लाम्दिक् 23
23
कुदोःप्मा खासे़न् नु एःक्पएःक् चोःक्मा मेःन्
1“मे़न्वाॽमनाबा पान् मे़इङ्साम्मिन्ने़ॽ हे़क्क्याङ् फे़न्याःम्बक् के़जोःक्पा मनान् फाॽमारे़ लागि इङ्ले़क्पा साःक्खि मे़बिरे़म्मिन्ने़ॽ॥
2“फे़न्याःम्बक् चोःक्मारे़ लागि यरिक् मनाहाॽ ले़प्माङ् मे़बत्छे़म्मिन्ने़ॽ॥ तुःन्देॽओ हयङ् किल्लिङ् पिसाङ् तोःन्दि मे़बिरे़म्मिन्ने़ॽआङ् कुदोःप्मा खासे़न्निन् फे़त्मे़लाःन्दे़म्मिन्ने़ॽ॥ 3याङ्गे़साॽबा फाॽआङ् तुःन्देॽओ खुने़ॽ ले़प्माङ् मे़बत्छे़म्मिन्ने़ॽ॥
4“खिनिॽ निङ्मिःल्ले़ कुबित्तिन् इग्र अदङ्ङिन् साम्माङ् पेःक्ल पप्पा के़निसुम्ने़भग्र, खे़न् नुःक्ते़म्मे़ॽआङ् याम्मो खुने़ॽओ साम्धाम्मे़ॽ॥ 5खे़ल्ले़ कुअदङ्ङिन् के़ङ्ङाङ् कक्किल्ले़ सिगाङ् के़प्तु आङ् ने़बा के़निसुम्ने़भग्र, खे़न् हाबा मे़ले़रे़म्मिन्ने़ॽ, कर खे़न् फोःक्खे़म्मे़ॽ॥
6“याङ्गे़साॽबाल्ले़ कुदुःन्देॽओ मे़न्वाॽमनाबा खासे़न् मे़जोगे़म्मिन्ने़ॽ॥ 7वेॽहाॽ इङ्ले़क् मे़प्मासि पाःन्नोलाम् लाःत्लाःत् वये़म्मे़ॽ॥ फे़न् याःम्बक् मे़न्जोःक्मनाबा नु कुदोःप्मा मनान् सिमे़ल्ले़ खुम्दिङ् मे़बिरे़म्मिन्ने़ॽ, थेआङ्भे़ल्ले़ आप्तिक्साबे़न् आङ्गाॽ आभे़ल्ले़आङ् कुदोःप्मा मे़लेःत्तान्॥
8“स्वाःत्ताङ् सुरुत्याङ् मे़जे़म्मिन्ने़ॽ, थेआङ्भे़ल्ले़ सुरुत् याङ्ङिल्ले़ मनान् मिक्फःम्बा चोगुॽ, हे़क्क्याङ् साम्योबा पाःन्निन् मे़न्वाॽमनाबा पाःन्नो ले़क्खुॽ॥
9“वेॽ लाजेॽबा मनान् ताप्फे़ःल्लिक् मे़मे़त्ते़म्मिन्ने़ॽ॥ मिस्रओ खिनिॽ के़वयिबाल्ले़ चोगुल्ले़ वेॽमिबाल्ले़ कुनिङ्वान् खिनिॽ कुसिङ् के़निःत्तुम्लो॥
नुसिगेक्पा तङ्बे नु नुसिगेक्पा ये़न्
10“तङ्बे तुक्सि थारिक् खिनिॽ प्याङ्सि इक्ताप्पो याॽरिःम्बा हेॽरे़म्मे़ॽ हे़क्क्याङ् खे़प्मो के़बप्पा कुजान् सुप्से़म्मे़ॽ॥ 11कर नुसिगेक्पा तङ्बे के़त्तिल्ले़ खे़न् मे़न्धोःङ्ङे हाबा ले़रे़म् ने़से़म्मे़ॽ, हे़क्क्याङ् खे़न्लाम् खिनिॽओबा कुभा याङ्गे़साॽबाहाॽरे़ मे़मयु मे़जर॥ खे़ङ्हाॽरे़ मे़नन्छुबान् चाहि ताम्भुङ् थक्साहाॽरे़ मे़जर, खिनिॽ आबाङे चे़ल्ले़क्सेॽ नु चैतुन इक्ताहाॽओआङ् हे़क्केए चोगे़म्मे़ॽ॥
