Rimluğo 9
9
Buxačuğon İçin çureśi c'ək'p'iyorox
1 Xrist'osi laxi yaq'en tağalt'oğoxunzu zu, bezi uk'ala əyitmoğoyal bito serine, əfçi əyit nextezu zu. Q'erəz cürə bakesal batenekon, şot'o görə ki, zast'a bakala, za yaq' ak'est'ala Ǐvel Urufi běšez coğab tast'a zu bezi ǰomoxun c'eğala hər əyitə görə. 2Və̌x şo uk'az ki, bezi boş bakala dərd kalane, q'ubarezbsa zu bez boş! 3Axıri het'u görəq'an metər baki? Avabakayiz ki, zu q'arğişi q'ončux baki Xrist'osaxun ə̌xil bitit'oğoxun bakayiz bezi azuk'axun bakala viçimoğon, bezi p'iyaxun bakalt'oğon xeyir ak'alt'un - zu irəziz bakon! 4Bozu zu mot'o israilluğoynak'! Bezi c'ək'p'i azuk'nan pi ğarluğane ext'i şot'oğo Buxačuğon, İzi kalaluğa ak'est'i irəziluğe ğaç̌eśi şot'oğoxun, k'anune tadi. Mani azuk'ene pes bakon ki, Buxačuğon yax İçu q'ulluğbsuni yönəne ak'est'e? Ama şot'oğo ak'est'ene! Mani azuk'ene pes bakon ki, Buxačuğon yax əyite tade? #9:3-4 C'eys. 4:22; 16:10; 24:1-17; 32:32; K'an. 5:1-22; 6:3; 2 Şam. 7:12-16 5Avraham, İsaak' saal İak'ov k'inək' bavoox bakala sa azuk'e mo, me dünyəne sa amdar k'inək' hari Xrist'os İçal me azuk'axune c'ere. Həmişəluğ alxışq'anbaki beşi Buxačux Bakalt'u! Ammen.
6Ama p'urumal mo şo upsun tene ki, Buxačuğoy tadi əyit hari bex tene c'eri. Morox şot'o görəne baksa ki, İsrailaxun törəyinşaksuna görə "israillu" baksun q'a İsrailə əyit tadeśi t'e azuk'axun baksun sa şey tene. 7Hetər ki, Avrahamaxun baki əyloğoy bito sa teney, şot'oxun baki əyloğoy bitot'uxun tene törəyinşaki içu əyit tadeśi t'e nəsil. K'ə pey Buxačuğon? "İsaak'axun törəyinşakale Bezi va əyit tadi t'e nəsil". #9:7 Burq. 21:12; Əbr. 11:18 8Moval şo upsune ki, Buxačuğon Avrahamaxun törəyinşakit'oğoy bitot'u tene İzi əylux k'inək' aksa. Əyit tadat'an şi s'iya duğenesa, saycə şot'oxun əmələ hariyoroxe Buxačuğoy əylux hesabbaksa. 9İzi tadi əyit isə metəre bake: "Bezi pi vədine eğoz, Saray q'ujelal sa ğar əyel bakale". #9:9 Burq. 18:10,14
10Saycə mo tene ki. Rebek'a ext'en: beşi bitot'ay bava hesabbakala İsaak'axuney şot'ay tapane bakala əyloğoy p'ǒğə̌l. 11-12Ama əylux hələ hari nanaxun bakamin Buxačuğon şot'o pine ki, "kalo mis'ik't'ay əyiten tağala bakale". #9:11-12 Burq. 25:23 Het'u görəne metər pi? Axıri metər ext'at'an, me əyloğon hələ Buxačuğoy piyes şaat' nəəl pis ak'eğala hik'k'al bitet'un. Şot'o görə ki, Buxačuğoy kiyele bito, saycə Şot'ine ava şu c'ək'k'ale! C'ək'eśiyorox isə içoğoy biq'i əşlə görə təə, şot'oğo C'ək'p'it'ay İzi çuresuna görət'un c'ək'esa. 13Ǐvel Śame boşal bune me ga: "Esava t'ǒǒxbi İak'ovaz c'ək'p'i Zu". #9:13 Mal. 1:2-3
14İsə mo k'ə upsune baki? Metəre c'eysa ki, Buxačuğon düz əş tene biq'sa? Bakes batenekon! 15K'ə pey Buxačuğon Moiseya? "Mat'aynak' ük' bok'ospsun çureğayiz, şot'aynak'ez ük' bok'ospsa, mat'u gorox eysun çureğayiz, şot'oz gorox eysa". #9:15 C'eys. 33:19
16Moval şo upsune baksa ki, nə insani çuresuna görə tene, nəəl şot'ay biq'ala əşlə görə. Buxačuğon k'ə tanest'asa İzi ük'bok'al baksuna görəne tast'a. 17Ǐvel Śame boş Buxačuğon faraona metəre nex: «Va ěqevk'ez ki, Bezi zora ak'est'es bakaz, Bezi s'iyal dirist' dünyəne t'ap'eğane». #9:17 C'eys. 9:16 18Hamemiin ayanksa ki, Buxačuğon çureğayin amdareynak' ük'e bok'osp'on, çureğayin inadkərbi izi ǰomoy tüşen tağalt'oğoxune bon.
