मत्ति 6
6
चागे़नाःक्पाहाॽ स्वाःत्ताङ् पिमासि
1ये़सुरे़ याम्मो मे़त्तुसि, “सिङ्सिङ् ये़क्ये़क् लॽरे़म्मे़ॽओ, खिनिॽ के़जोगुम्बा साम्योबा याःम्बक्हाॽ मनाहाॽरे़ मे़निसुआङ् खिनिॽ नारा मे़भोसुर फाॽआङ् मना तगि मे़जोगे़म्मिन्ने़ॽओ॥ हे़क्के के़जोगुम्ने़ फाॽग्र साङ्ग्राम्पेदाङ्ङोबा पानुदिङ् पा निङ्वाॽफुमाङ्लाम् थेआङ् के़ङ्घोसुम्मिन्लो॥ 2हे़क्केलॽरिक् मे़ङ्गप्मनाबाहाॽ कुजा के़बिरुसिल्ले़ वेॽहाॽरे़ मे़घे़प्सुर मे़निसुर फाॽआङ् मुक्ला मे़मुक्खे़न्ने़ॽओ॥ कुनिङ्वाॽ के़जिःप्पाहाॽरे़ यहुदि चुम्लुङ्हिम्मो नु लाम्लाम्मो मनाहाॽरे़ मे़निसुआङ् खुनिॽ नारा मे़भोसुर फाॽआङ् हे़क्के मे़जोगुॽ॥ इङ्गाॽ से़क्खाए मे़त्ने़ॽ, खे़ङ्हाॽरे़ खुनिॽ हाङ्से़म्मिङ्ग तगिसा मे़घोसु मे़सुरुआङ् मे़वाॽ॥ 3कर खे़ने़ॽ मे़ङ्गप्मनाबाहाॽ के़बिरुसिल्ले़ वेॽहाॽरे़ मे़न्निए पिरे़से़ॽओ॥#६:३ ग्रिक पाःन्दाङ्ङो “के़जुप्साङ् हुक्किल्ले़ के़बिरुसिबान् के़भे़न्छाङ् हुक्किल्ले़ निङ्वाॽ मे़घोसुन्ल” पोङ्॥ 4हे़क्केलॽरिक् के़बिरुसिबा पाःन्निन् स्वाःत्ताङ् पोङ्लरो॥ हे़क्क्याङ्लक् स्वाःत्ताङ् के़जोगुबा पान् के़निबा पानुदिङ् के़म्बारे़ हाङ्से़म् के़बिरो॥”
तुवा चोःक्मा
(लुका ११:२-४)
5“हे़क्क्याङ् खिनिॽ तुवा के़जोगुम्मिल्ले़ कुनिङ्वाॽ के़जिःप्पाहाॽ कुइसिक् मे़जोगे़म्मिन्ने़ॽओ॥ खे़ङ्हाॽरे़ग मनाहाॽरे़ मे़निसुर फाॽआङ् यहुदि चुम्लुङ्हिम्मो नु लाम्लाम्मो ये़प्माआङ् तुवा चोःक्मा खुनिॽ सिराॽथाङ्लो॥ इङ्गाॽ से़क्खाए मे़त्निङ्, खे़ङ्हाॽरे़ खुनिॽ याःम्बक्किल्ले़न् हाङ्से़म्मिन् तगिए मे़घोसु मे़सुरुआङ् मे़वाॽरो॥ 6कर खे़ने़ॽ तुवा के़जोगुल्ले़ के़हिम्लक्सिङ् सिगाङ् लासे़ॽआङ् लाम्धेःप्पान् सुबे़ॽ, हे़क्क्याङ् निमे़न्दे़प्मनाबा पानुदिङ् के़म्बानु एःक् तुवा चोगे़ॽओ॥ हे़क्क्याङ् स्वाःत्ताङ् चोःक्मनाबा याःम्बक् के़निबा पानुदिङ् के़म्बारे़ हाङ्से़म् के़बिरो॥
