१ युहुन्ना 2
2
आनिॽ कुभाॽ के़बिबा ख्रिस्त
1आमिःम् आस्सासे, खिनिॽ लायो मे़जोगे़म्मिन्ने़ॽ फाॽआङ् कन् सक्इङ्घङ्ङिन् साप्तुङ्ङाङ् हाक्निङ्ल पत्तारो॥ कर कुभारे़ लायो मे़जोगुसाङ् आनिॽ लागि के़बाःप्पा के़बिबा साम्योबा ये़सु ख्रिस्ते़न् आनिॽ लायोलाम् ले़प्मि आघोसुम्ल फाॽआङ् पानुदिङ् पाः निङ्वाॽफुमाङ्ङिन् पेलि फाक्तुॽरो॥ 2आनिॽ लायोन् ले़प्मि पिमारे़ लागि खुने़ॽ सिदुङ्जभा पोःक्खे़, हे़क्क्याङ् आनिॽ लायोरे़ लागिरक्ग मेःन्, कर इक्सादिङ् खाम्बेःक्मो के़वाॽबा के़रे़क् मे़न्छाम्गे़न् याप्मिहाॽरे़ खुनिॽ लायोरे़ लागिआङ् खुने़ॽ स्ये़बारो॥
3आनिॽ निङ्वाॽफुमाङ्ङिल्ले़ कुइङ्जाङ्ङिन् आइःत्तुम् आनाःत्तुम्ने़ फाॽग्र खुने़ॽ नुःरिक्काङ् कुसिङ् आनिःत्तुम् के़लॽबान् से़क्खा आनिसुम्लो॥ 4निङ्वाॽफुमाङ्ङिन् इङ्गाॽ कुसिङ् निःत्तुङ् लॽरिक् के़बाःप्पाल्ले़ निङ्वाॽफुमाङ्ङिल्ले़ कुइङ्जाङ्हाॽ मे़इःत्तुन् मे़नाःत्तुन्ने़ फाॽग्र खे़न् मनान् इङ्ले़क् के़बाःप्पारो, हे़क्क्याङ् खे़ल्लो से़क्खान् होप्लो 5कर निङ्वाॽफु पाःन्जाक्किन् के़इःप्पा के़नाःप्पाल्ले़ निङ्वाॽफुमाङ्ङिन् से़क्खाए साॽरिक् मिःम्जि मे़त्तुॽरो॥ हे़क्केलॽरिक् आनिॽ निङ्वाॽफुमाङ्ङिन्नु आवाॽ के़लॽबान् आनिसुम्लो॥ 6निङ्वाॽफुमाङ्ङो वाॽआ लॽरिक् के़बाःप्पाल्ले़ ये़सुरे़ चोगुबा कुइसिक् चोगुर वाॽर पोङ्लो॥
कुसङ् इङ्जाङ्
7आमिःम् आन्जुम्से, कन् साप्तुङ्बा इङ्जाङ्ङिन् कुसङ् इङ्जाङ्ग मेःन्लो॥ कङ्ग उन्छोःन्नाङ्धो खिनिॽनुए के़वाॽबा के़युःबा इङ्जाङ्लो॥ कन् उन्छोःन्बा इङ्जाङ्ङिङ्ग के़घे़प्सुम् के़सुरुम्बा पाःन्जाक्लो॥ 8हे़क्केसाङ् कन् साप्तुङ्बा इङ्जाङ्ङिङ्ग कुसङ् हे़क्तङ्बा चोक्—खे़ल्ले़ कुसे़क्खाःङ्ग ख्रिस्तओ नु खिनिॽओ निधाःबे़आङ् वाॽरो॥ थेआङ्भे़ल्ले़ माक्चिगे़न् खादाम्मान् ले़क्पेःक्ल पत्, हे़क्क्याङ् से़क्खाबा से़न्दाङ्गे़न् ओःत्तिःन् तगिनुए ओःत्ल वाॽरो॥ 