Rimluğo 5
5
Yax Buxačuğoxun barişt'ırişiyo İsuse baki
1Mone, yast'a bakala věluğene beşi günaxxo bağışlayinşest'i yax Buxačuğoy běš təmizə c'evk'i, beşi Q'ončux bakala İsus Xrist'osene bi mot'o, şot'o görəne beşi q'a Buxačuğoy ara düzbaki. 2Beşi Şot'o věbaksuna görəne Buxačuğon İzi xeyirxaxluğa beşi belxun oq'a śipi, Şot'ine beşi kiyexun biq'i yax t'e xeyirxaxluğaç taşeri. Yanal t'e xeyirxaxluği boş os'k'alyanne - mǔqyan yan, axıri beşi umuda boteyanst'a, avayan ki, Buxačuğoy əyloğoynak' həzirbaki neymətəxun yaxal q'ısmat'bakale. 3Beşi běšal hetər çətinluğ c'eğale c'ereq'an, şot'o p'urumal kala sa mǔqluğenyan q'abulbsa, şot'o görə ki, hər çətinluğaxun c'ovaksunen oşin çətinluğa bakala portpsunane avuzbsa. 4Metər bsunen Buxačuğon yax xaxalaxune c'ovakest'a, yast'al umude əmələ hari baksa. #5:3-4 İak'. 1:2-4 5Puça nu c'eğala umude me umud, şot'o görə ki, İzi Ǐvel Urufaxun beşi ük'e laxi yaxun İzi çuresuna tene kambi Şot'in.
6Vədəne buy beşi kiyexun hik'k'al aytenesay, günaxi boş batk'i tağaloroxyaniy yan, ama Xrist'osen hari yaynak' İzi elmoğone laxi. Buxačuğon İçin laxi vədinene baki mo. 7Sal düzgün bakalt'aynak' mot'o hər amdaren tene bon, hələ bərkə xeyirxax bakalt'aynak' şinesa izi elmoğo laxane. 8Ama Buxačuğon ak'esedi İzi yax heq'ədər çuresuna, beşi günaxi kiyel mandi vədine Xrist'osi hari beşi gala bisunene ak'est'i yax mot'o! 9İsə ene divanbaksaxunal q'ı̌teyanbsa - Xrist'osi bari p'iyen yax Buxačuğoy běš təmizə c'evk'enesa, Şot'in Buxačuğoy əcuğaxunal yax çark'est'ale. 10Beşi ara Buxačuğoxun duğeśi vədine Şot'ay Ğare bisunen yax bariştırişenesa, həysə, beşi ara düzbaki vədine, İzi Ğar běyinbaki sa vədine yax tene çark'est'on ki Şot'in? #5:10 Əbr. 7:25 11Saycə moval tene! Buxačuğoxun baksuni mǔqluğane eçeri yaynak' beşi Q'ončux bakala İsus Xrist'osen, Buxačuğoxun beşi arana düzbit'in beşi muzane boxoybi!
Adamen bisun eçeri k'inək' İsusenal yəşəyinşe eçeri
12Me dünyəne günaxeynak' ç̌omo qaypiyone baki, me günaxenal içuxun bisune eçeri. Amdarxoy bitot'une laft'i me günax, saycət'inal bisunaxun izi elmoğo çark'est'es tene baki, şot'o görə ki, bitot'ine günax əşp'est'i baki. 13Amdarxon içoğoynak' k'anun hələ laxeğamin günax əşp'est'et'uniy, ama k'anun tene buy pi me günax hesabaltenebaksay. 14T'e vədə Adamaxun burqi Moiseya k'anun tadeğamin bakalt'oğoy bisun hik'əy p'oy? Buxačuğoy əyitəxun c'eri günaxa əşp'est'iyo Adamal bakayin izi cazina bitot'ine zap'ey, şuk'k'alen izi elmoğo bisunaxun çark'est'es tene baki.
Metər ext'at'an, Adami q'a Buxačuğon yax çark'est'eynak' yaq'absun çureğalt'ay arane oşq'arluğ gelene. 15Düze, Adami əşp'est'i günax q'a Buxačuğon yax İzi xeyirxax baksuna görə tadi neymət sa bakes batenekon. Tərəzik'i sa piyel sa amdari əşp'est'i günaxa görə meq'ədər amdari bisune busa, t'e soğo piyel sa Amdari, Buxačuğon İzi xeyirxaxluğa ak'est'i Yaq'abit'ay, İsus Xrist'osi yax tades bakala neyməte bu. Me neymət içal bǐhine eysa, şot'o haq'alt'oğoy sayal gelene. 16Me Buxačuğoxun hari neyməten yax tades bakalo maya, Adami əşp'est'i günaxi caza maya! Me caza Buxačuğon yaynak' İzi əyitəxun sa kərəm c'eysuna görə bot'i sa cazaney, mo isə pay k'inək' tadeśi sa neyməte, beşi əşp'est'i meq'ədər günaxxoxun yax təmizə c'evk'es bakala sa neymət. 17Sa amdari əşp'est'i günaxen me dünyəne bisun uk'ala cazina eçerenesa, t'e vədə Buxačuğon beşi belxun oq'a śipi, yax İzi běš təmizə c'evk'es bakala me neyməten k'ə bon? Yax pay k'inək' tadeśi sa neyməte mo, sa amdaren, İsus Xrist'osen tades bakala me neymətenal şot'o q'abulbit'oğoynak' kalaluğ içoğoy kiyel bakala sa yəşəyinş eçeri bakale.
18Hetər ki, günaxa əşp'est'iyo sa amdare baki, ama izi cazina bito amdarxone zapi, hat'etərəl sa Amdari biq'i düzgün əşlə görə bitone təmizə c'eri, metərluğenal həmişəluğ yəşəyinşt'un q'azayinşi baki. 19Hetər ki, Buxačuğoy əyitəxun c'eriyo sa amdare baki, ama bitot'ine günaxkər s'i q'azayinşi, hat'etərəl sa Amdari Şot'ay pit'u bsunen gelet'une təmizə c'evk'i baki.
20Buxačuğon Moiseya tadi k'anunen amdarxoy heq'ədər günax əşp'est'i baksunane ç̌oyel c'evk'i. Ama günaxi loxol günax eysunen Buxačuğoy xeyirxaxluğal avuzebaki. 21İsəəl, günaxen hari bisuneynak' yaq' qaypi k'inək', me şaat'luğenal həmişəluğ yəşəyinşeynak' ç̌omo qaypi bakale. Beşi Q'ončux bakala İsus Xrist'osaxune hari c'ovaksa yax Buxačuğoy běš təmizə c'evk'es bakala me şaat'luğ.
Currently Selected:
Rimluğo 5: udi
Highlight
Copy
Compare
Share
Want to have your highlights saved across all your devices? Sign up or sign in
© Translation Services International Ltd.