HOSEA 9
9
Hosean Israel hremna tûr a puang
1Aw Israel, hnam dangte angin
hlim so bûng bûng khawpin
lâwm suh;
I Pathian chu nawhchi
i zawrhsan a,
Hruih zâwl tina a man chu
i ngaina si a.
2Hruih leh grêp sâwrna khurte
chuan anmahni a titlai lo vang a,
Uain thar tûr a hlawhchham ang.
3 Lalpa ramah chuan
an chêng lo vang a,
Ephraim chu Aigupta lamah
a kîr zâwk ang a,
Assuria ramah chaw thiang lo
an ei ang.
4 Lalpa hnênah uain chu
an bun chhuak lo vang a,
An thilhlante chu a tân
lâwmawm a ni hek lo vang;
An chhang chu lusûnte chaw
ang a ni ang a,
A ei apiang an bawrhbâng ang;
An chhang chu an nunna atân
mai a ni ang a,
Lalpa inah a lo lût lo vang.
5Inkhâwmpui urhsûn nîah leh
Lalpa kût nîah chuan
Eng nge in tih tâk ang le?
6Ngai teh u, chhiatna a lo thleng
ang a, an darh ang a,
Aigupta chuan anni chu
a lo khâwm zâwk ang a,
Memphis chuan a lo phûm ang.
An tangkaraw thil duhawmte chu
kângṭhaiin a bâwm ang a,
An puan inahte chuan
hnimhlîngnei a awm ang.
7Hremna nite chu a lo thleng a,
Thungrulhna nite chu
a lo thleng e;
Israel chuan chu chu a hria ang!
I khawlohna chu a tamin
intaina chu a nasat avângin,
Zâwlnei chu a â a, thlarau nei
mi chu mi â a ni.#Lk 21.22
8Ephraim râlvêngtu chu ka
Pathian hnêna awm a ni a;
Zâwlnei lah chu a kawng
tluanin thangkamtu thang
a awm a,
A Pathian inah pawh
intaina a awm.
9Gibea khuaa awm lai nite
ang khân
Nasa takin anmahni
an intikhawlo va.
An khawlohna chu
a hre reng ang a,
An sualnate chu a thungrûl ang.#Ro 19.1-30
Israel sualna leh a rah
10Israel chu thlalêra grêp rah ang
maiin ka hmu a.
In pate chu theipui, hun hmasaa
a hmin hmasa angin ka hmu;
Mahse, anni chu Baal-peor
hmunah an lo kal a,
Thil zahthlâk takah chuan
an inpumpêk ta a,
An ngainat tak milemte ang
bawk chuan an tenawm a ni.#Num 25.1-5
11Ephraim lah chu,
an ropuina chu sava angin
a thlâwk bo vang a:
Nau hring te, nau pai te,
rai te an awm lo vang.
12An fate puitlin mah sela mipa
rêng rêng awm lo tûrin
Ka sûntîr tho vang.
A ni, anmahni ka hawisan
hunah chuan
An chung a va pik zual dâwn êm!
13Tura ka hmuh ang bawkin
Ephraima chu hmun nuam
taka dahin a awm a:
Mahse, Ephraima chuan
a fate chu thattu hnênah
a la hruai chhuak ang.
14Aw Lalpa, neihtîr rawh:
Eng nge i neihtîr ang le?
Chhûl nau chhiat ṭhîn leh hnute
vuaite chu neihtîr ang che.
Israel chunga Lalpa rorêl
15An suahsualna zawng zawng chu
Gilgal-ah an ti ṭan a,
Chutah chuan anni chu
ka haw si a.
An thiltih suaksual avângte
chuan ka in ata
ka hnawt chhuak ang;
Anniho hi ka hmangaih
tawh lo vang.
An hotu zawng zawngte chu
hel hmang an ni.
16Ephraim chu vuakin a awm a,
an zung chu a ro zo va;
Rah an chhuah lo vang.
A ni, chhuah mah sela,
an chhûl rah duhawm tak chu
Ka that tho tho vang.
17Ka Pathian chuan anni chu
a paih bo vang,
Amah an bengkhawn loh avângin;
Tichuan, hnam dangte zînga
vâkvaiin an awm ang.
Currently Selected:
HOSEA 9: MIZOVBSI
Highlight
Copy
Compare
Share
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.