9इङ्गाॽ से़न्दाङ्गे़न् ओःत्तिओ वाॽआ लॽरिक् के़बाःप्पाल्ले़ नसानिबा फुॽनुसाॽ नु ने़ॽनुसाॽहाॽ चिःत्तुसिॽने़ फाॽग्र खे़ङ्ग आल्ल थारिक्साङ् माक्चिगे़न् खादाम्मोए वाॽरो॥ 10नसानिबा फुॽनुसाॽ नु ने़ॽनुसाॽहाॽ लुङ्माॽ के़दुक्पे़ङ्ग से़न्दाङ्गे़न् ओःत्तिओ वाॽ, हे़क्क्याङ् वेॽहाॽ के़घबा पान् खुने़ॽओ थेआङ् होप्लो॥ 11कर नसानिबा फुॽनुसाॽ नु ने़ॽनुसाॽहाॽ के़जिःप्पाङ्ग खादाम्मो वाॽ, हे़क्क्याङ् खादाम्मो लाङ्घेःक्किल्ले़ खुने़ॽ आत्तान् ले़प्माङ् पेःक्ल पत् थेआङ् निङ्वाॽ मे़घोसुन्लो, थेआङ्भे़ल्ले़ खादाम्माल्ले़ खे़न् खामे़न्निःमनाबा चोगुदेसुआङ् वाॽरो॥
12आमिःम् हिन्जाॽबित्छासे, ख्रिस्तरे़ चोगुबा कुयाःम्बक्लाम् खिनिॽ लायोन् ले़प्मि पोःक्खे़बाल्ले़ चोगुल्ले़ कन् सक्इङ्घङ्ङिन् साप्तुङ्ङाङ् हाक्निङ्ल पत्तारो॥
13पानुदिङ् पासे, तोलिङ्सोमुआङ्धोए के़वाॽबा ख्रिस्ते़न् खिनिॽ कुसिङ् के़निःत्तुम्बाल्ले़ चोगुल्ले़ कन् सक्इङ्घङ्ङिन् साप्तुङ्ङाङ् हाक्निङ्ल पत्तारो॥
थाङ्बे़न् मे़न्छियाॽसे, माफे़न्साम्मिन् खिनिॽ के़नाःन्दुम्माङ् के़वयिबाल्ले़ चोगुल्ले़ कन् सक्इङ्ङिन् साप्तुङ्ङाङ् हाक्निङ्ल पत्तारो॥
14आमिःम् आस्सासे, पानुदिङ् पा निङ्वाॽफुमाङ्ङिन् खिनिॽ कुसिङ् के़निःत्तुम्माङ् के़वयिबाल्ले़ चोगुल्ले़ कन् सक्इङ्घङ्ङिन् साप्तुङ्ङाङ् हाक्निङ्ल पत्तारो॥
पानुदिङ् पाःसे, तोलिङ्सोमुआङ्धो के़वाॽबा ख्रिस्ते़न् खिनिॽ कुसिङ् के़निःत्तुम्बाल्ले़ चोगुल्ले़ कन् सक्इङ्घङ्ङिन् साप्तुङ्ङाङ् हाक्निङ्ल पत्तारो॥
थाङ्बे़न् मे़न्छियाॽसे, खिनिॽ के़धुम्बा के़जोगिॽ, निङ्वाॽफु पाःन्जाक्किन् खिनिॽओ वाॽ, हे़क्क्याङ् माफे़न्साम्मिन् के़नाःन्दुम्माङ् के़वयिबाल्ले़ चोगुल्ले़ कन् सक्इङ्ङिन् साप्तुङ्ङाङ् हाक्निङ्ल पत्तारो॥
इक्सादिङ् खाम्बेःक्मान् मिःम् मे़प्मा मेःन्लो
