin; a ni, a ka a âng lo.#Thup 5.6 8Hnehchhiahna leh rorêlnaa lâk bovin a awm a; a dam rualpuite lek phei chuan tuin nge mi nung ram ata tihborala a awm chu ngaihtuah tehlul ni? Ka mite bawhchhiatna avângin lungngaihna tlâkbuakin a awm a ni.#Tirh 8.32-33 9Tin, thil râwng taka ti ngai lovin, a kaah tihderna rêng rêng awm ngai lo mah sela, a thlân chu mi sualte hnên lamah an ruatsak a, a thih hnu chuan mi hausa hnên lamah a awm a.#1 Pet 2.22

10Nimahsela, Lalpan ani chu vuak thitlin a duh rêng a ni; a tina ta ngei a. A nunna chu sual tân thilhlana i hman tikah, a chi thlah chu a hmu tawh ang a, a dam chhûng nite chu a tisei ang a, Lalpa duh zâwng chu a kutah hlawhtlingin a awm ang. 11A nunna thawh rim rah chu a hmu ang a, a lungawi tawh ang. Ka chhiahhlawh fel tak chuan a hriatnain mi tam tak chu thiam a chantîr ang a, an khawlohnate chu a phurhsak ang. 12Chuvângin, ani chu mi liante chanvo ang ka sem ve ang a, ani chuan râllâk sumte chu mi chakte a sem ve ang; a nunna chu thi khawp hiala a leih buaka, bawhchhetute zînga chhiar tela a awm avângin; nimahsela, mi tam tak sualna chu a phur a, bawhchhetute tân chuan a ṭawngṭaisak a.#Mk 15.28; Lk 22.37

Currently Selected:

ISAIA 53: MIZOVBSI

Highlight

Copy

Compare