लाम्दिक् 24
24
माङ्हुप्पो एःप्साप् मे़युक्तुॽ
1याम्मो खुने़ॽ मोसान् मे़त्तु, “खे़ने़ॽ, हारुन, नादाब, अबिहु नु साम्यो लाम्लोबाहाॽलाम् नुबोङ् इस्राइलबा लाम्लोबाहाॽ यहवे दाङ्बाओ थाःङ् थाङे़म्मे़ॽ, हे़क्क्याङ् लाःत्लाःत्लाम्बा अःक्खुम् फन्नासिम्मे़ॽआङ् आङ्गाॽ माङ्से़वा ओमे़त्ते़ॽ॥ 2कर खे़ने़ॽरक् आङ्गाॽ आबेसाङ् थाङे़ॽ, वेॽहाॽ आङ्गाॽ आबेसाङ् मे़न्धाङ्ने़ल्ल, मनाहाॽआङ् खे़ने़ॽनु थाःङ् मे़न्धाङ्ने़न्ल॥”
3मोसान् पेआङ् यहवे दाङ्बाल्ले़ के़रे़क् कुइङ्जाङ्हाॽ नु कुसाम्यो साक्थिम्हाॽ मनाहाॽ चे़क्तुसि॥ मनाहाॽरे़ थिक्ले़ङ्ले़ नोगप् मे़बिरु, “यहवे दाङ्बे़ल्ले़ पाःत्तुबा के़रे़क् पाःन्हाॽ आनिगे के़त्तुम्बे़॥” 4खे़ब्याङ् मोसाःल्ले़ यहवे दाङ्बे़ल्ले़ के़रे़क् कुइङ्जाङ्हाॽ साप्तु॥
कुदाःन्दिक्मा तानाम्सा खुने़ॽ कोमाल्ले़ कुबुङ्ओ लत्छा ले़त्ति तोःम्मादे़न् चोगु हे़क्क्याङ् खे़प्मो इस्राइलबा के़रे़क् थाःक्हाॽरे़ खुन्छिॽ मिङ्ङो लत्छा लत्छा थिबोङ्ङाङ् ने़त्छि लुङ्हाॽ फुक्खुआङ् सित्लाङ् लेःत्तु॥ 5खे़ब्याङ् खुने़ॽ थाङ्बे़न्हाॽ पाङ्घुसि हे़क्क्याङ् खे़ङ्हाॽरे़ यहवे दाङ्बाओ मिधिङ्मनादेमनाबा सिदुङ्जभा मे़दोन्दु हे़क्क्याङ् कुभा से़गम्बाहाॽ तङ्जुम्बा सिदुङ्जभा मे़दोन्दुसि॥ 6खे़न् थक्साहाॽरे़ खुन्छिॽ माक्खिन् कुभ्रे़ःङ् मोसाःल्ले़ खप्प्याओ केःत्तु हे़क्क्याङ् कुभ्रे़ःङ् सामाक्खिन् ले़त्ति तोःम्मादे़न्नो साक्खु॥ 7खे़न् एगाङ् खुने़ॽ यहवे दाङ्बे़ल्ले़ कुइङ्जाङ्हाॽ साप्मनाबा माङ्हुप् साप्पन्निन् याङ्सिङ् हे़क्क्याङ् मनाहाॽरे़ खुनिॽ तगि मे़घे़प्सुर निरुआङ् खे़म्बाङ्घुसि॥ मनाहाॽरे़ मे़बाःत्तु, “यहवे दाङ्बाल्ले़ कुइङ्जाङ्ङिन् आनिगे इःत्तुम् नाःत्तुम्बे़रो हे़क्क्याङ् यहवे दाङ्बाल्ले़ इङ्जाङ् चोगुबा के़रे़क् पाःन्हाॽ आनिगे के़त्तुम्बे़रो॥”
8खे़ब्याङ् मोसाःल्ले़ सामाक्खिन् याङ्सिङ्ङाङ् मनाहाॽरे़ खुन्छिॽ सम्धाङ् साक्खु, हे़क्क्याङ् खुने़ॽ मे़त्तुसि, “ओमे़त्ते़म्मे़ॽ, कन् माङ्हुप्पोबा माक्खिॽरो, यहवे दाङ्बे़ल्ले़ कन् कुबाःन्जाःक्हाॽ कुइसिक् खिनिॽनु माङ्हुप् चोगुआङ् वाॽ॥”
