John 21

1Óóki. Ánnika póóhsapoohtsika Jesus sotámaistamatsoohsatsiiwa ománikapiimiksi. Omiima ómahksikimi Tiberias itáístamatsoohsatsiiwaiksi. Ánnohka áámoyayii ákitsinikatoohpa. 2Óóki. Omáa Simon Peter ki omáa Thomas, ánnahkaoʼka máttanistawa niistsími, ki omáa Nathanael, ánnahkaoʼka annaahka iihtóʼtoowahka omiima Cana, omii istakaipisskoi Galilee. Óóki, ki omííksi Zebedee ohkóíksi, nátsitapiiyi, ki omííksi mattsistsítapiiksi Jesus omáttanikapiimaiksi. Itohkánaiʼtómanistóoyaawa.

3Óóki. Simon Peter itanístsiiwa omiiksi “Niistówa tákotoomiihka.” Otsítanikkaiksi, “Tákohpoʼkioohpinnaan.” Óóki. Sotámomatapóoyaawa. Sotámsapáakáopiiyaawa ááhkioohsaʼtsisi. Sotámipannomiihkaayaawa. Mátsikakohkoomiihkáawaiksi.

4Kii, ki áóʼmatapsopoyinakowa. Kii óómaoʼka Jesus, ítssáípoyiwa ómahksikimi. Ki omátonooka ománikapiimiksi. 5Jesus sotámanistsiiwáíksi, “Óki napíwaka. Kimátohkoomiihkaahpoaawa, ánnia?” Itaniiyaawa, “Áa.” 6Itanístsiiwaiksi, “Óóki. Áámoya nitʼtóóhtsi kitááhkiohsaʼtsiimoaawa sotámitssoyaapiksik kitssksimatákssini. Kitákitohkoomiihkaahpoaawa.” Óóki. Ánniayi sotámanisttsiiyaawa. Itsíítaʼpohkoomiihkaayaawa. Mátsikakawaatstóómaaiksaawa otssksimátakssoaawayi. Iikómaakayimmi otomííhkaanoawaiksi.

7Kii ki Jesus amíi otákomimmai ománikapiimi áánistsiiyinai anniiska Peteriska, “Ánnaoʼka kitsínaaiminnoona.” Ki omáa Simon Peter, káksapskaohsatom ómohtapoʼtakihpistsi. Ki otáʼyoohtsissi sotámsapskaohsatoma otsáotatsiisokaʼsimi. Ki sotámssáyohpaʼwaaniwa. 8Ki omííksi Jesus omáttanikapiimiksi, otsíʼnakaahkiohsaʼtsiimoaawayi sotámohtsitopitsaahkiohsiiyaawa. Mátsipiáowaatsi. Kaaksóókskaikiipippoohkata. Itopítsisskapatomiaawa omii isksimatákssini. Iihtoíʼtsiiwa mamííksi.

9Ki áóʼpitsissowóóyaawa. Ki ánnima issowóóhtsi itsinímiaawa atotáána. Iihtotótoohpa ksinitsíístsi. Itssóyaihtsiiyaawa mamííyaawa. Ki napayííniaawa. 10Jesus itanístsiiwaiksi, “Ásaistsipihtakika amóksiska kitsíímiihkatawaawaiksi.”

11Simon Peter sotámotoisapáakáopiiwa ááhkiohsaʼtsisi. Omii issksimátakssini iihtáómiihkaaoʼpi sotámsaʼkapsskapatomayi. Kii mátsikahkapiʼkááwaatsiksi isskimatákssini kííwa otákayiʼpi otomííhkaanoaawaiksi. Niitsímmiaiksi kipíppiaiksi nisitsíppi niikópotsii (153).

12Jesus itanístsiiwaiksi, “Ásaistooka. Áksikskanóyoʼpa.” Óóki. Omiiksi Jesus ománikapiimiksi mátsitsspisstsiihpa mááhksstsaawanikki, “Takáa kiistówa?” Iihkaaáíssksinimiaawa otámssayi otsínaaimoaawayi. 13Jesus sotámotooʼtakiwa napayíi. Iihtsíísoyiiwaiksi. Ánnimayi niʼtóyi máttsitsiisoyiiwaiksi mamííyi.

14Óóki. Ki ánnihkaoʼka iihtsóókskayi Jesus otsítaistamatsoohsatahpi ománikapiimiksi otáíʼssksipoaoohsi.

