तोलिङ्सोमु 45
45
युसुफे़न् कुम्भुॽसिनु ओसेःन्धाक्सिङ्ॽ
1खे़ब्याङ् खुने़ॽ कुघिरि के़ये़प्पा के़रे़क् से़वारोबाहाॽरे़ खुन्छिॽ तगि आबाङे थम्मा मे़सुक्तुन्नाङ् यसुफरे़ अःक्ते़र मे़त्तुसि, “कॽयोलाम् के़रे़क् लाःक्कात् पाङ्घे़म्से़ॽ॥” कल्ले़चोगुल्ले़ यसुफरे़ कुम्भुॽ कुन्साॽसिनु ओःन्धाक्सिङ्ङे़ल्ले़ खे़प्मो वेॽ हाःत्ताङ् मे़होःप्ते़॥ #सेःक्युक् ७:१३ 2हे़क्क्याङ् खुने़ॽ कम्भ्यारिक् यम्बा इक्लाओ हाबे़, खे़न् मिस्रिहाॽरे़ मे़घे़प्सु, हे़क्क्याङ् फारोल्ले़ कुहिम्सयङ्ले़आङ् निङ्वाॽ मे़घोसु॥
3युसुफरे़ आबाङे कुम्भुॽ कुन्साॽसि मे़त्तुसि, “आङ्गाॽ युसुफए़रो॥ आम्बा कुहिङ्वे़त्ते वाॽबि?” कर खुने़ॽ कुम्भुॽसिरे़ नोगप् पिमा मे़न्छुक्तुन्, थेआङ्भे़ल्ले़ खुने़ॽ कुदगि खे़ङ्हाॽ मे़गिसे़आङ् मे़यक्खे़आङ् मे़वये़॥
4खे़ब्याङ् युसुफरे़ आबाङे कुम्भुॽ कुन्साॽसि मे़त्तुसि, “आङ्गाॽ आबेसाङ् ते़म्मे़ॽओ॥” खे़ङ्हाॽ कुबेसाङ् मे़बेआङ् खुने़ॽ मे़त्तुसि, “खिनिॽ मिस्रओ के़सङ्घुम्बा खिनिॽ नुसाॽ युसुफे़न् आङ्गाॽएरो॥ 5खिनिॽ आङ्गाॽ याप्मि आगे़सङ्घे़बाओ निङ्वाॽ मे़दुक्खे़म्मे़न्ने़ॽ॥ हे़क्क्याङ् आबाङेआङ् निङ्वाॽ मे़लोरे़म्मिन्ने़ॽ, थेआङ्भे़ल्ले़ हिङ्मन् से़ःप्मा फाॽआङ् निङ्वाॽफुमाङ्ङिल्ले़ खिनिॽनुःल्ले़ तगि आङ्गाॽ कॽयो पाङ्घाङ्बारो॥ 6लाजेॽओ साक् त्ये़बा तङ्बे ने़त्छि पोःक्खे़, हे़क्क्याङ् आल्लसाङ् तङ्बे ङासि आत्तिआङ् के़क्चुॽ मे़धोःङ्ने़ल्लो, हे़क्क्याङ् चाआङ् मे़सुम्ने़ल्लो॥ 7कर निङ्वाॽफुमाङ्ङिल्ले़ खे़निॽ हिङ्मन् से़ःप्ल फाॽआङ् खे़निॽनुःल्ले़ तगि कॽयो पाङ्घाङ्बारो॥
8“खे़ल्ले़चोगुल्ले़ आङ्गाॽ कॽयो याप्मि के़बाङ्बा खिनिॽ मेःन्निङ्, कर निङ्वाॽफुमाङ्ङिन्नेरो॥ खुने़ॽ आङ्गाॽ फारोल्ले़ कुसुजादाङ्बा नु खुने़ॽ कुहिम्सयङ्ङिल्ले़ कुन्दाङ्बा हे़क्क्याङ् मिस्र खाराक्पा सुहाङ्युक्पा चोगाङ्ङाङ् वाॽ॥ 9आल्ल हारा आम्बारे़ॽओ पेगे़म्मे़ॽआङ् खुने़ॽ मे़त्ते़म्मे़ॽ, ‘के़स्सा युसुफरे़ अक्खे पाःत्तुरो—निङ्वाॽफुमाङ्ङिल्ले़ आङ्गाॽ मिस्र लाजेःल्ले़ कुन्दाङ्बा चोगाङ्ङाङ् वाॽ॥ मे़न्छुए हारा आङ्गाॽओ ये़ॽओ॥ #सेःक्युक् ७:१४ 10खे़ने़ॽ गोसेन ते़ङ्गप्पो युङे़ॽ॥ खे़ने़ॽ नु खे़ने़ॽ के़स्साहाॽ के़म्मे़न्छाॽहाॽ हे़क्क्याङ् खे़ने़ॽ के़बित्हाॽ के़मे़ःन्दाक्हाॽ नु खे़ने़ॽ के़गत्तुबा के़रे़क् पाःन्हाॽ आङ्गाॽ आबेसाङ् मे़वाॽरो॥ 11खे़ॽयो आङ्गाॽ खे़ने़ॽ हिङ्ने़, थेआङ्भे़ल्ले़ आल्लसाङ् साक्किल्ले़ ङासि तङ्बे तामाए वाॽ॥ मेःन्निल्ले़ग खे़ने़ॽ नु खे़ने़ॽ के़हिम्सयङ् खम्ब्याङ् खे़ने़ॽनु के़वाॽबा के़रे़क् साक्किल्ले़ के़स्ये़ॽइरो॥’
12“आल्ल खे़निॽनु ताॽगे़जे़ङ्बान् आङ्गाॽ युसुफे़न्ने फाॽआङ् खे़निॽ आबाङे मिक्किल्ले़ याप्मि के़निसे़ हे़क्क्याङ् आन्साॽ बे़न्जामिने़ल्ले़आङ् निसाङ्ङाङ् वाॽ॥ 13मिस्र लाजेॽओ आङ्गाॽ आमिमिदिङ्ङिन् नु खे़निॽ के़निसुम्बा के़रे़क् पाःन्हाॽ आम्बा चे़क्ते़म्मे़ॽ, हे़क्क्याङ् हाराए आम्बा कॽयो युरे़म्मे़ॽओ॥”
14खे़ब्याङ् आबाङे कुन्साॽ बेन्यामिने़न् हे़प्प्रे़क् हे़प्तुआङ् साॽरिक् हाबे़, हे़क्क्याङ् बे़न्जामिने़ल्ले़आङ् हे़प्प्रे़क् हे़प्तुआङ् हाबे़॥ 15खे़ब्याङ् खुने़ॽ हाबे़र कुम्भुॽसि के़रे़क् चुप् मे़त्तुसि॥ हे़क्क्याङ् खे़न् एगाङ् खुने़ॽ कुम्भुॽसिआङ् खुने़ॽनु ताॽमे़जे़क्खे़॥
16युसुफरे़ कुम्भुॽ कुन्साॽसि मे़द्ये़आङ् मे़वाॽ के़लॽबा इङ्घङ् फारोल्ले़ कुहिम्मो के़रे़ल्ले़ फारोःन्नु खुने़ॽ कुसुहाङ्गे़म्बाहाॽ के़रे़क् मे़सःत्ते़॥ 17फारोल्ले़ युसुफे़न् मे़त्तु, “खे़ने़ॽ के़म्भुॽ के़न्साॽहाॽ मे़त्ते़से़ॽ, ‘खे़निॽ थक्साहाॽ चा कुःत्ते़म्सिम्मे़ॽआङ् कनान लाजेॽओ नुःक्खे़म् पेगे़म्मे़ॽ, 18हे़क्क्याङ् खे़निॽ पान् नु खुने़ॽ कुहिम्सयङ्ङोबा के़रे़क् याङ्सिङे़म्मे़ॽआङ् आङ्गाॽओ ये़म्मे़ॽ॥ मिस्रबा के़रे़क्नुःल्ले़ नुबा ते़न्निन् आङ्गाॽ खिनिॽ पिनिङ्ॽ हे़क्क्याङ् खिनिॽ कन् लाजेॽओबा नुबा चा के़जाम्लो॥’
