१ युहुन्ना 3
3
निङ्वाॽफुमाङ्ङिल्ले़ कुस्साहाॽ
1ओमे़त्ते़म्मे़ॽओ! पानुदिङ् पा निङ्वाॽफुमाङ्ङिल्ले़ आक्खे़न् यरिक् लुङ्माॽ आदुक्ते़आङ् वाॽ! खुने़ॽ लुङ्माॽ आदुक्पाल्ले़ चोगुल्ले़ आस्सानिङ्लो फाॽआङ् आनिॽ आमे़त्लो॥ आनिॽग से़क्खाए कुस्सासिएरो! कर इक्सादिङ् खाम्बेःक्मोबा मनाहाॽरे़ निङ्वाॽफुमाङ्ङिन् कुसिङ् मे़न्निःत्तुन्बाल्ले़ चोगुल्ले़ खे़ङ्हाॽरे़ आनिॽआङ् कुसिङ् आमे़न्निःत्ने़न्लो॥ 2आमिःम् आन्जुम्से, आल्लो आनिॽग निङ्वाॽफुमाङ्ङिल्ले़ कुस्सासिरो॥ हे़क्केसाङ् थे आबोङ् फाॽआङ् नुरिक्काङ् मे़न्धाःप्पे वाॽरो॥ कर ख्रिस्ते़न् नुःङ् युःल्ले़ आनिॽग खुने़ॽ कुइसिःक्के आबोङ्, थेआङ्भे़ल्ले़ खे़न् ये़म्मो खुने़ॽ आक्तङ्बा चोक् हे़क्तङ्बाए आनिसुम्लो॥ 3हे़क्केःल्ले़ ख्रिस्तओ खे़न् हे़क्तङ्बा निङ्साङ् के़जोःक्पा काक्ले़ ख्रिस्ते़न् सेसे चोःक्पा कुइसिक् आबाङे सेसे मे़जोक्सिङ्लो॥
4लायो के़जोःक्पा काक्ले़ साम्योथिम्मिन् मे़भेःन्दुॽरो, थेआङ्भे़ल्ले़ के़रे़क् लायोन् ने साम्योथिम्मिन् फेःम्मनाबारो॥ 5आनिॽ लायोन् खे़प्मारे़ लागि ख्रिस्ते़न् ये़बाङ्ग खिनिॽ कुसिङ् के़निःत्तुम्लो॥ हे़क्क्याङ् खुने़ॽओ लायो होप्लो॥ 6हे़क्केःल्ले़ आत्तिन् ख्रिस्तओ वाॽ, खे़ल्ले़ लायो चोगुर मे़वाॽने़न्लो॥ कर आत्तिल्ले़ लायो चोगुर वाॽ, खे़ल्ले़ खुने़ॽ मे़न्निए नु कुसिङ् मे़न्निःत्ते वाॽरो॥
7आमिःम् आस्सासे, आत्तिन्हाॽरे़आङ् खिनिॽ इङ्गे़मे़ल्ले़क्तिन्लरो॥ आत्तिल्ले़ नुबा याःम्बक् चोगुॽ खे़ङ्ग ख्रिस्ते़न् कुइसिक् साम्योबा पोङ्लो॥ 8लायो के़जोःक्पार के़वाॽबा मनाःङ्ग माफे़न्साम्मिल्ले़ कुमनारो, थेआङ्भे़ल्ले़ माफे़न्साम्मिल्ले़ तोलिङ्सोमुआङ्धोए लायो चोगुर वाॽरो॥ खे़ल्ले़चोगुल्ले़ निङ्वाॽफुसान् माफे़न्साम्मिल्ले़ कुयाःम्बक्किन् मे़ङ्से़ ये़बारो॥ 9निङ्वाॽफुमाङ्लाम् कुसङ् लॽरिक् सागे़वाःन्छिङ्बा आत्तिल्ले़आङ् लायो चोगुर मे़वाॽने़न्, थेआङ्भे़ल्ले़ निङ्वाॽफुमाङ्ङिल्ले़ कुनोस्रङ्ङिन् खुने़ॽओ वाॽरो॥ खुने़ॽ लायो चोःक्कि वाॽमा मे़सुक्ने़न्लो, थेआङ्भे़ल्ले़ खुने़ॽग निङ्वाॽफुमाङ्लाम् सावाःन्छिङ्ङाङ् वाॽरो॥ 