15Óóki. Otáíʼksistsikskanoissaawa Jesus itssítsipssatsiiwa Simon Peter. Ánniskaoʼkinai Joannas ohkóyi. Jesus áánistsiiwayi, “Óóki Simon, kikátaiʼtóʼtsitskakomimmokihpa annííksi nanistákomimmiyihpi.” Otáánikkayi, “Áa nitsínaaimi. Kítssksiniihpa kitákomimmohsi.” Jesus itanístsiiwayi, “Ki omííksi nitsíímaiʼtookiksi matápiiksi ánni íímahkihkinaipokaai, ánniai anistotóítsikatsisaawa.”

16Óóki. Ki máttsistaaʼnistsiiwayi, “Simon, kikátaaʼkomimmokihpa?” Omáttsitanikkayi, “Áa nitsínaaimi. Kítssksiniihpa kitákomimmohsi.” Jesus itanístsiiwáyi, “Omííksi nitsíímaiʼtookiksi ánni íímahkihkinai anistotóítsikatsisaawa.”

17Óóki. Ánnika ómohtsookskaahpi Jesus áánistsiiwa Peter, “Simon, kikátaʼkomimmokihpa?”

Kii ki Peter iihtakánawa otsóókskawaniyissi Jesusi, “Kikátaaʼkomimmokihpa?” Itanííwa “Nitsínaaimi, kitsíʼtsinissksiniihpa. Kítssksiniihpa kitákomimmohsi.” Jesus itanístsiiwayi, “Anistotóítsikatsisa nitsíímaiʼtookiksi ánni íímahkihkinai.

18Kitákanisto niitsííyi. Kiistówa kitsítsaakiaiʼnaksstspi kitáksíkaiksistsopoatsistotoohsi kii kitákomaiʼpssiimi, ki kitsítapáakoohpi kitákitapoo. Kii aomahkítapiiniki kitákitsissikinsstsaaki. Ákitsissksipiihpa koʼtsíístsi Ákitsstsiihpa kitákíkaiksistsopoatsistotooki. Kitákitapípiookoo kítsawaisstaahpi kááhkitapoohsi.” 19(Óóki. Áámohka otaníssi Jesus iihtsíʼpoyiwa omíi Peter manistáksiʼnihpiayi. Ákitoʼtoowa itáksiʼnitahpi. Otsíʼnssini ákohtsitaistamatstohkatom manístsspsspi Áʼpistotookiiyi.)

Óóki. Jesus ináíʼtanistsiiwayi, “Tsapóót niistówa!”

20Óóki. Peter sotámoʼtaksipoyiwa, sotáminoyiiwa anniska omáa Jesus otákomimmai ománikapiimi otohpóʼkiawaawahkaahsinai. (Ánnahkaoʼka annaahka itsitápitsstópiiwa Jesusi anniihka otsítotáksoyihpiaawayihka. Ánnahkaoʼka anniihka itanístsiiwa Jesus anniihka otsítotaksoyihpiaawayihka, “Nitsinaaimi takáa kitákomatskaoka?”)

21Óóki. Omáa Peter itsinóyiiwa amoska Jesus otákomimmayi ománikapiimi. Itanístsiiwa Jesus, “Nitsínaaimi. Tsáa ákanistohkoyimma óóma?”

22Jesus itanííwa, “Íímakstatainiki mááhkitsakiaipaitapiiʼssi niistówa aiʼsskóʼtooiniki, kiistówa kimátsitoʼtohkoyikiihpa manistákohkoyiʼpi. Kákohtsapóót niistówa.” 23Óóki. Ánnihkayi sotámanistsipahtsoohtsimaʼsiwa Jesus mááhkanissi ótsawaaksíʼnssayi omíiska ómohtsiʼpoyiihpiska ománikapiimiska. Akáítapiiyi áomaiʼtakiiksi iihtsimátomiksi. Kii áámohka mátoohkaniiwaatsi Jesus. Káákaniiwa, “Íímakstatainiki mááhkitsaakiaipaitapiiʼssi aiʼsskóʼtooiniki, kimáátsitoʼtohkoyikiihpa manistákohkoyiʼpi.” 24Óóki. Omííska omáa Jesus ómohtáíʼpoyiihpiska ománikapiimiska, ánniskaoʼkinai áítsinikatominayi ámostska. Ánnoohk áámaoʼka anniihka otáítsinikatoohpi. Issksinííhpa otómanaʼssi áámostsi osínaakssistsi. 25Óóki. Iikáttakawoyi Jesus otánisttsiihpistsi. Ikkámssaakohkanaitsinikatoohpi otánisttsiihpistsi mátakohkottohkanaitsinikatoʼpa.

Currently Selected:

John 21: BLA

Highlight

Copy

Compare