ISAIA 52

Pathianin Jerusalem a chhan dâwn

1Aw Zion, harh la, harh la, i chakna inbel rawh; aw Jerusalem, khawpui thianghlim, i silhfên mawi takte chu inbel rawh. Tûn achinah chuan serhtan loh leh mi bawlhhlawh chu i chhûngah an lût tawh dâwn si lo.#Thup 21.2,27 2Aw Jerusalem, vaivut i kai kha inthing rawh; tho la, ṭhu rawh. Aw Zion fanu, sala awm, i nghâwng phuarnate kha phelh rawh.

3 Lalpa chuan heti hian a ti si a: “Eng mah lova hralh in ni a; tichuan, tangka lova tlan in ni tawh ang,” tiin. 4Lalpa Pathian chuan heti hian a ti si a: “Ka mite chu a tîrah chuan Aigupta rama awm tûrin an chhuk a; tin, Assuria miten enga khaw lawilovin an hnehchhiah hlawm a. 5Chutichuan, tûnah hetah hian eng nge ka tih dâwn? Ka mite hi eng mah lova hruai bovin an awm si a,” Lalpan a ti, “An chunga rorêltute chu an ṭê tuar tuar a,” Lalpan a ti, “Ka hming hi nilênga sawichhiatin a awm a.#Rom 2.24 6Chuvângin, ka mite chuan ka hming an hria ang; chuvângin, chumi nîah chuan a sawitu chu ka ni tih an hria ang: ‘Ngai teh, keimah hi ka ni,’” tiin.

7Tlângahte Chanchin Ṭha thlena, remna thu tlângaupuia, thil ṭha Chanchin Ṭha thlena, chhandamna thu tlangaupuia, Zion hnêna, “I Pathian chu lalah a ṭhu,” titu ke chu a va mawi êm!#Nah 1.15; Rom 10.15; Eph 6.15 8Chu! I râl vêngtute aw chu! Aw an chhuaha, hlim takin an zai ho chu; Lalpa chu Zion-ah a lo kîr leh hunah chuan inhmatawnin an hmu dâwn si a.

9Jerusalem hmun chhe tawhte u, hlim chhuak phut ula, hlim takin zai ho rawh u, Lalpa chuan a mite chu a thlamuan ta si a, Jerusalem chu a tlan ta a ni. 10Lalpa chuan hnam tinrêngte mit hmuhah a bân thianghlim chu a hlîm ta; tichuan, kâwlkila mi zawng zawngin kan Pathian chhandamna chu an hmu ang. 11Chhuak rawh u, chhuak rawh u, chuta ṭang chuan chhuak rawh u, thil bawlhhlawh rêng rêng dek suh u; a chhûng ata kal chhuak rawh u; Lalpa bungbêl kengtute u, thianghlim takin awm rawh u.#2 Kor 6.17 12Hmanhmawh takin in kal chhuak dâwn si lo va, tlânchhiain in kal dâwn hek lo; Lalpa chuan in hma a hruai ang a, Israel-ho Pathian chu in hnu dâltu a ni ang.

Lalpa chhiahhlawh tuartu

13Ngai teh, ka chhiahhlawh chuan fing takin a ti ang; chawimawi leh chawi sânin a awm ang a, sâng tak maiin a awm ang. 14A hmêl chu mihring hmêl ai maha tihchhiat a ni a, a pianhmang pawh mihring pianhmang aia tihchhiat a ni bawk, mi tam takin mak an tih ang bawkin; 15hnam tam takin mak an ti a, lalho pawh mak tiin an dang reng ang; an hmuh ngai loh an hmuin an hriat ngai loh an hria ang.#Rom 15.21

Currently Selected:

ISAIA 52: MIZOVBSI

Highlight

Copy

Compare