तोलिङ्सोमु 46
46
याकुबे़न् कुहिम्सयङ्नु मिस्रओ पेक्
1खे़ब्याङ् याकुबे़न् खुने़ॽ कत्तुबा के़रे़क् पाःन्हाॽ याङ्सिङ्ङाङ् थासिङ्, हे़क्क्याङ् बेर्सेबाओ के़रे़आङ् कुम्बा इसहाक्के़ल्ले़ कुनिङ्वाॽफुमाङ्ङिल्ले़ कुलागि सिदुङ्जभा तोःन्दु॥
2हे़क्क्याङ् से़न्दिक् सुफोओ निङ्वाॽफुमाङ्ङिन् खुने़ॽनु पारे़, “याकुबे, याकुबे” मे़त्तुर खुने़ॽ उःत्तु॥
हे़क्क्याङ् खुने़ॽ मे़त्तु, “है, आङ्गाॽ कॽयोए वाआरो॥”
3निङ्वाॽफुमाङ्ङिल्ले़ मे़त्तु, “आङ्गाॽ निङ्वाॽफुमाङ्, खे़ने़ॽ के़म्बारे़ कुनिङ्वाॽफुमाङ्आरो॥ मिस्रओ पेःक्मा मे़ङ्गिओ, थेआङ्भे़ल्ले़ खे़ॽयो आङ्गाॽ खे़ने़ॽलाम् लत्छा यम्बा मे़न्छाम् सुवाङ्धिक् चोगुङ्॥ 4आङ्गाॽ खे़ने़ॽनु मिस्रओ पेःक्का, हे़क्क्याङ् आङ्गाॽ से़क्खाए याम्मो नुःक्ने़ थाक्ने़, हे़क्क्याङ् खे़ने़ॽ के़स्सिःल्ले़ युसुफरे़ कुहुक्किल्ले़ए के़मिक्किन् सुबु के़बिरो॥”
5खे़न् एगाङ् याकुबे़न् बेर्सेबालाम्बा थासिङ्॥ इस्राइलरे़ कुस्साहाॽरे़ खुन्छिॽ पा याकुबे़न् हे़क्क्याङ् खुन्छिॽ साहाॽ नु खुन्छिॽ मेःत्हाॽरे़ लागि फारोल्ले़ खे़ङ्हाॽरे़ खुन्छिॽ लासे़ हाङुबा पित्लाधाहाॽओ मे़युक्खुसिआङ् मे़देॽरुसि॥ 6खे़ङ्हाॽरे़ खुनिॽ मे़ःन्दाहाॽ नु कनान लाजेॽओ मे़सुप्सुबा चिगक्वाहाॽ मे़याङ्सिङ्ङाङ् याकुबे़न् हे़क्क्याङ् के़रे़क् कुस्साहाॽ मिस्रओ मे़बे॥ #सेःक्युक् ७:१५ 7याकुबरे़ खुने़ॽनु कुस्साहाॽ, कुम्मे़न्छाॽहाॽ, कुस्सा मे़न्छुमाहाॽ, कुम्मे़न्छाॽमाहाॽ हे़क्क्याङ् के़रे़क् कुमुॽइदाङ्साहाॽ मिस्रओ तेॽरुसि॥
8मिस्रओ के़बेःक्पा इस्राइलरे़ कुस्सा ये़म्बित्छाहाॽरे़ खुन्छिॽ मिङ् कङ्हाॽरो—
याकुबरे़ कुस्सा तुम्बा रुबेन॥
9रुबेनरे़ कुस्साहाॽ—हनोक, पल्लु, हेस्रोन नु कर्मि॥ 10सिमियोनरे़ कुस्साहाॽ—
यमुएल, यामिन, ओहद, याकिन, सोहार हे़क्क्याङ् कनानि कुमेत् ले़प्माङ्बा कुस्सा साउल॥
11ले़बिरे़ कुस्साहाॽ—
गेर्सोन, कहात नु मरारि॥
12यहुदारे़ कुस्साहाॽ—
एर, ओनान, सेलह, फारेस हे़क्क्याङ् जेरह॥ (कर एर नु ओनाने़न् कनान लाजेॽओए माने़त्छि)॥
फारेसरे़ कुस्साहाॽ—
हेस्रोन नु हामुल वये़सि॥
13इस्साकारले़ कुस्साहाॽ—
तोला, पुवा, यासुब नु सिम्रोन॥
14जबलुनरे़ कुस्साहाॽ—
सेरेद, एलोन हे़क्क्याङ् यहलेला॥
15कङ्हाॽ याकुबलाम्बा लिआरे़ पद्दन आराम्मो कत्तुसिबा कुस्साहाॽओ दिनाःन्नाङ् लत्छा कुस्सा मे़न्छुमारो॥ लिआलाम्बा के़बोङ्बा याकुबरे़ के़रे़क् कुस्सा ये़म्बित्छा नु मे़न्छुमाहाॽ सुम्बोङ्ङाङ् सुम्सि मे़वये़॥
16गादरे़ कुस्साहाॽ—
सेफोन, हाग्यि, सुनि, यसबिन्, ए़रि, अरोदि नु अरेलि॥
17आसेररे़ कुस्साहाॽ—
यिम्ना, यिस्बा, यिस्बि नु बरिआ॥ खे़ङ्हाॽरे़ खुन्छिॽ नुस्साॽ मे़न्छुमा सेरह वये़॥
बरिआरे़ कुस्साहाॽ—
हेबेर नु मल्किएल वये़सि॥
18लाबानरे़ कुस्सा लिआःन् पिरुबा योःग्मा जिल्पा ले़प्माङ्लाम्बा के़बोङ्बा कुस्साहाॽ कन्हाॽरो॥ कङ्हाॽ के़रे़क्ले़ थिबोङ्ङाङ् तुक्सि मे़वये़॥
