मत्ति 17
17
ये़सुरे़ कुनाइबेक् ले़ङ्सिङ्
(मर्कु ९:२-१३; लुका ९:२८-३६)
1हे़क्के मे़त्तुसिबा तुक्सि (६) ये़न् एगाङ् ये़सुरे़ पत्रुस, याकुब नु कुन्साॽ युहुन्नाःन्लक् खुने़ॽनु थो केःम्बा कोःक्माओ तेॽरुसि॥ 2खे़ङ्हाॽरे़ ओमे़मे़त्तुर मे़बत्छे़ल्ले़ए ये़सुरे़ कुनाइबेक् ले़ङ्सिङ्ल पे, हे़क्क्याङ् कुनारान् नाम्मिन् कुइसिक् ले़क्ते़ हे़क्क्याङ् कुदेःत्तिन्नाङ् मिक्किन् चे़मुर ओःत्ते़रो॥ 3हक्चघत् खे़प्मो माङ्निङ्वाॽपान् के़बाःप्पा मोसान् नु एलियान्नाङ् थाःम्ने़त्छिआङ् ये़सुन् नु ताॽजे़क्खे़त्छि॥ 4पत्रुसरे़ ये़सुन् मे़त्तु, “दाङ्बे, आनिॽ कप्मोए वाॽमा नुबा पोङ्लो॥ खे़ने़ॽ निङ्वाॽ के़जोगुने़ फाॽग्र सुम्सि याक्साहाॽ चोगुङ्, थिक् खे़ने़ॽइन् हे़क्क्याङ् मोसान् नु एलियारे़ खुन्छिॽ लागिआङ् थिक्थिक् चोगुङ्लो॥”
5अक्खेलॽरिक् खुने़ॽ पारे़र पत्छे़ल्ले़ए फ लॽरिक् के़ओःप्पा खाप्मिःत्तिल्ले़ चिदे़प् ते़प्तुसिआङ् खाप्मिःत्तोलाम् अक्तङ्बा इक्ला मे़घे़प्सु, “कन् आमिःम् आस्सारो, खुने़ॽनु इङ्गाॽ सःत्ताङ्ङाङ् वाॽआरो॥ खुने़ॽ पाःत्तुबा पाःन्निन् खे़प्से़म्मे़ॽओ॥” 6हुॽसाम्बाहाॽरे़ कन् मे़घे़प्सुल्ले़ साॽरिक् मे़गिसे़आङ् खाम्मो साम्बोन् हबत् मे़भन्छिङ्लो॥
7कर ये़सुन् खे़प्मो त्ये़आङ् खे़ङ्हाॽ सुस्सुसिर मे़त्तुसि, “पोगे़म्मे़ॽ, मे़गिसे़म्मिन्ने़ॽओ॥” 8हे़क्क्याङ् खे़ङ्हाॽरे़ ओमे़मे़त्तुल्ले़ खे़प्मो ये़सुन् लक् वये़ कर वेॽ हाःत्ताङ् होःप्ते़रो॥
9खे़ङ्हाॽ कोःक्मालाम् यो मे़ध्ये़र मे़बत्छे़ल्ले़ ये़सुरे़ खे़ङ्हाॽ इङ्जाङ् पिरुसि, “इङ्गाॽ मे़न्छाम्सान् सिमे़न्लाम् याम्मो मे़न्हिङ्ङे थारिक् कन् के़निसुम्बा पाःन्हाॽ आत्तिन्नाङ् मे़जे़क्ते़म्मिन्ने़ॽओ॥”
10खे़ङ्हाॽरे़ ये़सुन् सेःन्मे़दोसु, “थेआङ् साम्योथिम्साम्बाहाॽरे़ निङ्वाॽफुमाङ्ङिल्ले़ सेःन्दुबा ख्रिस्ते़न् तामानुःल्ले़ तगि एलियाःङ्ग युमाए पोङ् फाॽआङ् मे़बाःत्तुबाबे?”
