मत्ति 16
16
साङ्ग्राम्पेदाङ्बा मिक्सेन्
(मर्कु ८:११-१३; लुका १२:५४-५६)
1कुभा फरिसिहाॽ नु सदुकिहाॽ मे़द्ये़आङ् “साङ्ग्राम्पेदाङ्लाम् के़ये़बा फाॽआङ् निङ्वाॽ के़माबा मिक्सेःन्धिक् याप्मि ओसेःन्आधाक्ते़ॽ” मे़मे़त्तुर ये़सुरे़ कुनिङ्वाॽ मे़साॽरु॥
2हे़क्केःल्ले़ ये़सुरे़ नोगप् पिरुसि, “युःन्छिक् ताङ्साक्पे़न् हे़ःत् लॽइल्ले़ ताःन्दिक् नाम्से़ःक्मा लॽरिक् के़बाःत्तुम्॥ 3हे़क्क्याङ् तानाम् ताङ्साक्पे़न् मुदःप्पिल्ले़#१६:३ ग्रिक पाःन्दाङ्ङो “ताङ्साक्पे़न् हे़ःत् लॽआङ् मुदःप्पिल्ले़” पोङ्॥ आइन् वाहित् थाःसुॽ, सुरित् केजङ्ङिन् हुःॽ लॽरिक् के़बाःत्तुम्॥ अक्खेलॽरिक् ताङ्साक्पे़न् ओगे़मे़त्तुम्माङ् वाये़म्मिन् नुबा नु ताप्फे़ःम्बा चोक् फाॽआङ् के़से़न्दुम्मिल्ले़ आक्खेलॽरिक् कन् ये़म्मो के़दाबा मिक्सेःन्हाॽ कुसिङ् के़न्निःत्तुम्मिन्बाबे? 4कन् ये़म्मोबा कुइगे़भे़ॽबा नु लायोबा मनाहाॽरे़ निङ्वाॽ के़माबा मिक्सेःन्हाॽ ओमे़प्मा मे़गोःत्तुॽ, कर खे़ङ्हाॽरे़ग माङ्निङ्वाॽपान् के़बाःप्पा योनारे़ कुमिक्सेःन्नाङ्धो वेॽ मिक्सेन् थेआङ् मे़ङ्घोसुन्लो॥” हे़क्क्याङ् ये़सुरे़ खे़ङ्हाॽ पक्थसिआङ् खे़प्मोलाम् थासिङ्लो॥
फरिसि नु सदुकिहाॽरे़न् खे़स्सुङ्
(मर्कु ८:१४-२१)
5याङ्सि हुॽसाम्बाहाॽ वरक्किल्ले़ नाधाःम्बि मे़गे़रे़ल्ले़ खे़ङ्हाॽरे़ खरे़ःङ् याङ्सिङ्मा निङ्वाॽ मे़भेःत्छुबान् निङ्वाॽ मे़घोसुरो॥ 6ये़सुरे़ खे़ङ्हाॽ मे़त्तुसि, “फरिसिहाॽ नु सदुकिहाॽरे़ खुनिॽ खरे़ःङ् के़भङ्बा सिदाॽलाम् सिङ्सिङ् लॽरे़म्मे़ॽओ॥”
7खे़ङ्हाॽरे़ खरे़ःङ्ङिन् आम्भे़त्तुम्मिन्नाङ् आनिॽ अक्खे आमे़त्ते़बारो फाॽआङ् खुनिॽ लुम्मो पान् मे़धक्ते़रो॥
8ये़सुरे़ खे़ङ्हाॽरे़ खुनिॽनिङ्वाॽओबा पाःन्निन् कुसिङ् निःत्तुआङ् मे़त्तुसि, “नसान् के़सुःम्बासे, खिनिॽ लुम्मो खरे़ःङ् होप् फाॽआङ् थेआङ् पान् के़धक्तिबाबे? 9खिनिॽ आल्लसाङ् कुसिङ् के़न्निःत्तुम्मिन्बि? हे़न्छिङ् ङासि (५,०००) मनाहाॽरे़ ङासि खरे़ःङ् मे़जआङ् कुजि के़नम्बान् के़सुप्सुम्मिल्ले़ आक्खे़न् नइमा योरे़, खे़न् निङ्वाॽ के़भेःत्छुम्बि? 10याम्मो हे़न्छिङ् लिसि (४,०००) मनाहाॽरे़ नुसि खरे़ःङ् मे़ज हे़क्क्याङ् आक्खे़म्म्याक् कुजि के़नम्बाहाॽ खिनिॽ के़सुप्सुम्, खे़न्नाङ् खिनिॽ निङ्वाॽ के़भेःत्छुम्बि? 