2 SLATEN 3
3
Kapitlu 3
Ġoram sultan ta’ Iżrael
1Ġoram bin Aħab beda jsaltan fuq Iżrael f’Samarija fis-sena tmintax ta’ Ġosafat, sultan ta’ Ġuda; u baqa’ jsaltan tnax-il sena. 2U għamel il-ħażin f’għajnejn il-Mulej, imma mhux daqs missieru u ommu, għax hu qered il-plier ta’ Bagħal, li kien waqqaf missieru. 3Imma baqa’ marbut mad-dnubiet ta’ Ġerobogħam bin Nebat, li fihom kien waqqa’ lil Iżrael; baqa’ ma warrabx minnhom.
4U Mesa, sultan ta’ Mowab, kien irabbi l-bhejjem; u kien iħallas lis-sultan ta’ Iżrael it-tribut ta’ mitt elf ħaruf u s-suf ta’ mitt elf muntun. 5U ġara li meta miet Aħab, is-sultan ta’ Mowab kisirha mas-sultan ta’ Iżrael. 6Għalhekk dakinhar is-sultan Ġoram ħareġ mis-Samarija, u għadd lil Iżrael kollu.#1 Slat 22. 7U qabad u bagħat jgħid lil Ġosafat, sultan ta’ Ġuda, u qallu: “Is-sultan ta’ Mowab kisirha miegħi: tiġi miegħi u naħbtu għal Mowab?” U dak wieġbu: “Nitla’! Ikun minni li jkun minnek, mill-poplu tiegħi li jkun mill-poplu tiegħek, miż-żwiemel tiegħi li jkun miż-żwiemel tiegħek.”#1 Slat 22,4. 8U staqsieh: “Minn liema triq nitilgħu?” U wieġbu: “Mit-triq tad-deżert ta’ Edom.”
9U telqu s-sultan ta’ Iżrael u s-sultan ta’ Ġuda u s-sultan ta’ Edom. Wara li kienu ilhom miexja sebat ijiem, naqashom l-ilma għall-eżerċtu u l-bhejjem li kellhom magħhom. 10U s-sultan ta’ Iżrael qal: “Jaħasra għalina! Jaqaw il-Mulej sejjaħ lil dawn it-tliet slaten biex jerħihom f’idejn Mowab?” 11U Ġosafat qallu: “Ma hawnx xi profeta tal-Mulej hawnhekk, biex nistħarrġu lill-Mulej permezz tiegħu?” U wieħed mill-qaddejja tas-sultan ta’ Iżrael wieġeb u qal: “Hawn il-profeta Eliżew bin Safat, li kien isawwab l-ilma fuq idejn Elija.”#1 Slat 22,11. 12U Ġosafat qal: “Għandu l-kelma tal-Mulej.” U niżlu għandu s-sultan ta’ Iżrael, Ġosafat, u s-sultan ta’ Edom.#1 Slat 18,15.
13U Eliżew qal lis-sultan ta’ Iżrael: “X’għandna x’naqsmu bejnietna, jien u int? Mur għand il-profeti ta’ missierek, u l-profeti ta’ ommok.” U s-sultan ta’ Iżrael qallu: “Le! Għala l-Mulej sejjaħ lil dawn it-tliet slaten? Biex jerħihom f’idejn Mowab?” 14U Eliżew wieġeb: “Daqs kemm hu ħaj il-Mulej tal-eżerċti li jien qiegħed naqdi, li ma kontx nirrispetta lil Ġosafat, sultan ta’ Ġuda, ma kontx nagħti kasek, u lanqas biss inħares lejk. 15U issa ġibuli min idoqq l-arpa.”
Kif kien id-daqqaq idoqq l-arpa, ġara li niżlet id il-Mulej fuq Eliżew.#1 Sam 10,6. 16U dan qal: “Dan jgħid il-Mulej: ‘Agħmel f’dan il-wied ġwiebi fuq ġwiebi.’ 17Għax dan jgħid il-Mulej: ‘Ma tarawx riħ, u ma tarawx xita; imma dan il-wied ifur bl-ilma, u tixorbu intom, l-imrieħel u l-bhejjem tagħkom.’ 18Iżda din ħaġa żgħira f’għajnejn il-Mulej; għad jerħi f’idejkom lil Mowab. 19U intom iġġarrfu l-bliet kollha bis-swar, u l-aħjar bliet, u tqaċċtu s-siġar kollha tal-frott, u ssoddu l-għejun kollha, u tħassru bil-ġebel ir-raba’ tajjeb kollu.”#Dt 20,19. 20U filgħodu, f’ħin l-offerta tas-sagrifiċċju, beda ġej l-ilma mit-triq ta’ Edom, u l-art imtliet kollha bl-ilma.
21U l-Mowabin ilkoll semgħu li s-slaten telgħu jaħbtu għalihom, u nġemgħu bin-nies kollha kapaċi jitħażżmu, u oħrajn magħhom, u marru qagħdu jistennewhom fuq il-fruntiera. 22U bakkru kmieni, u malli x-xemx bdiet tiddi fuq l-ilma, il-Mowabin raw quddiemhom l-ilma aħmar bħad-demm#3,22: L-ilma aħmar bħad-demm: minħabba l-ħamrija ħamra f’dawk l-inħawi minn hawn l-isem ta’ Edom, aħmar: Ġen 25,25-30.. 23U qalu: “Dan demm! Żgur li s-slaten tlewmu bejniethom, u tqatlu, u darbu lil xulxin; mela issa għall-priża, Mowabin!” 24U rħewlha lejn il-kamp ta’ Iżrael; u dawn ħarbu minn quddiemhom. U l-Iżraelin baqgħu sejrin jidorbu lill-Mowabin. 25Ġarrfu l-ibliet, u fuq kull biċċa raba’ tajba waddbu l-ħaġar, kull wieħed waħda, sa ma mlewhom, u saddew l-għejun kollha tal-ilma, u qaċċtu kull siġra tal-frott. Kien baqa’ biss il-ħitan tal-ġebel ta’ Kirħarexet; u dawruha l-arċieri, u ħabtu għaliha.#Ġob 5,23.
26Meta s-sultan ta’ Mowab ra li ma kienx jiflaħ għat-taqbida, ħa miegħu seba’ mitt raġel bix-xabla f’idejhom biex jiftaħ triq għal quddiem is-sultan ta’ Edom, imma ma rnexxilhomx. 27U qabad lil ibnu l-kbir, li kellu jsaltan floku, u offrieh sagrifiċċju tal-ħruq fuq is-sur; u xegħlet qilla kbira għal Iżrael#3,27: Xegħlet qilla kbira għal Iżrael: Is-sagrifiċċju ta’ bin is-sultan ta’ Mowab sewa biex xegħel il-qilla tal-Mowabin kontra Iżrael. Is-sagrifiċċju ta’ wlied f’xi kriżi nazzjonali ma kienx rari f’dak iż-żmien.; u dawn tbiegħdu minnu u reġgħu lura lejn arthom.#Mħ 11,30-31.
Currently Selected:
2 SLATEN 3: MB20
Highlight
Share
Copy
Want to have your highlights saved across all your devices? Sign up or sign in
Maltese DC Bible © Malta Bible Society, 2020.