Ams'i oç̌ala 31
31
Midyanluğoxun həyif haq'sun
1 Q'ončuğon Moiseya metəre pi: 2«Midyanluğoy israilluğo bi pisluği #31:2 - Q'ončuğon miya midyanluğoy israilluğoy loxol q'arğiş śipest'uni, şot'oğo binik' buxačux Baal-P'eora bul k'osbest'uni saal içoğoy xuyərmoğo şot'oğo işq'ara tast'uni baradane nex. Běğa: Ams'i oç̌. 22:4-6; 25:1-18 həyifə şot'oğoxun haq'a. Oşa p'uri t'e dünyəne, vi bavoğoy t'ǒğǒl tağalnu».
3Moiseyenal azuk'a pine: «Azuk'i boş bakala işq'arxoxun davina c'eyseynak' sa q'oşun həzirbanan. Barta midyanluğoy loxol taśi Q'ončuğoy əleyinə c'eysuni həyifə şot'oğoxun haq'eq'at'un. 4Hər tayfinaxun sa hazar tan yaq'abanan».
5Metərluğen, israilluğon hər tayfinaxun sa hazar işq'ara - bito sagala p'as's'e hazarluğ sa q'oşuna davina c'eyseynak't'un həzirbi. 6Moiseyen şot'oğoy loxol běyinš Eleazari ğar P'inexasa kalo laxi davinane yaq'abi, Eleazarenal ı̌vel ganu bakala şeymoğoxun q'a şeyp'urxo ext'i yaq'ane baft'i. Me şeyp'urxo farpi davina c'eğala q'oşuni k'ə bsuna avabakest'eynak'ey.
7Hametər, Q'ončuğon Moiseya əmirbi k'inək' şorox midyanluğoy loxol taśi şot'oğoy bito işq'arxo k'as'p'i śit'unpi. 8P'urit'oğoy boş Midyani qo padçağ - Evi, Rek'em, Śur, Xur saal Reval buney. Beori ğar Bileamal israilluğoy q'ılıncaxun p'urit'oğoy boşey. 9İsrailluğon bito midyanlu çupuxxo, əyloğo, şot'oğoy heyvanxoy sürüğo q'a içoğoy bakal nu bakala hər şeya içoğoy kiyelt'un badi. 10Midyanluğo yəşəyinşala bito şəhərmoğo q'a içoğoy çurk'ala ganxo bəc'ük't'undi. 11İsrailluğon içoğoy kiyel badi hər şeya - amdarxo, heyvanxo, şot'oğoy bito mal-dövlətə ext'undi. 12Şot'oğon davabi midyanluğo tat'unşeri, içoğoy kiyel badi bito me amdarxo q'a şeymoğoval Moiseyi, běyinš Eleazari saal dirist' azuk'i běšt'un eçeri. Azuk' Moavi düzənluğa, İordan oqe t'ǒğǒl, Yerixon şəhəri běš düzbi çurk'ala galaney.
Azuk'i davinaxun oşa pakbaksun
13Moisey, běyinš Eleazar saal azuk'i bito ağsaq'q'alxo içoğoy çurk'ala ganuxun q'oşuni běšt'un c'eri. 14Moisey davinaxun qaybaki q'oşuni kalat'oğoy - hazartani q'a sabaç̌tani kalat'oğoy loxol gele əcuğluney. 15Şot'in pine: «Het'aynak'nan çupuxxo bitova dirist' efi? 16Korox teney ki, Bileami əyiten beşi işq'arxo Q'ončuğoxun ə̌xilbi P'eora bakala binik'-buxačuğo bul k'os'best'alo? Kot'oğo görəne azuk'al k'as'eśi! #31:16 Ams'i oç̌. 25:1-9 17İsə bütüm ğar əyloğo q'a işq'araxun ı̌šaluğbi çupuxxo besp'anan. 18Ama işq'araxun hələ ı̌šaluğ nu bi xuyərmoğo galmadanan.
19Ef boş isə amdar besp'i nəəl iz kul meyidə laft'i şu bunesa - çuresa azuk'axun bakala davina taśi işq'arq'an baki, çuresa Midyanaxun ext'i eçeri xuyər - vǔğ ği azuk'i çurk'ala ganuxun t'ǒǒx c'eğalane. Şot'oğon içoğo xib ğinaxun saal vǔğ ğinaxun oşa pakbalat'un. 20Bito paltarxo, keçin t'olaxun q'a xayaxun düzbaki nəəl durut'axun bakala bito şeymoğoval pakbanan».