15इक्सादिङ् खाम्बेःक्मान् नु खे़प्मो के़वाॽबा चिगक्वाहाॽ मिःम्जि मे़मे़त्ते़म्मिन्ने़ॽओ॥ आत्तिल्ले़ इक्सादिङ् खाम्बेःक्मान् मिःम्जि मे़त्तुॽ, खे़ल्ले़ पानुदिङ् पा निङ्वाॽफुमाङ्ङिन् मिःम्जि मे़प्मा मे़सुक्तुन्लो॥ 16थेआङ्भे़ल्ले़ इक्सादिङ् खाम्बेःक्मोबा लायोबा याम्निङ्वाॽइन्, मिक्लो लाम्मान्, हे़क्क्याङ् कप्मनाबा नु चोःक्मनाबा पाःन्नो हे़न्छिङ्मान् पानुदिङ् पा निङ्वाॽफुमाङ्लाम्बा मे़दाने़न्, कर खे़ङ्ग इक्सादिङ् खाम्बेःक्मोलाम्बाने़ तारो॥ 17इक्सादिङ् खाम्बेःक्मान् ले़क्काङ् पेक्, हे़क्क्याङ् खे़ल्ले़ चोगुङ् फाॽआङ् इःत्तु सोःक्तुबा पाःन्हाॽआङ् ले़क्काङ् पेक्, कर निङ्वाॽफुमाङ्ङिल्ले़ कुनिङ्वाॽ कुइसिक् के़जोःक्पाङ्ग सदादिङ् वाॽरो॥
ख्रिस्तरे़ कुबिफ्युङ्बाहाॽ
18आमिःम् आस्सासे, कुनुप्मा ये़म्मिङ्ग निःत्ताङ्ङे वाॽरो॥ ख्रिस्तरे़ कुबिफ्युङ्ङिङ्ग ता लॽरिक् के़घे़प्सुम्माङ् के़वयिॽ॥ आल्लोसा खे़न् हे़क्तङ्बा ख्रिस्तरे़ कुबिफ्युङ्हाॽ यरिक् मे़द्ये़ मे़जुरे़आङ् मे़वाॽरो॥ खे़ल्ले़चोगुल्ले़ कन् पाःन्नोलाम् कुनुप्मा ये़म्मिन् निःत्ताङ्ङे वाॽ के़लॽबा पाःन्निन् कुसिङ् आनिःत्तुम्लो॥ 19खे़ङ्हाॽग आनिॽलाम् मे़लःन्दे़ मे़बे, कर से़क्खाःल्ले़ग खे़ङ्हाॽ आनिॽ मनाहाॽ मे़न्वये़न्लो, थेआङ्भे़ल्ले़ खे़ङ्हाॽ आनिॽ मनाहाॽ मे़वये़ल्ले़ग खे़ङ्हाॽ आनिॽनुए मे़याःक्ते़बा मेःन्लो॥ कर खे़ङ्हाॽरे़ पक्आम्ध्ये़आङ् मे़बेबाल्ले़ खे़ङ्हाॽ के़रे़क् आनिॽहाॽ मे़ःन्छि के़लॽबान् ओसेःन्दाङ् पोःक्खे़रो॥ 20कर खिनिॽग सेसेबा ख्रिस्तरे़ सेसेमाङ् के़बिरिआङ् वाॽ, हे़क्क्याङ् खिनिॽ के़रे़क्ले़ से़क्खान् कुसिङ् के़निःत्तुम्लो॥ 21खिनिॽ से़क्खान् कुसिङ् के़न्निःत्तुम्मिन् फाॽआङ् मेःन्, कर से़क्खान् कुसिङ् के़निःत्तुम् फाॽआङ् साप्तुङ्ङाङ् हाक्निङ्लो॥ हे़क्क्याङ् लत्छा इङ्ले़क् पाःन्धिक्काङ् से़क्खालाम् मे़दाने़न् फाॽआङ् कुसिङ् के़निःत्तुम्लो॥ 