11ये़सुरे़ नोगप् पिरुसि, “से़क्खाएरो, एलियाःङ्ग युःॽआङ् निङ्वाॽफुमाङ्ङिल्ले़ सेःन्दुबा ख्रिस्तरे़ कुदामान् के़रे़क् यारिप् चोगुॽरो॥ 12कर इङ्गाॽ से़क्खाए मे़त्निङ्, एलियान् त्ये़ चुरे़आङ् वाॽ, कर मनाहाॽरे़ कुसिङ् मे़न्निःत्तुन्नाङ् खे़ङ्हाॽरे़ खुने़ॽ निङ्वाॽ थाप्थाप् मे़मे़त्तुआङ् मे़वाॽरो॥ हे़क्केलॽरिक् मे़न्छाम्साःन्नाङ् खुनिॽ हुक्को थाआङ् तुक्खे चारो॥” 13हे़क्क्याङ्लक् ये़सुरे़ बप्तिस्मा के़बिबा युहुन्नाःल्ले़ कुयाःम्बेओ मे़त्तुसिबा फाॽआङ् हुॽसाम्बाहाॽरे़ कुसिङ् मे़निःत्तु॥
माफे़न्साम्मिल्ले़ याङ्घुबा मना
(मर्कु ९:१४-२९; लुका ९:३७-४३)
14हे़क्क्याङ् ये़सुन् नु कुहुॽसाम्बाहाॽ याम्मो यरिक् मनाहाॽ मे़वये़बा ते़न्नो मे़गे़रे़ल्ले़ खे़प्मो मनाधिक् ये़सुरो त्ये़आङ् कुदगि थुङ्बोहजॽ युङ्सिङ्ल 15पाःत्तु, “आदाङ्बे, आस्सान् लुङ्माॽ तुक्ते़ॽओ॥ थेआङ्भे़ल्ले़ खे़न्निन् थप्माममे़ल्ले़ याङ्घुआङ् वाॽ हे़क्क्याङ् साॽरिक् तुक्खे चारो॥ ए़त्ले़ङ् खे़न् च्वाःत्तो नु मिओ थारो॥ 16खे़न् के़हुॽसाम्बाहाॽरो मे़वेःन्दुर फाॽआङ् तारुङ्, कर खे़ङ्हाॽरे़ वेःम्मा मे़न्छुक्तुन्लो॥”
17ये़सुरे़ मे़त्तुसि, “नसान् के़होप्पा नु ताक्के़भे़ॽबा मनासे, आप्फाल्ले़ थारिक् इङ्गाॽ खिनिॽनु वाॽआबाबे? आप्फाल्ले़ थारिक् नासि थःत्निङ्बाबे? खे़न् चुक्पे़न् कत्ना फे़त्ते़म्मे़ॽ॥” 18ये़सुरे़ खे़न् फे़न्साम्मिन् फे़ःक्तुआङ् खे़न् चुक्पे़ल्लोलाम् लःन्दे़ पेरो॥ बा खे़न् ये़म्मोए खे़न् चुक्पे़न् वेःत्ते़रो॥
19याङ्सि हुॽसाम्बाहाॽ स्वाःत्ताङ् ये़सुरो मे़द्ये़आङ् सेःन्मे़दोसु, “थेआङ् आनिगे खे़न् फे़न्साम्मिन् नाःप्मा लःप्मा मे़सुक्तुम्बे़न्बाबे?”