19İsə qaybaki pesal banankon ki, t'e vədə beşi taxsır hik'ə? Buxačuğon "metərq'an baki" pit'uxun oşa şin k'ə bese bakon ki? 20Ama hun şunu ki, ǰomo ə̌mbi Buxačuğo əyit uk'avax? Amdarnu arśa vi amdarluğa ba. Ak'enu sal q'aven hayzeri içu düzbi ust'a uk'ane ki, za het'u görən me cürə düzbe? #9:20 İsa. 29:16; 45:9 21Ust'an içine ava - çureğon hər ği əşeğala bəzəysuz q'ave düzbon, çureğon q'onaği běš laxala bəzəylu q'ave düzbon. #9:21 Yer. 18:6 22Bərkə Buxačuğon me "bəzəysuz q'avurxo" düzbene ki, İzi əcuğoy q'a zore k'ə baksuna ak'est'es bakane? Ama portp'ala Buxačuxe Şo. Bərkə me "xoxbaki tağala q'avurxo" tadeśi vaxt' 23-24"bəzəylu q'avurxo" düzbi ust'ay hetər sa s'iye q'ončux baksuna ç̌oyel c'evkseynak'e tadeśe? İzi ük'el bask'it'oğoxun İzi şaat'luğa kamtenebon Buxačuğon, ěqevk'i ən hörmətlu galane arśevk'on şot'oğo. Yanyan me "bəzəylu q'avurxo" - Buxačuğon yax saycə iudeyxoxun təə, q'erəz azuk'xoxunal c'ək'p'ene ki, Şot'ay Şu baksuna car saken. 25Hosiya xavareçalen pi k'inək':
"Zu Bezi azuk'axun nu bakalt'oğo <Bezi azuk'> pi çalxoz,
Bezi piin aksun nu çureğalt'oğo eçeri Bezi piin işiğ booz." #9:25 Hos. 2:23
26Saal:
"<Və̌n Bezi c'ək'p'i azuk'axun tenan> pi gala <həmişə dirist' bakala Buxačuğoy əylux> pi çalxalt'un və̌x". #9:26 Hos. 1:10
27Xavareçal İsayan isə metəre nex israilluğoy barada:
"Lap dənizi börine bakala q'ume hamal bakayin israilluğoy say,
Şot'oğoxun p'urumal sa pay çark'eğale.
28Male mande, zap'k'ale me dünyənen izi cazina axıral śirik',
Buxačuğon şot'o izi pula qaypsa tene bark'al." #9:27-28 İsa. 10:22-23
29İsaya xavareçalen saturběš ak'i piyoroxe mo:
"Q'oşuni Q'ončuğon beşi boşt'an sa hemarat'u dirist' nu efi bakiyniy,
İsə Sodoma q'a Gomorrina əfçibakit'oğollarik' əfçibaki taśeyaniy." #9:29 İsa. 1:9; Burq. 19:1-29
İsrailluğon Buxačuğoy piyes düzgün ak'eseynak' laxeśi yaq'e k'ə baksuna nu q'amişaksun
30İsə běğanan axır k'ə baki: Buxačuğoy piyes düzgün ak'eseynak' nu çalışakalorox İsus Xrist'osa věbaki Şot'o Çark'est'al k'inək' q'abulbsunen hari Buxačuğoy piyes düzgün ak'eśit'oğoxunt'un baki. 31Buxačuğoy piyes düzgün ak'esuni qoşt'an t'it'eri k'anuni boş śameśit'oğo bitova əməlbala israilluğon isə hik'ə bayt'un, p'urumal içoğo təmizə c'evk'es tet'un baki. 32Het'u görə? Şot'o görə ki, içoğoy çark'esuna Xrist'osa věbaksunast'a təə, Moiseyen tadi k'anuna əməlbsunast'at'un ak'i şot'oğon. Mot'o görəl bit'unti, içoğoy tur ǰěna lamandi bitala k'inək'. 33Ǐvel Śame boş bakalt'ullarik':
"Mone, ǰěz laxi Zu Siona, #9:33 Sion - Yerusalim şəhər Sion buruğoy loxole, şot'o görəl Sion Yerusalima tadeśi s'iyurxoxun soğoney.
Şot'o içoğoy tur lamandi bitalorox bakale;
Q'alaz zapi Zu miya,
T'e q'alinaxun biti śareğalorox bakale.
Ama Şot'o věbakala şu bune, ç̌omə̌yin tene bakal". #9:32-33 İsa. 8:14; 28:16; 1 P'y. 2:6-8
Currently Selected:
Rimluğo 9: udi
Highlight
Copy
Compare
Share
Want to have your highlights saved across all your devices? Sign up or sign in
© Translation Services International Ltd.