John 20

1Óóki. Ánnika istsitsáíksistsikoyi amo niʼtatóyiiksistsikoi niitáʼpikskanaotonniwa sákiaissksíinattsiwa. Ki ánnikayii Mary Magdalene sotámitoʼtoowa omiim Jesus itsípststsaahpi. Ki náíksikskaihtsiiwa omii ómahkoohkotooki iihtsóʼkiihpi Jesus itsípststsaahpi. 2Áíʼnimayí ki óómahkaoʼka sotámomatapokskaʼsiwa. Ki áíʼtoʼtóowa amííksi Peteri ki omíisk omáa Jesus otákomimmaisk ománikapiimiska. Ki ááʼnistsiiwa amóksi nátsitapiiksi, “Ayíístapipohtoohpa ostómi kitsínaaiminnoona. Mátattsitsstsiiwaatsi omiim itsípsststsaahpi. Mátssksiniihpinnaana itapípohtoohpi ááhkitsstsaahpi.”

3Ki óómikskaoʼkiaawa Peter ki omii Jesus omáttanikapiimi, sotámomatapoksaʼsiiyaawa. Áyaakitapooyaawa omiim Jesus itsípststsaahpi. 4Sotámayákitapokskaʼsiiyi áámokska nátsitapiikska. Ki ánniayii omáttanikapiimi omáa Jesus itsístapissokskaʼsátsiiwa amíi Peter. Ki oomakaoʼka íítomitoʼtoowa omii Jesus itsípststsaahpi. 5Sotámotahsohpaʼwaaniwa ki itsípstssapiwa. Ki áíʼnima omiistsi innáíʼpisstsi iihtsisóómooniihpi Jesus ostómi sákiitaisstsiyaawa. Sotámsaitsipiima.

6Óóki. Simon Peter noohkáttsitoʼtoowa, póʼkioʼtóowa. Sotámitsipiima; sotámitsinima omííistsi innáíʼpisstsi otsitáísstsissaawa. 7Ki amoya iihtáyihkinipistahpi áyakiitaisstsiiwa. Mátohpitsstsiiwa omíístsi innáíʼpisstsi. Iimóóniihpiaawa.

8Ki náínowaohkattsitaipííminayi omáa Jesus omáttanikapiimi. Ánniskaoʼkinai íítomitoʼtooyi omii Jesus itsípststsaahpi. Ki áíʼnima manistsííhpi. Ki ánniayii iihtomáíʼtakiwa. 9(Óóki. Ánnihka iimíísawaotsistapiʼtsimiaawa naatóísínakiaʼtsisi niitsíkayissínaaihpi omáa Jesus áaksstsinaiʼssksipoaoowa.)

10Óóki. Ki anniayii amóksi nátsitapiiksi, Jesus ománikapiimiksi itániitahkayiiyaawa.

11Ki omáa Mary Magdalene sákiitsoohkaipoyiwa omiima Jesus itsípstsaahpi. Sákiawasaiʼniwa. Áotahskaohsiwa, áwasaiʼniwa, itsípstssapiwa omiim Jesus itsípststsaahpi. 12Ki ánniksayii áámoksi nátsitapiiksi natoyíítapiiksi sotáminoyiiwáíksi, itsipstáópiiyaiksi omiim Jesus itsípststsaahpi. Áámo itáópiiwa Jesus otsítapohkiihtsiihpi, ki annáa óómi itópiiwa Jesus otsítapíkaihtsiihpi. Ánniksimaoʼkiaawa itáópiiyaawa Jesus itsstsááhpi.

13Óóki. Omáa Mary otáánikkaiksi, “Óki akííyi, tskáa kómohtawasáiʼnihpa?” Itanístsiiwaiksi, “Kii iyíístapipohtoohsi ostómi annaahkayii nitsínaaima, ki nimátssksiniihpa itapípohtoohpi, itsstsááhpi.”

14Kii ki otááʼnissi áámohka itóʼtaksipoyiwa. Ki ánniaoʼkinai itáípoyiiyinai Jesusi. Omáa Mary itsinóyiiwáyi. Ki mátonoyiiwaatsayi. 15Otsítanikka omíí Jesusi, “Omáa akííyi. Tskáa kómohtawaasaiʼnihpa? Takáa kitáʼpaissammawa?” Kii ki sokstááwa amíi Jesus ááhkamíínayi omííkska áótoitsikatsiiksi sapipómmaaniksi miistsííksi. Áánistsiiwáyi, “Ikkamístapipohtomiiniki oostómi noohkaníkkita tsimáa kitsítsstsááwa. Niistówa nitákotooʼtoawa.” 16Omáa Jesus itanííwa, “Mary.” Ki omáa Mary sotámattsiitáákitapoʼtaksipoyiwáyi. Áánistsiiwayi, “Rabbi.” Amoohka “Rabbi” otáwattsiʼpoahsoaawa anistápanioʼsina “Áíssksinimaatstohki.” Amííksi Jews otsíʼpoahsoaayaawa. 17Jesus itanístsiiwáyi “Pináttsinnokit. Nimátomaitapsspommóohpa nínna. Istapóóta nómohpapiʼihpiksi náátsikopotsiiksi. Anistsísaawa nitákitapsspommoohsi annááhka nínnaahka, annááhka kínnoaawahka. Tákitapoo annááhka nitáwaatsimoihkaamawahka, Áʼpistotookiwahka, annááhka kinóóhkattawaatsímoihkaamoaawahka.”