11खरे़ःङ्ङिल्ले़ कुयाःम्बेओ इङ्गाॽ मे़त्निङ्बा मेःन् फाॽआङ् आल्लसाङ् कुसिङ् के़न्निःत्तुम्मिन्बि? कर फरिसिहाॽ नु सदुकिहाॽरे़ खुनिॽ खरे़ःङ् के़भङ्बा सिदाॽलाम् सिङ्सिङ् लॽरे़म्मे़ॽ फाॽआङ्ने़ हे़क्के मे़त्निङ्बारो॥” 12हे़क्क्याङ्लक् खे़ङ्हाॽरे़ खरे़ःङ् के़भङ्बा सिदाॽलाम् सिङ्सिङ् लॽरे़म्मे़ॽ मे़त्तुसिबा मेःन्, कर फरिसिहाॽ नु सदुकिहाॽरे़ खुनिॽ निसाम्मिल्ले़ कुदक्ले़ङ्वाओ पाःत्तुबा फाॽआङ् कुसिङ् मे़निःत्तुरो॥
पत्रुसरे़ ये़सुन् ख्रिस्त इङ्भोसुॽ
(मर्कु ८:२७-३०; लुका ९:१८-२१)
13ये़सुन् सिजरिया फिलिप्पि थुम्मो त्ये़ःल्ले़ कुहुॽसाम्बाहाॽ सेःन्दोसुसि, “मनाहाॽरे़ मे़न्छाम्सान् हात् फाॽआङ् मे़बाःत्तुॽबे?”
14खे़ङ्हाॽरे़ नोगप् मे़बिरु, “कुभारे़ बप्तिस्मा के़बिबा युहुन्ना, वेॽहाॽरे़ माङ्निङ्वाॽपान् के़बाःप्पा एलिया, हे़क्क्याङ् आल्लसाङ् वेॽहाॽरे़ग यर्मिया मेःन्छाङ् माङ्निङ्वाॽपान् के़बाःप्पाहाॽओ लत्छाने़रो फाॽआङ् मे़बाःत्तुॽरो॥”
15ये़सुरे़ खे़ङ्हाॽ सेःन्दोसुसि, “कर खिनिॽग, इङ्गाॽ हाःत्आ फाॽआङ् याप्मि के़मे़त्तिॽबे?”
16सिमोन पत्रुसरे़ नोगप् पिरु, “खे़ने़ॽग निङ्वाॽफुमाङ्ङिल्ले़ सेःन्दुबा ख्रिस्त, आजुनि निङ्वाॽफुमाङ्ङिल्ले़ कुस्साने़रो॥”
17ये़सुरे़ खे़न् मे़त्तु, “योनारे़ कुस्सा सिमोने, खे़ने़ॽग मुॽइसाबाने़रो थेआङ्भे़ल्ले़ कङ्ग मे़न्छाम् याप्मिहाॽरे़ ओसेःन्दाङ् के़म्जोगे़बा मेःन्, कर साङ्ग्राम्पेदाङ्ङोबा पानुदिङ् आम्बारे़ खे़ने़ॽ ओसेःन्दाङ् के़जोगे़बारो॥
18“से़क्खा पान् खे़ने़ॽ मे़त्ने़ॽ, खे़ने़ॽ पत्रुसने़रो (पत्रुस फाॽइन् लुङ्लो), हे़क्क्याङ् कन् पयम् यम्बा लुङ्सम्दाङ् इङ्गाॽ आसेसेहुप्लक्किन् चोगुङ्लो॥ हे़क्क्याङ् कन् आसेसेहुप्लक्किन् सिमे़ल्ले़न् मुक्साम्मिल्ले़ नाःम्मा मे़सुक्तुन्लो॥ 19खे़ने़ॽग साङ्ग्राम्पेदाङ्बा हाङ्जुम्मिल्ले़न् तिमिक्हाॽ पिने़रो॥ इक्सादिङ् खाम्बेःक्मो इके़घेःक्खुम्बान् साङ्ग्राम्पेदाङ्ङोआङ् इघेःङ्लो, हे़क्क्याङ् इक्सादिङ् खाम्बेःक्मो के़ले़रुम्बान् साङ्ग्राम्पेदाङ्ङो ले़त्लो॥” 20हे़क्क्याङ् ये़सुरे़ कुहुॽसाम्बाहाॽ इङ्गाॽ निङ्वाॽफुमाङ्ङिल्ले़ सेःन्दाङ्बा ख्रिस्तआ फाॽआङ् आत्तिन्हाॽआङ् मे़जे़क्ते़म्सिम्मे़न्ने़ॽओ लॽरिक् के़साक्पा इङ्जाङ् पिरुसिरो॥