12“तुक्सि ये़न् थारिक् याःम्बक् चोगे़म्मे़ॽ, कर नुसिगेक्पा ये़न्नो याःम्बक् मे़जोगे़म्मिन्ने़ॽ॥ हे़क्केःल्ले़ खिनिॽ योःग्बा योःग्माहाॽरे़ नु खिनिॽ याःम्बक् के़जोःक्पा वेॽ लाजेॽबा मनाहाॽरे़ खे़ब्याङ् पित्थक्सा नु अदङ्हाॽरे़ नाःम्सिङ्मा मे़घोसुॽ॥
13“आङ्गाॽ यहवे दाङ्बे़ल्ले़ खिनिॽ मे़त्निङ्बा के़रे़क् पाःन्हाॽ खे़प्से़म्मे़ॽआङ् खे़ङ्हाॽ इःत्ते़म् नाःत्ते़म्मे़ॽ॥ वेॽ माङ्हाॽ पेलि मे़भाक्ते़म्से़म्मिन्ने़ॽ, खे़ङ्हाॽरे़ खुन्छिॽ मिङ्ङाङ् मे़बाःत्ताम्मिन्ने़ॽओ॥
सुम्सि यम्बा तङ्नाम्हाॽ
(ला ३४:१८-२६; साम्यो इङ् १६:१-१७)
14“आङ्गाॽ मिङ्सो इङ्धाङ् पिमारे़ लागि तङ्बे थक्मा खिनिॽ तङ्बेरे़ सुम्सि तङ्नाम्हाॽ तोसाम्मे़ॽ॥
15“खिनिॽ खरे़ःङ् के़भङ्बा सिदाॽ मे़न्याक्केबा तङ्नाम् तोसे़म्मे़ॽ॥ खिनिॽ इङ्जाङ् पिनिङ्बा हे़क्के अबिब लाओ तोमा के़बोङ्बा नुसि ये़न् थारिक् के़भङ्बा सिदाॽ मे़न्याक्केबा खरे़ःङ् चे़म्मे़ॽ, थेआङ्भे़ल्ले़ हाबा खे़न् लाओ खिनिॽ मिस्रलाम्बा के़लःन्दि के़भे़रिबारो॥
“हुक्को थेआङ् मे़न्दाःत्ते आङ्गाॽ आदगि हाःत्ताङ् ओःन्मे़धाक्सिङ्ङिन्ल॥
16“प्याङ्सिओ खिनिॽ के़हेॽरुम्बा कुजाःल्ले़ तगिबा कुजाॽइन् तोःन्दे़म्मे़ॽआङ् चा हे़क्मा तङ्नाम् तोसे़म्मे़ॽ॥
“तङ्बेःल्ले़ कुनुप्मो खिनिॽ प्याङ्सिओ स्याङ्मे़न्दाङ् याःम्बक् के़जोगुम्बा कुजान् के़सुप्सुम्, खे़न् ये़म्मो कुजा चिङ्मा तङ्नाम् तोसे़म्मे़ॽ॥
17“तङ्बे थक्मा कन् सुम्सि तङ्नाम्हाॽओ खिनिॽ ये़म्बित्छा मनाहाॽ आङ्गाॽ यहवे दाङ्बा खिनिॽ निङ्वाॽफुमाङ्ङिन् माङ्से़वा मे़त्छे़ मे़दार पोङ्ॽ॥
18“वयागे़न् सिदुङ्जभा तोःम्मनासिबा थक्सा माक्खिॽइन्नु सोरिक् के़भङ्बा सिदाॽ याक्मनाबा खरे़ःङ् मे़दोःन्दे़म्मिन्ने़ॽ॥
