मत्ति 7
7
वेॽहाॽ पाःन्धिक्मासि मेःन्
(लुका ६:३७-३८,४१-४२)
1ये़सुरे़ याम्मो पाःत्तु, “मनाहाॽ पान् मे़धिक्ते़म्सिम्मे़न्ने़ॽ, हे़क्केलॽरिक् निङ्वाॽफुमाङ्ङिल्ले़ खिनिॽआङ् पान् के़न्धिक्तिन्लो॥ 2वेॽहाॽ पान् के़धिक्तुम्सिम्बा हे़क्केए निङ्वाॽफुमाङ्ङिल्ले़ खिनिॽआङ् पान् के़धिक्तिॽरो॥ आक्खेलॽरिक् वेॽहाॽ के़मे़त्तुम्सिम्, बा हे़क्केलॽरिक्के निङ्वाॽफुमाङ्ङिल्ले़ खिनिॽआङ् के़मे़त्तिॽरो॥
3“आबाङे मिक्को सिङ्घङ् मे़न्निःमनाबाल्ले़ आक्खेलॽरिक् के़न्साॽरे़ कुमिक्कोबा साप्सेःक्किन् के़निसुबे? 4आबाङे मिक्को सिङ्घङ् मे़न्निःमनाबाल्ले़ आक्खेलॽरिक् के़न्साॽइन् के़मिक्कोबा साप्सेःक्किन् लःत्तुङ् पिने़ फाॽआङ् मे़प्मा के़सुक्तुबे? 5कुनिङ्वाॽ के़जिःप्पाए, के़रे़क्नुःल्ले़ तगि आबाङे के़मिक्कोबा सिङ्घङ्ङिन् लःत्ते़देसे़ॽओ, हे़क्क्याङ्लक् के़न्साॽरे़ कुमिक्कोबा साप्सेःक्किन् नुरिक् के़निसुआङ् लःप्मा के़सुक्तुॽरो॥
6“सेसे चिगक्वान् ख्याबाहाॽ#७:६ कप्मो, ख्याबाहाॽ नु फाक्हाॽ फाॽइन् ये़सुरे़ कुनिसाम् के़अप्पा मनासिरो॥ मे़बिरे़म्सिम्मिन्ने़ॽ, मेःन्ने फाॽग्र खे़ङ्हाॽ हिल्लिक् मे़हिसिङ् हे़क्क्याङ् के़म्भत्तिॽआङ् के़म्हाॽरिरो॥ हे़क्क्याङ् फाक्हाॽरे़ खुनिॽ तगि ते़क्सेःक्किन् मे़से़से़म्मिन्ने़ॽओ, खे़ङ्हाॽरे़ मे़दोॽरु मे़लाःक्तुॽरो॥”
नाःक्मा, कोःप्मा, खक्खक् मे़प्मा
(लुका ११:९-१३)
7“नाःक्ते़म्मे़ॽ, हे़क्क्याङ् खिनिॽ के़म्बिरिॽ॥ कोःत्ते़म्मे़ॽ, हे़क्क्याङ् खिनिॽ के़घोसुम्॥ लाम्धेःप्पो पेगे़म्मे़ॽआङ् खक्खक् मे़त्ते़म्मे़ॽ हे़क्क्याङ् खिनिॽ लागि हन्लो॥ 8थेआङ्भे़ल्ले़ के़नाःक्पाहाॽ निङ्वाॽफुमाङ्ङिल्ले़ पिरुसिॽ, के़गोःप्पाहाॽरे़ मे़घोसुॽ, हे़क्क्याङ् लाम्धेःप्पो के़बेःक्पाआङ् खक्खक् के़मे़प्पाहाॽ खुने़ॽ लाम्धेःप्पे़न् हन्दु पिरुसिॽरो॥ 9आत्तिल्ले़ कुस्सान् कुजा नाःक्किल्ले़ लुङ्ङिन् पिरुबे? 10इग्र ङासान् नाःक्तुल्ले़ असेःक्पे़न् पिरुबे? 11खिनिॽ निङ्वाॽ के़भे़ॽबा के़जोगिसाङ् खिनिॽ साहाॽरे़ मे़नाःक्तुल्ले़ नुबा पाःन्हाॽ पिमा के़ले़स्सुम्ने़ फाॽग्र, खे़न्नुःल्ले़आङ् यरिक् खिनिॽ साङ्ग्राम्पेदाङ्ङोबा पानुदिङ् पाःल्ले़ खुने़ॽ के़नाःक्पाहाॽ नुबा पाःन्हाॽ पिरुसिॽरो॥”