20ये़सुरे़ मे़त्तुसि, “थेआङ्भे़ल्ले़ खिनिॽ नसाःन्निन् सुःन्लो॥ इङ्गाॽ से़क्खाए मे़त्निङ्, खिनिॽ नसाःन्निन् यःङ्गेॽ याॽरिःम्बाधिक् याःत्छाङ् कन् कोःक्मान् ‘खे़प्मोलाम् खे़त्छिङ्ङे़ॽ’ के़मे़त्तुम्मिल्ले़, खे़न् खे़त्छिङ् पेःक्लो॥ हे़क्क्याङ् खिनिॽलाम्बा पोङ्मा मे़न्छुक्मना थेआङ् होप्लो॥” 21((कर अक्तङ्बा फे़न्साम्मिङ्ग तुवा नु चाने़त् मेःन्ने लःप्मा सुक्मे़दे़त्ने़न्लो॥))
ये़सुरे़ याम्मो कुसिमे़ल्ले़ कुयाःम्बेओ पाःत्तुॽ
(मर्कु ९:३०-३२; लुका ९:४३-४५)
22हे़क्क्याङ् ये़सुन् नु कुहुॽसाम्बाहाॽ गालिल थुम्मो मे़द्ये़ल्ले़ खुने़ॽ अक्खे मे़त्तुसि, “आल्ल मे़न्छाम्सान् इङ्मे़ले़क्तुॽआङ् मनाहाॽरो हुक्मे़सुप्तुॽ, 23हे़क्क्याङ् खे़ङ्हाॽरे़ खुने़ॽ मे़से़रुॽ, कर सुम्ये़न् एगाङ् सिमे़न्लाम् याम्मो कुहिङ्वे़त् पोङ्लो॥” कन् पाःन्निन् मे़घे़प्सुआङ् कुहुॽसाम्बाहाॽरे़ खुनिॽ योम् पुॽरे़रो॥
ये़सुरे़ माङ्हिम् एःङ्याङ् हुङुॽ
24याङ्सि ये़सुन् नु कुहुॽसाम्बाहाॽ कपर्नहुम्मो मे़द्ये़, हे़क्क्याङ् माङ्हिम् एःङ्याङ्#१७:२४ ला ३०:१३-१६, यहुदि साम्योथिम्मो तङ्बे निबोङ्ङाङ् (२०) थोबा ये़म्बित्छाॽसारे़ तङ्बे थप्मा माङ्हिम्मिन् खाप्मा, चे़ःक्मा, चोःक्मारे़ लागि माङ्हिम् एःङ्याङ् हुङ्मा के़बोङ्बा वये़॥ खे़न् एःङ्याङ्ङिन् निये़न्बा याःलिक्ले़न् नाम्याक् वये़॥ के़भोङ्बाहाॽआङ् पत्रुसरो मे़द्ये़आङ् सेःन्मे़दोसु, “के़सिक्साम्बाल्ले़ माङ्हिम् एःङ्याङ् मे़हुङुन्बि?”
25खे़ल्ले़ नोगप् पिरु, “थेआङ् मे़हुङुन्बे? हुङुॽरो॥”
हे़क्क्याङ् पत्रुसे़न् हिम्मो लासे़नामे़ःन्ने़ ये़सुरे़ सेःन्दोसु, “सिमोने, थे निङ्वाॽ के़इःत्तुबे? इक्सादिङ् खाम्बेःक्मोबा हाङ्हाॽरे़ एःङ्याङ् आत्तिल्लोलाम् मे़भोःक्खुबे? खुनिॽ आबाङे मनालाम्बा मे़भोःक्खुबि, इ वेॽ लाजेॽबा मनालाम् मे़भोःक्खुबि?”
26पत्रुसरे़ नोगप् पिरु, “वेॽ लाजेॽबा मनालाम् मे़भोःक्खुरो॥”
ये़सुरे़ मे़त्तु, “हे़क्केने़ फाॽग्र खुनिॽ आबाङे मनाहाॽरे़ हुङ्मा मे़बोङ्ने़ल्लो॥ 27हे़क्केसाङ् आनिॽनु खे़ङ्हाॽरे़ खुनिॽ सिक् मे़बोःक्ने़न्ल फाॽआङ् गालिल वरक्को पेगे़ॽआङ् खेःङ् तेसे़ॽओ॥ के़रे़क्नुःल्ले़ तगि के़दे़म्सुबा ङाःल्ले़ कुमुराओ याङ्इत्छिधिक् के़घोसुॽरो॥ खे़न् तेॽरे़ॽआङ् आन्छिॽ माङ्हिम् एःङ्याङ्ङिन् हुङे़ॽओ॥”
Currently Selected:
मत्ति 17: LIF
Highlight
Share
Compare
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