7“हे़क्क्याङ् तुवा के़जोगिल्ले़ निङ्वाॽफुमाङ्ङिन् कुसिङ् मे़न्निःप्मनाबाहाॽ हे़क्के मनाहाॽरे़ मे़घे़प्सुर मुनुनु मे़लॽरे़म्मिन्ने़ॽओ, थेआङ्भे़ल्ले़ खे़ङ्हाॽरे़ग यरिक् मे़बाःत्तिल्ले़रक् माङ्ङिल्ले़ खुनिॽ तुवान् खे़प्सुॽ फाॽआङ् मे़इःत्तुॽरो॥ 8कर खिनिॽ खे़ङ्हाॽ हे़क्के मे़जोगे़म्मिन्ने़ॽओ, थेआङ्भे़ल्ले़ नाःक्मानुःल्ले़ तगिए साङ्ग्राम्बा खिनिॽ पानुदिङ् पाःल्ले़ के़ङ्गत्तुम्मिन्बान् निसुॽरो॥
9“खे़ल्ले़चोगुल्ले़ अक्खेलॽरिक् तुवा चोगे़म्मे़ॽओ—
“‘साङ्ग्राम्पेदाङ्ङो के़वाॽबा आनिगे पानुदिङ् पाए,
मनाहाॽरे़ के़मिङ्ङिन् सेसे मे़इःत्तुर मिङ्सो इङ्धाङ् के़म्बिररो॥
10के़हाङ्जुम्मिन् ताररो,
हे़क्क्याङ् साङ्ग्राम्पेदाङ्ङो हे़क्के इक्सादिङ् खाम्बेःक्मोआङ् के़निङ्वाॽ कुइसिःक्के मे़जोगुररो॥
11हे़क्क्याङ् थिक्याःन्धक्पा कुजान् आबिरे़ॽओ॥
12आनिगे तक्ले़ङ्वाओ लायो के़जोःक्पाहाॽ ले़प्मि पिरुम्सिम्बे़बा हे़क्केए
आनिगे चोगुम्बे़बा लायोन् ले़प्मि आबिरे़ॽओ॥
13हङ्साॽमो आन्धासे़न्ने़ॽओ,
कर माफे़न्साम्लाम् आसे़ःप्ते़ॽओ॥
((थेआङ्भे़ल्ले़ हाङ्जुम्, मुक्साम् नु मिमिदिङ्ङिन् सदादिङ् खे़ने़ॽइन्नेरो॥))’
14“थेआङ्भे़ल्ले़ खिनिॽ तक्ले़ङ्वाओ लायो के़जोःक्पाहाॽ ले़प्मि के़बिरुम्सिम्ने़ फाॽग्र साङ्ग्राम्पेदाङ्ङो के़वाॽबा खिनिॽ पानुदिङ् पा निङ्वाॽफुमाङ्ङिल्ले़आङ् ले़प्मि के़बिरिॽरो॥ 15कर खिनिॽ तक्ले़ङ्वाओ लायो के़जोःक्पाहाॽ ले़प्मि के़म्बिरुम्सिम्मिन्ने़ फाॽग्र खिनिॽ पानुदिङ् पा निङ्वाॽफुमाङ्ङिल्ले़आङ् खिनिॽ लायोन् ले़प्मि के़म्बिरिन्लो॥”
चाने़त्
16“हे़क्क्याङ् खिनिॽ चाने़त् के़युङ्ङिल्ले़#६:१६ यहुदिहाॽ निङ्वाॽफुमाङ्ङिन् इङ्धाङ् पिसे़ चाने़त् मे़युङे़रो॥ निङ्वाॽ के़जिःप्पाहाॽ कुइसिक् खिनिॽ ना मे़माक्ते़म्मिन्ने़ॽओ, थेआङ्भे़ल्ले़ खे़ङ्हाॽ चाने़त् मे़युङ्ङिल्ले़ वेॽ मनाहाॽरे़ निङ्वाॽ मे़घोसुर फाॽआङ् खुनिॽ नारान् मे़गिःन्दुर मे़युङ्लो॥ इङ्गाॽ से़क्खाए मे़त्निङ्, खे़ङ्हाॽरे़ग खुनिॽ हाङ्से़म्मिन् के़रे़क् मे़घोसु मे़सुरुआङ् मे़वाॽरो॥ 