के़रे़क्नुःल्ले़ के़ये़क्पा थिम्
(लुका ६:३१)
12“के़रे़क् पाःन्नो मनाहाॽरे़ आक्खेलॽरिक् खिनिॽ के़म्मे़त्ति के़म्इःत्तिबा निङ्वाॽ के़जोगुम्, हे़क्केलॽरिक्के खिनिॽआङ् खे़ङ्हाॽ इःत्ते़म्सिम्मे़ॽओ, थेआङ्भे़ल्ले़ कन् थिम्मो मोसारे़ साप्तुबा साम्योथिम् नु माङ्निङ्वाॽपान् के़बाःप्पाहाॽरे़ मे़बाःत्तुबा पाःन्निन् के़त्लो॥”
चिभिःप्फिःप्पा लाम्
(लुका १३:२४)
13“चिभिःप्फिःप्पा लाःप्मादे़न्नोलाम् निङ्वाॽफुहाङ्जुम्मो लासे़म्मे़ॽओ, थेआङ्भे़ल्ले़ यम्बा लाःप्मादे़न् नु ताम्दाम्बा लाम्मिल्ले़ग मे़क्माओ के़देॽरिॽरो॥ खे़न्लाम्बा यरिक् मनाहाॽ मे़लाःत्लो॥ 14कर चुक्सा लाःप्मादे़न् नु चिभिःप्फिःप्पा लाम्मिल्ले़ग मे़न्नुप्मनाबा हिङ्मन्नो के़देॽरिॽरो॥ खे़न् के़घोबाहाॽग मिसाक्लक् मे़बोङ्लो॥”
सिङ्बुङ् नु सिङ्सेॽ
(लुका ६:४३-४५)
15“इङ्ले़क्पा माङ्निङ्वाॽपान् के़बाःप्पाहाॽनु सिङ्सिङ् ये़क्ये़क् लॽरे़म्मे़ॽओ, खे़ङ्हाॽग लाःक्कात्लाम् मे़ल्लुक् कुइसिक् मे़ले़ङ्सिङ्ङाङ् खिनिॽओ मे़दारो, कर सिगाङ्ग खे़ङ्हाॽ किप्मा के़घुबा पराबासिरो॥ 16खे़ङ्हाॽरे़ मे़जोगुबा खुनिॽ याःम्बक्कोलाम् खे़ङ्हाॽ कुसिङ् के़निःत्तुम्सिम्लो॥ थेआङ्भे़ल्ले़ मनाहाॽरे़ तिङ्ग्रेक् पोःक्लाओलाम् चे़ल्ले़क्सेॽ नु सिध्राःक्पोलाम् पःत्छेॽइन् मे़न्दुबुन्लो॥ 17हे़क्केलॽरिक्के के़रे़क् नुबा सिङ्बुङ्ङो नुबाए सिङ्सेॽइन् थोःक्लो, हे़क्क्याङ् ताप्फे़ःम्बा सिङ्बुङ्ङो ताप्फे़ःम्बाए सिङ्सेॽइन् थोःक्लो॥ 18हे़क्क्याङ् नुबा सिङ्बुङ्ङो ताप्फे़ःम्बा सिङ्सेॽइन् मे़धोःक्ने़न्लो, हे़क्क्याङ् ताप्फे़ःम्बा सिङ्बुङ्ङो नुबा सिङ्सेॽइन् मे़धोःक्ने़न्लो॥ 19हे़क्केलॽरिक् नुबा सिङ्सेॽ मे़न्धोःक्मना के़रे़क् सिङ्बुङ्हाॽ ताङ्माआङ् मिओ लाप्फुमा पोङ्लो॥ 20खे़ल्ले़चोगुल्ले़ खे़ङ्हाॽरे़ मे़जोगुबा खुनिॽ याःम्बक्कोलाम् इङ्ले़क्पा माङ्निङ्वाॽपान् के़बाःप्पाहाॽ कुसिङ् के़निःत्तुम्सिम्लो॥”
से़क्खाबा हुॽसाम्बाहाॽ
(लुका १३:२५-२७)
