2 BaKorinti 12

1In rēn fok vit ikyɛng fi in da sɛ ayɛt e, in da ya kashon ni itsot kugwɔm. Yɔkɔnɔng, in da ya kashon ni kucɛɛt naton nabos abik ni itarak ice fɛ́ aYeso mi di tonong. 2Imi rēn afi ikuus akak fɛ́ ayɛ kusɔk abe anaas, ba kin ku sok sak azanɛn ka fɛ́ ataat. Ikyɛng fi in nin rēn awo yet, ke ba kin ku sok ni irɔm a, ke ni irɔm awo ayi. 3Won in bang fɛ̀ ye, Adakunom wu kyɛk fɛ́ a rēn fok ba kin sok anet e ni irɔm ke ni irɔm awo ayi. Imi rēn awo, 4a foos nkyɔrɔk fɛ́ a da kyem in tak awo, nyɔng fɛ́ vit anet fɛ́ a da kyem a fɛrɛng ina. 5In tsot kugwɔm naton anet tɛ ayɔ́ng, awɛt in da tsot kugwɔm ni ice min awo, tit nin in tsot kugwɔm naton kurat hom. 6Ki imi fi in shim itsot kugwɔm, ki in nye ti ishɔp awo, nek in da cɛɛt atsak. Imi da tsot kugwɔm awo, kɔng akak bi dung di sok garang azaton ikyɛng fi in nye ki in fɛ́ ayi.

7Nek da in bi kok ice naton kudot nkyɔrɔk fɛ́ Adakunom mi di tonong, ba di te kurɔk fi ku sot ti itsitsan ni irɔm. Tɛ asam aShetan fɛ́ ba sak na a di nesek iyɔm, kɔng in bi kok ice. 8Ite kataat, in tsɛsɛk aTisa ni a di tun iko. 9Awɛt iwu fɛ̀ ni imi; “Itek hom da kyem, nek kukyem hom nes ayit kurat ngɔn.” Nek anɔng, in da bang nye itɛrɛk iyɛ, ni itsot kugwɔm ayɛt kurat hom, nɔng kukyem Anet-Isheshek da sot gung ni imi. 10Nek anɔng, imi bi iyɛ ikan ayɛt kurat hom, ayɛt ncɛɛt ibyes fɛ́ ba di nyes e, ayɛt mgbang, ayɛt izot, ni nzam-nzam iyɔm fi in di ses nek Anet-Isheshek. Nek izen fi in se gbɛrɛk, ni izen e yɔng, ni in ses agap.

11In mi borok ice min, iyin ba i di sak yin mo. Ki iyin ba ningya fi i di tere yin, ngma ni fi da in kyem ikikak awo, in wat bayɔng fi i ka ba yes yin, agbat-agbat batom. 12Ni izen fi in se gung ni iyin, in nyes nkyɔrɔk fɛ́ ba tsɛt na atom aYeso, nek ayɛt akabɔk, in ras ntomong ajingjing, ni ntomong abes nate yin. 13Na ane fi kurat yin kin di ne aza bafi ikuus bakak ɛ? Tit nek in ramin dang ki te yin kunanang. Di nye yin akabɔk nek inɛn dɔng!

14Kyɔrɔng, in mi kana nye in da ki bɛ́ yin itsen afɛ́ ataat, in bi ki te yin kunanang awo, nek ikyɛng fi imi shim ni yin yet ikyɛng ibɔk yin awo tit iyin ice yin. In rēn yit fok da nnon na tsɛt kurúm nek bada bà awo tit bada ba ba tsɛt nnon bà ne. 15In da nye iyɛ ikan ni in wey nɛ akaakyɛ fi in bɛ, ngma ni ice hom, nɔng in ki sɛ yin mo. I di ki shim yin gyet, nek imi ki shim yin dot ɛ?

16Ngɔn rēn fok da imi ki sak yin kunanang awo. Awɛt akak da kyem a fɛ̀ fok imi ki ra yin kutsitsɛng, in ki te yin agunung mbɔɔs. 17Na anɛ fi in ki mɔɔt yin ni irèn atom akak ayɛt banet fi in kin ka ba tom sak ni yin ɛ? 18In kin ra awon na aTitus na a bɛ azɔng in ku moon na aruneng. Iyin da fɛ́ yin aTitus e ki mɔɔt yin ɛ? Ke iwu ni imi in bɛ́ yit kabik kazining awɛ, ke in nye yit nkyɔrɔk ni irèn izining awɛ?

19Bacɛk iyɛ hom, gyan bakak da di fok in tsɛt yin irèn itɛnɛsɛ ace yit ashon yin. Kye awey o! Iyit ra yit ni in cɛɛt yit kaakyɛ fɛ́ aYeso Kristi shim ni in raas yit ni in taas yit ashon Adakunom, in ki barasa yin mo agap. 20Nek in teng fok, izen fi in bɛ́, in da ki sɛ yin ni irèn fi imi da shim awo. Iyin bà gyan ni di sɛ yin ni irèn fi da i shim yin awo. In teng in kɔn ifa, ifup, inye fuu, i kana kabasa, tɛm icɛɛt, itang anu, ikok ice ni kperedyɛng bi di se. 21In teng in fok, izen fi in ti bɛ, Adakunom hom di sak ni in men ice hom ashon yin. In bi bɛ kafa kawe na banet dot fɛ ba mi raas anɛn yaame. Da ba mi tirik ba wosong nkyɔrɔk e fi in ka ba sak gbiridik, ti kujang, ni nggɔn nduk e fɛ ba ras. Da ba nɛ ba tirik ba wosong nkyɔrɔk e nang awo, nkyɔrɔk fi in ka ba sak ba sot gbiridik, nɛ ni iras kujang, ni nggɔn nduk e fɛ ba man na ba ras ina.

Currently Selected:

2 BaKorinti 12: IbaasNT

Highlight

Copy

Compare