17कर खे़ने़ॽ चाने़त् के़युङ्ङिल्ले़ खे़ने़ॽ के़धे़गेःक्पो निःङ्गेॽ हुःत्ते़ॽआङ् के़नारान् वाहप्ते़ॽओ॥ 18हे़क्केलॽरिक् खे़ने़ॽ चाने़त् के़युङ्बान् वेॽ मनाहाॽरे़ निङ्वाॽ मे़ङ्घोसुन्लरो, कर निमे़न्दे़प्मनाबा पानुदिङ् के़म्बा निङ्वाॽफुमाङ्ङिल्ले़रक् निसुररो॥ हे़क्के के़जोगुल्ले़ स्वाःत्ताङ् चोःक्मनाबा के़निबा पानुदिङ् के़म्बारे़ हाङ्से़म् के़बिॽरो॥”
साङ्ग्राम्पेदाङ्बा याङ्साकुन्धे
(लुका १२:३३-३४)
19“इक्सादिङ् खाम्बेःक्मो याङ्साकुन्धे मे़लुप्से़न्ने़ॽओ॥ खे़प्मोग थक्पाहाॽरे़ मे़जःॽ, हिङ्धोःक्किल्ले़ यःन्दुॽ, हे़क्क्याङ् खुःन्द्रिक्पाहाॽरे़ मे़घुःत्तुॽरो॥ 20कर साङ्ग्राम्पेदाङ्ङो याङ्साकुन्धे लुप्से़म्मे़ॽओ॥ खे़प्मोग थक्पाहाॽरे़ मे़न्जने़न्, हिङ्धोःक्किल्ले़आङ् मे़यःत्छुन्, हे़क्क्याङ् खुःन्द्रिक्पाहाॽरे़आङ् मे़न्घुःत्तुन्लो॥ 21थेआङ्भे़ल्ले़ आत्तो खिनिॽ याङ्साकुन्धेन् वाॽ, खे़प्मोए खिनिॽ निङ्वाॽइन्नाङ् पेःक्लो॥
22“मिक्किङ्ग नासिङ्गे़न् थक्कोबा सेमिरो, खे़ल्ले़चोगुल्ले़ के़मिक्किन् नुॽने़ फाॽग्र, के़रे़क् नासिङ्गे़न् के़धक्किन् ओःत्लो॥ 23कर खे़ने़ॽ के़मिक्किन् फे़न्ने़ फाॽग्र के़रे़क् नासिङ्गे़न् के़धक्किन् खादाम्मो वाॽरो॥ खे़ल्ले़चोगुल्ले़ खे़ने़ॽओबा से़न्दाङ्गे़न् ओःत्तिःन्ने खादाम्ने़ फाॽग्र खे़न् खादाम्मान् आक्खे़न् साॽरिक् पोङ्बिला॥ 24आत्तिल्ले़आङ् ने़प्फु दाङ्बाहाॽ से़वा चोःक्मासि मे़सुक्तुन्सिन्लो॥ खे़ल्ले़ थिक्किन् नुरिक् मे़त्तुॽआङ् वेॽसमा चिःत्तुॽरो, मे़ःङ्ग्र थिक्किन् इङ्धाङ् पिरुआङ् वेॽसमा इङ्धाङ् मे़बिरुन्लो॥ खे़ने़ॽ निङ्वाॽफुमाङ्ङिन् नु याङ्साकुन्धेन् सोसोरिक् से़वा चोःक्मा के़न्छुक्तुन्लो॥”
निङ्वाॽ इःत्छिङ्मा
(लुका १२:२२-३१)
25“खे़ल्ले़चोगुल्ले़ इङ्गाॽ खिनिॽ मे़त्निङ्, कन् ने़त्तिगे़न् हिङ्मन्नो थेःन् चामा थुङ्मा बे फाॽआङ् निङ्वाॽ इःत्छिङ्मो मे़ध्ये़म्मिन्ने़ॽओ, हे़क्केलॽरिक्के कन् नासिङ्गे़न् थक्कोआङ् थेःन् चाङ्मा वाःप्माबे फाॽआङ् निङ्वाॽ इःत्छिङ्मो मे़ध्ये़म्मिन्ने़ॽओ॥ ने़त्तिगे़न् हिङ्मन्निन् चामा थुङ्मानुःल्ले़ हे़क्क्याङ् नासिङ्गे़न् थक्किन् चाङ्मा वाःप्मानुःल्ले़ नुबा मे़जोःक्ने़न्बि? 26पुसाहाॽ ओमे़त्ते़म्सिम्मे़ॽ, खे़ङ्हाॽरे़ चा मे़न्देसुन् मे़न्छुप्सुन् हे़क्क्याङ् याङ्मे़ङ्घोःत्तुन्छाङ् साङ्ग्राम्पेदाङ्बा खिनिॽ पाःल्ले़ खे़ङ्हाॽ चामा पिरुसिरो॥ हे़क्केःल्ले़ खिनिॽ खे़ङ्हाॽनुःल्ले़आङ् इमे़ल्लुङ्बा के़न्जोगिम्बि? 27निङ्साम्मो के़ध्ये़ॽइआङ् खिनिॽ हिङ्मन्नो कुमुक्थिक् फोमा के़न्छुक्तुम्मिन्॥
28“हे़क्केःल्ले़ थे़माःन् चाङ्मा वाःप्माबे फाॽआङ् थेआङ् निङ्साम्मो के़ध्ये़ॽइबाबे? ताम्भुङ्मो के़लिङ्बा फुङ्ङिन् ओमे़त्ते़म्मे़ॽ, खे़ङ्हाॽ याःम्बक् मे़न्जोःक्ने़न् खिआङ् मे़न्लःन्ने़न्॥ 29कर इङ्गाॽ मे़त्निङ्, सोलोमन हाङ्ङिन् मिङ्सोधाःङ्सोओ मुक्ते़आङ् वये़साङ् खे़न् यारिक्काङ् नुबा तेत् मे़जाक्सिङ्ङिन्लो॥ 30नसान् के़सुःम्बासे, आइन् के़लिङ्बाआङ् ताःन्दिक् मिओ लाप्फुमा के़बोङ्बा यान् फुङ्हाॽ निङ्वाॽफुमाङ्ङिल्ले़ खे़न् यारिक् नुबा चोगुसिल्ले़ खे़न्नुःल्ले़ नुःरिक्काङ् तेत् खिनिॽ के़न्जाःक्तिम्बि? 31खे़ल्ले़चोगुल्ले़ थेःन् चामा थुङ्मा बे, थेःन् चाङ्मा वाःप्माबे फाॽआङ् निङ्वाॽ इःत्छिङ्मो मे़ध्ये़म्मिन्ने़ॽओ॥ 32थेआङ्भे़ल्ले़ थिम्मे़न्दङ् सुवाङ्हाॽरे़ खुनिॽ निङ्वाॽइन् बा खे़न् पाःन्हाॽओ पत्लो, कर साङ्ग्राम्पेदाङ्ङोबा खिनिॽ पानुदिङ् पाःल्ले़ कन् के़रे़क् पाःन्हाॽ चाहाबा के़जोगिॽ फाॽआङ् निसुरो॥ 33कर के़रे़क्नुःल्ले़ तगि निङ्वाॽफुमाङ्ङिल्ले़ कुहाङ्जुम् नु कुसाम्योनिमान् कोःत्ते़म्मे़ॽ हे़क्क्याङ् कन् के़रे़क् पाःन्हाॽ खुने़ॽ के़बिरिॽरो॥ 34खे़ल्ले़चोगुल्ले़ ताःन्दिक् थे पोङ् फाॽआङ् निङ्वाॽ इःत्छिङ्मो मे़ध्ये़म्मिन्ने़ॽओ, थेआङ्भे़ल्ले़ ताःन्दिक्पा तुक्खेन् ताःन्दिक्के पोङ्, हे़क्क्याङ् आइन्बा तुक्खेन् आइन्छा यरिक् पोःक्खे़आङ् वाॽरो॥”
Currently Selected:
मत्ति 6: LIF
Highlight
Share
Compare
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