21Běyinš Eleazaren davinaxun qaybaki əsk'ərxo pine: «Mone, Q'ončuğon Moiseyeynak' me q'aydoğone laxi: 22bito q'ızıla, gümüşə, tunca, dəmirə, q'alaya q'a q'urq'uşuna 23- aruğo nu bok'ala k'ə bunesa - bitova aruğoxun q'a pakbala xenaxun c'ovakest'anan. Mot'oxun oşa şorox pak bakale. Aruğo bok'ala şeyurxo isə saycə xenen pakbanan. 24Vǔğǔmci ğine ef paltarxo os'k'it'uxun oşa ef çurk'ala gala qaybakes banankon».
Midyanaxun eçeri mala cöybsun
25 Q'ončuğon Moiseya pine: 26«Běyinš Eleazaraxun q'a israilluğoy tayfoğoxun c'ək'eśi kalat'oğoxun sagala Midyanaxun eçeri bito amdarxo q'a heyvanxo bǒq'ə̌lpa. 27Oşa mot'oğo bitova p'ə̌ gala - davina taśit'oğoy q'a nu taśit'oğoy arane - barabar cöyba. 28Davina taśit'oğo koft'i payaxun hər qobaç̌ amdaraxun soğo saal hər qobaç̌ bul belinaxun, elemaxun q'a eğelaxun sa bul Q'ončuğoy paye. 29Şot'oğoxun Q'ončuğoynak' ext'i me paya běyinš Eleazara tadanan. 30Davina nu taśi israilluğo koft'i payaxun isə hər əlli amdaraxun sunt'u saal hər əlli bul belinaxun, elemaxun q'a eğelaxun sa bula ext'a. Mot'o Q'ončuğoy ı̌vel çadıra běğala leviğo tada». 31Moiseyen q'a běyinš Eleazarenal Q'ončuğon Moiseya pi k'inək' bit'un.
32Metərluğen, əsk'ərxon Midyanaxun 675 000 eğel q'a keçi, 3372 000 beli, 3461 000 elem, 35saal 32 000 hələ işq'araxun nu ı̌šaluğbi xuyərt'un eçeri.
36Mot'oğoxun davina taśit'oğo 337 500 bul eğel q'a keçi 37(mot'oğoxun 675 bul Q'ončuğoy payey), 3836 000 bul beli (me beliğoxun 72 bul Q'ončuğoy payey), 3930 500 bul elem (me elemxoxun 61 bul Q'ončuğoy payey), 40saal 16 000 amdare koft'i. Me amdarxoxun 32 tan Q'ončuğoy payey. 41Moiseyenal şot'oğoxun Q'ončuğoynak' ext'i me paya, içu pi k'inək' běyinš Eleazarane tadi.
42Moiseyen davina nu taśit'oğoynak' cöybi pay, 43mandi israilluğo koft'i pay isə money: 337 500 bul eğel q'a keçi, 4436 000 bul beli, 4530 500 bul elem, 46saal 16 000 amdar. 47Moiseyen Q'ončuğon içu pi k'inək' me mandi israilluğo koft'i payaxun hər əlli bul heyvanaxun sa bula saal hər əlli amdaraxun sa amdara cöybi Q'ončuğoy ı̌vel çadıra běğala leviğone tadi.
48Q'oşuni kalat'oğon - hazartani q'a baç̌tani kalat'oğon Moiseyi t'ǒğǒl hari pit'un: 49«Yan, me vi k'ulurxon, beşi kiin oq'a bakala əsk'ərxo bǒq'ə̌lyanpi. Şot'oğoxun aç̌iyo butene. 50İsəəl mone, beşi elmoğoy toya ödəyinşseynak' Q'ončuğoynak' Midyanaxun eçeri q'ızılxoyan eşt'a - ə̌mel q'a kiyel lavk'ala q'oxlangxo, boğoç̌alxo, sırığanxo saal śep'urxo».
51Moiseyen q'a běyinš Eleazarenal bito me q'ızıli şeymoğo şot'oğoxun ext'undi. 52Hazartani q'a baç̌tani kalat'oğon Q'ončuğoynak' eçeri bito me q'ızıli bı̌hiluğ 16 750 şek'eley. #31:52 16 750 şek'el - təxminən 190 k'ilo 53Adi əsk'ərxoy eçeri q'ızıl isə içoğone mandi. 54Hametər, Moiseyen q'a běyinš Eleazaren hazartani q'a baç̌tani kalat'oğoxun q'ızıla ext'i ı̌vel çadırat'un laxi. İsrailluğon me q'ızıli loxol běği Q'ončuğoy içoğoy tərəf baki içoğoy elmoğo hetər çark'est'una eyex efalat'uniy.
Currently Selected:
Ams'i oç̌ala 31: udi
Highlight
Copy
Compare
Share
Want to have your highlights saved across all your devices? Sign up or sign in
© Translation Services International Ltd.
