Məsəloox 8
8
Müdrikluği k'alpsun
1Müdrikluğen tene k'ale ki?
Q'amişaksunen iz səsə tene alloybsa ki?
2Axıri şot'in alloy ganxo, yaq'e t'ǒğǔrxo,
Yaq' cöybakala gala,
3Şəhəre bağala darvazin běš,
T'iya tağala yaq'e boş çurpi metər k'alene:
4«Ay amdarxo, zu və̌xez k'ale,
Ay camaat, bezi səs və̌ynak'e,
5Ay nu q'amişakalxo, q'ani bakanan,
Ay axmağxo, ə̌xilak'al bakanan.
6Ǔmǔxlaxanan, dəyərlü şeyurxoxunez əyite,
Bezi ǰomoxun düz əyitmuxe c'eysa.
7Bezi muzen serinəne nex,
Şot'aynak' ki, şot'in şərəxun irit'ene.
8Bezi ǰomoxun saycə düz əyitmuxe c'eysa,
Nə k'ori əyit teno, nəəl əfçi.
9Q'amişakalt'oğon mot'oğo q'amişe,
Avabaksun q'azayinşalt'oğoynak'al morox bütüm düze.
10Gümüşə təə, bezi tərbiyinə c'ək'p'anan,
Avabaksuna təmiz q'ızılaxun üst'ün biq'anan.
11Şot'aynak' ki, müdrikluğ toyexlu ǰěyurxoxunal dəyərlune,
Ef ük'en çureğalt'oğoy sayco şot'ay tay tene.
12Zu müdrikluğzu, ə̌xilaksunen zast'a məsk'əne sake,
Avabaksuna q'a q'amişaksuna p'ap'ezu.
13 Q'ončuğo çalxsun pisluğa nifrətbsun upsune.
Lovğaluğa, alaxun oq'a běğsuna, pis yaq'a,
Əfçi muza nifrətezbsa.
14Nəsyət, şaat' maslaat zast'ane,
Q'amişaksun q'a zoral zast'ane.
15Bezi köməyen padçağxon kalaluğt'unbsa,
Kalaluğbalxon düz əmirt'un tast'a.
16Düzgün divanbalxon q'a s'ila amdarxon,
Bezi köməyent'un kalaluğbsa.
17Za çureğalt'oğo çurezsa,
Za ük'en qə̌věğalt'in bə̌ğə̌nebsa.
18Bolluğ q'a şərəf,
Nu śareğala var-dövlət q'a düzgünluğ zaxune.
19Bezi tadala bar q'ızılaxun, təmiz q'ızılaxun dəyərlune,
Təmiz gümüşəxunal şaat'e.
20Zu düzgünluği yaq'en,
Haq'q'a taşala yaq'enez taysa.
21Za çureğalt'oğo varluzbon,
İçoğoy xəzinoğo buyezbon.
22 Q'ončuğon İz əşurxo burqat'an,
Hər şeyaxun běš zane yaratmişi.
23Burqesunast'a,
Dünyə yaranmişakalt'uxun běš zu buzuy.
24Bə̌ğə̌loy xeyur bakalt'uxun běš,
Bol xene orayinxo bakalt'uxun běš buzuy.
25Buruxmuğ yaranmişakalt'uxun běš,
Təpoox bakalt'uxun běš zu buzuy.
26Şot'in dünyənə, çölə-biyavana,
Oç̌alxo yaratmişat'an,
27Göyurxo yaratmişat'an,
Şot'o xene bə̌ğə̌loyluğxoxun ğis' zapi cöybat'an,
28Alloyax asoyxo,
Bə̌ğə̌loyax orayinxo ost'aarbat'an,
29Xeyur içu əmirbaki ganuxun maq'an c'eri pi,
Dənizə zahman zap'k'at'an,
Oç̌ali binorina laxat'an,
30Zu İz t'ǒǒx memarzuy.
Hər ği fərəxləyinşezbaksay,
Şot'ay piin běš həmişə mǔqezbaksay.
31İz yaratmişit'oğo görə mǔqezbaksay,
Amdarxo görə fərəxləyinşezbaksay.
32Həysə, ay bezi ğarmux, za ǔmǔxlaxanan:
Bezi yaq'a efalo he bəxt'əvəre!
33Bezi tadi tərbiyinə ǔmǔxlaxi
Müdrikluğ ext'anan, şot'o t'ǒǒx ma bosanan.
34Za ǔmǔxlaxalo,
Hər ği bezi darvazin běš çurk'alo,
Bezi ç̌omxoy běš çurpi yaq'běğalo he bəxt'əvəre!
35Şot'aynak' ki, za bə̌ğə̌balt'in yəşəyinşe bə̌ğə̌bon,
Q'ončuğoy piyesal şaat'e ak'eğon.
36Bezi əleyinə bakalt'in isə iz elmoğone q'əst'bon,
Za nifrət balt'oğoy bitot'in bisune çureğon».
Currently Selected:
Məsəloox 8: udi
Highlight
Copy
Compare
Share
Want to have your highlights saved across all your devices? Sign up or sign in
© Translation Services International Ltd.
