Ams'i oç̌ala 32
32
İordan oq'e běğ c'eğalaç tərəf bakala oç̌alxo cöybsun
(K'an. 3:12-22)
1Azuk'i boş Ruveni q'a Gade nəsiləxun bakalt'oğoy heyvanxo geleney. Şot'oğonal Yaśer q'a Gilead uk'ala oç̌alxo ak'at'an, me ganxoy heyvan otarişbseynak' şaat' sa ga baksun içoğoy piyexun tene t'it'eri. 2Şorox Moiseyi, běyinš Eleazari saal azuk'i boş kalo c'ək'eśit'oğoy t'ǒğǒl hari pit'un: 3-4«Q'ončuğon beş kiyel tadi me oç̌ala bakala At'arot', Dion, Yaśer, Nimra, Xeşbon, Eleale, Sevam, Nevo saal Beon şaat' heyvan otarişes bakala ganxone. Me vi k'ulurxoyal, avanu ki, heyvan gelene». 5Oşa saal pit'un: «Əgər yaynak' mot'o gele ten aksasa, me oç̌ala yax tada. Barta me gaq'an beşi baki, İordan oqe t'e tərəf yax ma taşa».
6Moiseyen pine: «Yəni dirist' azuk'en taśi davabale, və̌n isə memiya arśalnan? 7Het'aynak'nan israilluğo Q'ončuğon içoğo tadi ölkinə taysunaxun çaxevksa? 8Ef bavoğonal, Zu şot'oğo Kadeş-Barnea şəhərexun t'e oç̌ala běğsa yaq'abat'an haketərt'un bey. 9Şorox Eşk'ol dərənel śirik' taśi t'e oç̌ala bět'unği, ama oşa hari t'iya taysunaxun, Q'ončuğon içoğo tadi t'e ölkinə baysunaxun azuk'a qoşt'unbi. #32:8-9 Ams'i oç̌. 13:17-33 10T'e vədəne Q'ončuğoy əcuğ bəc'ük'eśi, Şot'inal elasp'i pine ki, 11"Zaxun ç̌o taradi Misirəxun c'erit'oğoxun sayco, q'a saal q'a yəşəxun ala bakalt'oğoxun sayco, Zu Avrama, İsaak'a saal İak'ova əyit tadi t'e oç̌ala bağalatene! 12Saycə Bezi əyitəxun nu c'eri k'enizlu Yefunneyi ğar K'alevaxun q'a Nune ğar Yeşuaxun başq'a". 13Hametərəl Q'ončuğoy əcuğon israilluğoy loxol bineq'i. Şot'in azuk'a q'ırx usen, Q'ončuğoy piyes günax ak'eśi me əşlə biq'i nəsil əfçibakamin ams'i oç̌ala fırıpesedi. #32:10-13 Ams'i oç̌. 14:26-35
14İsəəl mone, ef bavoğoxun q'oş tenan manst'a! Və̌xlarik' günaxkərxoxun baki günaxkərxone Q'ončuğoy əcuğo p'urum me azuk'i loxol śiye! 15Və̌n həysə Q'ončuğoxun ç̌o taradaynan, Şot'in p'urum azuk'a me ams'i oç̌ala efi bašaybale! Və̌n me azuk'a əfçibalnan!»
16T'e vədə Ruveni q'a Gade nəsiləxun bakalorox Moiseyi běš c'eri pit'un: «Beşi fikir t'etərey ki, miya beşi heyvanxoynak' ağılxo, ailoğoynak'al şəhərmux biq'i şot'oğo memiya efen. 17Yan isə taśi israilluğoxun sagala şot'oğo əyit tadeśi oç̌ala badamin davabalyan. Yan davina bakala vədine beşi əylox q'a çupuxxo q'alala şəhərmoğo, me oç̌ali amdarxoy kul nu p'ap'ala sa gala bakayt'un, yanal arxayinyan bakon. 18İsrailluğoxun hərt'in içu koft'ala oç̌ali paya haq'amin beşi k'ojurxo teyan qaybakal. 19Yan İordan oqe t'e tərəf oç̌al teyan ext'al, şot'o görə ki, ene miya - İordan oqe běğ c'eğalaç tərəf bakala oç̌alxoxunyan ext'i».
