Rimluğo 8
8
Buxačuğoy əylux k'aleğalt'oğoxun bakanan
1İsə mone, İsus Xrist'osa Çark'est'al k'inək' q'abulbi Şot'ay laxi yaq'en tağalt'oğoynak' taxsırkər s'iyen divanbaksuni q'ǐ butene. 2Axıri İsus Xrist'osa q'abulbsunen yəşəyinş tadala Ǐvel Urufen uk'alt'oğonan k'anun avabaki və̌n, Şot'inal efi boş muğurbakala günaxa bask'est'i şot'o izi əyitə upsa nu barst'unen və̌x bisunaxune çark'est'i. 3Moiseyen tadi k'anunen bes tene baki mot'o, şot'o görə ki, beşi boş arśi günaxi běš acızyan mandi yan. Buxačuğonal İzi Ğarane yaq'abi yaynak', Şot'o adi sa amdar k'inək'e yaq'abi ki, beşi günaxkər bədənə oşq'ar t'e bədənə q'urbanluğ bi beşi günaxxoq'an sakərəmluğ os'k'i taşeri. Metərluğen günaxi tumane əfçibi Buxačuğon. 4Mot'o bine ki, haq'q' gala tadeśi me k'anuna tam əməlbi k'inək' baken, beşi boş arśi günaxi ǰomon təə, yax tadeśi Ǐvel Urufi əyiten tağen.
5İçoğoy boş arśi günaxi kiyel ət't'əc bakalt'oğoynak' samci gala içoğoy bədənen çureğalt'u haq'es baksune, Ǐvel Urufaxun haq'it'oğoynak' isə me Urufi əyitəxun nu c'eri Şot'ay ak'est'ala yaq'en taysun. 6Vi boş arśi günaxi uk'alt'u bsunen bisunaç tağala yaq'an c'ək'p'i baksa hun, va tadeśi Ǐvel Urufi ak'est'ala yaq'en taysunen isə yəşəyinş q'a dincluğen q'azayinşi baksa. 7İzi boş arśi günaxi ǰomon tağala amdar Buxačuğoxun tərs biti amdare. Buxačuğoy laxi k'anuna nu əməlbalone şo, manu ki, sal şot'o əməlbsun izi kiyexun ayaltenesa. 8İzi çureğalt'oğo Buxačuğoy çureğalt'oğoxun üst'ün laxalo Buxačuğoy piyes şaat' ak'eśes batenekon.
9Ama və̌st'a Buxačuğoy Uruf bunesa, mo şo upsune ki, və̌n ene efi boş arśi günaxi ǰomon təə, və̌st'a bakala me Urufi əyitennan taysa. İçust'a Xrist'osi Urufaxun nu bakalt'ust'a içu Xrist'osa ğaç̌k'ala hik'k'al butet'ux. 10Xrist'os izi ük'e bakalone dirist' manst'a, efi günaxi kiyel ət't'əc bakala bədən p'uri taalğayin, və̌x tadeśi Urufen və̌x yəşəyinşest'ale, şot'o görə ki, Buxačuğoy piyes düzgün ak'eśiyonan baki və̌n. 11Xrist'osa p'uri ganuxun Běyinbit'ay Uruf efi boşesa, İsusi p'uri bədənə qaydi yəşəyinş Tadit'in efi p'uri tağala bədənəl və̌st'a bakala Urufen diriləyinşi bakale.