ये़सुरे़ कुसिमे़ल्ले़ कुयाःम्बेओ पाःत्तुॽ
(मर्कु ८:३१-३३; लुका ९:२२-२९)
21खे़न् ये़म्माङ्धो ये़सुरे़ कुहुॽसाम्बाहाॽ खुने़ॽ यरुसले़म्मो पेःक्माए पोङ्, हे़क्क्याङ् खे़प्मो यहुदि तुम्लाम्लोबाहाॽ, तुम्निङ्वाॽफुसाम्बाहाॽ नु साम्योथिम्साम्बाहाॽओलाम् यरिक् पाःन्नो तुक्खे चामाए पोङ् हे़क्क्याङ् खुने़ॽ सिमाए पोङ्ङाङ् याम्मो सुम्ये़न् एगाङ् सिमे़न्लाम् याम्मो हिङ्मा पोङ् के़लॽबा पाःन्निन् चे़क्मा हेःक्तुसिरो॥
22कर पत्रुसरे़ खुने़ॽ थिक्ले़प्माङ् तेॽरुआङ् फे़ःक्तु, “आदाङ्बे, निङ्वाॽफुमाङ्ङिल्ले़ अक्खे पोङ्मा मे़बाङ्घुन्लो, अक्तङ्बा पाःङ्ग खे़ने़ॽनु आप्फाल्ले़आङ् मे़बोङ्ने़ल्लो॥”
23ये़सुन् पत्रुस ले़प्माङ् हिसिङ्ङाङ् मे़त्तु, “माफे़न्साम्मे, खे़ने़ॽ इङ्गाॽलाम् माःङ्घा पेगे़ॽ! खे़ने़ॽ के़घआरो॥ खे़ने़ॽग निङ्वाॽफुमाङ् कुइसिक् मेःन्, कर मे़न्छाम् याप्मि कुइसिःक्लक् निङ्वाॽ के़इःत्तुॽरो॥”
24हे़क्क्याङ् ये़सुरे़ कुहुॽसाम्बाहाॽ मे़त्तुसि, “आत्तिल्ले़ इङ्गाॽ तिम्मा निङ्वाॽ चोगुॽ, खे़ल्ले़ इङ्गाॽरक् चाङ् थुङुङ् के़लॽबा कुनिङ्वाॽइन् से़रुआङ् कुसिलाम्साक्मा सिङ्ङिन् पक्खुआङ् इङ्गाॽ तिम्माररो॥ 25थेआङ्भे़ल्ले़ आत्तिल्ले़ कुहिङ्मन्निन् ताङ्से़ःप्तुङ् लॽरिक् निङ्वाॽ चोगुॽ, खे़ल्ले़ खे़न्नाङ् मासुॽ, कर आत्तिल्ले़ कुहिङ्मन्निन् आलागि मासुॽ, खे़ल्ले़ मे़न्नुप्मनाबा हिङ्मन् खोसुॽरो॥ 26मे़न्छाम् याप्मिःल्ले़ के़रे़क् इक्सादिङ् खाम्बेःक्मान् खुने़ॽइन् चोगुआङ् मे़न्नुप्मनाबा कुहिङ्मन्निन् मासुल्ले़ नुबा पोङ्बि? थेआङ्भे़ल्ले़ मे़न्छाम् याप्मिःल्ले़ मे़न्नुप्मनाबा कुहिङ्मन्निन् याङ्ना खोमारे़ लागि थेःल्ले़आङ् ले़क्मा मे़सुक्तुन्लो॥ 27थेआङ्भे़ल्ले़ इङ्गाॽ मे़न्छाम्सान् पानुदिङ् आम्बारे़ कुमिमिदिङ्ङो कुमाङ्लाइङ्बाहाॽनु युःआल्ले़ के़रे़क् मे़न्छाम् याप्मिहाॽरे़ मे़जोगुबा याःम्बक्किल्ले़न् लाॽरुबा थुम्घोन् पिरुङ्सिङ्लो॥ 28इङ्गाॽ से़क्खाए मे़त्निङ्, इङ्गाॽ मे़न्छाम्सान् आहाङ्जुम्मो हाङ् चोःक्से़ युःआबा मे़न्निए थारिक् कप्मो के़ये़प्पाहाॽओ कुभाग मे़न्छिने़न्लो॥”
Currently Selected:
मत्ति 16: LIF
Highlight
Share
Compare
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
