Məsəloox 9
9
Müdrikluği yaq'
1Müdrikluğen içeynak' k'oje biq'i,
Şot'aynak' vǔğ dənə kişeśi sütüne laxi,
2Heyvan šampi,
Fi həzirbi,
Sulfinal saneki.
3İz çuux nökərxo yaq'abi
Şəhəri alloy ganxoxun care k'alpest'i:
4«Ekinan memiya, ay nu q'amişakalxo»
Müdrikluğen q'ammazxo metəre pi:
5«Ekinan, bezi šumaxun ukanan,
Bezi həzirbi finaxun ǔğə̌nan.
6Q'ammazluğa bosanan - yəşəyinşalnan,
Haq'ıli yaq'en takinan.
7Ç̌oboç̌una töhmətbalo axırda içe biyaburbakon,
Şər amdara yaq' ak'est'alo içe ləkələyinşakon.
8Ç̌oboç̌una ma töhmətba ki, va maq'an nifrətbi,
Müdrik amdara töhmətba, şot'inal va çureğale.
9Metər amdara ögüten tadon, samalal müdrike bakon,
Tərbiyinə düzgün amdaran tadon, iz q'amişaksunane avuzbon.
10 Q'ončuğo çalxsune müdrikluği burqesun,
Ǐvel bakalt'u çalxsune q'amişaksun.
11Müdrikluğen vi yəşəyinşi ğimxone avuzbon,
Vi ömürəne boxoybon.
12Müdrikluğ q'azayinşayin, şot'in va xeyir tadale,
Ç̌oboç̌uluğbayin - zərələ hun zap'k'alnu».
Axmağluği yaq'
13Axmağluğ isə hay-küy sakala sa çuux k'inək'e,
Şo q'ammaze, hik'k'al tene q'amiş.
14Şo iz k'ojin ç̌omoy běš,
Taxt'e loxol k'inək', bütüm şəhəri piin běš arśi,
15Yaq'axun c'ovakalt'oğo,
İçoğoy yaq'en düz tağalt'oğone k'ale:
16«Memiya ekinan, ay nu q'amişakalxo!»
Q'ammazxo metəre nex:
17«Başq'eśi xe muč'ane baksa,
C'əp'k'in ukala šum tadlune baksa».
18Ama şot'oğon tet'un ava ki, şot'ay t'ǒğǒl bisuno,
İz k'alk'aloroxal ene t'e dünyənet'un.
Currently Selected:
Məsəloox 9: udi
Highlight
Copy
Compare
Share
Want to have your highlights saved across all your devices? Sign up or sign in
© Translation Services International Ltd.