10निङ्वाॽफुमाङ्ङिल्ले़ कुस्साहाॽ नु माफे़न्साम्मिल्ले़ कुस्साहाॽओ मे़न्दङ्मना पाःन्निन् आम्भा कन्लो—आत्तिल्ले़ साम्योथिम् कुइसिक् नुबा याःम्बक् मे़जोगुन् हे़क्क्याङ् नसानिबा फुॽनुसाॽ नु ने़ॽनुसाॽहाॽ लुङ्माॽ मे़दुक्तुसिन् खे़ङ्ग निङ्वाॽफुमाङ्ङिल्ले़ कुस्सा मेःन्लो॥
आनिॽ लुङ्माॽ तुक्सिङ्मा पोङ्
11आनिॽ लुङ्माॽ तुक्सिङ्मा पोङ् के़लॽबा इङ्घङ्ङिङ्ग तगिआङ्धोए के़घे़प्सुम्माङ् के़वयिॽरो॥ 12खिनिॽग कयिने़न्#३:१२ कयिन—कन् काक्नु तगिबा मनाहाॽरे़ खुन्छिॽ साः तुम्बाल्ले़ कुमिङ्लो॥ खुने़ॽ कुन्साॽ हाबिले़न् नाहे़त्तुआङ् से़रु (तोलिङ् ४:१-१६)॥ हे़क्के मे़बोःक्खे़म्मिन्ने़ॽओ॥ खे़ङ्ग माफे़न्साम्मिल्ले़न् वये़आङ् खे़ल्ले़ आबाङे कुन्साॽइन् से़रुरो॥ थेआङ् से़रुबाभे़ल्ले़ खे़ल्ले़ आबाङे कुयाःम्बक्हाॽ ताप्फे़ःम्बा चोगे़, कर कुन्साॽरे़ कुयाःम्बक्हाॽ साम्योबा चोगे़॥ 13आमिःम् फुॽनुसाॽ नु ने़ॽनुसाॽसे, इक्सादिङ् खाम्बेःक्मोबा मनाहाॽरे़ के़म्जिःत्तिल्ले़ खिनिॽ निङ्वाॽ मे़मये़म्मिन्ने़ॽओ॥ 14आनिॽ नसानिबा फुॽनुसाॽ नु ने़ॽनुसाॽहाॽ लुङ्माॽ आदुक्सिङ्बाल्ले़ चोगुल्ले़ आनिॽग सिमे़न्लाम् मे़न्नुप्मनाबा हिङ्मन्नो आजत्छिङ्ङाङ् आवाॽ फाॽआङ् आनिसुम्लो॥ कर आत्तिल्ले़ वेॽहाॽ लुङ्माॽ मे़दुक्तुसिन्, खे़ङ्ग आल्लोसाङ् सिमे़न्नोए वाॽरो॥ 15आत्तिल्ले़ नसानिबा फुॽनुसाॽ नु ने़ॽनुसाॽहाॽ चिःत्तुसिॽ, खे़ङ्ग मना के़से़प्पारो॥ हे़क्क्याङ् मना के़से़प्पा के़रे़क्ले़ मे़न्नुप्मनाबा हिङ्मन्निन् मे़ङ्घोसुन् फाॽआङ् खिनिॽ के़निसुम्लो॥ 16ये़सु ख्रिस्ते़ङ्ग आनिॽ ले़क्वा स्ये़बाल्ले़ से़क्खाबा मिःम्जिन् आक्तङ्बा चोक् फाॽआङ् कुसिङ् आनिःत्तुम्लो॥ आनिॽआङ् नसानिबा फुॽनुसाॽ नु ने़ॽनुसाॽहाॽरे़ खुनिॽ ले़क्वा सिमाआङ् यारिप् पोङ्मा पोङ्लो॥ 17चाहाबा के़जोःक्पा काक् पाःन्हाॽ के़गप्पा मनाःल्ले़ नसानिबा फुॽनुसाॽ नु ने़ॽनुसाॽहाॽ चाहाबा मे़जोःक्काङ् मे़वाॽबा निसुसाङ् लुङ्माॽ मे़दुक्तुसिन्निल्ले़ आक्खेलॽरिक् खे़न् मनाओ निङ्वाॽफुमाङ्ङिल्ले़ कुमिःम्जिन् वाॽबे?