19“खे़ङ्हाॽ अक्खेआङ् मे़त्ते़से़ॽआङ् इङ्जाङ् पिरे़से़ॽ, ‘खिनिॽ साहाॽरे़ लागि नु मेःत्हाॽरे़ लागि पित्लाधाहाॽ मिस्र लाजेॽलाम् तेॽरे़म्सिम्मे़ॽ, हे़क्क्याङ् खिनिॽ पान् युरे़म्मे़ॽ॥ 20खिनिॽ चिगक्वाहाॽरे़ लागि खिनिॽ निङ्वाॽ मे़बिरे़म्मिन्ने़ॽ, थेआङ्भे़ल्ले़ मिस्रबा नुःब्नुबा के़रे़क् पाःन्हाॽ खुने़ॽइन्नेरो॥’”
21याकुबरे़ कुस्साहाॽरे़ हे़क्केए मे़जोगु॥ फारोल्ले़ इङ्जाङ् पिरुबा हे़क्के युसुफरे़ खे़ङ्हाॽ पित्लाधाहाॽ नु लाम्दिःक्ले़ लागि चे़साक् फुङ्साक् पिरुसि॥ 22खे़ङ्हाॽ के़रे़क् कुसङ् चाङ् पिरुसि॥ कर बे़न्जामिने़ङ्ग किप् सुम्सि युप्पायाङ् नु कुगाप् ङासि चाङ् पिरु॥ 23मिस्रबा नुःब्नुबा पाःन्हाॽरे़ चिबे़ःत् मे़बे़ःत्ते़र थिबोङ् अदङ्हाॽ कुःत्तुसिआङ् कुम्बारे़ कुलागि कन् पाःन्हाॽ हाङु, हे़क्क्याङ् चा, खरे़ःङ् नु वेॽ कुजा के़गुमा थिबोङ् कुम्मामा अदङ्हाॽ हाङुदेसु॥ 24खुने़ॽ कुम्भुॽ कुन्साॽहाॽ पाङ्घुदेसुसि, हे़क्क्याङ् मे़धासिङ्ङिल्ले़ कुम्भुॽ कुन्साॽसि मे़त्तुसि, “लाम्मो मे़ङ्घेए पेगे़म्मे़ॽओ॥”
25अक्खेलॽरिक् खे़ङ्हाॽ मिस्र लाजेॽलाम्बा कनान लाजेॽओ आबाङे खुन्छिॽ पा याकुबरे़ओ मे़धाङे़॥ 26खे़ङ्हाॽरे़ खुने़ॽ मे़मे़त्तु, “युसुफे़ङ्ग आल्लोसाङ् कुहिङ्वे़त्ते वाॽरछ, हे़क्क्याङ् मिस्रबा सुहाङ्युक्पा खुने़ॽए पोःक्खे़आङ् वाॽरछ॥” कन् पाःन्निन् खुने़ॽ खे़प्सुआङ् कुलुङ्माॽ तिक्तिक् लॽरे़॥ खुने़ॽ खे़ङ्हाॽरे़ खुन्छिॽ पाःन्निन् नामे़साॽरुन्॥ 27कर युसुफरे़ खे़ङ्हाॽ मे़त्तुसिआङ् पाङ्घुसिबा के़रे़क् पाःन्हाॽ खे़प्सु हे़क्क्याङ् खुने़ॽ कुलासे़ युसुफरे़ हाङुबा पित्लाधाहाॽ निसुसिआङ् खुन्छिॽ पा याकुबरे़ कुनिङ्वाॽ सेरे़॥ 28हे़क्क्याङ् याकुबरे़ मे़त्तुसि, “आङ्गाॽ आनिङ्वाॽ त्ये़॥ आस्सा युसुफे़न् आल्लसाङ् कुहिङ्वे़त् वाॽरछ आङ्गाॽ पेःक्कारो, हे़क्क्याङ् सिमानुःल्ले़ तगि आङ्गाॽ खे़ल्ले़ कुनारान् ओमे़त्तुङ्लो॥”
Currently Selected:
तोलिङ्सोमु 45: LIF
Highlight
Share
Compare
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