22इङ्गे़ले़क्पे़न् हाःप्पे? ये़सुन् निङ्वाॽफुमाङ्ङिल्ले़ सेःन्दुबा ख्रिस्त मेःन् फाॽआङ् के़बाःप्पे़न्ने इङ्ले़क्पारो॥ आत्तिल्ले़ पानुदिङ् पा निङ्वाॽफुमाङ्ङिन् नु आबुगे़न् कुस्सान् नाॽरुसिॽ बा खे़न्ने ख्रिस्तरे़ कुबिफ्युङ्बारो॥ 23आबुगे़न् कुस्सान् के़नाॽबे़ल्ले़ पानुदिङ् पा निङ्वाॽफुमाङ्ङिन् नाॽरुॽ, कर आबुगे़न् कुस्सान् ते़न्दिङ् के़जोःक्पाल्ले़ पानुदिङ् पाः निङ्वाॽफुमाङ्ङिन्नाङ् ते़न्दिङ् चोगुॽरो॥
24हे़क्केःल्ले़ नसानिबा के़बोःक्खिआङ्धोए के़घे़प्सुम्बा सुनाइङ्ङिन् खिनिॽ सिक्लुङ्मो नुरिक्काङ् युक्खे़म्मे़ॽओ॥ हे़क्केलॽरिक् के़युक्खुम्ने़ फाॽग्र सदादिङ् पानुदिङ् पाः निङ्वाॽफुमाङ्ङिन्नु हे़क्क्याङ् आबुगे़न् कुस्साःन्नु सोरिक् के़वयिॽरो॥ 25हे़क्क्याङ् आबुगे़न् कुस्साःल्ले़ पिनिङ् फाॽआङ् चोगुबा माङ्हे़क्किङ्ग मे़न्नुप्मनाबा हिङ्मन्लो॥
26इङ्गाॽग खिनिॽ इङ्ले़क् के़मे़प्पाहाॽरे़ खुनिॽ याःम्बेओ साप्तुङ्ङाङ् हाक्निङ्ङाङ् वाॽरो॥ 27कर खिनिॽओग ख्रिस्तरे़ के़बिरिबा सेसेमाङ्ङिल्ले़न् माङ्धुक्नाःन् वाॽ याःक्लो॥ हे़क्क्याङ् खिनिॽ के़हुॽबा हाःत्ताङ् चाहाबा के़न्जोगिन्, कर सेसेमाङ्ङिल्ले़ के़रे़क् पाःन्निल्ले़ कुयाःम्बेओ के़हुॽरिॽ॥ खे़न् के़हुॽरिबा पाःन्निङ्ग इङ्ले़क् मेःन्लो, कर से़क्खाएरो॥ हे़क्केःल्ले़ सेसेमाङ्ङिल्ले़ के़हुॽरिबा निसाम्मिन् इःत्ते़म् नाःत्ते़म्मे़ॽआङ् ख्रिस्ते़न् मे़ल्ले़त्ते वये़म्मे़ॽओ॥ 28आल्ल आमिःम् आस्सासे, ये़सुन् युःल्ले़ मे़ङ्गिए नु सिरिङ् मे़म्मए खुने़ॽओ तोःन्छिङ्मा आसुक्तुम्ल फाॽआङ् ख्रिस्ते़न् मे़ल्ले़त्ते वये़म्मे़ॽओ॥ 29निङ्वाॽफुमाङ्ङिन् साम्योबा चोक् फाॽआङ् खिनिॽ के़निसुम्लो॥ हे़क्केःल्ले़ काक् नुबा याःम्बक् के़जोक्पे़न् निङ्वाॽफुसा पोःक्खे़आङ् वाॽ के़लॽबा पाःन्निन्नाङ् खिनिॽ के़निसुम्लो॥
Currently Selected:
१ युहुन्ना 2: LIF
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.