21आल्ल “‘आदाङ्बे, आदाङ्बे’, लॽरिक् याप्मि के़मे़प्पाहाॽ के़रे़क् साङ्ग्राम्पेदाङ्बा हाङ्जुम्मो मे़न्लाःत्ने़न्लो, कर साङ्ग्राम्पेदाङ्ङो के़वाॽबा पानुदिङ् आम्बारे़ कुनिङ्वाॽ हे़क्के के़जोःक्पाहाॽरक् मे़लाःत्लो॥ 22खासे़न् ये़न्नो यरिक् मनाहाॽ मे़दाआङ् अक्खे मे़मे़त्तारो, ‘आदाङ्बे, आदाङ्बे, खे़ने़ॽ के़मिङ्ङो माङ्निङ्वाॽपान् पारिगे़रो, हे़क्क्याङ् खे़ने़ॽ के़मिङ्ङो फे़न्साम्हाॽ नाःत्तुम् लःत्तुम्सिम्बे़आङ् निङ्वाॽ के़माबा याःम्बक्हाॽ चोगुम्बे़रो॥’ 23कर खे़न् ये़म्मो खे़ङ्हाॽ इङ्गाॽ अक्खे मे़त्तुङ्सिङ्, ‘खिनिॽग आप्फाल्ले़आङ् कुसिङ् निःत्निङ्बा होप्लो॥ खिनिॽ पानुदिङ् आम्बारे़ कुनिङ्वाॽ हे़क्के मे़न्जोःक्के फे़न् याःम्बक् के़जोःक्पासे, कप्मोलाम् पेगे़म्मे़ॽ!’”
ने़त्छि परिक्ले़न् हिम्पाङ्यक्
(लुका ६:४७-४९)
24आल्ल “खे़ल्ले़चोगुल्ले़ पेलिगे़न् आबाःन्जाक् के़घे़म्बाआङ् हे़क्के के़जोःक्पे़ङ्ग पयम् यम्बा लुङ्सम्दाङ् हिम्पाङ्यक् के़ने़बाआङ् हिम् के़जोःक्पा सिक्कुम्बा मना कुइसिक् चोक्लो॥ 25हे़क्क्याङ् पाङ्गे़न्दिङ् वाहित् थ्ये़आङ्, यङ्घङ्ङिन् कुक्खे़ ये़, हे़क्क्याङ् किप्मा के़घुबा सुरित् केजङ् हुरे़आङ् खे़न् हिम्मिन् हिप्तुसाङ् मे़जोःन्दे़न्लो, थेआङ्भे़ल्ले़ खे़न् हिम्मिल्ले़न् हिम्पाङ्यक्किङ्ग पयम् यम्बा लुङ् सम्दाङ् ने़स्से़रो॥ 26कर पेलिगे़न् आबाःन्जाक्किन् के़घे़म्बाआङ् हे़क्के मे़न्जोःक्मनाबाङ्ग ये़ःङ्घाओ हिम्पाङ्यक् के़ने़बाआङ् हिम् के़जोःक्पा अदङ् मना कुइसिक् चोक्लो॥ 27पाङ्गे़न्दिङ् वाहित् थ्ये़आङ्, यङ्घङ्ङिन् कुक्खे़ ये़, हे़क्क्याङ् किप्मा के़घुबा सुरित् केजङ् हुःरे़आङ् खे़न् हिम्मिन् हिप्तुल्ले़ यरे़बेरो॥”
28ये़सुरे़ कन् के़रे़क् पाःन्हाॽ पाःत्तु सुरु, हे़क्क्याङ् कुनिसाम् के़घे़म्बा यरिक् मनाहाॽरे़ खुनिॽ निङ्वाॽ मये़रो, 29थेआङ्भे़ल्ले़ खुने़ॽग साम्योथिम्साम्बाहाॽ कुइसिक् मेःन्, कर युक् के़गप्पा कुइसिक् हुॽरुसिरो॥
Currently Selected:
मत्ति 7: LIF
Highlight
Share
Compare
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