18Kii ki Mary Magdalene ki áíʼtapoowa omííksi Jesus ománikapiimiksi. Sotámanistsiiwaiksi, “Nitsinoáwa kitsínaaiminnoona.” Ki ááʼnistsiiwaiksi otááníyihpistsi.

19Óóki. Natoyííksistsikoi koʼkói ki ánníksaoʼkiaawa omííksi Jesus ománikapiimiksi itsípstáópiiyaawa náápioyii. Íkstonnoyiiyaawa omííksi istóʼtotamaʼpssiiksi Jews. Ki ánnihkayii niitáʼpiyoʼkimiaawa omiistsi kitsímistsi. Óóki. Ki ánnika Jesus itsitóʼtóowa ítsspiipoyiiwaiksi. Itáíksimatsimmiiwáíksi. Áániiwa, “Kítohkotohpoaawa iʼtáámaʼpii.” 20Ki otáíʼksistanistoohs i itáístamatsiiwáíksi oʼtsíístsi, ki áámo isttsipóóhtsi ostómi iitssímahpi. Ki omííksi iihtsítaamssiiaawa otsinóahsaawa otsínaaimoaawayi.

21Óóki. Jesus máttsitsiitáaksiksimatsimmiiwaiksi. Ki itanístsiiwáíksi, “Kítohkotohpoaawa iʼtáámaʼpii. Nanistóʼtsskoyihpi nínna, kitáítotoisapsstsimaahkatohpoaawa kááhkaʼpoohsooayi.” 22Ki otáíʼksistanistoohsi áámohka sotámitápsiitamiiwaiksi, ki itanístsiiwáíksi “Maʼtooka natowóttaka. 23Ikkámssiinomoainiki matápiiksi otokáʼpipaitapiiʼsoaawaistsi ákitssiinomoayaawaistsi, ki ikkámssaisiinomoainikiawaistsi mátakssiinomoayaawaistsi.” 24Óóki. Omáa Thomas, ánnikskaoʼki omííksiska nátsikopotsiikska. Máttanistawa niistsími. Mátsitohpokaʼpaissiimiwa omííksi nátsikopotsiiksi anniihka otáíʼtoʼtoohsi Jesusi. 25Ki anniayi Thomas otáánikka omííksi Jesus omáttanikapiimiksi, “Tsinoánnaana kitsínaaiminnoona.” Ki itanístsiiwaiksi, “Kimátakomaiʼtoohpoaawa. Niistówa ikkamínimminiki iksíniminiki oʼtsistsi itsstáíhpi, ikkamíksiinimminiki omii isttsipóóhtsi ostómi itssímahpi kitákitomaiʼtoohpoaawa.”

26Óóki. Ánnika mattatóyiksistsikoyika ki ánnikskaoʼkiaiksi Jesus ománikapiimiksi itsipstáópiiyaiksi. Ki Thomas itsinópiiwaiksi. Náítaʼpioʼkiihpiaawa omíístsi kitsímistsi. Kii Jesus sotámitsipiima; sotámiksimatsimmiwaiksi. Íítsspiipoyiiwaiksi. Itanístsiiwaiksi, “Kítohkotohpoaawa iʼtáámaʼpii.” 27Ináíʼtanistsiiwa omíi Thomas, “Póóhsapikinsstsaakit. Issáʼtsit áámostsi noʼtsíístsi. Istápikinsstsaakit áámo isttsipóóhtsi noostómi, nitsítssimokooyi. Pináttsayiʼtakit. Amáíʼtakit.” 28Sotámaniiwa Thomas, “Kiistówa kitsínaaimato. Kiistówa ánnahkaoʼka nanistáínihkatawahka Áʼpistotooki.”

29Jesus itanístsiiwayi, “Kímohtomaiʼtaki takaa kitsinóókssi. Ikákiʼtaamssi omáa matápiiwa iimáíʼtakiwa kííwa nítsayinóyihpi.”

30Óóki. Ánnohka áámo sináákssini kitáóksstoohpoaawayi ánnohka mátsitohkanaitsinikatoohpi Jesus otsítsipisataistamatstohkihpistsi otáóhpokóomahsi ománikapiimiksi. Ikákawoi kátaiʼtssínaaihpistsi. 31Amóstsi itssínaihpistsi atsiníkssiistsi, iihtssínaiʼpiaawa kiisṯowaawayi ánnaka áókstakiwaka, kááhkohtsitomaiʼtoahsoayi Jesus ánniskaoʼkinayi annááhka Áʼpistotookiwa anniiska ómohtohkoikiihpiska, ki ánniskaoʼkinai annaahka Áʼpistotookiwa anniisk ohkóyiska. Ikkamómaiʼtakiinoainiki Jesus kítohkokkoaawa kaahkaissksipaitapiiʼssoaayi.

Currently Selected:

John 20: BLA

Highlight

Copy

Compare