20Moiseyen şot'oğo metəre coğab tadi: «Əgər və̌n ef pit'ullarik' bi Q'ončuğoy s'iyen davina tağaynan, 21İordani t'e tərəfəl Q'ončuğon İz düşmənxoxun oç̌alxo ext'i İz azuk'a tadamin davabaynan, 22t'e vədə t'e ölkin amdarxon Q'ončuğo taşevk'it'uxun oşa və̌n ef k'ojurxo qaybakes banankon. Metər və̌n Q'ončuğoy q'a azuk'i běš ef borca ödəyinşi bakalnan, Q'ončuğonal və̌x me oç̌ala İz xeyir-bərəkətəxun sagala tadale. 23Ama əgər ef pi əyitin loxol nu çurk'aynan, t'e vədə Q'ončuğoy piyes günax əşp'est'i bakalnan, əşp'est'i günaxi cazinal zap'k'alnan. 24İsə takinan ef çupux-əyloğoynak' bakala şəhərmoğo q'a heyvanxoynak' bakala ağılxo biq'anan, ama efi tadi əyiti loxol çurpanan».
25Gade q'a Ruveni nəsiləxun bakalt'oğon Moiseya pit'un: «Barta beş ağan pit'ullarik'q'an baki, yan vi k'ulurxoyan! 26Beşi çupux-əylox q'a bütüm heyvanxo miya - Gileada biq'i şəhərmoğo mandalt'un. 27Yan isə hun, beşi ağan, yax əmirbi k'inək' İordan oqe t'e tərəf, Q'ončuğoy s'iyen davina tağalyan».
28Moiseyenal běyinš Eleazara, Nune ğar Yeşua saal israilluğoy tayfoğoxun c'ək'eśi kalat'oğo əmir tadi pine: 29«Əgər Gade q'a Ruveni nəsiləxun bakalt'oğon İordan oqe t'e tərəf c'ovaki Q'ončuğoy s'iyen davabayt'un, t'e vədə Q'ončuğon t'e oç̌alxo ef kiyel tadit'uxun oşa, şot'oğoy oç̌ali paya memiin - Gileadaxun tadanan. 30Ama əgər və̌xun sagala davina nu tağayt'un, şot'oğoyal oç̌ali paya Kənanaxun tadanan».
31Gade q'a Ruveni nəsiləxun bakalt'oğon pit'un: «Barta Q'ončuğon me vi k'ulurxo əmirbi k'inək'q'an baki. 32Yan oqe t'e tərəf bakala Kənan oç̌ala taśi Q'ončuğoy s'iyen davabalyan, yax koft'ala oç̌ali paya isə memiin, İordan oqe me tərəfəxun tadalnu». #32:28-32 Yeş. 1:12-15
33Metərluğen, Moiseyen emorluğoy padçağ Sixoni q'a Başani padçağ Oge kiin oq'a bakala bito oç̌alxo, içoğoy şəhərmoğoxun sagala Gade q'a Ruveni nəsiləxun bakalt'oğo saal İosifi ğar Menaşşeni nəsiləxun bakalt'oğone tadi. 34Gade nəsiləxun bakalt'oğon Divon, At'arot', Aroer, 35At'rot'-Şofa, Yazer, Yok'bohan, 36Bet'nimra saal Bet'haran uk'ala şəhərmoğo, iz hərrəmine bakala barina təzədən biq'i içoğoy heyvanxoynak'al ağılxot'un düzbi. 37Ruveni nəsiləxun bakalt'oğon isə Xeşbon, Eleale, Giryat'ayim, 38Nevo saal Baal-Meon uk'ala şəhərmoğoy hərrəminət'un təzədən biq'i. Nevo saal Baal-Meon şəhərmoğoy s'iyurxoval badalt'unbi. Şot'oğon Sivma şəhərəl təzədən bit'unq'i. Metərluğen, bito me təzədən biq'eśi şəhərmoğoy s'iyurxo badalt'unbsay.
39Menaşşeni ğar Maxiri nəsiləxun bakalorox isə Gileadat'un baśi. Şot'oğon t'e oç̌ala kiyel badi t'iya bakala emorluğo şəp't'unśi. 40Hametər, Moiseyen Gileada Menaşşeni ğar Maxiri nəsiləxun bakalt'oğo tanedi, şoroxal baśi t'iya art'unśi. 41Menaşşeni nəsiləxun bakala Yairen miya sa hema ayizal ext'i şot'oğo "Yairi ayizmux" s'ine tadi. 42Novaxen isə Qenat şəhərəne izi hərrəmine bakala ayizmoğoxun sagala ext'i şot'o iz s'iya, yəni "Novax" s'i tadi.
Currently Selected:
Ams'i oç̌ala 32: udi
Highlight
Copy
Compare
Share
Want to have your highlights saved across all your devices? Sign up or sign in
© Translation Services International Ltd.