12İsə bezi upsun çureğalo hik'ə: ay bezi xunçi-viçimux, efi boş arśi günaxi ǰomon taysuna, şot'ay uk'alt'u bsuna məjbur tenan. 13Günaxi ǰomon tağaynan əfçibaki tağalnan, ama Urufi əyiten taśi günax əşur biq'sunaxun kul haq'aynan, Şot'ay kiin günaxi tuma əfçibi yəşəyinş q'azayinşi bakalnan. 14Şot'o görə ki, Buxačuğoy Urufen taşala yaq'a c'ək'p'it'oğo Buxačuğoy əyluxt'un nex. 15Buxačuğon me Urufa şot'o görə tene tade ki, və̌x sa ət't'əc k'inək' əşp'est'i efi pula haq'ane. Və̌x ğarluğa exst'eynak'e tadeśe me Uruf, Şot'ine və̌x Buxačuğo k'alk'at'an "Abba, #8:15 Me əyit arameyi muzin "bava" upsune. ay bezi Bava" pi k'alpest'a. 16Me Urufen uk'alt'u yanal beşi muzin upsunen ak'esest'a ki, yan Buxačuğoy əyluxyan. 17Şot'ay əylux baksun isə şo upsune ki, Buxačuğoy Ğar Xrist'osa koft'alt'oğoxun yaxal kofest'a. Xrist'osi əzyətxo şərik baksun bunesa, Şot'ay kala s'iya şərik baksunal bune.
Buxačuğoxun nəfəs haq'alt'oğoynak' həzirbaki neymət
18Və̌x sa şo uk'az ki, beşi həysət'in zap'k'ala əzyət yaynak' həzirbaki neyməti t'ǒğǒl hik'k'al tene. 19Həysə Buxačuğon yaratmişi me dünyənen içinal ğine bǒq'ə̌le: Buxačuğon İzi əyloğoynak' həzirbi neyməti, şot'oğoy hetər sa s'iye q'ončux baksuni ç̌oyel c'eğala ğinane yaq'běğsa me dünyənen. 20İzi çuresuna görə tene baft'e şo me ğina, Buxačuğone şot'ay kul-tura ğaç̌p'e. #8:20 Burq. 3:17-19 Ğaç̌p'ene ki, oşa sa ği 21şot'oval əfçibaki taysuni běš acız manst'unaxun çark'est'i Buxačuğoy əyloğoynak' həzirbi neymətəxun q'ısmat'p'ane, şot'inal Buxačuğon tades bakala irəətluği k'ə baksuna ak'ane.
22Buxačuğon yaratmişi me dünyəni hələl əzyəti boş baksuna, əyel eçala çuğoy zap'k'ala q'ač'urxoxun zapsuna avayan. 23Ama əzyət zap'k'alo saycə dünyə tene, yanal əzyəti boşyan. Ǐvel Urufaxun haq'i təzə yəşəyinşaxun nübərbiyoroxyan yan, ama p'urumal beşi boş t'e q'ač'a zap'yanne, şot'o görə ki, beşi pulmux yaq'ane. Buxačuğoy əylux baksunen q'azayinşest'alt'oğoy - beşi bədəni loxol kalaluğbala günaxi beşi bədəni loxol ene kalaluğbes nu baksuna, şot'ay sakərəmluğ əfçibaki taysunayan yaq'běğsa yan. 24Buxačuğon yax çark'est'i ğinaxun mağay me umudenyan yəşəyinşbsa yan. Puça nu c'eğala umude me umud, ama şot'ay hari bex c'eysuna hələ beşi piin ak'iteyan pi beşi pul yaq'ane. Axıri ak'it'uxun oşa het'aynak'q'an pul yaq'a baki? 25Ama isə ki, beşi piin nu ak'i t'e ği eyseynak' hələ bune, beşi ük'ə buz k'inək' efi portp'iyan buq'on. 26Beşi mot'oğo bitova portp'es baksunast'a Ǐvel Urufiyal köməy gelene, axıri yan zəifyan, sal afırıpi Buxačuğoxun çuresun lazımbakalt'oğo teyan ava yan. Ama beşi boş bakala Urufaxun c'eğala səsen İçin beşi pes nu bakalt'oğo nexe. 27Bitot'ay ük'ə avabakala Buxačuğonal t'e Urufi muza avane, şot'o görə ki, İzi çuresuna görəne Urufen beşi, yəni Buxačuğon c'ək'p'i İzi bit'oğoy s'iya duği afırıne.