“कन् तङ्नाम्हाॽओ वयागे़न् सिदुङ्जभा तोःम्मनासिबा थक्साहाॽरे़ खुन्छिॽ सोःत्तिन् कुदाःन्दिक्मा तानाम् थारिक् याःक्ल मे़जोगे़म्मिन्ने़ॽ॥
19“तङ्बे थक्मा खिनिॽ लाजेॽ सिङ्बुङ्ङोबा के़रे़क्नुःल्ले़ तगि के़दुम्बा कुजाहाॽओ नुबा कुजान् यहवे दाङ्बा खिनिॽ निङ्वाॽफुमाङ्ङिल्ले़ कुहिम्मो तारे़म्मे़ॽ॥
“मे़ःन्दज्याःक् सान् खे़ल्ले़ कुम्मारे़ कुनुओ मे़धोःक्ते़म्मिन्ने़ॽओ॥
माङ्हुप्हाॽ नु खाहुन्हाॽ
20“ओमे़त्ते़म्मे़ॽ, लाम्मो खिनिॽ कम्ब्राङ् मे़प्मारे़ लागि नु आङ्गाॽ यारिप् चोगुङ्बा ते़न्नो खिनिॽ के़प्मारे़ लागि आङ्गाॽ लत्छा माङ्लाइङ्बाधिक् खिनिॽ तगि तगि पाङ्घुङ्ॽ॥ 21सिङ्सिङ् ये़क्ये़क्काङ् खे़ल्ले़ कुबाःन्निन् खे़प्से़म्मे़ॽ हे़क्क्याङ् खे़न् इःत्ते़म् नाःत्ते़म्मे़ॽ॥ खे़न् मे़अत्ते़म्मिन्ने़ॽ थेआङ्भे़ल्ले़ खे़न् आङ्गाॽए पाङ्घुङ्बा हे़क्क्याङ् खे़ल्ले़ खिनिॽ फे़न्याःम्बक्को ले़प्मि के़म्बिरिन्ॽ॥ 22खे़ल्ले़ कुबाःन्निन् खिनिॽ के़घे़प्सुम्ॽ, हे़क्क्याङ् आङ्गाॽ पाःत्तुङ्बा के़रे़क् पाःन्हाॽ के़जोगुम्ने़भग्र, आङ्गाॽ खिनिॽ निङ्मिहाॽरे़ खुन्छिॽ निङ्मि पोङ्ङा हे़क्क्याङ् खिनिॽ के़अप्पाहाॽ अत्तुङ्सिङ्ॽ॥ 23आङ्गाॽ आमाङ्लाइङ्बान् खिनिॽ तगि तगि पेक्, हे़क्क्याङ् एमोरि, हित्ति, परिज्जि, कनानि, हिब्बि नु यबुसिहाॽरे़ खुन्छिॽ लाजेॽओ खिनिॽ के़गे़त्तिॽ, हे़क्क्याङ् आङ्गाॽ खे़ङ्हाॽरे़ खुन्छिॽ मिङ् मासुङ् पिरुङ्सिङ्ॽ॥ 24खे़ङ्हाॽरे़ खुन्छिॽ माङ्हाॽ से़वा मे़मे़त्ते़म्सिम्मिन्ने़ॽ हे़क्क्याङ् खे़ङ्हाॽरे़ खुन्छिॽ साम्यो साक्थिम्हाॽ मे़इःत्ते़म् मे़नाःत्ते़म्मिन्ने़ॽ, कर खे़ङ्हाॽ वरे़ङ्ले़ङ् मे़क्खे़म्सिम्मे़ॽआङ् खे़ङ्हाॽरे़ खुन्छिॽ सेसे लुङ्हाॽ कुम्जिक्मा चोगे़म् पिरे़म्सिम्मे़ॽ॥ 25यहवे दाङ्बा खिनिॽ आबाङे निङ्वाॽफुमाङ्ङिन् माङ्से़वा मे़त्ते़म्मे़ॽ, हे़क्क्याङ् खुने़ॽ खिनिॽ पोगुगे़न् चामा कुजा नु च्वाःत्तो हाङ्वागे़न् मुॽइसाम् थासु के़बिरिॽ॥ आङ्गाॽ खिनिॽलुम्मोलाम् तुक्मा लाःक्माहाॽ खे़त्तुङ्देसुङ् पिनिङ्ॽ॥ 26खिनिॽ लाजेॽओ आत्तिन् मे़न्छुमाहाॽआङ् कुस्सा के़ले़म्मा नु सामे़ङ्गप्मनामा मे़म्बोङ्ने़न्॥ आङ्गाॽ खिनिॽ थाःक् चाॽर चोगुङ् पिनिङ्ॽ॥