18आमिःम् आस्सासे, आनिॽग पाःन्नो नु मुराःल्ले़रक् लुङ्माॽ तुक्कासि मेःन्लो॥ आनिॽ से़क्खा लुङ्माॽ तुक्सिङ्मा पोङ्लो॥ हे़क्तङ्बा लुङ्माॽ तुक्सिङ्मान् याःम्बक्कोलाम् निदे़त्लो॥ 19-20अक्खेलॽरिक् लुङ्माॽ आदुक्कासिने़ फाॽग्र आनिॽग से़क्खाःल्ले़ कुमनासि फाॽआङ् आनिसुम्लो, हे़क्क्याङ् आनिॽ निङ्वाॽइल्ले़ए पान् आधिक्साङ् आनिॽ निङ्वाॽफुमाङ्ङिल्ले़ कुदगि तोःन्छिङ्मा आःन्छिङ्गे़न् हाङ्हाङ् आजोःक्लो, थेआङ्भे़ल्ले़ निङ्वाॽफुमाङ्ङिङ्ग आनिॽ निङ्वाॽनुःल्ले़आङ् पयम् यम्बा चोक्लो, हे़क्क्याङ् खुने़ॽ के़रे़क् पाःन्हाॽ निसुरो॥ 21हे़क्केःल्ले़ आमिःम् आन्जुम्से, आनिॽ निङ्वाॽइल्ले़ए पान् आन्धिक्ने़न्ने़ फाॽग्र निङ्वाॽफुमाङ्ङिल्ले़ कुदगि हाङ्हाङ्ङाङ् आनिॽ तामा आसुक्लो॥ 22हे़क्क्याङ् आनिॽग निङ्वाॽफुमाङ्ङिल्ले़ कुइङ्जाङ्ङिन् आइःत्तुम् आनाःत्तुम्बा नु खुने़ॽ कुसिराॽ के़धाङ्बा याःम्बक् आजोगुम्बाल्ले़ चोगुल्ले़ आनिॽ आनाःक्तुम्बा पाःन्निन् खुने़ॽ आबिॽरो॥ 23खुने़ॽ कुइङ्जाङ्ङिङ्ग बा कन्लो—आबुगे़न् कुस्सा ये़सु ख्रिस्ते़न् आनिॽ नसान् चोःक्मा पोङ्, हे़क्क्याङ् खुने़ॽ आबिरे़बा इङ्जाङ् कुइसिक् लुङ्माॽ तुक्सिङ्मा पोङ्लो॥ 24निङ्वाॽफुमाङ्ङिल्ले़ कुइङ्जाङ्ङिन् के़इःप्पा के़नाःप्पे़न् निङ्वाॽफुमाङ्ङो वाॽ हे़क्क्याङ् खे़ल्लो निङ्वाॽफुमाङ्ङिन् वाॽरो॥ आनिॽओ निङ्वाॽफुमाङ्ङिन् वाॽ फाॽआङ् खुने़ॽ आबिरे़बा सेसेमाङ्लाम् कुसिङ् आनिःत्तुम्लो॥
Currently Selected:
१ युहुन्ना 3: LIF
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.