28Yan avayan ki, Buxačuğoxun nəfəs haq'alt'oğoy bel eğalorox bito içoğoy xeyireynak'e eysa, axıri İzi bsun çureğalt'oğo bex p'ap'espseynak'e c'ək'p'e şot'oğo Buxačuğon. 29Hələ şot'oğoy s'i tene buy Buxačuğon şot'oğo çalxat'an, şot'o görə ki, İzi Ğarallarik' bakseynak' c'ək'eśiyoroxe şorox. Buxačuğon şot'oğo saturběš c'ək'p'e ki, İzi Ğareynak' xunçi-viçiq'at'un baki, İzi Ğaral şot'oğoy boş k'ojin kala Ğar. 30Saturběš c'ək'eśiyoroxe hari me s'iyen c'ək'eśit'oğoxun baki, me s'iyen c'ək'eśit'oğoxun baksun isə Buxačuğon təmizə c'evk'it'oğoxun baksun upsune. Me Buxačuğon təmizə c'evk'iyoroxal hari kala s'iye q'ončuxt'un baki.
Xrist'osen yax çuresuni běšinə̌mə hik'k'alen haq'es batenekon
31Ene mot'oxun avuzin k'ə bakale? Buxačux İç beşi tərəf bakit'uxun oşa yax şin k'ə bese bakon? Şuk'k'alen! 32İzi tək sa Ğara yaynak' gele nu ak'i Buxačuğon, Şot'o yax çark'est'eynak' ext'i q'urban k'inək' Tadit'in yax q'erəz k'ə tene tadon? 33Buxačuğon c'ək'p'it'oğo şine hayzeri taxsırkər c'evk'es bakon? Buxačuğon İçin təmizə c'evk'it'oğoynak' 34şine divanbi q'ərar c'evk'es bakon? Şuk'k'alen! P'uri, hələ sa Buxačuğon běyinbiyal eçeri İzi yön tərəf arśest'i İsus Xrist'os İç beşi tərəfe, Şot'ine beşi gala Buxačuğoy t'ǒğǒl ǰomo ə̌mbsa. 35Hik'k'al bayes batenekon beşi q'a Xrist'osi arane, Şot'ay yax çuresuni běšinə̌mə hik'k'alen haq'es batenekon: nə beşi əzyət q'a koruğ zapsunen, nə Şot'o nu çureğalt'oğon yax pul tadi işiğ nu tast'unen, nə beşi busa-xeneza tarapsunen, nə beşi loxol lak'ala şey nu bə̌ğə̌bsunen, nə beşi xatina bafst'unen, nəəl yax biq'i bespsun çureğalorox baksunen. 36Ǐvel Śamen uk'alt'ullarik':
Yan Vi laxi yaq'en taysuna görə beşi elmoğot'un haq'sun çuresa hər ği,
Šampsa taşala sa eğeli loxol běğala k'inək't'un běğsa beş loxol! #8:36 Ǐvel mə̌ğ. 44:22
37Ama yaxun İzi çuresuna nu Kambit'in yax enefsa, yanal hər şeya portp'i beşi bač'ana sal teyan k'os'psa. 38Sa şeyaz ava ki, nə bisunen, nə karxsunen, nə angelxon q'a murdar urufxon, nəəl me dünyənexun nu bakala q'erəz sa zoren, nə ğeyin ğinen, nə oşin ğinen, 39nə göye ç̌oyel bakalt'oğon, nəəl oç̌ali tume bakalt'oğon - me dünyəne hik'k'alen Buxačuğoy çuresuna yaxun kambes batenekon, beşi Q'ončux bakala İsus Xrist'osa yax çalxest'i çuresune me çuresun.
Currently Selected:
Rimluğo 8: udi
Highlight
Copy
Compare
Share
Want to have your highlights saved across all your devices? Sign up or sign in
© Translation Services International Ltd.