19याकुबरे़ कुमेत् राहेलरे़ कुस्साहाॽ—
युसुफ नु बे़न्जामिन॥
20ओनबा निङ्वाॽफुसाम्बा पोतिफेरारे़ कुस्सा मे़न्छुमा आसनत ले़प्माङ्लाम्बा मिस्रओ के़बोङ्बा युसुफरे़ कुस्साहाॽ—मनस्से नु एफ्राइम॥ #तोलिङ् ४१:४५,५०-५२
21बेन्यामिनरे़ कुस्साहाॽ—
बेला, बेकेर, अस्बेल, गेरा, नामान, ए़हि, रोस, मुप्पिम, हुप्पिम नु आर्द॥
22राहे़ललाम्बा के़बोङ्बा याकुबरे़ कुस्साहाॽ कङ्हाॽएरो॥ खे़ङ्हाॽ के़रे़क्ले़ थिबोङ्ङाङ् लिसि मे़वये़॥
23दानरे़ कुस्सा—
हुसिम॥
24नाप्तालिरे़ कुस्साहाॽ—
यहसेल, गुनि, येसेर, नु सिल्ले़म॥
25लाबानरे़ कुस्सा राहे़ले़न् पिरुबा योःग्मा बिल्हाःल्ले़ याकुबलाम्बा कत्तुसिबा कुस्साहाॽ कङ्हाॽएरो॥ खे़ङ्हाॽ के़रे़क्ले़ नुसि मे़वये़॥
26याकुबे़न्नु मिस्रओ के़बेःक्पा कुम्बाङ्लिहाॽनुःल्ले़ वेॽ आबाङे कुमुॽइदाङ्साहाॽ तुक्बोङ्ङाङ् तुक्सि मे़वये़॥ 27मिस्रओ के़बोङ्बा युसुफरे़ कुस्साहाॽ ने़प्फु वये़सि॥ मिस्रओ के़युबा याकुबरे़ कुहिम्सयङ्हाॽ के़रे़क्ले़ नुबोङ् मे़वये़॥ #सेःक्युक् ७:१४
याकुबे़न् कुहिम्सयङ्नु मिस्रओ
28गोसेन्नो खुने़ॽ कुदुम्से़ युर फाआङ् याकुबरे़ यहुदान् युसुफरो इङ्घङ् पिसे़ तगि पाङ्घु॥ 29युसुफरे़ कुअन्लाधान् यारिप् चोःक्पाङ्घुसि हे़क्क्याङ् गोसेन थारिक् कुम्बा याकुबरे़ कुदुम्से़ फे़रे़॥ युसुफे़न् कुम्बारो थाःम्सिङ्नुमे़ःन्ने कुम्बारे़ कुभक्ताङ्ङो हे़प्रे़क् हे़प्तुआङ् यरिक् ये़म् थारिक् हाबे़॥
30याकुबरे़ युसुफे़न् मे़त्तु, “आङ्गाॽ के़नारान् निसुङ्ङाङ् खे़ने़ॽ कुहिङ्वे़त्ते के़वाॽबा निसुङ्बाल्ले़ चोगुल्ले़ आल्ल आङ्गाॽ आनिङ्वाॽ तार सिए़रो॥”
31युसुफरे़ कुम्भुॽ कुन्साॽसि हे़क्क्याङ् कुम्बानु के़युबाहाॽ के़रे़क् मे़त्तुसि, “आल्ल आङ्गाॽ पेःक्काआङ् फारोन् इङ्घङ् पिरुङ्ॽ हे़क्क्याङ् खुने़ॽ मे़त्तुङ्, ‘कनान लाजेॽबा आम्भुॽ आन्साॽसि हे़क्क्याङ् आम्बानु के़युबाहाॽ के़रे़क् आङ्गाॽओ मे़ये़आङ् मे़वाॽ॥ 32खे़ङ्हाॽ के़रे़क् पित् मे़ःन्दा के़हिङ्बा मे़जोःक्पाल्ले़ पित् के़गम्बासिरो॥ खे़ङ्हाॽरे़ खुन्छिॽ के़रे़क् पित् नु मे़ःन्दालुप्हाॽ, हे़क्क्याङ् खुन्छिॽ मे़गत्तुबा के़रे़क् पाःन्हाॽ मे़युरुआङ् मे़ये़आङ् मे़वाॽ॥’ 33फारोल्ले़ खिनिॽ के़उःत्तिआङ् ‘खिनिॽ थे़मा याःम्बक् के़जोःक्पानिङ्?’ फाॽआङ् से़ःन्गे़लाप्तिॽ, 34खे़बे़ल्ले़ खिनिॽ अक्खे मे़त्ते़म्मे़ॽ, ‘आदाङ्बारे़ के़से़वारोबाहाॽ आनिगे कुम्बा कुस्सा के़रे़क् चुःक्तिगे़आङ्धो आल्लो थारिक् पित् मे़ःन्दाॽ के़हिङ्बासिगे़॥’ हे़क्क्याङ् खिनिॽ गोसेन्नो युङ्मा के़घोसुम्, थेआङ्भे़ल्ले़ मिस्रिहाॽरे़ के़रे़क् पित् के़गम्बाहाॽ मे़जिःत्तुसिॽ॥”
Currently Selected:
तोलिङ्सोमु 46: LIF
Highlight
Share
Compare
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
