2 BaKorinti 11

ABulus ne batom mbɔɔs

1Nye yin akabɔk ni ishɔp hom gyegyet, imi rēn i da nye yin anɔng! 2Imi bi ifup naton yin ti idɔng fɛ́ Adakunom bɛ́, in mi ki kasa yin sak na amatek azining ti ica anamang fɛ anet isam ka me, yet aKristi. 3Awɛt nnyim hom yet fok da ba bi ki wɔrɔk yin tɛ fi ihwyen nborok kin di wɔrɔk aHauwa awo, in fok nnyim kɔng ba bi tirik ayɛ yin, ni won yin inabak iyɛ yin sak na Anet-Isheshek. 4Nek ke anet akak ki bɛ́ yin ni ishara naton aYeso akak zɛɛt na ayɔng fi iyit mi ki tak yin, ke a ki bɛ́ yin na kabik kakak zɛɛt nɛ ka yɔng fi ki mang shan yin, ke ni ishara ikak zɛɛt ni iyɔng fi i ki mang shan yin ayi, ni ti ni feng yin ni iye makiyi.

5Awɛt imi di ikyɛng fɛ́ bayɔng fi i ka ba yes yin ye, “agbat-batom” e di wat ni ide awo. 6Nyen in rēn cɛɛt ashon banet awo, awɛt in se kpuu ni irēn nkyɔrɔk awo, in mi ki tonong yin anɔng e na akaakyi irèn.

7In nye inɛn fi in men ni nhwyɛ hom, in ki nesek yin iratek, in ki shara yin ifɛ̀ itek Adakunom vit ishan itarang ikak ni yin ɛ? 8In sak kunanang na bafi ikuus bakak, in shashang itsɔm ni ba, nek in ki ra yin mo kutomong. 9Ngma kusot in azɔng ni iyin, in mang idi sɛ yin mo ni ikikak ni izen fi in tsɛt itsɔm awo, bafi ikuus banyining nɛ batek fɛ́ ba nes na aMasedoniya ba fɛ̀ ba di nes ni ikyɛng fi in shim. Kpaf ti in kin di tumung, sak ashon, imi da sot acet ni yin awo. 10Na atsak Anet-Isheshek ayɛt hom, imi mi di anet fɛ́ a di ki ro ni itsot kugwɔm naton ikyɛng deng ni mben Akaya ngma kusum awo. 11In tsin ra anɔng fok nek in ki shim yin awɛ? Adakunom wu fɛ́ a rēn in ki ishim yin fi in bɛ mok iyin.

12Imi da ya kashon ni ra ikyɛng fi tsin ra me ni ramin ishashang nkyɔrɔk ni yin, nɔng banet e yɔng bin bit ikyɛng itsot kugwɔm fok iba se nagbɔng ti iyit. 13Nek banet e yɔng, yet batom mbɔɔs, bafi kutomong iboroso banet, ba shesheng nse bá fok iba yet batom Anet-Isheshek. 14Ayet ikyɛng yɔɔt awo, nek aShetan ice wu, a shesheng ice wu tɛ atomaza mgbey. 15Nek anɔng, iyet ikyɛng ifas awo ke basam aShetan tirik ace bá tɛ bafɛ́ ntomong isot kutabat. Ki izen nye, ba bi sɛ izang fi i se kpaf ni ntomong bá.

ABulus tsot kugwɔm ni sɔ mgbang

16In shim in bang fɛ́ ane, akak bi di sok fok in yet kushɔp awo, ki iyin di sok yin anɔng, ni wes yin ato ni imi kyɔn tɛ ba di foos ishɔp, nɔng in di ki sɛ ikyɛng itsot kugwɔm gyat. 17Da ifɛ́ itsot kugwɔm deng yet ikyɛng fɛ́ aTisa di te mo awo tit ikyɛng fi in tsin cɛɛt ti ishɔp. 18In di fok banet dot tsɛt itosok kugwɔm ni irɔm, imi da tsot kugwɔm bà. 19Iyit yet yin batsitsɛng, nek anɔng i da kyem i nye yin akabɔk na ashɔp. 20I da nye yin akabɔk na banet fɛ́ ba ki sas yin isam, ke ba ki mɔɔt yin, ba ya ikyɛng fi iyet ifiin ayi. Ke a ki byɛs yin, ke a ki rus yin kubɔk na yisi ayi. 21I di yet ikyɛng nsum ni ifɛ́ fok nkyɔrɔk yɔng kin ki gaat yit.

Awɛt ke akak tsot kugwɔm naton ikikak, imi ma in da nye iyɛ in da nye anɔng bà. In tsin cɛɛt ifɛ deng ti ishɔp. 22Iba yet baYahuda yɛ? Imi ma in yet azining. Iba yet bafɛ́ aIsrela yɛ? Imi ma in yet azining, Iba yet nnon aIbrahim ɛ? Imi ma in yet azining. 23Iba yet basam Anet-Isheshek yɛ? I se kpaf ni in cɛɛt anɔng awo, awɛt in se kashon ni iba azaton isam nek Anet-Isheshek. In mi sɔ mgbang ni itomong, ba mi di famasa ari inyang ni izen dot, ba mi di tsosok ne ahwyereng izen dot, in mi nyiis ni iku izen dot. 24Ite katoon, bakɔk-ashon baYahuda mi di nesek ahwyereng nsɔk ntaat na agyɛng azining. 25Ite kataat, igwɔm aRoma mi sak ba di tsosok ne anyin ishɛn, bafi ifa ni imi mi di bara na ata kazining, ite kataat kukyɛ ashi mi fo ni imi ayɛt e, in mang kɔsɔ, in ti in di woso ayit izek, ba da ne ba bɛ́ ba di tun.

26Ayit ntseet zizɛɛt fi in nyes, in mi sɔ mgbang na ákyɛk, ni mgbang ne bakpatang agap. In mi sɔ mgbang ni bɔk bafi icɛn inaan, in mi sɔ mgbang ni bɔk bafi Ícɛn-iduk. In mi sɔ mgbang ayit iwɔp, in sɔ mgbang ayɛt ayit, in mi sɔ mgbang nate izek, in mi sɔ mgbang ni bɔk bafi ikuus mbɔɔs. 27In mi bɔrɔng ni kutomong makiyi, in mi kɔs vit nda, in mi sosok ni nzong ni iyɛ ingash, izen ikak vit nayak, izen ikak ni wun vit ikyɛng ifam irɔm. 28Ama nyɔng, kaakyi kunom, kunanang ndaam bafi ikuus ngma kusum se naton hom. 29Ke akak se gbɛrɛk ayɛt yin, na di te gbɛrɛk bà, ke akak ayɛt yin kpa ni inɛn, na di shining ne kafa kawe.

30Ki i se gbingbing ni in tsot kugwɔm, in da nye anɔng ayit nkyɔrɔk fi in tonoso kurat hom. 31Ada, ada aTisa aYeso, won na ba tere iyerek wu! Iwu rēn fok imi tsin tas mbɔɔs awo. 32Ni izen e yɔng, anet fɛ́ a yet ayisi agwɔm Aretas na aDamaskos, sak na ba famasa natisi iwɔp aDamasin e, nɔng ba di ki yit mo. 33Awɛt ba di tun ni iwere na akwɔmɔng ni kubat iwɔp e, in hwet ni bɔk wu.

Currently Selected:

2 BaKorinti 11: IbaasNT

Highlight

Copy

Compare