Rimluğo 3
3
Buxačux İzi tadi əyiti loxol çurk'ala Buxačuxe
1İsə şaat', p'oy iudey baksuni avuzin ga maya? Sünnətbakit'oğoxun baksunen k'ə tast'a? 2Hələ bito t'ǒǒx, Buxačuğoy piyorox bito amanat pi iudeyxo tadesuna ext'en.
3İsə ef zənden, Buxačuğon İzi şu baksuna avabakest'i me azuk'axun bakalt'oğoy bəzit'oğon me amanati q'ədirə tet'un ava pi Buxačuğonal İzi tadi əyitə eyexun c'evk'ale? 4Bakala əş tene! İnsanen ğe pit'u əyc'ə eyexun c'evek'on, ama Buxačux İzi tadi əyiti loxol çurk'alone. Ǐvel Śamen uk'alt'ullarik':
"Vi ǰomoxun c'evk'ala əyitmoğoy bito hari düze c'eğon,
Sa tanenal hayzeri pes tene bakon ki, Hun əfçin nex". #3:4 Ǐvel mə̌ğ. 51:4
5Ama oşa qaybaki metərəl nexzu: yan beşi tadi əyiti loxol nu çurpsunen Buxačuğoy şuk'k'ala qǐ yaq'a nu efsuna samalal ç̌oyene c'evksasa, p'oy ene het'u görə beşi loxol İzi əcuğon biq'sa? Metəre c'eysa ki, Buxačuğon düz əş tene biq'sa? Şin bakayin unek'on... 6Ama əş t'iyane ki, hakiya sərfyan baksa! Dirist' dünyəni əşlə Běğalt'uxunyan əyite yan, ef zənden düz nu bakala əş bineq'on Şot'in? 7P'oy zast'a bakala əfçin t'ǒğǒl Buxačuğost'a bakala seri samalal qaye ak'esasa, Şot'ay hörməti loxol hörməte eşt'asa, het'u görəz günaxkər s'iyen divanbaksa? 8Beşi loxol şər laçuvk'alt'oğoy əyit maq'an baki, bərkə şaat'luğ ç̌oyel c'ereq'an pi hayzen bitot'in pisluğben? Beşi əyitmoğo hetərt'un tarast'asa, içoğoy exləten yan və̌x mot'oyan zombsa! Ama tadale Buxačuğon metərt'oğoy paya!
Düzgün amdar tene bu
9Şaat', p'oy me beşi, yəni iudeyxoy, t'iyə̌mit'oğoxun avuzin ga k'ə baki? Sal hik'k'al! Mot'oxun běš k'əz pi? İudeyxoval, q'erəz azuk'axun bakaloroxal - bito günaxi boş batk'et'un tat'unsa. 10Ǐvel Śamen uk'alt'ullarik':
"Sa tan tene bu ki, uk'an mo düzgün amdare,
11Nə Buxačuğo qə̌věğal, nə serin k'ə baksuna q'amişakale bu.
12Bitot'in Q'ončuğoxun ç̌oya taradene, düz yaq'axun c'eret'un bito,
Sa tanal bakayin şaat' əş biq'al tene mande". #3:12 Ǐvel mə̌ğ. 14:1-3; 53:1-3
13"Şot'oğoy xirt't'əyəxun c'eğala nəfəsenal amdara gərəmzoğone taşon,
J̌omoxun c'eğala əyitmoğoy bito əfçine". #3:0-13 Ǐvel mə̌ğ. 5:9
"Gürzin zəhəre bu şot'oğoy muzna bel". #3:13 Ǐvel mə̌ğ. 140:3
14"Q'arğiş q'a amdara laft'ala əyitmuxe baron şot'oğoy ǰomoxun". #3:14 Ǐvel mə̌ğ. 10:7
15"T'iyə̌mit'ay elmoğo haq'en uk'at'an içoğoy pulmuxe qayesa,
16Tura maya ç̌axk'ayt'un t'e ga xarabinane mandon.