27“खिनिॽ के़अप्पा मनाहाॽ आङ्गाॽ मे़गित्तार याःन्दुङ्सिङ्ॽ॥ आत्तिन्हाॽनु खिनिॽ थङ् के़जोगिॽ, खे़ङ्हाॽरे़ खुन्छिॽलुम्मो हयङ् किल्लिङ् पोङ्ल चोगुङ्ॽ, खे़ब्याङ् खिनिॽ के़रे़क् निङ्मिहाॽ खिनिॽलाम्बा मे़घे़त्छिङ् मे़बेःक्॥ 28खिनिॽ निङ्मिहाॽ आङ्गाॽ यङ्मा मे़सिर याःन्दुङ्सिङ्ॽ॥ खिनिॽ तगि के़बोरिर के़बेगिल्ले़ हिब्बिहाॽ, कनानिहाॽ, हित्तिहाॽ आङ्गाॽ नाःत्तुङ्सिङ्ॽ॥ 29कर आङ्गाॽ खे़ङ्हाॽ खिनिॽ तगिलाम्बा तङ्बेधिक्ले़सा मे़नाःत्तुङ्सिङ्ङिन्, मेःन्ने़भग्र लाजेन् चिजि खक्खक् पोङ्ॽ, हे़क्क्याङ् ताम्भुङ् थक्साहाॽ खिनिॽ लागि खानिःत्तो यरिक् मे़बोङ्ॽ॥ 30आङ्गाॽ खे़ङ्हाॽ खिनिॽ तगिलाम् याःक्याःक्काङ् नाःत्तुङ्देसुङ्सिङ्ॽ हे़क्क्याङ् कन् लाजेन् के़रे़क् खिनिॽ हुक्को मे़न्धाए थारिक् आङ्गाॽ खिनिॽ फोनिङ्ॽ॥
31“आङ्गाॽ खिनिॽ इःन्दोन् हे़ःत्ताङ्बा वरःङ्ङोनु पलिस्तिहाॽरे़ खुन्छिॽ लुम्बा वरःङ् थारिक्, हे़क्क्याङ् मुरे़ःक् खे़रे़ःक् थेआङ् के़होःप्पादे़न्नाङ् कत्ना युफ्रेतिस थारिक्के ने़स्सुङ् पिनिङ्ॽ॥ आङ्गाॽ खे़न् लाजेॽबा यक्युङ्बाहाॽ खिनिॽ हुक्को थासुङ्सिङ्ॽ, खे़ब्याङ् खिनिॽ खे़ङ्हाॽ के़नाःत्तुम् के़देसुम्सिम्ॽ॥ 32खे़ङ्हाॽनु इग्र खे़ङ्हाॽरे़ खुन्छिॽ माङ्हाॽनु माङ्हुप् मे़जोगे़म्मिन्ने़ॽ॥ 33खे़न् मनाहाॽ खिनिॽ लाजेॽओ युङ् मे़भाःक्ताम्सिम्मिन्ने़ॽ, खे़ङ्हाॽ खिनिॽ युङ्मा के़भाःक्तुम्सिम्ने़भग्र खे़ङ्हाॽरे़ खिनिॽ आङ्गाॽ आदक्ले़ङ्वाओ लायो चोःक्मा के़म्बाङ्घिॽ॥ खे़ङ्हाॽरे़ खुन्छिॽ माङ्हाॽ खिनिॽ से़वा के़मे़त्तुम्सिने़भग्र खिनिॽ सिमा इओ के़ध्ये़ॽइरो॥”
Currently Selected:
लाम्दिक् 23: LIF
Highlight
Copy
Compare
Share
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
