Ǐvel mə̌ğurxo 145
145
145-ci Ǐvel mə̌ğ #145:0 - Me mə̌ğ "ak'rost'ix" uk'ala yönene śameśe, yəni hər cörgin süft'in t'arurxo alfavit'i boş bakala k'inək' sunay bač'anexune eysa.
Davidi Buxačuğo tərifləyinşala Ǐvel mə̌ğ.
1Va alxışp'oz zu, ay bez Buxačux, bez Padçağnu Hun,
Vi s'iya alaboz zu həysəəl, meyin oşa həmişəəl.
2Vi s'iya alaboz zu hər ği,
"Halalq'an baki" uk'oz həysəəl, meyin oşa həmişəəl.
3 Q'ončux kalane, Şot'o heq'ədər tərifləyinşalbayan male,
Şot'ay kalaluğa beyne p'aq'est'ala şey tene!
4Nəsilxoval hari badalbakayin Vi s'i t'ap'eğale,
Vi biq'i əşurxoy kalaluğaxun əyitk'alt'un şot'oğon.
5Vi hetər sa hörməti q'ončux baksuni,
Vi bitot'uxun üst'ün baksuni baradaz fikirbsa zu,
Vi biq'i nu ak'eśi əşurxoy loxole bez fikir.
6Bitot'in avabakale Vi biq'i əşurxoy q'erəz şuk'k'ali kiyexun nu ayesuna,
Vi kalaluği k'ə baksuna ak'est'oz zu, bez ǰomoxun ten bital Hun.
7Vi bol-bol ak'est'i xeyirxaxluğaxun əyitk'alt'un bitot'in,
Vi düzgünluğa içoğoy muzel eçat'an ük' qayeğale şot'oğoy,
Vi s'iya alabala mə̌ğur mə̌ğk'alt'un şot'oğon.
8Ük' bok'al, xeyirxax bakalone Q'ončux,
Şo usum nu posk'al, İz ük' nu badalbakala çuresunen buy bakalone. #145:8 C'eys. 34:6
9Bitot'une lafst'a Şot'ay xeyirxaxluğ,
İzi yaratmişit'oğoy saycət'uxun İzi çuresuna nu kambalone Şo.
10Tərifbalt'un Va Vi yaratmişit'oğoy bitot'in, ay Q'ončux,
Alxışbalt'un Va Vi laxi yaq'en tağalt'oğon.
11Vi padçağluği hər şeyaxun üst'ün baksuna ak'est'alt'un şot'oğon,
Vast'a bakala zore k'ə baksunaxun exlətp'alt'un.
12Avabakalt'un amdarxon Vi biq'i əşurxo q'erəz şuk'k'alen biq'es nu baksuna,
Vi padçağluğen içoğoy piye işiğ eçes baksuna ak'alt'un.
13Həmişəluğ sa padçağluğe Vi padçağluğ,
Nəsilxoval hari badalbakayin, Hun hələ kalaluğbal bakalnu. #145:13 Bəzi kiin śamurxost'a miya me əyitmuxal bune: "iz tadi əyiti loxol çurk'alone Q'ončux, İz yaratmişit'oğoy saycət'u qı̌ yaq'a nu efalone Şo".
14Tur lamandalt'oğoy bitot'aynak' t'ayağe Q'ončux,
Bitit'oğoy bitot'u kul biq'i alabalone Şo.
15Vi kiyele běğsa bitot'in,
Hunal hər sunt'ay šuma iz vədine p'ap'esenpsa. #145:15 Ǐvel mə̌ğ. 104:27
16Vi mə̌xinəxunt'un uksa
İçoğoy boş elmux bakalt'oğoy bitot'in.
17 Q'ončuğoy biq'ala əşurxo bito düzgüne,
Şuk'k'ala qı̌ yaq'a nu efalone Şo.
18 Q'ončuğon İçu k'alpi xoyinšp'alt'oğo,
İzi şot'oğo ibaksunaxun nu şupələyinşakalt'oğoy t'ǒğǒle bakon.
19P'ap'esebon Şot'in İz yaq'en tağalt'oğoy afırıpi çureğalt'oğo,
İçoğoy xoyinša ibaki çark'esedon şot'oğo.
20İçu çureğalt'oğo q'orişi,
Pist'oğo isə əfçibalone Q'ončux.
21 Q'ončuğo tərifbale bez muzen,
Barta Şot'ay yaratmişit'oğon bitot'in Şot'o alxışp'eq'at'un,
Barta Şot'ay s'i həmişəluğq'an t'ap'eśi!
Currently Selected:
Ǐvel mə̌ğurxo 145: udi
Highlight
Copy
Compare
Share
Want to have your highlights saved across all your devices? Sign up or sign in
© Translation Services International Ltd.