Amdarxoynak' dərdt'un avuzbon şot'oğon,
17Serluğaxun ə̌xilt'un pi şuk'k'alaxun yaq'axt'ağalo tet'un". #3:17 İsa. 59:7-8
18"Buxačuğoxun tet'un q'ǐbsa şot'oğon". #3:18 Ǐvel mə̌ğ. 36:1
19Ama avayan ki, k'anuni boş śameśi əyitmux k'anuni kiin oq'a bakalt'oğoynak' śameśi əyitmuxe! Mo şo upsune ki, şuk'k'alen izi ǰomo ə̌mbi içu Buxačuğoy běš təmizə c'evk'es tene bakal, me dünyəne saycət'in izi əşp'est'i günaxa izi ozanexun śap't'es tene bakal. 20Şot'o görə ki, Buxačuğoy piyes düzgün ak'esun k'anuni boş śameśit'oğo əməlbsunen bakala şey tene. Sa şone ki, k'anunaxun içoğoy xavar bakalt'oğoy günaxi k'ə baksunaxunal xavar bune. #3:20 Ǐvel mə̌ğ. 143:2; Gal. 2:16
K'anuna əməlbalo təə, İsusa Çark'est'al k'inək' q'abulbalo Buxačuğoy piyes düzgün ak'eğale
21Ama həysə Buxačuğon yax qay avabakesest'a ki, beşi Şot'ay piyes düzgün ak'eśes baksun k'anuna śameśit'oğo əməlbsunaxun asulu tene. Mot'o k'anunen uk'alt'oğonal ak'esest'a, xavareçalxoy ǰomoxun c'erit'oğonal. 22Şin ki izi çark'esuna İsus Xrist'osast'a ak'i Şot'o věnebaksa, şone Buxačuğoy piyes düzgün ak'eğon - mo iudey bakalt'aynak'al metəre, nu bakalt'aynak'al. #3:22 Gal. 2:16 23Axıri amdarxoy sayco günaxsuz tene, şuva içu ı̌vel Buxačuğoy kala s'iya görə taşes bakalo? 24Yax təmizə c'evk'iyoval İsus Xrist'ose baki, beşi günaxxoy toya sakərəmluğ ödəyinşpsunene bi mot'o! Me beşi təmizə c'eysun Buxačuğon yax tadi paye, yaxun hik'k'al haq'inut tadi sa pay. 25Beşi s'iyen šameśi sa q'urbane bi Şot'o Buxačuğon, Şot'inal İzi p'iyen os'k'i taneşeri İçu Çark'est'al k'inək' q'abulbit'oğoy günaxxo. Mot'oxun běš əşp'est'i günaxxo nu aksunane laxi Buxačuğon, yax İzi düzgünluği k'ə baksuna ak'est'eynak'e bağışlayinşi şot'oğo. 26Gelene portp'i Buxačuğon, ğeyin ğineyal İzi hetər sa düzgünluği q'ončux baksuna ak'esedi, İsusa věbaki Şot'o Çark'est'al k'inək' q'abulbit'oğoy günaxxo bağışlayinşi şot'oğo düzgüne c'evk'i, şot'o görə ki, Şo İçal düzgün bakala Buxačuxe.
27P'oy isə het'in forsp'alyan? Sal het'in! Mani k'anuna biq'i çurk'alyan? K'anuni boş śameśit'oğo əməlbsunen tene, İsus Xrist'osa věbaki Şot'o Çark'est'al k'inək' q'abulbsune əsil k'anun. 28T'evər piyan, saal nexzu: İsusa věbaksunene Buxačuğoy piyes va təmizə c'evksa, k'anunaz əməlbsa upsunen təə.
29Avanan mo k'ə upsune? Buxačux saycə iudeyxoy təə, q'erəz azuk'axun bakalt'oğoyal Buxačuxe. 30Sa Buxačuxe bu, Şot'in yax təmizə c'evk'es bakseynak'al İsusa věbakalayan, mo iudey bakalt'aynak'al metəre, nu bakalt'aynak'al. #3:30 K'an. 6:4; Gal. 3:20 31Ama mo şo upsun tene ki, yan İsusi Çark'est'al baksuna q'abulyanbisa k'anuna hik'k'alyanbsa. Metər bi k'anunen upsun çureğalt'oğoyan əməlbi baksa yan!
Currently Selected:
Rimluğo 3: udi
Highlight
Copy
Compare
Share
Want to have your highlights saved across all your devices? Sign up or sign in
© Translation Services International Ltd.