9खे़न् एगाङ् मोसा, हारुन, नादाब, अबिहु नु इस्राइलबा लाम्लोबाहाॽओ नुबोङ् मनाहाॽ कोःक्माओ थाःङ् मे़बेआङ् 10खे़ङ्हाॽरे़ इस्राइलबा निङ्वाॽफुमाङ्ङिन् मे़निसु॥ खुने़ॽ कुलाङ्वाजक्पो सिगाङ् माङ्लुङ् फे़मनाबा ताङ्साक् हे़क्तङ्बा माङ्लुङ् लाम् ने़स्से़॥ 11कर खुने़ॽ इस्राइलिहाॽरे़ खुन्छिॽ लाम्लोबाहाॽ थे़माआङ् हान्ति मे़जोगुन्सिन्, हे़क्क्याङ् खे़ङ्हाॽरे़ निङ्वाॽफुमाङ्ङिन् मे़निसु खे़ब्याङ् खे़ङ्हाॽरे़ मे़ज मे़धुङुरो॥
सिनै कोःक्माओ मोसान्
12हे़क्क्याङ् यहवे दाङ्बे़ल्ले़ मोसान् मे़त्तु, “आङ्गाॽ वाॽआबा कोःक्माओ थाःङ् थाङे़ॽआङ् युङे़ॽ॥ खे़ने़ॽ खे़ङ्हाॽ हुॽमासिरे़ लागि आङ्गाॽ साप्तुङ्बा साम्योथिम् इङ्जाङ्ङिन् नु इङ्जाङ्हाॽ के़बप्पा लुङ्साप्हाॽ आङ्गाॽ खे़ने़ॽ पिने़॥”
13खे़ब्याङ् मोसान् नु खुने़ॽ कुभाॽबाङ् यहोसुन् यारिप् पोःक्खे़सि हे़क्क्याङ् मोसाःल्ले़ सेसे कोःक्मान् लिङ्मा हेःक्तु॥ 14मोसाःल्ले़ खे़न् लाम्लोबाहाॽ मे़त्तुसि, “आन्छिगे मे़न्नुःङ् मे़न्युए थारिक् आम्भा कन् साःङ्गाहिम्मो युङे़म्मे़ॽआङ् आहाङ्घे़म्मे़ॽ॥ हारुने़न् नु हुरे़न् खिनिॽनु कप्मो वाॽसि हे़क्क्याङ् कुभारे़ कुभा पान् चे़ङ्मा पाःप्मा के़बोङ्बा वाॽने़भग्र खे़ङ्हाॽ खे़न् ने़प्फु मनाहाॽओ पेःक्मा मे़सुक्॥”
15खे़ब्याङ् मोसान् सिनै कोःक्माओ थोःक्सिङ् हे़क्क्याङ् खाॽमिःत्तिल्ले़ कोःक्मान् सिदे़प् ते़प्तु॥ 16यहवे दाङ्बे़ल्ले़ कुमिमिदिङ्ङिन् सिनै कोःक्माओ पत्छे़, हे़क्क्याङ् खाॽमिःत्तिल्ले़ तुक्सि ये़न् थारिक् कोःक्मान् पन्छुआङ् पत्छे़॥ नुसि ये़न्नो याःन्दिक् खाॽमिःत्तिल्ले़ कुलुम्मोलाम् यहवे दाङ्बे़ल्ले़ मोसान् पाःन्छाःत्तु॥ 17इस्राइलिहाॽरे़ मे़निसुल्ले़ यहवे दाङ्बे़ल्ले़ कुमिमिदिङ्ङिन् कोःक्माल्ले़ कुजङ्ङो आमे़ङ्मे़ङ्बा मिधुङ् मिराःक् हे़क्तङ्बा चोगे़॥ 18खे़ब्याङ् मोसान् खाॽमिःत्तिल्ले़ कुलुम्मोलाम्बा पोःक्खे़आङ् कोःक्माओ थाःङ् थोःक्सिङ्, हे़क्क्याङ् खुने़ॽ कोःक्माओ लिबोङ् ये़न् नु लिबोङ् से़न् थारिक् युङे़रो॥
Currently Selected:
लाम्दिक् 24: LIF
Highlight
Copy
Compare
Share
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
