Rimluğo 4
4
Avraham içust'a bakala věluğa görəne Buxačuğoy piyes düzgün ak'eśi
1-2İsə běğen běyn beşi bitot'ay bava bakala Avrahama Buxačuğoy běš təmizə c'evk'iyo k'ə bake, k'ə bine q'azayinşe mot'o? İzi biq'i əşurxo görənesa, mot'o görə saycə amdarxoy běše izi ǰomo ə̌mbi forsp'es bakon, Buxačuğoy běš təə. 3Ǐvel Śamenal ak'esest'a ki, "Avram Q'ončuğo věnebaki, me věluğa görəne şo Q'ončuğoy piyes düzgün ak'eśi". #4:3 Burq. 15:6; Gal. 3:6; İak'. 2:23
4Əşp'alt'in izi biq'i əşlin haq'q'ane haq'sa, şot'o tadalo pay tene hesabbaksa. 5Bezi biq'ala əşur bəsebaksa uk'alo təə, günax əşp'est'it'u təmizə c'evk'es bakala Buxačuğo věbakalone Buxačuğoy piyes düzgün ak'eğon. 6Buxačuğon amdara şot'ay biq'i əşurxo görə düzgün hesabbiyniy, Daviden uk'ala amdar bəxt'əvər banekoy? Sa běğanan k'ə nex:
7"İzi taxsırxo bağışlayinşakiyo,
İzi günaxxo os'eśi taśiyo he bəxt'əvəre!
8Bəxt'əvəre Q'ončuğon günaxa şot'o əşp'est'it'ay ozane nu efalo". #4:7-8 Ǐvel mə̌ğ. 32:1-2
9İsə efi zənden me bəxt'əvərluğ saycə sünnətbakit'oğoynak'e, yoxsa sünnətnubakit'oğoval kofest'a? Mot'oxun běš piyan ki, Avraham izi věluğa görəne Buxačuğoy piyes düzgün ak'eśi. 10Sünnətbakit'uxun oşane Buxačuğoy piyes düzgün ak'eśi ki Avraham? Təə! Hələ sünnətbakamine Buxačuğoy piyes düzgün ak'eśi şo! 11"Vi loxol bakala avuzin yeq'a bot'a bosa" uk'ala əmirə isə oşane haq'i Avrahamen, #4:11 Burq. 17:10 moval şo hələ sünnətbakamin, izi věluğa görə Buxačuğoy piyes düzgün soğo baksuna ak'est'ala sa nišan, izi loxol duğeśi sa peçat k'inək'e baki. Şot'o görəl, Avraham Buxačuğo věbakalt'oğoy bitot'ay bavane hesabbaksa, sünnətbakinuval bakayt'un, içoğost'a bakala me věluğa görə Buxačuğoy piyes düzgün ak'eśit'oğoy bava. 12Şo izi laxi yaq'en tağala, içust'a věluğ bakala bito sünnətbakit'oğoyal bavane hesabbaksa. Me věluğ beşi bitot'ay bava hesabbakala Avrahamast'a baki věluğe, şo hələ sünnətbakinut içust'a baki věluğe.
Yanal yast'a bakala věluğa görə Buxačuğoy piyes düzgün ak'eğalyan
13Axıri Buxačuğon Avrahama şot'in İzi tadi k'anunane əməlbsa pi təə, Avrahama təmizə c'evk'i me věluğa görəne şot'o əyit tadi ki, va q'a vaxun törəyinşakit'oğo mandale me dünyə. #4:13 Burq. 17:4-6; 22:17-18; Gal. 3:29 14Exlət saycə k'anuna əməlbalt'oğoxun taśiyniy, t'e vədə nə me věluği, nə Buxačuğon tadi əyiti mənə tene bakoy. #4:14 Gal. 3:18 15Bitot'in avayan ki, k'anun tadeśenesa, şot'o əməlbalanu, tene Buxačuğon İzi əcuğon biq'i vi əşp'est'i me günaxi cazina tadale. Ama k'anun nu bakala gala, t'iya śameśit'oğo nu əməlbsunal tene manst'a.
16Hamot'o görəl, věluğa görə tadeśi me əyit biq'i əşlə görə təə, Buxačuğoy xeyirxaxluğa görə tadeśi sa əyite. Avrahamaxun törəyinşaki şu bune, bitot'une kofst'a me payaxun - içust'a Avrahami věluğaxun bakit'uxun oşa çuresa k'anuna əməlbalt'oğoxunq'an baki, çuresa təə. Beşi bitot'ay bavane baki şo, 17Ǐvel Śame boş bakalt'ullarik': "Vaxun törəyinşaki azuk'xoy bitot'ay bava bakalnu hun". #4:16-17 Burq. 17:5; Gal. 3:7 Buxačuğon beşi bitot'ay bava bi Avrahama İçin tadi əyite mo, p'urit'oğo yəşəyinş tadala, nu baki şeyurxo bakest'i Buxačuğon.
18Věnebaki Avraham Buxačuğon içu tadi me əyitə, umud nu bakala gala p'urumal izi umuda tene bot'i, hariyal he gele azuk'xoy bavane baki, "vaxun bakit'oğo bǒq'ə̌lpi çark'est'ala tene bakal" #4:18 Burq. 15:5 əyit hari düze c'eri. 19Sal iz ük'e xalal tene baft'i - sabaç̌ yəşə ǐša yəşe buy şot'ay, izi sa tur gərəmzoğo, Saral paltar aksunaxun bot'baki sa vədine içu tadeśi me əyitə p'urumal věnebaki. #4:19 Burq. 17:17 20Sak'ıt'imal bakayin tene şüpələyinşaki Buxačuğon içu tadi əyiti loxol çurpsunaxun, hələ samalal ost'aare baki içust'a bakala věluğ, Şot'ay s'iya alabsunaxun kul tene haq'i. 21Buxačuğon əyit tadenesa bakale, Şot'ay kiyexun nu ayeğala şey tene bu uk'alt'oğoxuney Avraham. 22Me věluğa görəne şo Buxačuğoy piyes düzgün ak'eśi.
23"Buxačuğoy piyes düzgüne ak'eśi" uk'at'an mo saycə Avrahamaxun tene taysa exlət, 24mo yaxal lafest'a. Axıri Buxačuğo, beşi Q'ončux bakala İsusa p'uri ganuxun Běyinbit'u věyan yan, moval şo upsune ki, Şot'ay piyes düzgün ak'eśit'oğoxun bakalyan. 25Şot'o görə ki, Buxačuğon beşi əşp'est'i günaxxo görəne Şot'o amdarxoy kiyel tadi besp'est'i, oşal yax İz běš təmizə c'evk'eq'an pi Şot'o p'uri ganuxun běyinebi. #4:25 İsa. 53:4-5
Currently Selected:
Rimluğo 4: udi
Highlight
Copy
Compare
Share
Want to have your highlights saved across all your devices? Sign up or sign in
© Translation Services International Ltd.